Den fɔlɛnu la ko sariya
13
Alatala kumata Musa ye, a ko:
2 «Wo den kayiren fɔlɛ bɛ kɛrɛkɛrɛ n ɲɛ. A mata mɔgɛ tɛŋɛ la ba, bani Isirayila kaanu tɛma, a mata kolofeŋɛ tɛŋɛ la ba, den kayiren fɔlɛ bɛ nde le tan mu anu la.»
Musa la kuma jama ye
3 Musa ka a fɔ jama ye, a ko: «Wo bi lɔ́gɛ́ talɔn wo bɔɔta jonya tɔ lun min na Misira, bayi Alatala sɛnbɛ le ka wo labɔɔ ɲɔ. Wolo mu, fondo lɛbini tige te dɔmɔ wo lun.
4 Wo be bɔɔla bi le, wo mɔ la dɔmɔ tɔnsɛnu mɔ kare la.
5 Alatala tini wo lake lun min na duge tɔ, a ka a kali wo benbanu ye min dii koe la wo ma, Kanana kaanu, Hɛti kaanu, Amɔri kaanu, Hiwi kaanu, anun Jebusi kaanu be sabatiren ka min na, nɔnɛ nun kumɛ te ban duge min tɔ, wo ni kɛnɛ Dɛgɛ Lɛbinibɔnɛ sale mala Alatala la biliya butɔ kɛ kare le la:
6 wo tɛmuɛ le, wo be dɛgɛ lɛbinibɔnɛ le dɔmɔla tele wɔrɔwila butɔ. A tele wɔrɔwila luŋɛ sale le mu, Alatala la biliya butɔ.
7 Tele wɔrɔwila butɔ, dɛgɛ lɛbinibɔnɛ le be dɔmɔla. Lɛbinɛ be dɛgɛ min tɔ, a kana yen wo bata. Lɛbinɛ tugun kana yen wo la naaniŋɛnu bɛ tɔ.
8 Wo lun, wo si a masifɛ le wo la deŋɛnu ye, wo ni a fɔ: ‹Mɔ be kɛ sale mala ko le la, Alatala bata min ma mɔ ye mɔ bɔɔ tɛmuɛ Misira duge tɔ.›
9 Kɛ sale si ma le wo ye iko tɔnkuma min be saren wo bole tɔ anun wo tindɛ tɔ. Wolo si a ma Alatala la sariya si to wo da tɔ, bayi Alatala le ka wo labɔɔ Misira a sɛnbɛ la.
10 San yo san wo si kɛ yamɔre makanta a wagate ma.
11 Alatala tini wo lake Kanana kaanu la duge tɔ wagate min tɔ, a tini a dii wo ma iko a ka a kali ki min na wole nun wo benbanu ye,
12 wo si den kayiren fɔlɛ bɛ to le Alatala bolo, hali kolofeŋɛnu minnu be wo bolo anu la den fɔlɛ bɛ. A kayima bɛ mu Alatala le tɛŋɛ la.
13 Sofale kaye bɛ be kunkala saaka kontoŋɛ le la ka wo ma sikule. Ka wo ma a kunka, wo ni ale kaŋɛ kɔma kati. Wo ni wo la den kayiren fɔlɛnu tugun kunka wo la deŋɛnu tɛma.
14 Ka wo la deŋɛ tagata wo maɲininka sinan: ‹Kɛ kunka koe be fen yitaren?›, wo si a jaabi: ‹Alatala sɛnbɛ le ka mɔ labɔɔ jonya tɔ Misira.
15 Firauna to be balanden nun kosi mɔ boloka koe la mɔ ni taga, Alatala ka den fɔlɛ bɛ faga Misira duge tɔ, ka bɔɔ mɔgɛnu la den fɔlɛ ma han ka ke kolofeŋɛnu la den fɔlɛ ma. Wo koe le be a maren, wo mɔ be kolofeŋɛnu la den kayiren fɔlɛ bɛ diila Alatala ma sarika la, mɔle tugun na den kayiren fɔlɛ bɛ be kunkala le deŋɛnu tɛma.›
16 Wo yamɔre si naa to le iko tɔnkuma min be wo bole tɔ anun wo tindɛ ma, bayi Alatala sɛnbɛ le ka wo mɔ labɔɔ Misira.»
Kulunyuma ba tɛgɛ koe
17 Firauna to ka jama boloka anu ni taga, Ala ma anu kun sɔ Filisiti duge kila tɔ, hali wolo to sutu, bayi Ala ka a fɔ le: «Ka jama ka a yen anu be anu kɛlɛla, anu si naa nimisa le anu bɔɔ koe la Misira, han anu mɛn ni tasaagi ɲɔ.»
18 Ala ka a ma jama ka kila mamilin janfue tɔ, Kulunyuma ba mafanna. Bani Isirayila kaanu to bɔɔta Misira duge tɔ, koe bɛ be anu bolo.
19 Musa ka Yusufu kolenu doni a fɛ, bayi Yusufu ka bani Isirayila kaanu lakali le nun wo koe la, a ka a fɔ: «N be laaren Ala si naa le hinnɛ wo la. Wo tɛmuɛ, wo si n kolenu doni wo fɛ anu ni yanfaya yan na.»
20 Bani Isirayila kaanu bɔɔta Sukoti saa tɔ anu tagata madɛn Etami janfue dala.
21 Anu taga tɛmuɛ, Alatala le be sɔren anu ɲatɔ. Tele tɔ, anu be a yenna a luuture madɛnden kɛɲa le ma a ni kila yita anu la, sue tɔ tugun, anu be a yenna luuture malanna kɛɲa le ma, min be banta lakɛnɛla anu ye, alako anu ni nɔ tagamanna sue nun tele la.
22 Luuture madɛndeŋɛ bele bɔɔla jama ɲatɔ tele tɔ, luuture malanna tugun be ɲɔgɔnna le sue tɔ.