13
Iburama nun a la muse bɔɔta Misira, a tagata Negɛwu mafanna. A tagata a bolofeŋɛ bɛ fɛ. Luti tugun ka a jokki.
Iburama nun Luti fatan koe
2 Iburama bata ma fondo tigi banba la, kolofeŋɛnu anun kaalise be a bolo, anun sanuɛ.
3 A bɔɔta Negɛwu mafanna, a tanbita madaakadaakala tagala Betɛli. A keta a la tanta sɔ dula kɔtɛ do tɔ. Wo dula be Betɛli nun Ayi saa le tɛma,
4 Iburama ka sarika bintandula ɲiɲa ka min na nun. A mɛn ka Alatala batu a tɔgɛ la ɲɔ.
5 Luti min be Iburama jokkiren, kolofeŋɛ lanmanu nun a banbanu nun mɔgɛ bata siya wo tugun bolo.
6 Iburama la kolofeŋɛnu anun Luti la kolofeŋɛnu siyata wo duge ko. Anu fila bɛ te nɔ kunna kandula dɔndɔ.
7 Wo tɛmuɛ, Kanana kaanu nun Feresi kaanu tugun be sigiren wo duge tɔ. Lun go lun, Iburama la kolofen kantalanu nun Luti la kolofen kantalanu si to sɔnkɔla.
8 Wo butɔ, Iburama ka a fɔ Luti ye, a ko: «Yandi, mɔ kana sɔn sɔnkɛ ni to donna ile nun nde tɛma, tagala i la kolofen kantalanu nun n na kolofen kantalanu tɛma, bayi mɔ mu barenma le la.
9 Kɛ duge bɛ fɛlɛ. Awa mɔ fatan. Ka yanna sɔngɛ le ka i hɛnɛ, i ni yanna jigan. Nde ni to ɲɔ la sɔngɛ la. Ka kala sɔngɛ le ka i hɛnɛ, i ni ɲɔ le jigan, nde ni to yanna la.»
10 Luti ka a ɲa lataga a ka Yurudɛn fara kɛnɛ yen han Soware saa mafanna. Je be a bɛ tɔ a ɲinma la. Wo dula be toren iko Alatala la laakɔ ɲinma. A be toren iko Nili kɔɛɛ je Misira jamanɛ tɔ. Kɔnɔ wo ka a taran, Alatala ma Sodɔmu nun Gomori saanu halagi nun.
11 Wo butɔ, Luti ka Yurudɛn fara masubɛ a yɛtɛ ye. A tagata tele yɛlɛ sɔngɛ la, anu fatanta ɲɔgɔnna le.
12 Iburama tota Kanana duge tɔ. Luti kan tagata to wo fara saanu kɛnna. A ka a la tantanu sɔ han Sodɔmu saa dala.
13 Kɔnɔ, Sodɔmu kaanu bata koronya koola. Anu bata ma junubutɔɛ la Alatala ye.
14 Luti nun Iburama la fatandeŋɛ kɔma, Alatala ka a fɔ Iburama ye, a ko: «I ɲa lataga ka bɔɔ i be ka min na ka. I ni bolo ɲinma mafanna fɛlɛ anun bolo mara, anun tele yɛlɛ mafanna anun tele jige.
15 Bayi i ɲa be duge min bɛ la ka, n si wo bɛ dii i nun i bɔnsɛnu ma, a ni ma wo tɛŋɛ la kudai.
16 N si i bɔnsɛ lasiya iko mɛɲɛŋɛ min be duge tɔ. Ka mɔgɔ si nɔ mɛɲɛŋɛ kɔntila, i bɔnsɛ tugun si kɔnti le.
17 Wuli, i ni duge la kanya nun a la yajɛ matagaman, bayi n si a dii le i ma.»
18 Iburama ka a la tantanu bɔɔ, a tagata sabati Mamire la lɔgɔ kutu banba be sɔren dula min tɔ. Ɲɔ be Heburɔn saa dala le. A ka sarika bintandula ɲiɲa Alatala ye ɲɔ.