Tuura deŋɛ sanunɛŋɛ
32
Bani Isirayila kaanu to ka a yen, Musa bata mɛ jigi koe la bɔɔla kɔnkɛ kunma, jama naata na Harona digii ma, anu ka a fɔ a ye, anu ko: «Ile! Ala do ɲiɲa mɔ ye, min si sɔ mɔ ɲatɔ, bayi ale Musa min ka mɔ labɔɔ Misira duge tɔ, mɔ ɲan ma a lɔn fenfen min be a masɔtɔren.» 2 Harona ka a fɔ anu ye, a ko: «Awa, sanu tololadeŋɛnu min be wo la musenu anun wo la den kayireŋɛnu nun wo la den musereŋɛnu tole tɔ, wo a bɛ bɔɔ wo ni a nati n ɲɛ.» 3 Wo butɔ, jama bɛ ka anu la sanu tololadeŋɛnu bɔɔ anu tole tɔ, anu nata anu don Harona bolo. 4 A ka sanu tololadeŋɛ bɛ labita anu bolo, a ka anu lakunɛn, a ka a ɲiɲa tuuradeŋɛ la. Bani Isirayila kaanu ka sɔnkɛ layɛlɛ, anu ko: «Wo mɔ la ala le ka, min ka wo mɔ labɔɔ Misira duge tɔ!» 5 Harona to ka wo yen, a ka sarika bɔɔ dula sɔ wo tuuradeŋɛ ɲatɔ, a ka a fɔ a kulɛ mayɛlɛreŋɛ la: «Sinan, murade si sɔ le Alatala ye!» 6 Wo tabantaka, anu wulita saguma piri, anu ka sarika bintannɛŋɛnu bɔɔ anun kanunteya sarikanu. Mɔgɛnu sigita anu ka dɔmɔre ma, anu ka minfeŋɛ min. Wo kɔma, anu wulita, anu be anu diyanankoe mala.7 Anu tota wolo tɔ han Alatala fɔlɔta kumala Musa ye, a ko: «Jigi ba teriya la, i la jama i ka min nabɔɔ Misira duge tɔ, anu bata murutɛ. 8 N be anu yamɔriren kila min na, anu bata anu kɔ sɔ a la kɛ teriya tɔ: anu bata tuuradeŋɛ ɲiɲa anu fan ye sanu lakunɛndeŋɛ la, anu be sujuduren wolo ye, anu ni sarika dii a ma, anu mɛn ni to a fɔla a ma: ‹Bani Isirayila kaanu! Wo mɔ la ala le ka, min ka wo mɔ labɔɔ Misira duge tɔ!›» 9 Alatala mɛn ka a fɔ Musa ye, a ko: «N ka a lɔn kɛ jama mu kanbɛlɛŋɛ le la. 10 Kɔtɛ, a to n ni n na dumɛ labɔɔ anu ma, n ni anu la ko lamɔdɛ. Kɔnɔ n si ile ma jama banba tige la.»
11 Kɔnɔ Musa ka Alatala madiya, a la Ala, a ko: «Alatala, fen de be a maren i la dumɛ sɛnbɛ be koloyaren i la jama ma, i ka min nabɔɔ Misira duge tɔ, i sɛnbɛ banba la nun i la nɔɛ bɛ la? 12 I be diren de ba Misira kaanu ni a fɔ: ‹Ala ka kɛ mɔgɛnu labɔɔ mɔ la duge tɔ a la hanigi koroŋɛ le la, alako a ni taga anu faga kɔnkɛnu tɔ, a ni anu la ko ban duge kunma›? Ee, n Marige, i juse majigi i la jama ye, diɲa ko koroŋɛ ma koe la i be diren min mala i la jama la. 13 I ni lahire talɔn i ka min kiti i nun i la jondeŋɛnu Iburahima nun Isiyaka nun Yaguba tɛma, i ka i lakali i yɛtɛ tɔgɛ la, i ka a fɔ anu ye: ‹N si wo bɔnsɛ lasiya le iko loolenu be siyaren ki min na kantɔ. N ka duge min na ko lahire jigan wo bɔnsɛ ye, n si a dii le anu ma, a ni ma anu tɛŋɛ la kudai.› » 14 Wo butɔ, Alatala diɲata ko koroŋɛ ma koe la a be diren min mala a la jama la.
15 Musa ka a firifiri a jigita bɔɔla kɔnkɛ kunma, kuru wala fila be bitaren a bole la, minnu be maren Ala la lahire seedeɲɔgɔya la. Wo walanu sɔngɔ fila bɛ be sɛbɛren. 16 Ala le yati ka wo walanu ɲiɲa, ale le mɛn ka anu sɛbɛ. 17 Yosuwe to ka jama sɔnkɔ sɔnkɔ kulɛ mɔɛ, a ka a fɔ Musa ye, a ko: «A be toren iko kɛlɛ girinba le be daaka tɔ.» 18 Musa ka a jaabi, a ko: «Kɛlɛ kunnawule sɔnkɔ sɔnkɛ ma de, kunmajige sɔnkɔ sɔnkɛ tugun ma! Nde be murade ɲagaliŋɛ sɔnkɔ sɔnkɛ le mɔɛla.»
19 Anu la sutuyareŋɛ daaka la, Musa ka wo tuuradeŋɛ sanunɛŋɛ yen, jama be dɔŋɛ dɔnna a ye. A juse yɛlɛta kisanna, a ka wo wala fila lafili minnu be bitaren a bole la, anu mafarata kɔnkɛ kɔtɔ. 20 Wo kɔma, anu ka tuuradeŋɛ min ɲiɲa, a ka wo jigan a ka a lafili ta tɔ, a ka a muɲunkun, a ka wo buguta kasan je tɔ, a ka wo dii bani Isirayila kaanu ma anu ni a min.
21 Wo kɔma, a ka Harona maɲininka, a ko: «Kɛ jama ka fen de ma i la, han i be anu sɔren kɛ junubu banba wale ma koe la?» 22 Harona ka a jaabi, a ko: «N tige, i kana dumɛn n ma, ile yati ka kɛ jama lɔn anu si ko koroŋɛ ma teriya la. 23 Anu nata le n dula, anu ko: ‹Ala do ɲiɲa mɔ ye, min si sɔ mɔ ɲatɔ, bayi ale Musa min ka mɔ labɔɔ Misira duge tɔ, mɔ ɲan ma a lɔn fenfen min be a masɔtɔren.› 24 Nde tugun ka a fɔ anu ye: ‹Sanuɛ be minnu bolo anu ká a bɔɔ!› Wo butɔ, anu ka sanuɛ nati. N ka a lafili ta tɔ, awa kɛ tuuradeŋɛ sanunɛŋɛ bɔɔta wo butɔ kisanna.»
25 Wo bɛ butɔ, Musa ka a yen, Harona bata jama boloka, anu ni anu sagoe ma, han wo koe ni nɔ mala anu majele koe la anu jaguenu bolo. 26 Wo butɔ, Musa tagata sɔ daaka dondula tɔ, a ka a fɔ a kulɛ mayɛlɛreŋɛ la, a ko: «Minnu be Alatala ye, wo na n ma!» Lewi bɔnsɛ jama bɛ nata madɛn a dula. 27 A ka a fɔ anu ye, a ko: «Alatala, bani Isirayila kaanu la Ala be kɛ yamɔre saren: ‹Bɛ ni a la faŋɛ bita a bole la, ka daaka bɛ takuntu; anu keta bonda yo ma, bɛ ni a baabadɔndɛ nun a kafuɲɔgɛ nun a sigiɲɔgɛ faga.› » 28 Lewi bɔnsɛ jama tota Musa kulɛ kɔma. Wo lun dɔndɛ, anu ka mɔgɔ wulu saba le faga bani Isirayila kaa la. 29 Musa ka a fɔ Lewi bɔnsɛ ye, a ko: «Bi wo bata sɔ Alatala la wale ma koe la, bayi wo ma sikkɛ wo la deŋɛnu nun wo baabadɔndɛnu faga koe la. Wo butɔ, Ala bata barikɛ sa wo la ko tɔ bi!»
Musa la Ala madiya koe junubu kafare la
30 Wo tabantaka, Musa ka a fɔ jama ye, a ko: «Wo bata junubu banba ma. Kɔtɛ, n be tayɛlɛla le kɔnkɛ kunma Alatala ma. Tumado, n si nɔ Ala madiyala, a ni wo la junube kafari.» 31 Musa tatagata Alatala dula, a ka a fɔ a ye: «Aa! kɛ jama bata junubu banba ma, anu ka ala do ɲiɲa a sanunɛŋɛ la. 32 Kɔtɛ, ka i diɲata anu ye, awa. Ka i ma diɲa anu ye, yandi, i ni n tɔgɛ bɔɔ i la wala tɔ, i be mɔgɔ kisireŋɛ tɔgɛnu sɛbɛren min tɔ.» 33 Alatala ka Musa jaabi, a ko: «Ade, ka min ka junube sɔtɔ n na, n be wolo tɔgɛ bɔɔla n na malakisi wala tɔ. 34 Awa, taga kɔtɛ, i ni jama doni dula tɔ, n ka ka min na ko fɔ i ye, n na maleka si sɔ i ɲatɔ. Kɔnɔ lun do si naa ke le, n si anu bita le anu la junube la ko la.» 35 Alatala ka bani Isirayila kaanu bita le, bayi anu ka a fɔ le Harona ye, aa a ni tuuradeŋɛ ɲiɲa anu ye.