Minnu bɛnta junubu kafari sarika bɔɔla: a misali donu
5
«Misali la: Mɔgɛ bata ma koe do seede la. Anu bata taga kiiti dula. Anu ka jama kele alako min be seedeyaren wo koe ma, a ni ale koe seede bɔɔ. Kɔnɔ wo tigi, a ka min yen anun a ka min mɔɛ, a ma sɔn tagala wo seedeɲɔgɔya bɔɔla. Awa, a tigi bata junube sɔtɔ wo butɔ.
2 Ka wo ma, ka a tagata taran mɔgɛ magata fondo saniyanbale mɔɔle min yo la lɔnbaliya butɔ, iko subu haramureŋɛ binde, ka wo ma kolofeŋɛ saniyanbale binde ka wo ma niilama mɛsɛn saniyanbale fagareŋɛ, wo mɔgɛ tugun si ma le mɔgɔ saniyanbale la, a ni junube sɔtɔ wo tɔ.
3 Ka wo ma, a taranta mɔgɛ magata fondo saniyanbale la min be fatanden adamadeŋɛ bale la. Hali a ma a lɔn, kɔnɔ ka a naata a lɔn tɛmuɛ min tɔ, wo tɛmuɛ a si ma le saniyanbale la, a ni junube sɔtɔ wo tɔ.
4 Ka wo ma, a taranta mɔgɛ ka a kali tun ɲɔgɔnna, kɔnɔ a ma a mira wo koe la, a mata ko ɲinma la ba, a mata ko koroŋɛ la ba, awa ka a naata lɔn sɔtɔ wo koe ma, wo butɔ a si ma le saniyanbale la, a ni junube sɔtɔ wo tɔ.
5 Awa, min ka wo junube mɔɔlenu ma, a bɛnta a ni wo junube talɔn jama ɲala.
6 A ni saaka muse bɔɔ sarika la, ka wo ma baa muse. Wo kolofeŋɛ ni ma fan nasaagi sarika la nde Alatala ye. Awa, sarika lakelá si a kunka wo la, alako a la junube ni kafari.
7 Ka fɛrɛ bele a bolo wo sarika la ko la, a ni legetere fila, ka wo ma gabu fila bɔɔ sarika la nde Alatala ye. Dɔndɛ ni ma junubu kafari sarika la, doe ni ma sarika bintannɛŋɛ la.
8 A ni anu doni sarika lakelá dula, sarika lakelá ni junubu kafari sarika fɔlɔ bɔɔ. A ni a kaŋɛ kannatɛgɛ, kɔnɔ hali a ma a kuŋɛ kuntu.
9 A ni a base do lasulen sarika bintandula sɔngɔ ma. Base tɔɛ min be toren a ni wo bɔn sarika bintandula lanbaŋɛ tɔ. Junubu kafari sarika le mu.
10 Sarika lakelá ni wo konden filaɲɔgɛ bɔɔ sarika bintannɛŋɛ la iko a bɛnta mala ki min na. Wo butɔ, sarika lakelá be sarika bɔɔla wo mɔgɛ tigi ye min si a kunka, alako a be junube min maren, a ni kafari.
11 Ka fɛrɛ bele a bolo legetere fila, ka wo ma gabu fila sɔtɔ koe la, a ni sugu kolo munge kilo dɔndɔ nun a tɛma bɔɔ junubu kafari sarika la. A kana tule, ka wo ma sorayi sa a kunma, bayi junubu kafari sarika le mu.
12 A ni wo doni sarika lakelá dula, sarika lakelá si bolo ɲa dɔndɔ kɔɔ, a ni naa a bintan sarika bintandula kunma. Wo ni ma tɔnkuma la sarika bɛ la ko tɔ. A be wo mala sarikanu kunma le, minnu be bintanna kɛnɛ sarika bintandula kunma nde Alatala ɲala, bayi junubu kafari sarika le mu.
13 Wo butɔ, sarika lakelá si sarika bɔɔ wo mɔgɛ tigi ye min si a kunka, alako a ka junube min ma, a ni kafari. Suge kolo munge tɔɛ min be tola, a be mala sarika lakelá tɛŋɛ le la.»
Fan nasaagi sarika la ko
14 Alatala kumata Musa ye, a ko:
15 «Misali la, mɔgɔ do ka fondo jigan min be kɛrɛkɛrɛren nde Alatala ye, kɔnɔ a ma a lɔn a be wo junube mɔɔle maren. Awa ka a tagata lɔn sɔtɔ wo koe ma wagate min tɔ, a ni taga saaka kontoŋɛ bɔɔ fan nasaagi sarika la nde Alatala ye a la junube la ko la. A ma bɛn lanjuru yo ni to wo saaka kontoŋɛ la. A sɔŋɛ saɲa le ka: nɛgɛ min be ladonden a la ko tɔ, wo kaalisi kole la biliya nun kaalise kole nɛŋɛ min be lawalila hɔrɔma dingira tɔ, fɔ anu ni kan.
16 A ka min jigan nun a be maren nde Alatala tɛŋɛ la, wo fondo be mala nafule min bere la, a ni wo lasaagi sarika lakelá ma. A ni a sɔŋɛ jigan, a mɛn ni wo sɔŋɛ ɲɔgɔn tafatan sigi loolu la, a ni sigi dɔndɔ jigan, a ni a sa wo sɔŋɛ kunma, a be wo bɛ labɛndeŋɛ diila. Wo butɔ, sarika lakelá si kunsara sarika bɔɔ le a ye saaka kontoŋɛ la min mu fan nasaagi sarika la, alako a la junube ni kafari.
17 Mɔgɛ min be junubu koe mala, a ka nde Alatala la yamɔre do sɔsɔ, hali a ma a lɔn, a bata junube sɔtɔ. Ka a naata lɔn sɔtɔ a ma wagate min tɔ, fɔ a ni wo sɔŋɛ dii.
18 A bɛnta a ni sikule bɔɔ fan nasaagi sarika la, lanjuru yo bele min na, min sɔŋɛ si bɛn sariya ma. Wo butɔ sarika lakelá si kunsara sarika bɔɔ le a ye a la junube la ko la, a be min maren a lɔnbaliya la, alako a la junube ni kafari.
19 Wo bata ma fan nasaagi sarika la, bayi a ka junube le yati sɔtɔ nde Alatala la.»
20 Alatala kumata Musa ye, a ko:
21 «Ka a taranta mɔgɛ ka ko koroŋɛ ma, a ka junube sɔtɔ nde Alatala la, iko a ni a nɛɛnɛdɔndɛ do madakuya fondo la, min be taakuren nun a la; ka wo ma, a ka fondo kanka, ka wo ma a ka fondo bɔɔ a filaɲɔgɛ bolo boenma la,
22 ka wo ma, a be fondo samareŋɛ yenden kɔnɔ a si foniya fɔ wo la ko la; ka wo ma a ni a kali foniya la alako wo junubu koe mɔɔle do kana lɔn ma,
23 awa, wo tigi be junube sɔtɔren wo koe bɛ butɔ, a ni naa wo fondo kankareŋɛ lasaagi. Ka a be a kankaren de ba, ka a be taakuren de a la ba, ka fondo samareŋɛ le mu a be min yenden ba,
24 ka fondo le a ka foniya fɔ min na ko la kalire la, wo bɛ butɔ a ni wo fondo lasaagi a tige ma. A be wo fondo sɔŋɛ jiganna, a mɛn ni wo sɔŋɛ ɲɔgɔn tafatan sigi loolu la, a ni sigi dɔndɔ jigan, a ni a sa wo fondo sɔŋɛ kunma, a be wo bɛ labɛndeŋɛ lasaagila a tige ma. A ni wo ma a be a fan nasaagi sarika bɔɔla lun min na yati.
25 Wo fan nasaagi sarika butɔ, a ni saaka kontoŋɛ doni sarika lakelá dula a la junube la ko la a be min maren nde Alatala la. Lanjuru yo kana to wo saaka la, a sɔŋɛ tugun ni bɛn sariya ma.
26 Wo butɔ sarika lakelá si kunsara sarika bɔɔ wo tigi ye nde Alatala ɲala, alako a be junube min maren, a ni kafari.»