Etiyɛn na jaabire
7
Sarika lakela kuntigi banba ka Etiyɛn maɲininka, a ko: «Min be fɔren i kunma, a be ɲɔgɔnna le ba?»
2 Etiyɛn ka a jaabi: «N nɛɛnɛdɔndɛnu nun n baabanu, wo tolomasɔ! Wo mɔ benba Iburahima to be Mesapotami jamanɛ tɔ, Ala nɔɔra tige bɔɔta le a ma, yannun a ni sabati Haran saa tɔ.
3 A ka a fɔ a ye, a ko: ‹Bɔɔ i la jamanɛ tɔ, i bareŋɛnu kunma, i ni na jamanɛ do tɔ n be ka min yitala i la.›
4 Wo butɔ, a bɔɔta Kalide kaanu la jamanɛ tɔ, a tagata sabati Haran saa tɔ. A baaba la fagareŋɛ kɔma, Ala ka a nati kɛ Kanana duge tɔ, wo be sabatiren ka min na kɔtɛ.
5 A ma dugu yo dii a ma kɛ jamanɛ tɔ, hali kɛn sɔ dula ɲɔgɔn. Kɔnɔ a ka lahire jigan de a ye aa a si naa kɛ duge dii le a ma a ni ma a tɛŋɛ la, ale nun a bɔnsɛ, hali a tanbi kɔma. Adun wo tɛmuɛ Iburahima ma den yo sɔtɔ betunna.
6 Wo kɔma, Ala kumata kaa le, a ko: ‹Iburahima bɔnsɛ si wagati do ma le luntanya la jamanɛ do tɔ. Wonu si anu ma joŋɛ la, anu ni anu ɲagankata san kɛmɛ naani kɔtɔ.
7 Kɔnɔ see min tini anu ma joŋɛ la, nde Ala si naa wo see makiiti le. Wo tanbi kɔma, anu si bɔɔ le ka naa n batu kɛ dula tɔ.›a
8 Awa, Ala ka lahire lakoti a nun Iburahima tɛma, sunna koe mata wo lahire seedeɲɔgɔya la. Wolo mu, a to ka Isiyaka sɔtɔ, a ka a sunna a la sɔtɛ tele sagin luŋɛ. Isiyaka ka a ma Yaguba tugun na ɲɔgɔnna le. Yaguba tugun ka a ma wo mɔ benba tan nun fila la ɲɔgɔnna le.
9 Wo kɔma, wo mɔ benbanu ka anu dɔgɛ Yusufu mayita bɛsɛnkɔnnɛya sabu la, a ni ma joŋɛ la Misira duge tɔ. Kɔnɔ Ala tota a fɛ.
10 Wo butɔ, a ka a bɔɔ a tɔɔrɔ koe bɛ tɔ. A ka a ma hakkilima la, a mɛn ka a la ko ladiya Firauna ye, Misira mansa. Wo ka a sɔ kɛnnasɔla la Misira jamanɛ kunma, a mɛn ka a ma a la boŋɛ butɔ kunma fɔla la.
11 Awa, kɔnkɔ fitina donta Misira nun Kanana jamanɛ fɛfɛ bɛ la, wo ka anu tɔɔrɔ a banba la. Wo mɔ benbanu bele fondo sɔtɔla anu si min dɔmɔ.
12 Yaguba la a mɔɛreŋɛ aa dɔmɛ be Misira, a ka wo mɔ benbanu kii ɲɔ a fɔlɛ la.
13 Anu to tagata a filaɲɔgɛ la, Yusufu ka a yɛtɛ labɔɔ a baabadɔndɛnu ma. Wo butɔ, Firauna naata na Yusufu bɔnsɛ lɔn.
14 Wo kɔma, Yusufu ka a baabadɔndɛnu kii, anu ni taga a baaba Yaguba nun a la denbaya bɛ kɔma, anu bɛ kɔnte labɛndeŋɛ mu mɔgɔ bi wɔrɔwila nun loolu le la.
15 Wo butɔ, Yaguba jigita Misira, a fagata ɲɔ, anun wo mɔ benbanu bɛ.
16 Anu ka anu furenu doni Sisɛmu, anu mandita ɲɔ, Iburahima la gaburudula tɔ, a ka min san kaalise la Hamori la deŋɛnu ma Sisɛmu saa tɔ.
17 Ala ka lahire min jigan Iburahima ye, wo kamali tuma to be sutuyala, bani Isirayila jama jiidita, anu siyata Misira duge tɔ,
18 han mansa nama do sɔta Misira duge tɔ, min ma Yusufu la ko lɔn.
19 Wo mansa ka janfa makiti wo mɔ see ye, a ka wo mɔ benbanu ɲagankata, han a ka anu yamɔri anu ni anu la bɔɔbɛnu lafili, alako anu ni faga.
20 Wo wagate le annabi Musa sɔtɔta; a majabuta Ala ye. Anu ka a dankun a baaba la boŋɛ tɔ kari saba.
21 A lafilita wagate min tɔ, Firauna la den musereŋɛ tagata a jigan, a ka a dankun iko a yɛtɛ la den kayireŋɛ.
22 Anu ka annabi Musa karan Misira kaanu la lɔnnɛ bɛ la. A la kuma nun a wali ɲa sɛnbɛ koloyata.
23 Musa la sɔtɛ san binaanɛ to kamalita, a bareŋɛnu bani Isirayila kaanu fɛlɛ sɔgɛ ka a juse bita.
24 A la tagareŋɛ, a ka Misira kaa do yen min be ko koroŋɛ mala bani Isirayila kaa do la. Wo butɔ, Musa ka a bareŋɛ la kɛlɛ ma Misira kaa be nɔya laboeren min ma: a ka wo tigi botege han a ka a faga.
25 A be a miraren de ka a fɔla, a bareŋɛnu si a fahamu Ala si naa anu lakisi ale la ko sabu la, kɔnɔ anu ma a fahamu.
26 Wo lun tabantaka, a ka bani Isirayila kaa fila taran kɛlɛla. A katata kɛlɛ ban koe la anu tɛma, a ko: ‹N nɛɛnɛdɔndɛnu, barenmanu ma wo la ba? Awa, fenna wo be ɲɔgɔn kɛlɛla?›
27 Kɔnɔ min ka kɛlɛ tɛgɛ a bareŋɛ ma, wo ka Musa latuntun, a ko: ‹Ɲɔmɔ le ɲan ka i sɔ mansa la kiiti sa koe la mɔ tɛma?
28 Ile be diren nde tugun fagala le ba, iko i ka Misira kaa faga ki min na kunun?›
29 Annabi Musa to ka wo kuma mɔɛ, a borita a tagata sabati luntanya la Madiyana jamanɛ tɔ. A ka den kayiren fila sɔtɔ ɲɔ.
30 San bi naani mɛn to kamalita wagate min tɔ, maleka bɔɔta Musa ma kɛnɛ tɔ, a be ta mɛlɛŋɛ tɔ bapɛ do tɛma janfue tɔ, Turisinina kɔnkɛ tɔ.
31 Musa to ka wo laamute yen, a kaabɛta. A be a madonna wagate min tɔ, a ni a lasaga, a ka Marige kulɛ mɔɛ, wo ka a fɔ a ye:
32 ‹I benbanu la Ala le mu nde la, Iburahima nun Isiyaka nun Yaguba la Ala.› Wo butɔ, Musa sɛrɛnta, a ma suusɛ a lasagala.
33 Marige ka a fɔ a ye, a ko: ‹I la samatanu bɔɔ i kɛŋɛ tɔ, bayi i be sɔren dula min tɔ, ɲɔ mu dugu saniyandeŋɛ le la.
34 N bata n na jama yen a ɲinma la, anu be anu tɔɔrɔren ki min na Misira, n ka anu kutun kulɛ tugun mɔɛ ɲɔ; wolo mu n be jigiren anu lakisi koe la. Kɔtɛ, n be i kiila Misira.›
35 Awa, anu balanta Musa min na ko la, ka a fɔla: ‹Ɲɔmɔ le ɲan ka i sɔ mansa la kiiti sa koe la mɔ kunma?›, Ala ka wolo yati kii a ni ma mansa la anu kunka koe la. Wo kiila fɔta a ye maleka sabu la min bɔɔta a ma bapɛ tɔ.
36 Ale Musa yati le ka bani Isirayila kaanu labɔɔ Misira duge tɔ. A ka kabanakoenu nun laamutenu ma Misira, Kulunyuma ba tɔ, anun janfue tɔ, san bi naani.
37 Ale Musa yati le ka a fɔ bani Isirayila kaanu ye, a ko:
‹Ala si nabiyonmɛ do kii le wo ma, min si to iko nde, a be bɔɔla wo bɔnsɛ le tɔ.›b
38 Wo mɔ benbanu to be madɛnden janfue tɔ, ale Musa yati le tota ande nun maleka tɛma min be kumala a ye Turisinina kɔnkɛ kunma. Ale len ka Ala la malakisi kumanu mɔɛ, a ni wonu matanbi wo mɔ ma.
39 Kɔnɔ wo mɔ benbanu ma sɔn a la kuma bitala, anu ka a sɔsɔ le ɲan, anu ka anu hakkile firifiri Misira ma.
40 Wo butɔ, anu ka a fɔ Harona ye, anu ko: ‹I ni batufeŋɛnu ɲiɲa mɔ ye minnu si sɔ mɔ ɲatɔ, bayi ale Musa min ka mɔ labɔɔ Misira duge tɔ, mɔ ɲan ma a lɔn fenfen min be a masɔtɔren.›
41 Awa, wo tɛmuɛ le, anu ka tuuradeŋɛ ɲiɲa, a kuyenɛŋɛ, anu ka sarika bɔɔ a ye. Anu bata min ɲiɲa anu yɛtɛ bole la, anu sɛɛwata wolo la.
42 Wo butɔ, Ala ka a kɔ sɔ anu la, a ka anu boloka, anu ni sankole tɔ feŋɛnu batu, iko a be sɛbɛren ki min na nabiyonmɛnu la kitabue tɔ:
Bani Isirayila bɔnsɛ,
kolofen kannatɛgɛreŋɛnu nun sarika donu,
wo ka anu bɔɔ nde Ala le ye ba,
janfue tɔ, san bi naani kɔtɔ?
43 Ade, kuye min tɔgɔ Moloko, a la tantaa,
anun wo la kuye Refan loli la muluŋɛ,
wo ka wondelen doni wo fɛ,
Iyon, wo ka kɛ kuyenu le ɲiɲa anu batu koe la.
Wolo be a mala nde tugun si wo lasanba Babilɔn saa kɔma.
44 Kɔtɛ, tantaa mafanna min be maren Ala la lahiri lakotireŋɛ seedeɲɔgɔya la, wo be wo mɔ benbanu bolo janfue tɔ. Ala ka Musa yamɔri a ni a ɲiɲa iko a ka a misale yita a la ki min na.
45 Wo mɔ benbanu minnu nata Musa tanbi kɔma, wo tantaa tota wonu tugun bolo, anu ka a doni duge tɔ, Ala ka sii gbɛtɛ mɔgɛnu bee anu ɲala ka min na, Yosuwe la yamɔre kɔtɔ. Wo tantaa tota ɲɔ han Dauda wagate.
46 Dauda la ko diyata Ala ye, a ka Ala mataran a ni a batu boŋɛ sɔ bani Isirayila bɔnsɛ ye.
47 Kɔnɔ Sulemani le ka ale boŋɛ sɔ Ala ye.
48 Hali wolo mu, Ala min mayɛlɛta, a te sabati fondo kɔtɔ, min be ɲiɲaren mɔgɛ bole la. Nabiyonmɛ tugun ka wo fɔ, Marige ko:
49 ‹Sankole mu n na mansa tintiŋɛ la,
dugu kole mu n kɛnsɔfeŋɛ la.
Wo be bon miniman de sɔla n ɲɛ?
Wo be dula miniman de mala n sulendula la?
50 Nde le ma wo bɛ ɲiɲa ba?›c»
51 Awa, Etiyɛn mɛn ko: «Wole kanbɛlɛ, wo tole nun wo sondoŋɛ be deseren, hali wo ɲan ma sunna nun. Tɛmuɛ bɛ, wo be Ala Hakkili saniyandeŋɛ kɛlɛla; wo benbanu ka a ma ki min na, wole tugun ɲɔgɔnna le.
52 Wo benbanu kitita nabiyonmɛ bɛ ɲagankata koe la! Iyon, minnu ka Telenbaga na koe lake nun, anu ka wonu faga, kɔtɛ wole tugun bata ale Telenbaga janfa, wo ka a faga.
53 Wole minnu ka Ala la sariya sɔtɔ malekanu la yamɔre sabu la, wo ma a labatu!»
Etiyɛn mabun koe
54 Kuntigenu to be wo kuma mɔɛla, anu juse tota yɛlɛla koola anu be anu ɲiŋɛnu takinna Etiyɛn ma.
55 Kɔnɔ Hakkili saniyandeŋɛ barikɛ to be Etiyɛn tɔ, a ka a ɲa banban saŋɛ ma, a ka Ala la nɔɔra yen, a mɛn ka Isa yen a be sɔren Ala bolo ɲinma tɔ,
56 a ko: «Wo tolomasɔ, n be a yenden saŋɛ bata laka, Adamadeŋɛ be sɔren Ala bolo ɲinma tɔ.»
57 Anu la wo mɔɛreŋɛ, anu ka anu tolenu dese, anu tota belebelela, anu bɛ labɛndeŋɛ giripɛta Etiyɛn ma,
58 anu ka a sabaa saa kɔma, anu be a mabunna anu ni a faga. Wo butɔ, minnu mata seede la a tɔɲɛgɛ koe la, wonu ka anu la doroki banbanu sa kamareŋɛ do kɛn kɔtɔ, a tɔgɔ Sɔlu.
59 Anu be a mabunna wagate min tɔ, Etiyɛn be mamataraŋɛ mala, a ko: «Marige Isa, n nɛ jigan.»
60 Wo kɔma, a kimisirinta, a ka a kulɛ labɔɔ sɛnbɛ la, a ko: «Marige, i kana anu bita kɛ junube la!» A to banta wo fɔla, a fagata a tota iko a be kinnɔgɔla.