Kankira ɲiɲa koe
37
Besaleli ka kankira ɲiɲa kasiya lɔgɛ la. A la yanya nɔngɔn fila nun a tɛma, a la yajɛ nɔngɔn dɔndɔ nun a tɛma, a la towe tugun, nɔngɔn dɔndɔ nun a tɛma. 2 A ka sanuɛ yati le madon a butɔ nun a kɔma ma, a ka a kunma fɛfɛ lamiliŋɛ bɛ ɲiɲa sanuɛ la. 3 A ka sanuɛ lakunɛn, a ka kurunda naani ɲiɲa, a ka anu sa a tunku naanɛ ma, kurunda fila sɔngɔ dɔndɔ, kurunda fila sɔngɛ doe. 4 A ka kasiya lɔgɛ kayanma fila malasɛ a ye, ka na sanuɛ madon anu ma. 5 A ka anu ladon wo kurundanu tɔ kankira sɔngɔnu tɔ, wonu mata kankira jiganfeŋɛnu la.6 A ka wo junubu kafare dataguraŋɛ ɲiɲa sanuɛ yati la. A la yanya nɔngɔn fila nun a tɛma, a la yajɛ nɔngɔn dɔndɔ nun a tɛma. 7 A ka maleka fila misale ɲiɲa sanu botegereŋɛ la, a dataguraŋɛ la yajɛ sɔngɔ filanu kunma. 8 Wo malekanu misale nun wo dataguraŋɛ bɛ ɲiɲata ɲɔgɔn fɛ le. 9 Anu be ɲamatelenden ɲɔgɔn ma anu kunsinta dataguraŋɛ kunma, anu be anu gabataŋɛnu lafontiren ka butin a kunma.
Dɛgɛ sa teebile Ala tabɛŋɛ tɔ
10 A ka teebile ɲiɲa kasiya lɔgɛ la, a la yanya mata nɔngɔn fila, a la yajɛ nɔngɔn dɔndɔ, a la towe nɔngɔn dɔndɔ nun a tɛma. 11 A ka sanuɛ yati madon a ma, a naata a dabole bɛ ɲiɲala sanuɛ la. 12 A ka a dabole lamiliŋɛ ɲiɲa, a la yajɛ bolo solin naani, a naata sanuɛ sala a lamiliŋɛnu tɔ. 13 A ka sanu kurunda naani ɲiɲa a tunke naanɛ bɛ ye, minnu si tabɛn a kɛn naanɛ ma. 14 Wo kurundanu madonta a dabole la, lɔgɔ kayanmanu ladonta anu tɔ, teebile jiganfeŋɛ la. 15 A ka kasiya lɔgɔ fila malasɛ, a nata sanuɛ madon anu ma, wonu mata teebile jiganfeŋɛ la. 16 A ka teebile la miraŋɛnu ɲiɲa, a la piletenu, a la tɔnbilenu, a la pɔɔti banbanu anun a la panɛnu, anu be beere bɔɔla sarika la minnu tɔ. A ka wonu ɲiɲa sanuɛ yati le la.
Lanpu sigifeŋɛ
17 A ka sanuɛ yati botege jɔnjɔnna la, a ka lanpu sigifeŋɛ ɲiɲa a la. A kɛŋɛ yo, a kute yo, a balanu yo, a la sigidulanu yo, anun a la yangufeŋɛnu, wo bɛ ɲiɲata sanu wundu dɔndɔ le la. 18 Bala wɔɔrɔ le tota a kute tɔ, a sɔngɔ dɔndɔ bala saba, sɔngɛ doe tugun bala saba. 19 Bala yo bala, fere saba le be a ma; fere dɔndɔ yo fere dɔndɔ, a be toren iko tɔnbile, a kukureŋɛnu nun a yanbanu tugun be wolo ɲaama. 20 Fere naani le tota lanpu sigifeŋɛ kute ma, minnu be toren iko tɔnbile, a kukureŋɛnu nun a yanbanu tugun be wolo ɲaama. 21 Bala fila be bɔɔla a kute tɔ ka min na, kukuren dɔndɔ le tota ɲɔ kɔtɔ: bala fila tɛma, minnu be a kute kɔtɔ, ɲɔ kɔtɔ kukuren dɔndɔ; bala fila tɛma minnu be a kute tɛma, ɲɔ tugun kɔtɔ kukuren dɔndɔ; bala fila tɛma minnu be a kute kunma, ɲɔ tugun kɔtɔ kukuren dɔndɔ. 22 A kukureŋɛnu nun a balanu anun wo tɔɛ bɛ mu fondo dɔndɔ le la. A bɛ mata sanuɛ yati le la, min botegeta jɔnjɔnna la.
23 A ka a la lanpu wɔrɔwila ɲiɲa; anu la wukke tɛgɛfeŋɛ anun anu la buguta safeŋɛ bɛ ɲiɲata sanuɛ yati le la. 24 A ka sanuɛ kilo bi saba nun naani le ma lanpue sigifeŋɛ nun a la miraŋɛ bɛ ɲiɲafeŋɛ la.
Sorayi saniyandeŋɛ bintandula
25 A ka sorayi saniyandeŋɛ bintandula ɲiɲa kasiya lɔgɛ la. A la yanya nɔngɔn dɔndɔ, a la yajɛ nɔngɔn dɔndɔ, a kɔtɔ mata tunku naani le la, a la towe nɔngɔn fila. Binanu tota a tunkenu tɔ, anu nun sorayi bintandula bɛ ɲiɲata ɲɔgɔn fɛ le. 26 A ka sanuɛ yati le madon a kunma ma, a kɔma bɛ ma, anun a binanu. A ka a dabole lamiliŋɛ tugun ɲiɲa sanuɛ le la. 27 A ka kurunda fila ɲiɲa sanuɛ la a sɔngɔ fila tɔ, a dabole kɔtɔ la. Lɔgɔ kayanmanu be donna wolo tɔ, a jiganfeŋɛ la. 28 A ka kasiya lɔgɛnu ɲiɲa jiganfeŋɛnu la, a naata sanuɛ madon anu ma.
29 A ka tulu saniyandeŋɛ ɲiɲa, anun fondo kuɲɛ diyama min be basanden sorayi fɛ min si bintan, iko labundɛ ɲiɲalá be a ɲiɲala ki min na.