Yaguba la Ala mu mɔ kantalá le la
46
Kora la deŋɛnu la beete do le ka,
beeti bɔɔlanu la kuntige ye,
a ni bɔɔ den museren kulɛ la.
2 Ala le mu mɔ kantalá la,
anun mɔ sɛnbɛ;
wagate bɛ ale le mu mɔ dɛmanná la ɲamɔɛ wagate.
3 Wo butɔ,
hali duge sɛrɛnta,
hali kɔnkɛnu boeta ba butɔ le,
mɔ te kilan.
4 Hali mɔrɔŋɛnu wuruntunta anu kanpata,
hali kɔnkɛnu tagata lamaga wo wuruntuŋɛ la,
mɔ te kilan.
I sulen.
5 Kɔɛɛ do be ɲɔ,
min boliŋɛnu be Ala la saa lasɛɛwala,
ale saa min be maren Ala la dula saniyandeŋɛ la,
Ala min mayɛlɛta.
6 Ala be wo saa tɔ,
min te naa lamaga.
Ka fɔlɔ ɲɔlakɛnɛ fɛ han wo ɲatɔ,
Ala si anu dɛman.
7 Sii gbɛtɛnu be sɔnkɔsɔnkɔla,
mansayanu bata mamaga.
Wo tɛmuɛ le,
Ala ka a kulɛ labɔɔ,
limaniya bɔɔta dunuya bɛ bolo.
8 Alatala dalifeŋɛ bɛ da Mansa be mɔ fɛ;
Yaguba la Ala mu mɔ kantalá le la.
I sulen.
9 Wo na,
wo ni Alatala la walenu fɛlɛ;
a bata kabanakoe minnu ma dunuya.
10 Ale le be kɛlɛnu banna han dunuya daŋɛ tɔ.
A ni kalanu kati,
a ni tanbanu kuntu,
a ni kɛlɛmalanu la nɛgɛ leefanu bintan.
11 A ko:
«Wo wo lakara,
wo ni a lɔn nde le mu Ala la.
N na nɔɛ be dunuya bɛ kunma,
n na nɔɛ be see bɛ kunma.»
12 Alatala dalifeŋɛ bɛ da Mansa be mɔ fɛ;
Yaguba la Ala mu mɔ kantalá le la.
I sulen.