Yonatan nun Dauda la lahire
20
Dauda borita ka bɔɔ Nayɔti, dula min be Rama saa tɔ. A tagata Yonatan bata, a ka a maɲininka, a ko: «N be fen de maren? N na tiɲare mu fen de la? N ka fen de ma i baaba la, a to be diren n nɛɛ bɔɔla?» 2 Yonatan ka a jaabi, a ko: «Ade! I te faga. N baaba te fenfen ma a ni to a ma min fɔ n ɲɛ, a mata ko lanma la ba, a mata ko banba la ba. Fenna a si naa kɛ kan dogon n na? A te wo ma!» 3 Dauda ka a kali, a ko: «I baaba ka a lɔn a ɲinma la ka a fɔla n na ko bata diya i ye. A be a fɔla le a fan ma, i kana lɔn sɔtɔ kɛ ma, ka wo ma a si i tɔɔrɔ le. Kɔnɔ, n bata n kali Alatala la, Ala min be baluren, anun ile la ko la, n ko nde nun faga tɛma yo ma yanfa ɲɔgɔn na bitugun.»4 Yonatan ka a fɔ Dauda ye: «Awa, i be diren fen de ye n si min ma i ye?» 5 Dauda ko: «I ka a lɔn, sinan kari nama sale le mu, n bɛnta majigila mansa kɛnna dɔmɔre ma wagate. A to n ni taga, n ni dogon saa kɔma, han a tele saba luŋɛ wura la. 6 Ka i baaba ka i maɲininka n na ko la, i ni a fɔ a ye, aa n ka i madiya le alako i ni a to n ni taga teriya la mɔ bata Betilɛmu saa tɔ, aa sarika bɔɔnɛŋɛ be mɔ gabila bolo, anu be min bɔɔla san yo san. 7 Ka a ka a fɔ, wo kaɲin, wo be a fɔren de jususa be n ɲɛ, nde i la joŋɛ. Kɔnɔ ka a tagata dumɛn, i si a lɔn wolo la ka a fɔla a be ko koroŋɛ yati le nataren n mafanna. 8 Kɔtɛ yandi, i la hanige ɲinmaya yita n na, bayi i bata ile nun nde i la joŋɛ ladon lahire tɔ Alatala ɲala. Fenna i be n donila i baaba dula? Awa, ka n be tiɲare do le maren, ile yati ni n faga!»
9 Yonatan ka a fɔ a ye: «I kana a mira ka a fɔla n baaba be ko koroŋɛ min nataren i ye, ka n tagata lɔn sɔtɔ a ma n si to n ma a fɔ i ye.» 10 Dauda ka a fɔ Yonatan ye, a ko: «Ka i baaba nata i jaabi kuma bɛlɛma la go, ɲɔmɔ le be n nalɔnna yan?» 11 Awa, Yonatan ka a fɔ Dauda ye: «Mɔ bɔɔ yan, mɔ ni taga saa kɔma.» Anu fila bɛ tagata saa kɔma. 12 Yonatan ka a fɔ Dauda ye, a ko: «N nun Alatala tɛma, bani Isirayila Marige Ala, mɔ be wagate min tɔ ka, ka bɔɔ sinan han sinankɔ kɛ wagati ɲɔgɔn, wo si a taran de n bata n baaba jusu butɔ koe tefi. Ka a si bɛn i ye, n tota n ma kiilá kii i lalɔn koe la, 13 Alatala ni ɲagankata koroŋɛ sigi n ma. Ka a kaɲin n baaba ye a ni ko koroŋɛ le ma i la, n mɛn si i lalɔn de. Wo wagate, n si a to le, i ni taga jususa tɔ, Alatala ni to i fɛ, iko a be n baaba fɛ ki min na nun. 14 Ɲatɔ, ka a taranta n be balue tɔ wo tuma, i ni n bita Alatala la hanige ɲinmaya la, alako n kana faga. 15 Yandi, Dauda, hali Alatala tagata i jaguenu bɔɔ kɛ dunuya bangu munge kunma, kɔnɔ i kana i la jusu ɲinmaya kan dan n na juruya ye kudai.» 16 Awa, Yonatan ka lahire kiti a nun Dauda juruya tɛma, a ko: «Alatala ni Dauda tɛŋɛ yɔgɔ a jaguenu ma.» 17 Yonatan mɛn ka Dauda lakali a la kanunteya la ko la, bayi a ka a kanu le iko a yɛtɛ yati.
18 Yonatan ka a fɔ a ye, a ko: «Sinan de mu kari nama sale la. Anu si i la ko lakɔrɔsi ka a fɔla i bele ɲɔ, bayi i sigidula be tola le a tɛsɛn. 19 A tele saba luŋɛ, i be tagala han i dogon dula kɔtɛ tɔ le pon, i ni taga to Ɛsɛli kure kɔma ɲɔ. 20 N si taga ɲɔ n ni ndaka saba fili wo kure mafanna, iko n be fondo le bunna. 21 Wo kɔma, n si kamarendeŋɛ kii le a ni taga anu kɔma. Ka n ka a fɔ a ye: ‹I ɲa sɔ, ndakanu ɲan bele yanfayaren, i ni anu jigan›, awa wo be a fɔren de i si nɔ nala, i juse ni sa, fenfen bele. N be a fɔla Alatala le ɲala, Ala min be baluren! 22 Kɔnɔ ka n ka a fɔ kamarendeŋɛ ye, n ko: ‹Ndakanu le wo la i kɔma kala›, awa taga, Alatala le be diren i ni taga. 23 Mɔ fila bɛn kuma le wo la. Alatala le be mɔ fila tɛma kudai.»
24 Wo butɔ, Dauda tagata dogon saa kɔma.
Sayulu dumɛn koe Yonatan ma Dauda la ko la
Kari nama sale to keta, mansa ka a majigi sale luŋɛ ɲagaɲaga tɛma, a ni a daɲini. 25 Mansa to ka a majigi a la tintiŋɛ tɔ, a be dariren sigila ka min na, bon koloŋɛ ma, Yonatan wulita. Abineri sigita Sayulu kɛnna, kɔnɔ Dauda sigidula kan tota a tɛsɛn. 26 Sayulu ma fenfen fɔ wo lun, bayi ale ye, tumado Dauda be kɔ́sɛ́ do le tɔ, a bele saniyanden de, wolo mu. 27 Wo tabantaka, sale tele fila luŋɛ, Dauda sigidula mɛn be toren a tɛsɛn. Sayulu ka Yonatan maɲininka, a ko: «N na den Yonatan, bɔ, fende Jese la den kayireŋɛ ma na a daɲinidula kunun anun bi?» 28 Yonatan ka Sayulu jaabi, a ko: «Dauda ka n madiya le, aa n ni a to a ni taga Betilɛmu. 29 A ka a fɔ, a ko: ‹Yandi, a to n ni taga, bayi sarika bɔɔ nɛŋɛ do le be n bata saa tɔ, gabila nɛŋɛ. N kɔtɔ ka a fɔ n ɲɛ aa n ni taga. Ka n na ko di i ye, a to n ni taga teriya la, n ni n kɔtɔnu yen.› Awa mansa, wolo ka a ma, a ma bɛn i la daɲini koe ma.»
30 Awa, Sayulu dumɛnta a la den Yonatan ma, a ka a fɔ a ye: «Ile den murutɛreŋɛ, a be toren i ye, aa n ma a lɔn, ka a fɔla i bata to Jese la deŋɛ ye. A be mala i ye maluya le la, i nun i nɛɛnɛ! 31 I tolomasɔ: fanni Jese la deŋɛ be baluren, ile te naa sabati i la mansaya tɔ. Kɔtɛ, kiilanu kii ka taga a nati, bayi tekku le fɔ a ni faga.» 32 Yonatan ka a baaba Sayulu jaabi, a ko: «Bɔ, a be fagala fenna? A be fen de maren?» 33 Wo butɔ, Sayulu ka a la tanba fili a la deŋɛ ma, a ni a sɔgɔ. Awa, Yonatan bata a lɔn, a baaba be diren Dauda fagala le yati. 34 A wulita teebile tɔ a dumɛndeŋɛ la, a ma sɔn a daɲinila bitugun wo kari nama sale tele fila luŋɛ tɔɛ la. A juse bele diyaren a ye Dauda la ko la, a baaba to ka malajarabi kuma fɔ.
Yonatan na Dauda lalɔn koe a baaba la natá koroŋɛ la
35 Wo tabantaka saguma, Yonatan tagata saa kɔma, ale nun Dauda bɛnta ka min ma, denden lanma do be Yonatan jokkiren. 36 A ka a fɔ a ye, a ko: «I ni taga ndakanu matɔnbɔn n be naala minnu filila.» Dendeŋɛ fɔlɔta borila ki min na, Yonatan ka ndakanu fili a ɲatɔ ɲagama butɔ. 37 Dendeŋɛ to keta ndaka dula Yonatan ka min fili, Yonatan ka a kulɛ mayɛlɛ a kɔma, a ko: «Ile, ndaka ma yanfa ɲɔ la ba?» 38 A mɛn ka a kulɛ mayɛlɛ a ma, a ko: «Teriya, i kana sɔ de!» Awa, Yonatan na dendeŋɛ ka ndakanu matɔnbɔn, a ka anu nati a tige ye. 39 Dendeŋɛ kan bele fenfen lɔnden, Dauda nun Yonatan tun de be wo kuma butɔ lɔnden ɲɔgɔn ye. 40 Yonatan ka wo kɛlɛ mafeŋɛnu don dendeŋɛ bolo a nun min be ɲɔgɔnna, a ka a fɔ a ye: «Taga, anu doni saa tɔ.» 41 Dendeŋɛ to tagata, Dauda wulita, a bɔɔta a dogondula tɔ kure kɔma, a ka a ɲakɔtɔ majigi duge mafanna han a ka a tindɛ sɔ duge tɔ kunɲama saba. Kanuntema filanu naata milimili ɲɔgɔn ma, anu dita, a gbengbeŋɛ Dauda. 42 Awa, Yonatan ka a fɔ Dauda ye, a ko: «Mɔle fila to bata mɔ lakali Alatala tɔgɛ la, a fɔ koe la, Alatala ni to nde nun ile tɛma, a ni to n juruya nun i juruya tɛma kudai, wo kɔtɛ, taga jususa butɔ.»