Mansa la musu jiga
45
Kora la deŋɛnu la mɔgɔ lakaran beete do le ka,
beeti bɔɔlanu la kuntige ye.
A ni a bɔɔ iko beete min tɔgɔ:
«Feere ɲinmanu.»
Kanunteya beete.
2 N be beete bɔɔla mansa ye,
kuma ɲinmanu bata n juse lafa han ka bɔn.
N nɛŋɛ be toren iko sɛbɛri malá la kala.
3 I ɲiɲata adamadeŋɛ bɛ ko,
i nɛŋɛ lafulenta kuma dula.
Sikkɛ bele a tɔ,
Ala bata barikɛ sa i la ko tɔ tɛmuɛ bɛ.
4 Mansa sɛnbɛma le mu i la,
Awa,
i ni i la faŋɛ kiti i tɛ ma,
i la kunnawule nun i la biliya ni lɔn.
5 I ni yɛlɛ i la soee kanna,
i ni taga i la biliya fɛ.
I ni taga tɔɲa,
kinikinɛ,
anun teleŋɛ la ko la.
I ni ko banbanu ma i bolo sɛnbɛma la.
6 I la ndakanu da dumɛnta;
anu si na i jaguenu sondoŋɛ sɔgɔ.
Seenu si boe i kɛn kɔtɔ.
7 Ala,
i la mansa tintiŋɛ si mɛ le abada!
teleŋɛ le be maren i la mansaya tɔnkuma la.
8 I be ko ɲinma kanuren,
i be ko koroŋɛ kɔnden.
Wolo be a maren,
ile Marige,
i Marige Ala bata i masubɛ ka tule bɔn i kuŋɛ ma sɛɛwa butɔ,
a ka i ma fisamante la ka tanbi i kafuɲɔgɛnu bɛ la.
9 Labundɛ kuɲɛ diyamanu be i la kutanu bɛ ma,
labundɛ min be ɲiɲaren miri nun kasiya lɔgɔ je anun alowɛ yanba la.
Muradilanu be i la koori boŋɛ ɲinma le tɔ,
anu be basirifeŋɛ botegela i lasɛɛwa koe la.
10 Mansa la den musereŋɛnu be i kɛnna.
I la muse be i bolo ɲinma tɔ;
a be makitiren sanu ɲinma le la.
11 Ile jonba,
i tolomasɔ n na den musereŋɛ!
Ɲina i bɔnsɛnu nun i baabadɔndɛnu ma.
12 I la ko kɛɲa ni mansa hɛnɛ koola.
I ni i majigi a ye,
ale le be maren i marige la.
13 Ti iri dugu mɔgɛnu si naa kɔrifeŋɛnu dii i ma;
bannanu si na i biliya.
14 Mansa la den musereŋɛ le ka,
a be donna muradi boŋɛ butɔ,
a be kuta ɲinma donden,
sanuɛ be min ma.
15 Anu be jonba donila mansa bata,
a be a la kuta maɲɛgɛndeŋɛnu lajigiren a ma.
A kafuɲɔgɛnu be sɔren a kɔma,
ka a masɔ mansa bata.
16 Anu don tɛmuɛ ɲɔ,
mɔgɛnu bɛ be ɲagalinden,
anu be sɛɛwaren.
17 Ee mansa,
i benbanu tota ki min na,
i la deŋɛnu tugun si naa to ɲɔgɔnna,
i ni anu ma mansanu la dunuya bɛ tɔ.
18 N be ile mala tɔgɔ tige le la kudai.
Bɔnsɛ bɛ si na i tantu le abada.