Sara la fagareŋɛ
23
Sara ka san kɛmɛ san mugan nun wɔrɔwila le sɔtɔ simaya la.
2 A fagata Kiriyati Araba saa tɔ le, ɲɔ mɛn tɔgɔ le Heburɔn, a be Kanana duge tɔ le. Iburahima belebeleta Sara la ko la, a mɛn dita.
3 Iburahima bɔɔta a la musu Sara fure kɛnna, a kumata Hɛti bɔnsɛ ye,
4 a ko: «Nde mu luntaŋɛ le la, n be sigiren wo bata yan. Wo dula do san n ma, alako n ni a ma gaburudula la, n ni n na muse mandi ɲɔ, a ni yanfaya n na.»
5 Hɛti bɔnsɛ ka Iburahima jaabi, anu ko:
6 «Mɔ tige, i tolomasɔ mɔ kulɛ la! Ala bata i ma kuntige la mɔ tɛma yan. Ka i dita i la muse mandila mɔ la gaburudula do tɔ, ka min ka i hɛnɛ, a mandi ɲɔ. Mɔgɔ yo te nɔ sɔtɔla mɔ tɛma yan min si nɔ balanna i ye i la muse fure mandi koe la a la gaburudula tɔ.»
7 Iburahima wulita, a ka a majigi a ka Hɛti bɔnsɛnu lawali sa, minnu be ɲɔ saa tɔ.
8 A ka a fɔ anu ye, a ko: «Wo tolomasɔ, ka wo sɔnta n ni n na muse fure mandi wo la gaburudula tɔ a ni yanfaya n na, wo ni Sohari la den kayireŋɛ Efurɔn mataran n ɲɛ,
9 fanmɛ min be a bolo Makipela, a la duge la baŋɛ tɔ, a ni wo san n ma. Ka a ka nafule min kɔnte fɔ, n si wo don a bolo wo bɛ ɲala, alako wo dula ni ma n na fure mandidula la.»
10 Wo ka a taran, Efurɔn yɛtɛ be sigiren Hɛti bɔnsɛ tɛma ɲɔ. Ale tugun mu Hɛti bɔnsɛ le la. A ka Iburahima jaabi, Hɛti bɔnsɛ ɲala anun mɔgɛnu minnu bɛ be naren mamadɛndula tɔ, saa dondula.
11 A ka a fɔ Iburahima ye, a ko: «N tige, i tolomasɔ n na kuma la. I bele a sanna de! N be duge diila le i ma, fanmɛ min be ɲɔ n be wo tugun diila i ma. N be anu diila i ma le, n bareŋɛnu ni ma n seede la. Taga i la muse fure mandi ɲɔ.»
12 Iburahima mɛn ka a majigi saa mɔgɛnu ɲala, a ka anu lawali sa.
13 A ka a fɔ Efurɔn ye anu bɛ ɲala, a ko: «I tolomasɔ n na tun! N si duge sɔŋɛ don de i bolo, i ni a labita, alako n ni taga n na muse fure mandi ɲɔ.»
14 Kɔnɔ Efurɔn ka Iburahima jaabi, a ko:
15 «N tige, i tolomasɔ n na. Kɛ duge sɔŋɛ te tanbi kaalisi kole kɛmɛ naani la. Wo mu fen na nde nun ile tɛma? Taga i la fure mandi.»
16 Efurɔn ka kaalisi kɔnte min fɔ, Iburahima sɔnta wo la. A ka wo kaalise kɔnti Hɛti bɔnsɛ bɛ ɲala a ka a don Efurɔn bolo. Wo kaalisi kolo kɛmɛ naanɛ le kɔnte be tabɛnden julanu be kaalise min nawalila nun wo wagate ma.
17 Wo butɔ, Efurɔn na duge min be Makipela,
Mamire tabɛŋɛ tɔ,
fanmɛ nun lɔgɔ kutenu
min bɛ be sɔren duge naaniŋɛnu tɔ,
18 wo bɛ mata Iburahima tɛŋɛ la.
Wo Hɛti bɔnsɛ anun mɔgɛnu minnu nata mamadɛndula tɔ saa dondula,
anu bɛ bata ma seede la.