Matabɛn koe Marige tana luŋɛ la ko la
5
N nɛɛnɛdɔndɛnu, kɛ koenu be nala mala tɛmuɛ nun wagate min yo tɔ, hali n ma kuma sɛbɛ a la ko la ka a lasanba wo ma. 2 Bayi wole yati ka a lɔn a ɲinma la, ka a fɔla Marige la lɔgɛ si na le iko kankante be nala sue tɔ ki min na. 3 Anu be a fɔla wagate min tɔ aa anu be jususa tɔ, anun hɛra tun, awa ɲagankata belebele si anu latɛrɛnna wo tɛmuɛ le kisanna, iko buuma muse den sɔtɔ bue tini wuli a la. Anu te tanga a ma feu. 4 Kɔnɔ wole n nɛɛnɛdɔndɛnu, wo to bele dibe tɔ, wolo mu, wo luŋɛ te naa wo latɛrɛnna iko kankante. 5 Wo bɛ be maren tele nun kɛnɛ la deŋɛnu le la. Sue nun dibe la deŋɛnu ma wo mɔ la. 6 Wo butɔ, wo mɔ kana kinnɔgɔ iko doenu, fɔ ka to mɔ ɲamakende la, wo mɔ ni mɔ yɛtɛ tabita. 7 Minnu bɛ be kinnɔgɔla, anu be kinnɔgɔla sue tɔ le. Minnu bɛ be siisila, anu be siisila sue tɔ le. 8 Kɔnɔ, wo mɔle minnu mu tele tɛn deŋɛnu la, wo mɔ ni mɔ yɛtɛ tabita. Wo mɔ ni dɛnkɛnɛya nun kanunteya lasabati. Wonu sɔdula si to le mɔ ye iko jusukun mabutinfeŋɛ sɔdula be tola kɛlɛ malá ye ki min na. Wo mɔ mɛn ni mɔ yigi sɔ kise la, wo yige le si mɔ latanga iko kɛlɛ malá la kun makantafeŋɛ. 9 Ala ma a lagiri wo mɔ ma, wo mɔ ni a la dumɛŋɛ sɔtɔ, fɔ kise sɔtɔ koe wo mɔ Marige Isa sabu la, Ala la mɔgɔ masubɛreŋɛ, 10 min fagata wo mɔ ye, alako wo mɔ si to Marige kɛnna abada, a mata mɔ kende la ba, a mata mɔ fagareŋɛ la ba. 11 Wolo mu, wo ni ɲɔgɔn nalimaniya, ka ɲɔgɔn sɛnbɛ sa iko wo be dariren a mala ki min na.Malase nun kɔntɔre tɔɛ
12 N nɛɛnɛdɔndɛnu, minnu be walila wo tɛma, anu be sɔren wo kunma ka wo kawandi Marige la ko la, n be wo madiyala wo ni wonu biliya. 13 Wo ni anu biliya koola kanunteya la anu la wo wale la ko la. Wo ni to jususa koe mala ɲɔgɔn ye. 14 N nɛɛnɛdɔndɛnu, mɔ mɛn bata wo madiya, wo ni fuyantenu lasii, wo ni limaniyabalenu lalimaniya, wo ni sɛnbɛbɔnɛnu dɛman, wo ni a lamuɲu bɛ ye. 15 Wo ni wo mɛnni koola, mɔgɔ yo kana ko koroŋɛ yɔgɔ ko koroŋɛ la. Wo ni to katala tɛmuɛ bɛ ka ko ɲinma le tun ma ɲɔgɔn ye, anun mɔgɛ bɛ ye. 16 Wo ni sɛɛwa tɛmuɛ bɛ. 17 Wo ni Ala mataran wagate bɛ tɔ. 18 Wo be koe min bɛ tɔ, wo ni Ala tantu, bayi Ala sagoe le mu wo la wo ye, wole minnu be toren a la mɔgɔ masubɛreŋɛ Isa kɔma. 19 Wo kana Ala Hakkili saniyandeŋɛ la ko ladufen. 20 Ka a taranta Ala be kuma do lajigila mɔgɔ do ma wo ɲaama a ni a fɔ, wo kana wo tolo bɛlɛya wo ma. 21 Wo ni koe bɛ mayegelen, min kaɲin wo ni wo bita sɔɔbɛ la. 22 Wo ni wo matanga ko koroŋɛ mɔɔle bɛ ma koe la. 23 Jususa tige Ala yɛtɛ ni wo lasaniyan a kɛɲa bɛ la. Wo butɔ, wo hakkile, wo nɛ anun wo bali bangue bɛ ni mandi kɔrɔsibaliya tɔ han wo mɔ Marige Isa Ala la mɔgɔ masubɛreŋɛ be tanala tɛmuɛ min tɔ. 24 Min be wo keleren, a si wo koe bɛ lakamali, bayi kuma dɔndɔ tige le mu a la.
25 N nɛɛnɛdɔndɛnu, wo ni Ala mataran mɔ ye.
26 Wo ni nɛɛnɛdɔndɛnu bɛ kɔntɔn ka ɲɔgɔn sunbu a saniyandeŋɛ la.
27 N bata wo lakali Marige la ko la, wo ni kɛ bataakɛ karan nɛɛnɛdɔndɔ ⸂saniyanbaganu⸃ bɛ ɲala.
28 Ala mu a mala mɔ Marige Isa, Ala la mɔgɔ masubɛreŋɛ la hinnɛ ni to wo fɛ. ⸂Amina.⸃