Ala la Iburahima mafɛlɛ koe
22
Wo koenu tanbi kɔma, Ala ka Iburahima kele a ka a mafɛlɛ, a ko: «Iburahima.» A ko: «Naamu.»
2 Ala mɛn ka a fɔ a ye: «I la den kayireŋɛ Isiyaka jigan, i la den dɔndɛ, i be min kanuren; i ni taga Mɔriya duge tɔ. N si kɔnkɛ do yita i la ɲɔ. I ni taga wo kɔnkɛ kanna, i ni Isiyaka bɔɔ sarika bintannɛŋɛ la.»
3 Iburahima wulita saguma piri a ka sarika bintan lɔgɛ fara, a ka a la sofale tabɛn. A ka mɔgɔ fila jigan a la walilanu tɛma, sa a la den kayireŋɛ Isiyaka kunma, anu bɛ bɔɔta anu tagata Ala ka ka min na ko fɔ a ye.
4 Anu ka tele fila tagamaŋɛ ma. A tele saba luŋɛ, Iburahima ka a ɲa lawuli, a ka kɔnkɛ yen kan yanfa.
5 Iburahima ka a fɔ a la walila fila ye, a ko: «Wo nun sofale ni to yan; mɔ nun n na deŋɛ ni taga Ala batu wo dula tɔ. Mɔ mɛn si tasaagi le yan.»
6 Iburahima ka sarika bintan lɔgɛ sigi a la den kayireŋɛ Isiyaka kunma, a ka a la mure jigan anun ta kenbue. Anu fila bɛ tagata ɲɔgɔn na.
7 Isiyaka ka a fɔ a baaba Iburahima ye, a ko: «N baaba.» Iburahima ko: «Naamu.» Isiyaka ko: «Ta kenbue anun lɔgɛ be mɔ bolo. Saakadeŋɛ be mina le min be mala sarika bintannɛŋɛ la?»
8 Iburahima ka a jaabi, a ko: «N na den, saakadeŋɛ min be mala sarika bintannɛŋɛ la, Ala yɛtɛ le be wo koe ɲatabɔla.» Anu fila bɛ tatagata ɲɔgɔn na.
9 Anu to keta kɔnkɛ tɔ, Ala ka ka min na ko fɔ a ye nun, Iburahima ka sarika bintandula ɲiɲa ɲɔ, a ka lɔgɛnu sa ɲɔ. Wo kɔma, a ka a la den kayireŋɛ Isiyaka kiti, a ka a lasa sarika bintandula tɔ lɔgɛnu kunma.
10 Wo kɔma, Iburahima ka a bole lafonti a ka mure jigan, a ni a la den kayireŋɛ kan natɛgɛ.
11 Wo tɛmuɛ le, Alatala la maleka ka Iburahima kele ka bɔɔ saŋɛ tɔ kisanna, a ko: «Iburahima! Iburahima!» Iburahima ko: «Naamu!»
12 Maleka mɛn ko: «I kana i bole lake deŋɛ ma de! I kana fenfen ma a la. N bata a lɔn kɔtɛ i be kilanden Ala la. Wolo ka a ma i ma balan i la den kayiren dɔndɛ diila n ma.»
13 Iburahima ka a kuŋɛ lawuli, a ka a kɔma tafɛlɛ, a ka saaka kontoŋɛ yen kitiren a binanu ma bapɛnu tɛma. Iburahima tagata a nati, a ka a faga sarika bintannɛŋɛ la, a la den kayireŋɛ faliŋɛ la.
14 Iburahima ka wo dula tɔgɔ sa: «Alatala si koe ɲatabɔ». Wolo mu mɔgɛnu be a fɔla bi: «Koe be ɲatabɔla Alatala la kɔnkɛ le tɔ.»
15 Alatala la maleka ka Iburahima kele ka bɔɔ saŋɛ tɔ a kunɲama filaɲɔgɛ la.
16 Maleka ko: «Alatala la kuma fɔreŋɛ le mu ka, a ko: I ma balan i la den kayiren dɔndɛ diila n ma, wolo mu n bata n kali n yɛtɛ tɔgɛ la.
17 N si barikɛ sa i la ko tɔ koola, n ni i bɔnsɛ lasiya iko loolenu minnu be kantɔ, ka wo ma anu si siya iko mɛɲɛn kole min be ba dala. I bɔnsɛ si naa nɔ sɔtɔ le anu jaguenu kunma.
18 I bata n na kuma bita, dunuya mɔgɛ bɛ be hɛra sɔtɔla ile le bɔnsɛnu fɛ.»
19 Iburahima nun a la den kayireŋɛ tasaagita, anu tagata walilanu taran. Anu bɛ ka kila bita tagala Bɛri-Seba, bayi Iburahima be sabatiren ɲɔ le.
Rebeka la sɔtɔreŋɛ
20 Wo koenu la tanbireŋɛ kɔma, anu ka kiila fɔ Iburahima ye, anu ko: «Milika tugun bata den kayireŋɛnu sɔtɔ i dɔgɔ Nakɔri ye:
21 a la den kayiren fɔlɛ tɔgɔ Utisi, a filaɲɔgɛ tɔgɔ Busa, a sabaɲɔgɛ tɔgɔ Kemuyeli; Kemuyeli ka Aramu sɔtɔ.
22 Milika la den kayiren naaniɲɔgɛ tɔgɔ Kesedi, a ka Haso tugun sɔtɔ, a nun Pilidasi, a nun Yidilafi, a nun Betuyɛli.»
23 Betuyɛli la den musereŋɛ le Rebeka la. Milika ka wo den kayiren sagiŋɛ le sɔtɔ Iburahima dɔgɔ Nakɔri ye.
24 Nakɔri la musu filaɲɔgɛ min tɔgɔ Rehuma, wo tugun ka den kayireŋɛnu sɔtɔ a ye. Wo den kayireŋɛnu tɔgɛnu le ka: Teba, anun Gahamu, anun Tahasi, anun Mahaka.