Yonatan na Dauda kunmafɔɛ a baaba ye
19
Sayulu kumata a la den kayireŋɛ Yonatan ye, anun a la walilanu bɛ, aa anu ni Dauda faga. Kɔnɔ, Dauda di Yonatan ye koola. 2 Awa, Yonatan tagata wo koe ɲamakaran Dauda ye, a ko: «N baaba be katala i faga koe la. I hakkili to i yɛtɛ ma. Sinan saguma, i si to kan do, i ni dogon. 3 Nde tugun si bɔɔ le, n ni sɔ n baaba sɔngɔ i be dogonden ka min mafanna saa kɔma, n ni i la ko kuma fɔ n baaba ye, n si a fɛlɛ ka n si nɔ a lɔnna a be min miraren i la ko tɔ. Wo kɔma, n si a ɲamakaran i ye.»
4 Yonatan naata na Dauda kunmafɔ a baaba Sayulu ye. A ko: «Mansa, yandi, i kana junube sɔtɔ i la walilá Dauda la, bayi a bele fenfen maren i la, fɔ a ɲan to be ko ɲinma le tun maren i ye. 5 A diɲɛta le a nɛɛ ma, a ka wo Filisiti kaa Jaluta faga, Alatala ka Isirayila bɛ lafulen fuleŋɛ banba la. I ka wo yen de, i ɲagalinta. I be diren junube mala fenna i ni mɔgɛ base labɔɔ min bele koko koron maren? I be tɔɲa le tɔ Dauda faga koe la ɲɔgɔnna tun ba?» 6 Sayulu ka a la den Yonatan kulɛ lamɔɛ a ɲinma la, a ka a kali, a ko: «N bata lahire jigan Alatala ɲala, Ala min be baluren, n ko Dauda te faga!» 7 Wo kɔma, Yonatan ka Dauda kele a ka wo kumanu bɛ ɲamakaran a ye. A ka Dauda doni Sayulu dula, Dauda mɛn ka a la wali kɔtɛ bita, a fɔlɛ be min mala nun Sayulu bolo.
Mikali la Dauda latanga koe faga ma
8 Kɛlɛ mɛn tawulita Isirayila kaanu nun Filisiti kaanu tɛma. Lun do, Dauda tagata Filisiti kaanu kɛlɛ, a ka anu kasara a banba la han anu borita. 9 Wo butɔ, wo hakkili koroŋɛ min be fatanden Alatala la, a mɛn tanata Sayulu ma. Sayulu be sigiren a bata, tanba be bitaren a bolo. Wo ka a taran, Dauda be a la kɔra botegela. 10 Sayulu ka a la tanba fili Dauda ma, a katata a ni a banban bon koloŋɛ ma. Dauda bɔɔta a kɔtɔ, Sayulu la tanba banbanta bon koloŋɛ ma. Dauda borita, a ka a kun bɔɔ faga bolo wo sue tɔ.
11 Sayulu ka mɔgɛnu lasanba, anu ni Dauda bata kanta, alako anu ni a faga saguma. Kɔnɔ Dauda la muse Mikali ka a lasogi, a ko: «Ka i ma i bori yan bi sue, ɲɔ be kɛnɛla i fagareŋɛ le ma.» 12 Mikali ka a lajigi wundare la, Dauda borita. A ka a kun bɔɔ ɲɔgɔnna le. 13 Mikali ka kuye lɔgɔ malasɛreŋɛ jigan, a ka a sa benbe tɔ, a ka a butin kuta la, a ka baa bole sa a kun sa dula mafanna. 14 Sayulu to ka kiilanu lasanba Dauda jigandula, a la muse ka a fɔ, a ko: «A bele kendeyaren.» 15 Sayulu to ka wo mɔɛ, a mɛn ka kiilanu lasanba anu ni taga Dauda yen anu ɲala, a ko: «Wo taga a jigan a la benbe tɔ, wo ni a nati n ɲɛ, n ni a faga.» 16 Kiilanu to nata, anu ka a taran kuye lɔgɔ malasɛreŋɛ le be benbe tɔ, baa bole be saren kun sa dula mafanna. 17 Wo butɔ, Sayulu ka a fɔ Mikali ye, a ko: «I bata a to n jague ni a kun bɔɔ! I be n majuguyaren fenna?» Mikali ka a jaabi, a ko: «A ka a fɔ n ɲɛ le, aa ka n ma a to a ni taga, a si n faga le.»
Dauda la bore tagala Samiyɛli bata
18 Dauda ka a kun bɔɔ, a borita, a tagata Samiyɛli dula Rama saa tɔ. Sayulu ka min ma a la, a ka a bɛ fɔ a ye. Ale nun Samiyɛli tagata Nayɔti, anu tota ɲɔ. 19 Anu tagata wo koe fɔ Sayulu ye, ka a fɔla Dauda be Nayɔti, dula min be Rama saa tɔ. 20 Sayulu ka kiilanu boloka, anu ni taga Dauda jigan. Wonu ka nabiyonmɛ gale do taran, Samiyɛli be sɔren anu ɲatɔ, anu be Ala la kiila lakela. Ala hakkile jigita Sayulu la kiilanu ma, ande tugun bakkuta Ala la kiila lakela. 21 Mɔgɔ donu tagata wo fɔ Sayulu ye. A ka kiilá donu tugun nasanba, wonu tugun to keta ɲɔ, anu bakkuta Ala la kiila lakela. A mɛn ka kiila sabaɲɔgɛnu tugun nasanba, wonu tugun ka a ma iko doenu.
22 Sayulu yɛtɛ naata na taga Rama. A to keta Seku saa tɔ, ji dinka belebele be ka min na, a ka ɲininkare ma, a ko: «Samiyɛli nun Dauda be mina le?» Anu ka a fɔ a ye, aa anu be Nayɔti, Rama saa tɔ. 23 A ka a kun sɔ ɲɔla ye. A be kila tɔ, Ala hakkile jigita ale tugun ma. A be tagala a be Ala la kiila lakela, han a tagata ke Nayɔti, Rama saa tɔ. 24 Ale tugun ka doroke layɛlɛ a ma, a tota Ala la kiila lakela Samiyɛli ɲala ɲɔ. Wo kɔma, a boeta a bali makoloŋɛ la. A ka wo teleŋɛ nun sue bɛ latanbi ɲɔgɔnna le. Wolo mu anu be kɛnɛ kɛ taale fɔla: «Sayulu tugun be nabiyonmɛnu le ɲaama ba?»