Pɔlu nun Baranabasi to koe Ikoni saa tɔ
14
Ikoni saa tɔ tugun, Pɔlu nun Baranabasi ka a ma ɲɔgɔnna le: anu donta Yahudenu la kawandi ma boŋɛ butɔ. Anu kumata a ɲinma la, han Yahudenu nun sii gbɛtɛ jama banba dɛnkɛnɛyata.
2 Kɔnɔ Yahude minnu balanta dɛnkɛnɛyala, wonu ka saa mɔgɛnu bu tadon minnu bele maren Yahudenu la, alako anu juse ni yɛlɛ dɛnkɛnɛyabaganu ma.
3 Hali wo bɛ to mata, Pɔlu nun Baranabasi ka tɛmu yanfama le ma ɲɔ. Anu be yigi saren Marige ma, anu be kumala limaniya la. Marige be kabanakoenu nun misalenu mala anu sabu la, wo butɔ, anu be kuma min nakela a la hinnɛnteya la ko tɔ, Marige be wo kuma seedeɲɔgɔya bɔɔla ɲɔgɔnna le.
4 Awa, saa butɔ mɔgɔ jama fatanta fila la: sɔngɔ dɔndɔ sɔta Yahudenu fɛ, sɔngɛ doe sɔta kiilanu fɛ.
5 Wo butɔ, Yahudenu anun anu la kuntigenu anun sii gbɛtɛ mɔgɛnu bɛnta a ma anu ni ko koroŋɛ ma Pɔlu nun Baranabasi la, anu ni anu mabun ka anu faga.
6 Bɔɔla Pɔlu nun Baranabasi ka wo mɔɛ, anu borita ka taga Likayoni duge, Lisitiri nun Deribe saanu tɔ anun wonu lamiliŋɛnu tɔ.
7 Anu tota kibaru ɲinma lakela ɲɔ.
Pɔlu mabun koe kure la Lisitiri
8 Kaye do taranta sigiren Lisitiri saa tɔ, sɛnbɛ bele a kɛŋɛnu tɔ. A mu namata la bɔɔla a sɔtɔ luŋɛ, a ma tagaman hali lun dɔndɔ.
9 Lun do, a ka Pɔlu mɔɛ kumala. Wo to ka a ɲanu banban a ma, a ka a yen a be dɛnkɛnɛyaren a ni kendeya,
10 wo butɔ, a ka a fɔ a kulɛ mayɛlɛreŋɛ la: «Wuli, i ni sɔ i kɛŋɛnu kunma!» A wulita kisanna, a tagamanta.
11 Jama to ka a yen Pɔlu ka min ma, anu ka anu kulɛ mayɛlɛ Likayoni kuma tɔ, anu ko: «Mɔ be kuyenu minnu batula, wonu bata falin mɔgɔ kɛɲa ma, ka jigi mɔ tɛma.»
12 Anu ka Baranabasi tɔgɔ sa anu la kuye Seyusi la, anu ka Pɔlu tɔgɔ sa anu la kuye Hɛrɛmɛ la, bayi ale le mu kuma matanbila la.
13 Wo tɛmuɛ, Seyusi min na batu boŋɛ be saa tatta kɔma dondula tɔ, wo la sarika lakela ka tuuranu nati saa bondanu mafanna, lɔgɔ feerenu be bakkuren wonu kaŋɛ la; ale nun jama be diren sarika bɔɔla Baranabasi nun Pɔlu ye.
14 Kiilanu Baranabasi nun Pɔlu to ka wo fahamu, anu ka anu la donfeŋɛnu mafara, anu borita mɔgɛnu tɛma, anu be belebelela,
15 anu ko: «Baabanu, wo be fen de maren ka? Mɔle tugun mu Adamadeŋɛnu le la, mɔ be toren iko wole. Mɔ be naren de mɔ ni kibaru ɲinma fɔ wo ye, ka a fɔla wo ni bɔɔ kɛ fufafu koenu kɔma, wo ni wo fan nasaagi Ala kisi tige ma,
min ka saŋɛ nun duge da
anun ba nun anu butɔ feŋɛ bɛ.a
16 Wagati tanbireŋɛnu tɔ, see bɛ minnu ma ma Yahudenu la, ale Ala ka wonu bɛ to ɲɔ anu ni anu yɛtɛ tɛn kilanu jokki.
17 Kɔnɔ hali wo bɛ butɔ, a ma gali seedeɲɔgɔya misalenu bɔɔla a la ko tɔ: a be ko ɲinma mala, a ni sangi je nun kifeŋɛ ɲiɲa wagatenu dii wo ma bɔɔla saŋɛ tɔ, a ni dɔmɛ dii wo ma, a mɛn ni wo lasɛɛwa wo juse tɔ.»
18 Hali Pɔlu nun Baranabasi to be kɛ kuma fɔla, karahan anu ka jama ladan alako anu kana sarika bɔɔ anu ye.
19 Kɔnɔ Yahudenu nata bɔɔla Antiyoki anun Ikoni saa tɔ, anu ka jama bu tadon han anu ka Pɔlu mabun a faga koe la. Wo kɔma anu ka a sabaa ka a labɔɔ saa butɔ, a be toren anu ye a bata faga.
20 Kɔnɔ talibenu to ka a lamilin, a wulita, a saagita saa tɔ. Wo tabantaka, ale nun Baranabasi tagata Deribe saa tɔ.
Sagi koe Antiyoki anu bata
21 Pɔlu nun Baranabasi to be Deribe saa tɔ, anu ka kibaru ɲinma lake, mɔgɔ siyama mata talibe la ɲɔ. Wo kɔma anu tasaagita Lisitiri nun Ikoni nun Antiyoki min be Pisidi duge tɔ.
22 Anu be talibenu lalimaniyala, ka anu lasii anu ni sabati dɛnkɛnɛya butɔ, anu be a fɔla anu ye: «Ka wo mɔ ma tɔɔrɛ siyama doni, wo mɔ te don Ala la mansabaya niiniŋɛ kɔtɔ.»
23 Dɛnkɛnɛyabaga kurun yo kurun, anu ka kuntigenu sɔ anu ye. Wo kɔma, anu ka súŋɛ́ nun Ala mataraŋɛ ma, anu mɛn ka wo kuntigenu taaku Marige la, anu dɛnkɛnɛyata min ma.
24 Awa, anu to ka Pisidi duge takuntu, anu donta Panfili duge tɔ.
25 Anu to ka Ala la kuma fɔ Perege saa tɔ, anu jigita Atali saa butɔ.
26 Anu bakkita kulun banba tɔ ɲɔ, anu saagita Antiyoki, anu ka anu taaku Ala la hinnɛnteya la ka min na nun kiilaya wale ma koe la, anu be bɔɔren min mala.
27 Anu la kereŋɛ ɲɔ, anu ka dɛnkɛnɛyabaga jama madɛn. Anu la madɛndeŋɛ, Ala ka koe minnu ma anu fɛ, a mɛn ka bonda laka sii gbɛtɛ mɔgɛnu ye wonu tugun si dɛnkɛnɛya ki min na, anu tota wo bɛ ɲamakaranna.
28 Anu nun ɲɔ talibenu mɛta ɲɔgɔn fɛ wagati yanfama.