Kabila nun Habila
4
Adama nun a la musu Hawa kafuta. Hawa ka bue jigan ka Kabila sɔtɔ. Hawa ko: «N bata den kayireŋɛ sɔtɔ Alatala sabu la.»
2 Wo kɔma, a mɛn ka bue talabɛn a ka Kabila dɔgɔ Habila sɔtɔ. Habila mata kolofen kantala la. Kabila mata sɛnɛ sala la.
3 Tɛmuɛ do latanbireŋɛ kɔma, Kabila ka min sɔtɔ a la sɛnɛ wale tɔ, a ka wonu donu jigan a ka a dii sarika la Alatala ye.
4 Habila tugun ka a la kolofeŋɛnu den fɔlɛnu donu faga a ka anu bɔɔ sarika la Ala ye anun anu tule. Alatala ka Habila nun a la sarika jigan,
5 kɔnɔ a ma Kabila nun a la sarika jigan. Kabila mɔnɛta wo tɔ, han a ɲakɔtɔ masarata.
6 Alatala ka a fɔ Kabila ye, a ko: «I be mɔnɛren fenna han i ɲakɔtɔ bata masara?
7 Ka i ka ko ɲinma ma, i si kunnawule sɔtɔ le, kɔnɔ ka i ma ko ɲinma ma, ko koroŋɛ be i kɔnɔnna le, a ni giripɛ i ma. A be katala a ni nɔ sɔtɔ i ma, kɔnɔ ile tugun ka kata i ni nɔ sɔtɔ ale kunma.»
8 Awa, Kabila kumata a dɔgɔ kayima ye. Anu to tagata ɲagama butɔ, Kabila boeta a dɔgɛ Habila ma, a ka a faga.
9 Wo kɔma, Alatala ka a fɔ Kabila ye, a ko: «I dɔgɛ Habila be mina?» Kabila ko: «N ma a dula lɔn, ka nde le be a kantala?»
10 Wo kɔma, Ala ka a fɔ a ye, a ko: «I ka fen de ma ka? Base min bɔɔta i dɔgɛ ma a sata duge tɔ, wo base kulɛ be bɔɔla duge tɔ a ni ke n ma ka a fɔla n ni a tɛŋɛ yɔgɔ.
11 Kɔtɛ i bata danka, bayi i bata i dɔgɛ faga. I dɔgɛ base be duge min tɔ, i si a lawali, kɔnɔ i te a tɔnɛ sɔtɔ.
12 Ka i ka duge sɛnɛ, a te harige kunma sa i ye. I si to i dɔrɔn, ka to tagaman tagamanna duge kunma.»
13 Kabila ko Alatala ma: «I bata jihade min sa n kunma, a kolo n ko, n te a nɔ.
14 I bata n bee n ni bɔɔ sɛnɛ wale tɔ bi, fɔ n ni taga dogon n ni yanfaya i la. N si to n dɔrɔn, n ni ma tagaman tagamanna la duge kunma. Min tini n masɔtɔ a ni n faga.»
15 Alatala ka a fɔ a ye: «Ade, ka mɔgɔ min yo ka i faga, n si mɔgɔ wɔrɔwila faga i tɛŋɛ yɔgɛ la.» Wo kɔma, Alatala ka manditɛ sa Kabila ma, alako ka mɔgɔ min ka Kabila yen, a kana a faga.
16 Awa, Kabila bɔɔta Alatala ɲala, a tagata sigi Nodi jamanɛ tɔ, Edɛn tele yɛlɛ tɔ.
Kabila bɔnsɛ
17 Kabila nun a la muse kafuta. A la muse ka bue jigan, a ka den kayireŋɛ sɔtɔ, a ka a tɔgɔ sa Henoki. Wo la sɔtɔreŋɛ kɔma, Kabila ka saa do labɔɔ, a ka a la den kayireŋɛ Henoki tɔgɛ sa wo saa kunma.
18 Henoki ka Iradi sɔtɔ. Iradi ka Mehuyayilu sɔtɔ. Mehuyayilu ka Metusayelu sɔtɔ. Metusayelu ka Lameki sɔtɔ.
19 Lameki ka musu fila jigan. A fɔlɛ tɔgɔ Ada. A filaɲɔgɛ tɔgɔ Silasi.
20 Ada ka den kayireŋɛ sɔtɔ, a ka a tɔgɔ sa Yabali. Mɔgɛnu minnu be sigila tanta kɔtɔ, anu ni anu la kolofeŋɛnu kanta, Yabali le mata wonu benba la.
21 Yabali dɔgɛ tɔgɔ Yubali. Ale mata kɔndin botegelanu anun serede felanu benba la.
22 Silasi tugun ka den kayireŋɛ sɔtɔ, a ka a tɔgɔ sa Tubali Kabila. Wo mata numɛ le la. Ale tota sila anun nɛgɛ fiŋɛ dadiyamanu le dala. Tubali Kabila dɔgɔ musuma tɔgɔ Naama.
23 Lameki ka a fɔ a la musenu ye, a ko:
«Ada nun Silasi, wo ni hakkɛ to n ɲɛ!
N na musenu, wo ni wo tolomasɔ n na kuma la!
Ka kaye min ka n botege, n si a faga n tɛŋɛ yɔgɛ la.
Ka kamareŋɛ min tugun ka n maba, n si a faga n tɛŋɛ yɔgɛ la.
24 A fɔla ka mɔgɔ min ka Kabila faga,
a tɛŋɛ si yɔgɔ wo tigi la kunɲama wɔrɔwila,
awa, ka mɔgɔ min ka Lameki kan faga,
wo tɛŋɛ si yɔgɔ kunɲama bi wɔrɔwila sigidula wɔrɔwila.»
Sɛti nun Enosi
25 Adama nun a la muse mɛn kafuta. A la muse ka bue jigan, a ka den kayireŋɛ sɔtɔ, a ka a tɔgɔ sa Sɛti, a ko: «Ala to bata den kayireŋɛ do dii n ma Habila faliŋɛ la, Kabila ka min faga.»
26 Sɛti tugun ka den kayireŋɛ sɔtɔ, a ka a tɔgɔ sa Enosi. Bɔɔla wo wagate le, mɔgɛnu fɔlɔta Ala batula Alatala tɔgɛ la.