Luki 22

Janfa makiti koe Isa kunma

Dɛgɛ Lɛbinibɔnɛ sale be sutuyala, min tugun tɔgɔ Hɔrɔya Sale. 2 Sarika lakela kuntigenu, anun sariya karamɔgɛnu be fɛrɛ ɲinila anu si Isa la ko lamɔdɛ ki min na, kɔnɔ anu be kilanden jama la. 3 Awa, Judasi min tɔgɔ Isikariyoti, min be Isa la talibi tan nun fila ɲaama, Sentanɛ donta wo tɔ. 4 A si naa Isa don anu bolo ki min na, a tagata sumundula wolo la anun sarika lakela kuntigenu anun Ala batu bon banba kɔsɔbile kuntigenu. 5 Anu sɛɛwata anu ka lahire kiti ɲɔgɔn tɛma, anu ni nafule dii a ma. 6 A sɔnta wo la, a tota fɛrɛ ɲinila Isa don koe la anu bolo, jama kana lɔn sɔtɔ a ma.

Hɔrɔya sali dɔmɛ tabɛn koe

7 Dɛgɛ Lɛbinibɔnɛ sale lɔ́gɛ́ keta, a be wajibiyaren anu ni saaka kontoŋɛ lanma kannatɛgɛ lun min na, hɔrɔya sale sarika la, 8 Isa ka Piyɛri nun Yaya lasanba, a ko: «Wo taga hɔrɔya sali dɔmɛ ɲiɲa wo mɔ ye, wo mɔ ni a dɔmɔ.» 9 Anu ka a maɲininka, anu ko: «I be diren mɔ ni taga a ɲiɲa mina le?» 10 A ko anu ma: «Wo tolomasɔ, wo tini be donna saa tɔ, wo nun kaye do si bɛn a be ji lɔndɛ londiren. Wo ni sɔ a kɔma han a be donna boŋɛ min tɔ, 11 wo ni a fɔ bon tige ye, wo ko: ‹Karamɔgɔ ko i ma: i ni yigiyadula yita mɔ la, ale nun a la talibenu si hɔrɔya sali dɔmɔre ma ka min na.› 12 Wo kaye si konko banba do yita wo la koore kanna, ɲɔ be tabɛnden a ɲinma la; wo be sali dɔmɛ ɲiɲala ɲɔ le.» 13 Piyɛri nun Yaya tagata, anu ka a taran iko Isa ka a fɔ anu ye ki min na. Anu ka hɔrɔya sali dɔmɛ ɲiɲa ɲɔ.

Hɔrɔya sali dɔmɔ ɲa nama

14 Wagate keta tɛmuɛ min tɔ, Isa anun a la kiilanu tagata dɔmɔre madula. 15 A ka a fɔ anu ye, a ko: «A sɔgɔ ka n bita a ɲinma la n ni kɛ hɔrɔya sale dɔmɔre ma wo fɛ, yannun n be ɲagankatala. 16 N ni a fɔ wo ye, n te a ɲɔgɔn dɔmɔ bitugun, han ka kɛ hɔrɔya sale la ko tini naa kamali Ala la mansabaya tɔ.» 17 Awa, a ka pɔɔte bita, a ka Ala tantu, a ka a fɔ: «Wo bɛ ni kɛ pɔɔte jigan dɔndɔ dɔndɔ wo ni a fatan ɲɔgɔn tɛma. 18 N ni a fɔ wo ye: bi kɔma, n te naa rɛsɛn deŋɛ je min, fɔ ka Ala la mansabaya nata lun min.» 19 Wo kɔma, a ka dɛgɛ jigan, a ka Ala tantu, a ka dɛgɛ makuntu, a ka a dii anu ma, a ka a fɔ: «Kɛ dɛgɛ be maren iko n bali bangue, n be min bɔɔla sarika la wo la ko la. Wo ni naa to kɛ mɔle mala kɛnɛ, alako wo si wo hakkile to nde ma.» 20 Dɔmɔre to bɔɔta a la, Isa ka pɔɔte tugun jigan ɲɔgɔnna, a ka a fɔ: «Kɛ pɔɔte be maren iko n base, n be min bɔɔla wo la ko la. N basi bɔɛ si lahiri nama lakiti le. 21 Kɔnɔ wo tolomasɔ de: min be n janfala, a ni n don n jaguenu bolo, mɔ bɛ bole be fɛ dɔndɔ tɔ yan. 22 Tɔɲa le, nde Adamadeŋɛ si faga le iko a be saren n ɲɛ ki min na. Kɔnɔ kɛ mɔgɛ min be n donna mɔgɛnu bolo, wo si ɲagankata sɔtɔ le.» 23 Anu fɔlɔta ɲɔgɔn maɲininkala: «Ɲɔmɔ dɔndɔ le si nɔ wo mala mɔ tɛma?»

Mɔgɔ fisamante

24 Wo kɔma, anu ka ɲɔgɔn masɔ́sɛ́ fɔlɔ a lɔn koe la anu tɛma, anu ko: «Ɲɔmɔ le be toren iko mɔgɔ fisamante mɔ bɛ tɛma?» 25 Isa ka a fɔ anu ye: «Dunuya mansanu be nɔɛ laboela anu la jamanɛ kunma; minnu be anu yamɔrila, anu be diren mɔgɛnu ni anu kele ‹Ko ɲinma malanu›. 26 Kɔnɔ wole kana a ma ɲɔgɔnna. Min mu mɔgɔ fisamante la wo tɛma, wo bɛnta a fan mala mɔgɔ lanma la. Min mu kuntige la, wo ni ma iko walila. 27 Ɲɔmɔ le mu mɔgɔ fisamante la, min be sigiren dɔmɛ dɔmɔ koe la, ka wo ma min be walila? Min be sigiren dɔmɛ dɔmɔ koe la, kaa wo ma? Nde nɔn be toren wo tɛma iko walila. 28 Wole bata timiladiya n fɛ n na bɛlɛya butɔ. 29 Nde tugun be mansaya hanigela wo ye, iko n Baaba ka a hanige nde ye ki min na. 30 Wo butɔ, wo mɔ bɛ si dɔmɔre ma, wo mɔ bɛ si minfeŋɛ min kandula dɔndɔ n na mansaya butɔ. Wo si sigi mansa tintiŋɛnu tɔ bani Isirayila bɔnsɔ tan nun fila makiiti koe la.»

Isa la Piyɛri lalɔɔ koe

31 Isa mɛn ka a fɔ, a ko Piyɛri ma: «Simɔn, Simɔn, i tolomasɔ: Sentanɛ bata mamataraŋɛ ma a ko a ni wo bɛ sibita iko sugu kole. 32 Kɔnɔ n bata Ala mataran ile ye, alako i la dɛnkɛnɛya kana ban i bolo. Ile tugun, i tini i yɛtɛ lasaagi n ma wagate min tɔ, i si i bareŋɛnu sɛnbɛ don de.» 33 Piyɛri ka a fɔ a ye, a ko: «N marige, n bata wuli n ni i jokki tagala geele tɔ, hali fagadula.» 34 Isa ka a jaabi, a ko: «Piyɛri, n ni a fɔ i ye, yannun donton keke fɔlɛ, wo si a taran, i bata sɔsɔre ma kunɲama saba, ka a fɔla i ma n lɔn.»

Yɛtɛ tabɛŋɛ

35 Isa mɛn ka a fɔ anu ye: «N ka wo kii wagate min tɔ, nafulu sa fen bele wo bolo, hali bɔnfɛ, hali samata, wo butɔ, fondo do be ɲɔ ba min ma kamali wo bolo?» Anu ko: «Fenfen.» 36 A ka a fɔ anu ye: «Awa kɔtɛ, nafulu sa feŋɛ be min bolo, wo ka a jigan. Bɔnfɔ tige tugun ɲɔgɔnna. Faŋɛ bele min bolo, a ka a la doroke san faŋɛ la. 37 Kɛ kuma be sɛbɛren kitabue tɔ: Anu be a saren ko koron malá le la. Awa, n ni a fɔ wo ye, a fɛrɛ bele fɔ kɛ kuma ni ma tɔɲa la nde la ko tɔ. Iyon, min be sɛbɛren n na ko tɔ, wo si kamali le.» 38 Wo butɔ, a la talibenu ka a fɔ: «Marige, fan fila le ka.» A ka a fɔ anu ye: «Wo bata kun.»

Isa la mamataraŋɛ Jayitunu kɔnkɛ tɔ

39 Isa bɔɔta ɲɔ, a tagata Jayitunu kɔnkɛ tɔ, iko a darita a la ki min na. A la talibenu tugun ka a jokki. 40 A to keta wo dula tɔ, a ka a fɔ anu ye: «Wo Ala mataran alako wo kana don malatantaŋɛ tɔ!» 41 A yɛtɛ ka a matuntun anu la, a la yanfaya iko i tini kure fili, a kimisirinta, a tota Ala mataranna. 42 A ko: «N baaba, i ni kɛ pɔɔte bɔɔ n ma min mu i la dumɛŋɛ la, ka i sɔnta. Kɔnɔ nde sagoe le bele mala de, fɔ ile sagoe, wolo be mala.» 43 Wo tɛmuɛ le, maleka do bɔɔta Isa ma kɛnɛ tɔ, ka bɔɔ saŋɛ tɔ, a ka sɛnbɛ dii a ma. 44 Suunɛ bata a tabɔɔ han, a tota Ala mataraŋɛ mala a sɔɔbɛ la, fisa fɔlɔnɛŋɛ ko. A woose tota sulenna duge tɔ iko base. 45 A to ka Ala mataraŋɛ ban, a wulita a tagata ke a la talibenu ma. A ka anu taran anu be kinnɔgɔla suunɛ sabu la. 46 A ka a fɔ anu ye: «Wo be kinnɔgɔla fenna? Wo wuli wo ni Ala mataran, alako wo kana don malatantaŋɛ tɔ!»

Isa lasɔ koe

47 Isa be kumare tɔ wagate min tɔ, anu ka jama yen nala. Judasi min be Isa la talibi tan nun fila ɲaama, wo be ɲatɔ. A ka a madon Isa la a ni a sunbu. 48 Isa ka a maɲininka, a ko: «Judasi, i be Adamadeŋɛ donna mɔgɛnu sagoe tɔ sunbue le la ba?» 49 Isa nun minnu be ɲɔgɔnna, wonu ka a yen min be nala mala. Anu ka a maɲininka, anu ko: «Marige, mɔ te anu botege faŋɛ la ba?» 50 Wo ka a taran, sarika lakela kuntigi banba la joŋɛ be ɲɔ. Isa la mɔgɔ dɔndɔ ka faŋɛ daɲa dɔndɔ bɔɔ a tɔ, a ka a bolo ɲinma tole tɛgɛ. 51 Kɔnɔ Isa ka a fɔ talibenu ye, a ko: «Wo a to, wo dan ɲɔ!» A ka a bole maga wo kaye tole la, a ka a lakendeya. 52 Sarika lakela kuntigenu, anun Ala batu bon banba kɔsɔbile kuntigenu, anun kayibanu minnu be naren Isa bitadula, a ka a fɔ wonu ye, a ko: «Wo bata na faŋɛnu nun dɔkkɛnu fɛ n digii ma iko n mu boenmalá le la. 53 Lun go lun, wo mɔ bɛ le be kɛnɛ tola Ala batu bon banba tɔ, kɔnɔ wo ma wo bole sa n ma ɲɔ. Kɔnɔ wo la wagate bata ke anun Sentanɛ la wagate min be sɛnbɛ sala dibe tɔ.»

Piyɛri la Isa aɲɛ koe

54 Anu to ka Isa bita anu ka a doni, anu ka a ladon sarika lakela kuntigi banba la boŋɛ tɔ. Piyɛri be sɔren anu kɔma, kɔnɔ anu yanfata ɲɔgɔn na. 55 Anu ka ta labita tatta butɔ tɛma, anu bɛ sigita ta kɛnna. Piyɛri tugun nata, a sigita anu kɛnna. 56 Jon muse do ka a yen sigiren ta malaŋɛ ma, a ka a lasaga koola, a ka a fɔ: «Kɛ kaye tugun nun ale Isa le mu.» 57 Kɔnɔ Piyɛri ka muse sɔsɔ, a ko: «Nde ma a lɔn.» 58 Wori a ma mɛ, mɔgɔ do tugun ka Piyɛri yen, a ko: «Ile tugun nun kɛ mɔgɛnu le.» Kɔnɔ Piyɛri ko a ma: «Ade! Nde ma!» 59 Fayida wagati dɔndɔ tanbita, do tugun nata bɛlɛya wo kuma ma, a ka a fɔ: «Tɔɲa le mu! Kɛ kaye tugun nun ale Isa le mu, bayi Galile kaa le mu ale tugun na.» 60 Piyɛri ka a jaabi, a ko: «I be min fɔla, n ma a lɔn.» Piyɛri be wo kuma fɔla wagate min tɔ nɛti, dontoŋɛ keketa kisanna. 61 Wo tɛmuɛ, Marige Isa ka a firifiri, a ka Piyɛri fɛlɛ. Wo butɔ, Piyɛri ka Marige la kuma talɔn kisanna, a fɔla a ye ko: «Yannun dontoŋɛ ni keke bi, i si a fɔ kunɲama saba ka a fɔla, i ma n lɔn.» 62 Piyɛri bɔɔta bara tɔ, a dita a bɛlɛma la.

Isa fɛɛya koe

63 Minnu be Isa kantala anu tota yola a la anu be a botegela. 64 Anu ka a ɲa kiti anu be a maɲininkala, anu ko: «Nabiyonmɛ, ɲɔmɔ le ka i botege? A tigi tɔgɔ fɔ mɔ ye.» 65 Anu tota tana kuma fɔla, anu be kuma koroŋɛ siyama fɔla a ma.

Isa doni koe kuntigenu la mamadɛŋɛ tɔ

66 Ɲɔ to kɛnɛta, Yahude jama kayibanu ka mamadɛŋɛ ma, anu nun sarika lakelá kuntigenu nun sariya karamɔgɛnu, anu ka Isa doni wo kuntigenu la mamadɛŋɛ tɔ. 67 A la kereŋɛ ɲɔ, anu ko a ma: «Ka Ala la mɔgɔ masubɛreŋɛ mu ile le la, a fɔ mɔ ye.» Isa ka anu jaabi, a ko: «Hali n ka a fɔ wo ye, wo te laa n na feu. 68 Ka nde tugun ka wo ɲininka, wo te n jaabi. 69 Kɔnɔ ka bɔɔ kɔtɛ ma, nde Adamadeŋɛ si naa sigi le Ala sɛnbɛma bolo ɲinma tɔ.» 70 Wo butɔ, anu bɛ labɛndeŋɛ ka a maɲininka, anu ko: «Bɔ, Ala la den kayireŋɛ le mu i la ba?» Isa ka anu jaabi, a ko: «Wo be a fɔren ki min na, a be ɲɔgɔnna le.» 71 Wo butɔ, anu ka a fɔ, anu ko: «Mɔ haju bele seede ko tɔ bitugun. Mɔle yɛtɛ yati bata ban a kumari kulɛ mɔɛla, min be bɔɔren a yɛtɛ da tɔ.»