Ala la kuma Iburama ye
12
Lun do, Alatala kumata Iburama ye, a ko: «Iburama, bɔɔ i la jamanɛ tɔ, bɔɔ i baaba dɔndɛnu tɛma, bɔɔ i baaba la fɔgɛ tɔ. N be duge min yitala i la, i ni taga ɲɔ.
2 N si i ma jama banba tige la.
N si barikɛ sa i la ko tɔ,
n si i tɔgɛ lakoloya.
Mɔgɛnu si hɛra sɔtɔ i fɛ.
3 Mɔgɔ yo mɔgɔ be dubala i ye, n si barikɛ sa le wo tigi la ko tɔ;
mɔgɔ yo mɔgɔ ka i danka n si danka lasaagi le wo tigi ma.
Dunuya see bɛ si hɛra sɔtɔ i fɛ.»
4 Iburama tagata iko Alatala ka a fɔ a ye ki min na. Luti tugun ka a jokki. Iburama bɔɔ tɛmuɛ Harani, a la simaya be san bi wɔrɔwila anun loolu.
5 Iburama ka a la muse Sarayi jigan, anun a dɔgɛ la den Luti. Feŋɛnu min bɛ be a bolo a ka a bɛ jigan, anun a la joŋɛnu bɛ, a ka minnu sɔtɔ Harani, a ka wonu bɛ jigan. Anu bɔɔta, tagala Kanana duge tɔ. Anu la kereŋɛ ɲɔ,
6 anu ka ɲɔ takuntu han anu tagata ke Sisɛmu, More la lɔgɔ kutu banba be sɔren dula min tɔ. Wo tɛmuɛ, Kanana kaanu be Kanana duge tɔ.
7 Alatala ka a yɛtɛ labɔɔ Iburama ma, a ka a fɔ a ye, a ko: «N si kɛ duge bɛ dii le i bɔnsɛ ma.» Iburama ka sarika bintandula ɲiɲa Alatala ye ɲɔ, Ala min ka a yɛtɛ labɔɔ a ma.
8 Wo kɔma, Iburama bɔɔta ɲɔ, a tagata kɔnkɛnu mafanna, Betɛli saa tele yɛlɛ tɔ. A ka a la tanta sɔ ɲɔ. Betɛli saa tota a tele jige. Ayi saa tota a tele yɛlɛ. A ka sarika bintandula ɲiɲa Alatala ye ɲɔ, a ka Alatala matɔgɔ, a ka a batu.
9 Wo kɔma Iburama tanbita madaakadaakala, a tagata Negɛwu mafanna.
Iburama la taga Misira jamanɛ tɔ
10 Wo tɛmuɛ le kɔnkɛ donta jamanɛ la; wo bɛlɛyata le han. Wolo ka a ma, Iburama jigita Misira jamanɛ tɔ, a ka wagati do ma ɲɔ.
11 Anu don tɛmuɛ Misira, Iburama ka a fɔ a la musu Sarayi ye, a ko: «I tolomasɔ, n ka a lɔn i kɛɲa bɛnta.
12 Ka Misira kaanu ka i yen, anu si a fɔ le n na muse le mu i la, wo butɔ anu si naa nde faga le, ile ni to baluren.
13 Wo butɔ, yandi, i ni a fɔ anu ye, n dɔgɔ musuma le mu i la, alako ile sabu si a ma anu ni n mabita a ɲinma la. Wo butɔ, n si to baluren ile la ko la.»
14 Iburama to keta Misira, Misira kaanu ka a yen Sarayi kɛɲa bɛnta han a tanbita a tɔ.
15 Misira mansa la kɔmasɔlanu ka kɛ muse matɔgɔ a ye, anu ka a doni a bata.
16 Kɛ muse la ko sabu la, mansa ka Iburama mabita a ɲinma la: Iburama ka baanu sɔtɔ, anun ningenu, anun sofale kayenu, anun a musenu, anun jon kayenu, anun a musenu, anun ɲɔgɔmɛnu.
17 Kɔnɔ Alatala ka bandiya koroŋɛ sa Misira mansa nun a la denbayanu ma, Iburama la musu Sarayi la ko la.
18 Wo kɔma, Misira mansa ka Iburama kele, a ka a fɔ a ye: «I be fen maren n na? Fen de i ma a fɔ n ɲɛ i la muse le mu kɛ la?
19 I ka a fɔ fenna i dɔgɛ le mu, han n bata a ma n na muse la? Kɔtɛ i la muse le ka, a jigan wo ni taga!»
20 Wo kɔma Misira mansa ka yamɔre dii a la walilanu ma, anu ni Iburama labɛnbɛn, anun a la muse, anun anu bolofeŋɛ bɛ.