Otse kwa Aba Amaan Jisɔs
2
1 Ko okpe nwo ovaar kwi ididen Ɔgɔstusa ɔnang ɛmang abɛ aba awug ɔnang kwidede kwu unɨng kɔ ɔyagbɨn kwa Rom. 2 (Muma wɔ ode ɛnang wuga etseden tsɛ ko okpe kwu Kwirinus ɔdaw Sirya.) 3 Ɔnang kwidede opfona ko ofon kwɔ ɔmman aba ta wug-ɛ. 4 Josɛf ɔttara ubɨna Nazarɛt kwu Galili opfona Bɛtɛlɛhɛm ko ofon kwu Devid kwu Judiya ukwurabɛ ɛma ubɨn ke efona tsi Devid. 5 Ubɨn ɔttara Meri umɨna kwɛ, kwɛ ɛfar kɛ ɛbara aba ta kɛr ntse rabɛ. 6 Sa aba anɨng muma, okpe kwu Meri mɔ ɔmaan okwo wem, 7 Ɔmaan otseden nwa kwɛ, unwa udwunɨng. Ɔfar-ɛ kɔ ɔvara, ɔtag-ɛ oto tsog gi ikwukwu sa abɛna anang nten utsatɔg, ukwurabɛ ɛwang gɔ ɔtsɔm kwa anang ana yam aba ayɨma kede. 8 Akker-nvu aba rɨg ki imɨn abanga ma Bɛtɛlɛhem kɔ ɔwang kwa abɛna ker nvu rabe kirɨng. 9 Ɔtɔmɔtɔm kwu Ubɨnɔkpaabyi uyɨn obe, owonidi kwu Ubɨnɔkpaabyi ɔnna muma kɔ ɔwang ngwo ibɨng, ozora ussi bɛ. 10 Ɔtɔmɔtɔm kwu Ubɨnɔkpaabyi oben bɛ abɛ, “Ozora ɔnang banga ussi, ntɨm ekkawa zuwa ntsen banga kwɛmɛ ɛnang ɔnang kwidede olew. 11 Tsemma ko ofon kwu Devid, abɛ kɔ Ɔkkana amana, Kraisb kwode Ovaar. 12 Ker ɛkɔga sa abanga ma tɨma asonga; abanga ma se unwa kwa aba far-ɛ kɔ ɔvara aba arɨr-ɛ ki ikwukwu sa abɛ na ake utsatɔg pfu nten.”13 Sɔ ɔnɔ tɔnga ma, atɔmɔtɔm pu Ubɨnokpaabyi sawada ɛkwɛ tara ɔtɔmɔtɔm kwu Ubɨnɔkpaabyi nwo aba na tsona Ubɨnɔkpaabyi abɛ:
14 “Abarada ade pu Ubɨnɔkpaabyi ga kɛ ɛrang,
ɔttara ki iseg ɔkkpakpa dɨr unɨnga ɔttara anang pu Ubɨnɔkpaabyi olew abubɛ.”
15 Okpe kwa atɔmɔtɔm pu Ubɨnɔkpaabyi ammang awana ga kɛ ɛrang, akker-nvu mbo aben ayok abɛ “Amana anta Bɛtɛlɛhɛm anta se udɨg ngwa kwa kwɛ ku uyɨna kwɔ Ɔvaar ka amana ussa ansonga.”
16 Aba dwuga aba pfona, aba ase Meri ɔttara Josɛf ɔttara ku unwa nwo su uyɨm ga ki ikwukwu sa abɛ na ke utsatɔg pfu nten. 17 Sa aba ku unwa nwo asa aba ateg ɔnang kwidede udɨg kwa kwɛ kuyɨna ɔttara otse kwa atɔmɔtɔm pu Ubɨnɔkpaabyi ka aba atega ɔbanga unwa nwo. 18 Anang mbo ibɨng pa aba awanga idɨg ndo ra akker-nvu ateg bɛ, arɛ ikkon bɛ. 19 Meri ɔtaga idɨg ndo ibɨng oke ke ettem ɔttara ɔtan ntana ɔbanga ma. 20 Akker-nvu mbo aba manga ata ker nvu ra abɛ, aba anang abarada ɔttara atsona Ubɨnɔkpaabyi ki idɨg ra abɛ awang ɔttara aba se, otse kwa aba ateg bɛ.
21 Sɔ ɔgba ngwu ɔsɔttan, se kobenga kwa abɛma kpar-ɛ ɛkpatwar, aba kpɛ Jisɔs etse nzo sɔ ɔtɔmɔtɔm kwu Ubɨnɔkpaabyi ukpɛ-ɛ prɛ aba tɨm-ɛ ki ifar.
Aba Atima Jisɔs Aba kwu kɔ Ɔtsɔm kwa Atɨm
22 Si ngwu ndo ri Meri modo ɛma oyen uwurc otse kwi inyɨna tsɛ Mosis ɛtɔng kɨmgba, Josɛf ɔttara Meri aba ataga Jisɔs pfona ga Jɛrusɛlɛm aba ata akɔga Ɔvaar, 23 otse kwa aba kɛr ki inyɨna tsɔ Ɔvaar abɛ, “Otseden nwa kwidede kwo ode udwunɨng, aba ataga nang Ɔvaar.” 24 Ɔttara aba fɔn ɛzza tse etor ki inyɨna tsɔ Ɔvaar abɛ “Aba atɨma akpowuga affa, odese enede, aba atɨma adugbɛnya va affa”. 25 Ko okpe ngwo ɔkam udwunɨng wan kwo okpen Simiɔn, urɨg ma Jɛrusɛlɛm, ode ɔnang kwu uwuruwur ɔttara ono tsog inyɨna su Ubɨnɔkpaabyi, unu tɨg igwu so ofog-nttem kwi Izɨrɛl mu ukwu. Ɔkpakpa kwu Ubɨnɔkpaabyi unɨnga abɛ. 26 Ɔkpakpa kwu Ubɨnɔkpaabyi kɛ otega abɛ moppe pɛrɛ ose Ɔvaar, Krais. 27 Ɔkpakpa kwu Ubɨnɔkpaabyi utɨm-ɛ opfona ga kɔ ɔtsɔm kwa atɨm kwu Ubɨnɔkpaabyi. Okpe kwu Josɛf ɔttara Meri aba atɨm unwa nwo Jisɔs aba nwa ga ke etanga aba assi otse kwɔ ɔmmana dɨg kwi Inyɨna tsɛ Mosis, 28 Simiɔn ɔtaga unwa nwo Jisɔs utɨma kɔ ɔbɔg, otsona Ubɨnɔkpaabyi abɛ,
29 “Ɔvaar, ka assa otse kwa aben,
temɔbɔg nfpona ki idɨra.
30 Atsen pam kɛ ɛkkana tsɔ isa,
31 sa addo atsog anang pɔ ibɨng aba ase:
32 Iyansa ra akɔg anang pana Izɨrɛl na bɨna,
ɔttara abarada pa anang anang pɔ Izɨrɛl.”
33 Otte ɔttara kɔ ɔkka okkon bɛ ki idɨg rɔ ɔtɔng ɔbanga Jisɔs. 34 Simiɔn ɔshɛ bɛ ishɛ, oben Meri ɔkkakwe abɛ, “Unwa nwa Ubɨnɔkpaabyi wɔ oreng-ɛ abɛ ussi anang ban aba annanga ɔttara anang ban atto ma ki Izɨrɛl. Ɛma wɔ ode ekɔga su Ubɨnɔkpaabyi. Anang na tɔng ipyuwa anang-ɛ, 35 fasɛ ɔjaag ntana ri inɨng bɛ kɨ nttem. Irem ni sɔ ke ettem dambɛ ogge wu kumɔ uyɨn ki innam ɔttara.”
36 Ɔkam ukwanɨng wan kwɔno oteg ɛkkawa tsu Ubɨnɔkpaabyi, kwo okpen Anna, unwa kwu Fanuɛl kwu ubɨn ke effona tsa Asha. Anna kɔ ɔtama; ku udɨm ɔba ki itso isenaffa pɛrɛ udɨm oppe urɨg-ɛ. 37 Unɨng epokwa tarr kowema itso arraw anebɨng ukuma anebɨng. Anna ɔtsɔm kwa atɨm kwu Ubɨnɔkpaabyi kunu bɨna urɨg. Ono kpowa Ubɨnɔkpaabyi ki irɨng ɔttara kɛ ɛya, okwo afufɛ ɔttara ka atɨm zɔma. 38 Ukwu muma ko okpe ngwo kwu Simiɔn ɔnɔ ɔtɔnga ɔnang Meri ɔttara Josɛf, usɨma Ubɨnɔkpaabyi ɔttara ɔtɔnga idɨg ɔbanga unwa nwo, oteg anang pana tɨg ɛnaanga tsɛ Jɛrusɛlɛm.
39 Okpe kwu Josɛf ɔttara Meri aba ki idɨg ndo ri Inyɨna tsɔ Ɔvaar oben abɛ aba assi, assa ibɨng aba manga pfona ga Galili ko ofon kwa abɛ Nazarɛt. 40 Unwa nwo okpom, ɔkpɔg kɛ ɛkpakpa; esonga ɛnwɛ ɔttara ɔsham pfu Ubɨnɔkpaabyi unɨng abe.
Jisɔs ke Ɛvava Ɔnwa kɔ Ɔtsɔm kwa Atɨm
41 Utso kwidede otte ɔttara kɔ ɔkka aba nata Jɛrusɛlɛm aba ata assi Elowa tse Ezega.d 42 Okpe kwu Jisɔs owem itso zowaffae aba ayɨn elowa nzo otse kwa abɛ nassi. 43 Se elowa nzo kɛ ɛra, so otte ɔttara ɔkka aba na pfona ko oter, Jisɔs okponga unɨnga ga Jɛrusɛlɛm, otte ɔttara kɔ ɔkka fɨna songa. 44 Aba atan abɛ ɔttar bɛ mma, aba senga osenga ngwo ki igwu. Aba titso aror-ɛ ma ka anang pa abɛ ɔttara ka ayog. 45 Masa aba nɛkɛnasa aba manga innam ga Jɛrusɛlem aba ta ror-ɛ. 46 Si ngwu nttan nseng aba ta se-ɛ ga kɔ ɔtsɔm kwa atɨm kwu Ubɨnɔkpaabyi, unɨng ɛyɛr ga ɔttara ka akpew-nnwer, ɔnɔ kɔm bɛ ɔttara ɔbɔw bɛ idɨk. 47 Ɔnang kwidede kwɔ ɔwang-ɛ okkon-ɛ otse kwi idɨg ini tan-ɛ ɔttara otse kwɔ ɔnɔ ɔpɔn bɛ. 48 Okpe kwo otte ɔttara kɔ ɔkka aba ase-ɛ, okkon bɛ. Ɔkka oben-ɛ abɛ, “Unwa kwam, odeyan kwa assi mana otse ngwa? Atte ɔttara ka amma ka amana udɨg ɔyaga, ana rorɔ.”
49 “Bugudɨk gwɔ kwa abanga na ror-m, abanga na songa abɛ amma nɨnɨng kɔ ɔtsɔm kwo Otte kwam?” Jisɔs ɔbɔw bɛ. 50 Akwɛ bɛ no ogwonga udɨg kwu Jisɔs ɔtɔnga abubɛ.