Yaya 19

Wo kɔma, Pilati ka yamɔre dii a la sɔɔrenu ni Isa jigan ka a botege lonba la. Anu ka wo ma. 2 Anu mɛn ka ŋaniŋɛ dɛbɛ ɲɔgɔn fɛ, ka a ma mansa kufunɛlama la, anu ka a dusu Isa kuŋɛ tɔ. Anu ka doroki banba tugun najigi a ma, a wulemalama. 3 Anu tota anu madonna a la, anu ko: «Yahudenu la mansa, i mama!» Anu tota a bantilanna.

4 Pilati mɛn tabɔɔta bara tɔ, a ka a fɔ jama ye: «N be a labɔɔla le wo ye, alako wo ni a lɔn ka a fɔla, n bele fenfen koron yenden kɛ kaye la, a si makiiti min na.» 5 Wo butɔ, Isa bɔɔta bara tɔ. Wo ŋaniŋɛ dɛbɛreŋɛ mansa kufunɛlama be dusuren a kuŋɛ tɔ, doriki banba wulemalama tugun be lajigiren a ma. Pilati ka a fɔ anu ye: «Ale mɔgɛ le mu ka!»

6 Kɔnɔ sarika lakela kuntigenu nun kɔsɔbilenu to ka a yen, anu ka sɔnkɛ layɛlɛ, anu ko: «A ni banban lɔgɛ tɔ! A ni banban lɔgɛ tɔ!» Pilati ka a fɔ anu ye: «Wole yɛtɛ ká a jigan, ka a banban lɔgɛ tɔ, bayi nde bele fenfen koron yenden a la, a si makiiti min na.» 7 Yahudenu ka a jaabi: «Mɔ tɛn sariya do be ɲɔ. Wo sariya sabu la, a bɛnta a ni faga, bayi a bata a fan ma Ala la deŋɛ la.»

8 Pilati la wo kuma mɔɛreŋɛ, a la kilaŋɛ koloyata. 9 A mɛn tadonta boŋɛ tɔ tugun, a ka a fɔ Isa ye: «I be bɔɔren mina le?» Kɔnɔ Isa ma jaabire yo dii a ma. 10 Pilati ka a fɔ a ye: «I be i mɔdɛren nde la ba? I ma a lɔn ba, yamɔre be n bolo n si nɔ i bolokala, n mɛn si nɔ i banbanna lɔgɛ tɔ?» 11 Isa ka a jaabi: «Ile la yamɔri yo te to nde kunma, ka a bele fatanden Ala le la. Wolo mu, minnu ka n don i bolo, wonu la junube kolo i tɛŋɛ ko.»

12 Kabɔɔ wo tɛmuɛ ma, Pilati ka a boloka fɛrɛ ɲini, kɔnɔ Yahudenu ka sɔnkɛ layɛlɛ, anu ko: «Ka i ka kɛ kaye boloka, Rɔmu mansa banba kanunteŋɛ ma ile la. Bayi min yo be a yɛtɛ mala mansa la, Rɔmu mansa banba jague le mu wo tigi la.» 13 Pilati to ka wo kumanu mɔɛ, a mɛn ka Isa labɔɔ bara tɔ, a sigita ɲinbe kɔtɔ a la kiiti sa tintiŋɛ tɔ, ka min tɔgɔ Hebure kuma tɔ «Gabata». 14 Wo ka a taran, wo lun, Yahudenu be anu tabɛnna Hɔrɔya Sale la ko la. Fayida tele be kunna, Pilati ka a fɔ Yahudenu ye: «Wo la mansa le ka!» 15 Wo butɔ, anu mɛn ka sɔnkɛ layɛlɛ, anu ko: «A faga! A faga! A banban lɔgɛ tɔ!» Pilati ka a fɔ anu ye: «N ni wo la mansa banban lɔgɛ tɔ ba?» Sarika lakela kuntigenu ka a jaabi: «Mansa yo bele mɔ bolo fɔ Rɔmu mansa banba!» 16 Awa, Pilati naata a don anu bolo, a banban koe la lɔgɔ bangalandeŋɛ tɔ.

Isa banban koe lɔgɔ bangalandeŋɛ tɔ

Wo kɔma, sɔɔrenu ka Isa bita, 17 anu ko a ma a ni a la lɔgɔ bangalandeŋɛ doni a fan na. A bɔɔta a fɛ saa tɔ, tagala dula tɔ ka min tɔgɔ «Kun konkota». Hebure kuma tɔ, a tɔgɔ «Gologota». 18 Anu ka ale nun mɔgɔ fila banban ɲɔ le, bɛ nun a tɛn lɔgɔ bangalandeŋɛ. Dɔndɛ tota a sɔngɛ doe la, doe tota a sɔngɛ doe la. Isa tota anu tɛma. 19 Wo ka a taran, Pilati ka yamɔre sa anu ni sɛbɛre ma, ka taga a bakku Isa la lɔgɔ bangalandeŋɛ kunma. Wo sɛbɛre be a fɔren de: «Isa Nasarɛti kaa le ka, Yahudenu la mansa». Anu ka wo ma le. 20 Yahude siyama ka wo sɛbɛre karan, bayi Isa banbanta lɔgɛ tɔ dula min tɔ, ɲɔ be saa kɛnna le. A be sɛbɛren kɛ kuma saba bɛ tɔ: Hebure kuma, anun Latɛn kuma, anun Girɛki kuma. 21 Wo butɔ, Yahudenu la sarika lakela kuntigenu tagata a fɔ Pilati ye, anu ko: «I kana a sɛbɛ ‹Yahudenu la mansa›, kɔnɔ i be a sɛbɛla le, ka a fɔla a yɛtɛ da ko aa, a mu Yahudenu la mansa le la.» 22 Pilati ka anu jaabi, a ko: «N ka min sɛbɛ, n bata ban wo sɛbɛla.»

23 Sɔɔrenu to banta Isa banbanna lɔgɛ tɔ wagate min tɔ, anu ka a la kutanu jigan, ka anu tafatan sigi naani la. Sigi dɔndɔ yo sigi dɔndɔ, sɔɔri dɔndɔ. Anu ka a la doroki kɔtɔnɛŋɛ tugun jigan. A be sɔgɔren, kɔnɔ bɔɔla a kunma, han a dugula, kan do kan ɲan bele karilen a tɔ. 24 Anu ka a fɔ ɲɔgɔn tɛma: «Wo mɔ kana a mafara, han ka fɛrile ma, alako mɔ ni a lɔn, a be tola min bolo.» Wo butɔ, Ala la kuma min be sɛbɛren, kamalita, a ko:

«Anu ka n na kutanu fatan ɲɔgɔn tɛma,

ka fɛrile ma n na doroki kɔtɔnɛŋɛ la ko la.»

Awa, sɔɔrenu ka a ma ɲɔgɔnna le.

25 Isa nɛɛnɛ tugun be sɔren Isa faga lɔgɔ bangalandeŋɛ kɛnna, anun a nɛɛnɛ bareŋɛ musuma. Kilopa la muse Mariyama anun Mari Magidala kaa tugun be ɲɔ. 26 Isa ka a nɛɛnɛ yen, anun a la talibe, min di a ye. A to ka wonu yen sɔren, a ka a fɔ a nɛɛnɛ ye: «N na, kɛ talibe bata ma i la den kayireŋɛ la.» 27 Wo kɔma, a ka fɔ wo talibe ye, a ko: «I nɛɛnɛ bata ma kɛ la.» Bɔɔla wo wagate ma, wo talibe ka a doni a bata.

Isa la faga

28 Wo kɔma, Isa to ka a lɔn, ka a fɔla koe bɛ ɲan bata kamali, a ko, «Ji sɔgɛ be n na.» A ka wo fɔ le, alako Ala la sɛbɛre ni kamali. 29 Wo ka a taran, dunbe do be sigiren ɲɔ, min be faren rɛsɛn ji lanmɛreŋɛ la. Anu ka puute lajigi wo ji lanmɛreŋɛ tɔ. Anu ka a kiti lɔgɔ bolin kayanma la, anu ka a madon Isa da la. 30 A to ka a min, a ko: «Koe bɛ bata ban kamalila.» A ka a kunsin, a ka a nɛ lasaagi Ala ma.

Isa sɔngɔ sɔgɔ koe

31 Wo ka a taran, ɲɔ be kɛnɛla sulen lɔ́gɛ́ ma. Yahudenu la kuntigenu bele diren wo furenu ni to lɔgɛ kanna han Hɔrɔya Sali luŋɛ, bayi wo sulen lɔ́gɛ́ sɛnbɛ kolo sulen lɔgɛ doenu ko. Wo butɔ, anu tagata Pilati madiya, aa a ni mɔgɛnu kii ka taga mɔgɔ banbandeŋɛnu kɛŋɛnu kati, alako anu ni faga, anu furenu ni bɔɔ ɲɔ. 32 Wo kɔma, sɔɔrenu tagata. Anu la tagareŋɛ, anu ka wo mɔgɔ fila kɛŋɛnu kati, minnu be banbanden lɔgɛnu tɔ Isa kɛnna a bolo ɲinma tɔ anun a bolo mara tɔ. 33 Kɔnɔ anu to keta Isa ma, anu ka a yen a bata ban fagala. Wo butɔ, anu ma ale kɛŋɛnu kati. 34 Wo kɔma, sɔɔrenu tɔ, dɔndɔ ka a bu sɔngɔ sɔgɔ tanba la. Base nun je bɔɔta kisanna. 35 Min ka wo koe yen, a bata ma a seede la, alako wole tugun ni dɛnkɛnɛya. A la seedeɲɔgɔya mu tɔɲa le la. Ale yɛtɛ ka a lɔn a be tɔɲa le fɔla. 36 Wo koenu mata le, alako Ala la sɛbɛre ni kamali, a ko:

«Hali a kolo dɔndɔ te kati.»

37 Ala la sɛbɛre do gbɛtɛ tugun ko:

«Anu ka min bu sɔngɔ sɔgɔ, anu si wo lasaga le.»

Isa sa koe gabure tɔ

38 Awa, kaye do le be ɲɔ, a tɔgɔ Yusufu Arimati kaa. Isa la talibe do le mu a la, kɔnɔ a bele a yɛtɛ makɛnɛnden, bayi a be kilanden Yahude kuntigenu la. Awa, a to ka a yen Isa bata faga, a tagata Pilati madiya ale ni Isa lajigi lɔgɛ kanna, a ni a fure bɔɔ ɲɔ. Pilati sɔnta. Wo butɔ, Yusufu tagata a ka Isa fure lajigi. 39 Nikodemu min tagata Isa yen lun do sue tɔ, wo tugun nata labundɛ fɛ, min be ɲiɲaren miri nun alowɛ lɔgɔ je la, a biliya kilo bi saba ɲɔgɔn. 40 Anu ka Isa fure jigan, anu ka a kasange, anun labundɛ la, iko Yahudenu la fure mandi ɲa be ki min na. 41 Wo ka a taran, anu ka a banban lɔgɛ tɔ dula min tɔ, sunte be ɲɔ kɛnna. Gaburu nama do be wo sunte tɔ, mɔgɔ ma sa min fɔlɔ tɔ betunna. 42 Awa, Yahudenu la sulen lɔ́gɛ́ to be sutuyala, wo gabure mɛn sutu ɲɔ la, anu ka Isa sa ɲɔ le.