Yaya 8

Musu jeenante la ko

Wo butɔ, Isa tagata kɔnkɛ tɔ min tɔgɔ Jayitunu kɔnkɛ. 2 Ɲɔ kɛnɛta ki min na, a mɛn tagata Ala batu boŋɛ tɔ. Jama bɛ tagata a dula. A sigita, a fɔlɔta anu kawandila.

3 Awa, sariya karamɔgɛnu nun Farisinu ka muse do nati, min be bitaren jeena ma tɔ. Anu ka a sɔ mɔgɛnu tɛma, 4 ka na a fɔ Isa ye: «Karamɔgɔ, kɛ muse bata bita a be jeena ma tɔ. 5 Kɔnɔ Musa ka mɔ yamɔri le Ala la sariya tɔ, a ko aa kɛ muse mɔɔle ni mabun kure la han a ni faga. Ile go, i ko wo tɔ kama le?» 6 Anu ka wo fɔ Isa dakɔtɔ bɔɔ koe le la, alako anu ni a tɔɲɛgɛ. Kɔnɔ Isa butinta a tota sɛbɛre mala duge tɔ, a bolo soliŋɛ la. 7 Anu to mɛta a maɲininkala, a ka a fan nawuli, a ka a fɔ anu ye: «Min ma junubu ko yo ma wo tɛma betunna, wo tigi fɔlɔ ká kure lafili kɛ muse ma.» 8 A mɛn tabutinta tugun, a tota sɛbɛre mala duge tɔ. 9 Anu to ka wo kuma mɔɛ, anu bɛ bɔɔta dɔndɔ dɔndɔ, a fɔlɔta anu la kayibanu ma. Isa dɔrɔn de tota ɲɔ, anun ale muse min be anu tɛma. 10 Isa to ka a fan nawuli, a ka a fɔ muse ye, a ko: «N na, minnu ka i nati anu be mina? Mɔgɔ yo ma i makiiti?» 11 Muse ko: «N marige, dodo ma n makiiti.» Isa ka a fɔ a ye: «Awa, nde tugun te i makiiti. Taga, i kana junube ma bitugun.»

Dunuya kɛnɛ

12 Isa mɛn kumata jama ye tugun, a ko: «Nde le mu dunuya kɛnɛ la. Min tini sɔ n kɔma, wo te tagaman dibe tɔ muku, a be kɛnɛ le sɔtɔla min si a lakisi.» 13 Wo butɔ, Farisinu ka a fɔ a ye: «I bata ma i yɛtɛ seede la. Wolo mu, i la seedeɲɔgɔya te ma tɔɲa la.» 14 Isa ka anu jaabi, a ko: «Ade! Hali n mata n yɛtɛ seede la, n na seedeɲɔgɔya mu tɔɲa le la, bayi n ka n bɔɔdula nun n tagadula lɔn. Kɔnɔ wole ma n bɔɔdula nun n tagadula lɔn. 15 Wole be mɔgɛ makiitila wo tɛn hakkile le ma. Nde te mɔgɔ yo makiiti. 16 Hali n ka mɔgɔ makiiti, n na mɔgɔ makiite mu tɔɲa le la, bayi n dɔrɔn ma, fɔ n nun n Baaba le mu, min ka n kii. 17 Hali wo la sariya tɔ, a be sɛbɛren de aa ka mɔgɔ fila ka seedeɲɔgɔya mɔɔle dɔndɔ bɔɔ, wo mu tɔɲa le la. 18 N mu n yɛtɛ seede le la. N Baaba min ka n kii, wo tugun mu n seede le la.» 19 Wo butɔ, anu ka a fɔ a ye: «I Baaba be mina le?» Isa ka anu jaabi, a ko: «Wo bele nde lɔnden, wo ɲan te n Baaba lɔn. Ka wo ka nde lɔn nun, wo si n Baaba tugun lɔn de nun.» 20 Isa ka wo kumanu fɔ anu la sarika sadula kɛnna Ala batu boŋɛ tɔ, a be mɔgɛnu kawandila ka min na. Mɔgɔ yo ma a bita, bayi a la wagate ma ke betunna.

Ala la kiilá

21 Awa, Isa mɛn ka a fɔ anu ye: «Nde si naa taga le. Wo tɛmuɛ, wo si naa n ɲini le, kɔnɔ wo si faga wo la junube tɔ. Nde be tagala ka min na, wole te nɔ kela ɲɔ.» 22 Wo butɔ, Yahude kuntigenu be a fɔla ɲɔgɔn tɛma, anu ko: «Bɔ, a si naa a yɛtɛ faga le ba? bayi a ko: aa ale be tagala ka min na, aa mɔle te nɔ kela ɲɔ.» 23 A ka a fɔ anu ye, a ko: «Wole bata mu duge tɔ le la. Nde bata mu saŋɛ tɔ le la. Kɛ dunuya tɛŋɛ le wole la. Kɛ dunuya tɛŋɛ ma nde la. 24 Wolo mu, n ka a fɔ wo ye, wo si faga wo la junubenu tɔ. Bayi ka wo ma laa ka a fɔla nde le mu min be sabatiren, wo si faga wo la junubenu tɔ.» 25 Yahudenu ka a fɔ a ye: «Ɲɔmɔ le mu ile la?» Isa ka anu jaabi, a ko: «N bata mɛ a fɔla wo ye kabɔɔ a fɔlɛ! 26 N si nɔ kuma siyama fɔla wo makiiti koe la. Kɔnɔ n ka koe minnu mɔɛ n Kiilá la, n be wonu pɛti le fɔla dunuya mɔgɛnu ye. Ale le mu tɔɲa tige la.» 27 Wo butɔ, anu ma hakkili sɔtɔ a ma, a be kɛnɛ a Baaba Ala le la ko fɔla anu ye. 28 Awa, Isa ka a fɔ anu ye, a ko: «Wo tini nde Adamadeŋɛ bakku wagate min tɔ, wo si a lɔn wo tɛmuɛ ka a fɔla, nde le mu min be sabatiren. Wo si a lɔn, n te fenfen ma n yɛtɛ ma, fɔ n ni kuma iko n Baaba ka n degen ki min na. 29 Nde nun n Kiilá le mu. A ma n dɔrɔn to, bayi tɛmuɛ bɛ, n be a sagona koe mala.» 30 Isa be kɛ koenu fɔla wagate min tɔ, mɔgɔ siyama dɛnkɛnɛyata a ma.

Iburahima bɔnsɛ yati yati

31 Awa, Yahude minnu bata dɛnkɛnɛya Isa ma, a be a fɔla wonu ye: «Ka wo tota n na kuma bitala, wo si ma le n na talibenu yati la. 32 Wo si tɔɲa lɔn, tɔɲa tugun si wo hɔrɔya.» 33 Anu ka a jaabi, anu ko: «Iburahima bɔnsɛ le mɔ la. Han bi mɔ ma ma mɔgɔ yo la jon na. I be a fɔla kama le, i ko: mɔ si hɔrɔya?» 34 Isa ka anu jaabi, a ko: «N ni tɔɲa beeyareŋɛ pɔsi fɔ wo ye: min yo be junube mala, wo tigi mu junube la joŋɛ le la. 35 Marige do la joŋɛ te nɔ tola a tige la boŋɛ tɔ tɛmuɛ bɛ, kɔnɔ a la den kayireŋɛ kan si nɔ tola le ɲɔ tɛmuɛ bɛ. 36 Awa, ka Ala la den kayireŋɛ ka wo hɔrɔya, wo butɔ wo bata lafulen yati.

37 N ka a lɔn de yati Iburahima bɔnsɛ le mu wo la. Kɔnɔ wo be katala n faga koe la, bayi n na kuma ma kun wo tɔ. 38 Nde be min yenden n Baaba la, n be wolo fɔla. Wole tugun ka min mɔɛ wo baaba la, wo be wolo mala.» 39 Anu ka a jaabi, anu ko: «Mɔle benba mu Iburahima le la.» Isa ka a fɔ anu ye: «Ka Iburahima bɔnsɛ yati yati le mu wo la, wo be Iburahima la kɛwalenu siila le mala nun. 40 Kɔnɔ kɔtɛ, hali n be tɔɲa fɔren wo ye, n ka tɔɲa min mɔɛ Ala la, wo be kataren n faga koe le la. Adun, Iburahima ma wo koe siila ma! 41 Wole be wo tɛn baaba walenu siila le mala.» Wo butɔ, anu ka a fɔ a ye: «Yangadeŋɛ ma mɔle la de! Mɔ mu baaba dɔndɔma le la, mɔ bɛ Ala la deŋɛ.» 42 Isa ka a fɔ anu ye: «Ka Ala mu wo baaba le la nun, wo si n kanu le nun, bayi nde be fatanden Ala le la, n nata. N bele naren n yɛtɛ ma, ale le ka n kii. 43 Fen de wo bele n kumari kulɛ fahamula? Bayi wo bele sɔnden n na kuma bitala. 44 Iyon, wole baaba mu Sentanɛ yati le la, wo be sɔnden a sagona koe mala. Mɔgɔ fagalá le mu a la kabɔɔ a fɔlɛ la. A bele toren tɔɲa ko tɔ, bayi a te tɔɲa fɔ muku! A be foniya le fɔla, bayi a kɛɲa le wo la. Foniyante le mu a la, a mɛn mu foniya baaba le la. 45 Kɔnɔ nde, wo bele laaren n na, bayi n be tɔɲa le fɔla! 46 Mɔgɔ be min si nɔ n na junube do fɔla wo tɛma ba? N to be tɔɲa fɔla ka, fen de wo bele laala n na? 47 Min mu Ala la mɔgɛ la, wo tigi si Ala la kuma lamɔɛ. Wo to bele maren Ala la mɔgɛ la, wolo mu wo te a lamɔɛ.»

Isa nun Iburahima

48 Yahude kuntigenu ka Isa jaabi, anu ko: «Mɔ tɔɲa ma ba, a fɔla Samari kaa le mu ile la, jinna be i bolo.» 49 Isa ka anu jaabi, a ko: «Jinna bele nde bolo. N be n Baaba le biliyala, kɔnɔ wole be n fɛɛyala. 50 Nde bele biliya ɲinila n yɛtɛ le la de! Min be a ɲinila n ɲɛ, wo be ɲɔ. A mɛn si n na kiite sa le. 51 N ni tɔɲa beeyareŋɛ fɔ wo ye: ka mɔgɔ min ka n na kuma bita, wo tigi te faga sɔtɔ muku!»

52 Yahudenu ka a jaabi, anu ko: «Mɔ bata a lɔn kɔtɛ jinna le be i bolo. Iburahima fagata, nabiyonmɛ doenu tugun fagata. Ile nɔn be a fɔla aa ka mɔgɔ min ka i la kuma bita, aa a te faga sɔtɔ muku. 53 Ile fisa le mɔ benba Iburahima ko ba? Ale fagata. Nabiyonmɛnu tugun fagata. I be i yɛtɛ mɔlɔnden fen de la?» 54 Isa ka anu jaabi, a ko: «Ka n ka n yɛtɛ matɔgɔ, tɔnɔ yo bele wo tɔ. N Baaba le be biliya diila n ma, wole be a fɔla min ma, aa a mu wo tɛn Ala le la. 55 Hali wolo mu, wo bele a lɔnden, kɔnɔ nde ka a lɔn. Ka n ka a fɔ n ma a lɔn, n bata ma foniya fɔlá la, iko wole. Kɔnɔ nde kan ka a lɔn, n mɛn be a la kuma bitala. 56 Wo benba Iburahima sɛɛwata koola n na tuma yen koe la. A ka a yen de yati, a ɲagalinta.» 57 Yahudenu ka a fɔ a ye: «I la sɔtɛ ɲan ma san bi loolu bɔɔ betunna, i nɔn ka Iburahima yen kama le?» 58 Isa ka a fɔ anu ye: «N ni tɔɲa beeyareŋɛ fɔ wo ye: yannun Iburahima ni sɔtɔ, nde be sabatiren nun.» 59 Wo butɔ, Yahudenu ka kurenu jigan a digii ma, anu ni a mabun. Kɔnɔ Isa dogonta, a bɔɔta Ala batu boŋɛ tɔ.