Kuru wala namanu
34
Wo kɔma, Alatala ka a fɔ Musa ye, a ko: «Kuru fila malasɛ walanu la, minnu nun wo fɔlɔnɛŋɛnu mulunta, i ka minnu mafara. N ni sɛbɛre ma anu ma, iko sɛbɛre min mata doenu ma nun. 2 I tabɛn, i ni sori saguma piri yɛlɛla Turisinina kɔnkɛ kunma. I be sɔla kɔnkɛ kun tɛma le n ɲakɔtɔ. 3 Mɔgɔ yo kana i jokki, mɔgɔ yo mɛn kana yen kɔnkɛ kan do kan tɔ. Hali kolofen lanma nun a banbanu, dɔndɔ kana a daɲini kɔnkɛ lamiliŋɛ tɔ.»4 Musa ka kuru wala fila malasɛ iko wo fɔlɔnɛŋɛnu. A wulita saguma piri, a yɛlɛta Turisinina kɔnkɛ tɔ, iko Alatala ka a yamɔri ki min na. A ka wo kuru wala fila doni a fɛ. 5 A la kereŋɛ ɲɔ, Alatala jigita luuture tɔ, a nata sɔ ɲɔ Musa kɛnna. A ka a tɔgɛ «Alatala» fɔ a kulɛ mayɛlɛreŋɛ la. 6 A tanbi tɛmuɛ Musa ɲakɔtɔ, a be a fɔla a kulɛ mayɛlɛreŋɛ la: «Nde le mu Alatala la! Nde Alatala, Ala kinikininte le mu n na, anun hinnɛnte, n juse te yɛlɛ teriya la, n na kanunteya dan bele, nɛn dɔndɔ tige le mu n na. 7 N si n na kanunteya yita le mɔgɛnu la han yɛlɛman wulu dɔndɔ: n si diɲa le mɔgɛ ye min ka tiɲare ma, anun murutɛ anun junube. Kɔnɔ, n te to muku n ma a malá bita: minnu bata tiɲare ma, n si wonu la deŋɛnu bita le nun a mamareŋɛnu han yɛlɛman saba, han naani, wo tigi la tiɲare la!»
8 Musa kimisirinta duge tɔ kisanna, a sujuduta. 9 A ka a fɔ, a ko: «N Marige, ka n na ko bata i hɛnɛ, yandi sɔ mɔ ɲatɔ, hali kɛ jama to mu kanbɛlɛŋɛnu la; i ni diɲa mɔ la tiɲarenu nun junubenu ma, i ni mɔ jigan iko i la jama.»
Lahiri lakoti kumanu
10 Alatala ka a fɔ, a ko: «N bata lahire kiti wole nun nde tɛma. N si naa kabanakoenu ma le i la jama bɛ ɲala, minnu fɔlɔ ma ma betunna jamanɛ yo tɔ dunuya. I be jama min tɔ, wonu si nde Alatala la wali makilandeŋɛ yen de n be min mala ile la ko sabu la. 11 Wo n na yamɔre makanta n be min fɔla wo ye bi. N si naa Amɔri kaanu, anun Kanana kaanu, anun Hɛti kaanu, anun Feresi kaanu, anun Hiwi kaanu, anun Jebusi kaanu bee le wo ɲatɔ. 12 Wo yɛtɛ mɛnni: wo be donna duge min tɔ, wo nun anu kana lahiri yo kiti, alako anu kana naa ma wo ye julu yɛlɛreŋɛ la. 13 Wo ɲan be anu la sarika bɔɔ dulanu malansanna le, wo be anu la kuru sigireŋɛnu tiɲala le, wo mɛn be anu la lɔgɔ malasɛreŋɛnu matɛgɛla le.
14 Wo kana kimisirin batufen yo ye de, bayi nde Alatala, n tɔgɔ le Ala min tɔɔnɛta, n te sɔn n filaɲɔgɛ la.
15 Wo nun wo duge mɔgɛnu kana lahiri yo kiti, alako anu tini be anu la kuyenu batula, anu ni sarika bɔɔ anu ye, anu kana naala wo kelela wo sarika dɔmɔdula. 16 Wo kana naala ɲɔ den musereŋɛnu ɲinila wo la den kayireŋɛnu ye, ka wo ma wo den musereŋɛnu si naa wo la den kayireŋɛnu latantan de anu la kuyenu batu koe la.
17 Wo kana batufen yo ɲiɲa nɛgɛ lakunɛndeŋɛ tugun na.
18 Wo si Dɛgɛ Lɛbinibɔnɛ sale makanta. Tele wɔrɔwila minnu be masubɛren wo la dɔmɔ tɔnsɛnu mɔ kare butɔ, wo be dɛgɛ lɛbinibɔnɛ le dɔmɔla, iko n ka wo yamɔri ki min na, bayi wo bɔɔta Misira duge tɔ wo kare le la.
19 Wo la den kayiren fɔlɛ bɛ mu n tɛŋɛ le la, hali wo la kolofeŋɛnu be den fɔlɛ min bɛ sɔtɔla wo la kula tɔ a kayima, a mata ninge le la ba, a mata saaka le la ba, a bɛ mu n tɛŋɛ le la. 20 Ka a tagata ma sofale la den fɔlɛ le la, wo be a kunkala saaka kontoŋɛ le la, ka wo ma baa deŋɛ. Ka wo ma a kunka, wo be a kun kɔma le tɔntɔnna, a ni faga. Wo la den kayiren fɔlɛ bɛ si kunka le; wo kana na n ma wo bolo tɛsɛŋɛ la.
21 Wo be wo la wale bɛ mala tele wɔɔrɔ le kɔtɔ. A tele wɔrɔwila luŋɛ bɛ wo be wo sulenna le, hali a tagata tabɛn sɛnɛ wɔtɛ wagate le ma, ka wo ma sɛnɛ tɛgɛ wagate.
22 Wo tini be sɛnɛtɔfeŋɛ kunfɔlɛ tɛgɛla wo si Sɛnɛ Tɛgɛ sale ma le. Wo tini ban sɛnɛ wale tɔnɛ ladonna sama la baŋɛ la, wo ni wo tugun sale ma. 23 San dɔndɔ kɔtɔ, kaye bɛ si na le nde Alatala batu koe la, nde bani Isirayila Marige Ala ɲakɔtɔ kunɲama saba. 24 Wo si a taran, n bata duge bɔɔ ɲɔ dugudeŋɛnu bolo, n mɛn ni naa wo la duge naaniŋɛnu matuntun. Awa, wo tini be tagala wo la nde wo Marige Ala ɲakɔtɔ wagate min tɔ, kunɲama saba san dɔndɔ kɔtɔ, mɔgɔ yo te suusɛ wo la duge bosila wo bolo.
25 Wo tini be kolofeŋɛ bɔɔla n ɲɛ sarika la, wo te a basan fondo fɛ lɛbinɛ be min tɔ. Malatanga sale Saya Maleka ma, wo sarika sube te to han saguma.
26 Wo si wo la sɛnɛtɔfeŋɛ kunfɔlɛ bɛ nati nde Alatala wo la Ala batu boŋɛ tɔ.
Wo te baa deŋɛ sube taba a nɛɛnɛ singi je la.»
27 Alatala mɛn ka a fɔ Musa ye, a ko: «Kɛ yamɔrenu sɛbɛ, bayi n be n na lahire kitila ile nun bani Isirayila kaanu nun nde tɛma kɛ yamɔrenu le la.» 28 Musa tota kɔnkɛ kunma Alatala dula tele bi naani, sue anun tele. A ma dɛgɛ dɔmɔ, a ma je min. Alatala ka yamɔri taŋɛ minnu fɔ Musa ye nun, a ka wonu sɛbɛ wo walanu ma, minnu mu lahiri lakotireŋɛ la.
Musa la saagireŋɛ daaka tɔ
29 Wo kɔma, Musa jigita bɔɔla Turisinina kɔnkɛ kunma, wo wala fila be bitaren a bolo, minnu mu lahiri lakotireŋɛ seedeɲɔgɔya la. A jigi tɛmuɛ, a ɲakɔtɔ be nɔɔrɔren ale nun Ala la sumuŋɛ sabu la, kɔnɔ a ma a lɔn. 30 Harona nun bani Isirayila kaanu ka Musa lasaga; anu to ka a yen a ɲakɔtɔ be nɔɔrɔren wo la, anu kilanta anu madonna a la. 31 Kɔnɔ Musa ka anu kele; wo butɔ, Harona nun jama kuntige bɛ saagita nala a kɛnna, wo kɔma Musa kumata anu ye. 32 Wo tanbi kɔma, bani Isirayila kaa tɔɛ bɛ nata anu madon a la; Musa tugun naata na yamɔre bɛ matanbi anu ma, Alatala ka minnu fɔ a ye Turisinina kɔnkɛ kunma.
33 Musa to ka kuma ban matanbila, a ka a ɲakɔtɔ butin tijaraŋɛ la. 34 Musa tini be donna Alatala kunma sumundula, a be tijaraŋɛ bɔɔla le a ɲakɔtɔ ma han a be bɔɔla wagate min tɔ. A tini bɔɔ, a ni na Alatala la yamɔre matanbi bani Isirayila kaanu ma. 35 Bani Isirayila kaanu tini Musa ɲakɔtɔ yen a be nɔɔrɔren, ale ni a ɲakɔtɔ butin tijaraŋɛ la, han a tini be donna sumundula Alatala dula.