Dɛnkɛnɛyabaganu la ɲatɔnkanu
3
Tɔɲa kuma beeyareŋɛ pɔsi le mu ka. Ka a sɔgɔ be mɔgɔ min na a ni ma dɛnkɛnɛyabaga jama la ɲatɔnka la, wo tigi be sɔdula ɲinma le ɲiniren wo la. 2 Wo butɔ, ɲatɔnka bɛnta le, a ni ma mɔgɔ la kɔnɔ yo bele min na, mɔgɛ min be musu dɔndɔ pɛti le sigiren, mɔgɛ min tagasita, min be tagamanna hakkilimaya nun teleŋɛ butɔ, min si mɔgɔ nareŋɛnu lasɛnɛ biliya butɔ, a mɛn kusan mɔgɛnu lakaranna a ɲinma la. 3 A ma bɛn a ni ma siisilá la, ka wo ma mɔgɛ min juse teri, kɔnɔ a bɛnta mala mɔgɔ le la, min si bɛnɲɔgɔya ɲini, a juse sɛɛta, a ma miila, 4 a kusan a tɛn denbayanu latagamanna a ɲinma la, a la deŋɛnu ni a la yamɔre jokki ka a biliya. 5 Bayi ka mɔgɛ ma nɔ a tɛn denbaya latagamanna a ɲinma la, wo si nɔ Ala la dɛnkɛnɛyabaga jama dankunna kama le ba? 6 A ma bɛn wo ɲatɔnka ni ma mɔgɔ la min be bɔɔren donna dɛnkɛnɛya tɔ, ka wo ma a si ma wasumante le la, wo si a ma a ni naa ɲagankata sɔtɔ iko Sentanɛ be a sɔtɔren ki min na. 7 A bɛnta le tugun, a ni ma mɔgɛ la, min be seedeɲɔgɔya ɲinma sɔtɔren mɔgɛnu la minnu bele Isayankanu ɲaama, alako mɔgɔ yo kana ko koroŋɛ fɔ a la ko tɔ, a kana jigi Sentanɛ la jule tɔ.Dɛnkɛnɛyabaga jama dɛmannanu
8 Mɔgɛnu minnu be sɔla dɛnkɛnɛyabaga jama dɛmanná la, wonu tugun bɛnta mala mɔgɔ biliyareŋɛ le la. A ma bɛn anu ni ma nɛnfilatige la, ka wo ma beere banba minná. Anu mɛn kana nafule ɲini telenbaliya tɔ. 9 Fɔ anu ni ma mɔgɛnu le la minnu be anu yɛtɛ taakuren anu juse beeyareŋɛ la tɔɲa la ko la, Ala bata dɛnkɛnɛya koe min makɛnɛn. 10 Ande tugun bɛnta lakɔrɔsila le betunna, a ni lɔn ma ka tantan yo ma yen anu la ko tɔ. Wo kɔma, ka kɔnɔ bele anu la, anu si nɔ mala dɛnkɛnɛyabaga jama dɛmannanu la. 11 Anu la musenu tugun bɛnta anu ni ma mɔgɔ biliyareŋɛnu la. Anu ma bɛn anu ni mɔgɛnu la ko koroŋɛ mafɔ, anu bɛnta mala mɔgɔ tagasireŋɛ le la, kuma dɔndɔ tigenu. 12 Wo dɛmannanu bɛnta le, anu ni ma mɔgɛnu la minnu be musu dɔndɔ pɛti le sigiren, anu ni nɔ anu la deŋɛnu latagamanna yugo ɲinma la, anun denbayanu bɛ labɛndeŋɛ. 13 Minnu be sɔren dɛmanná la, ka anu be wale mala a ɲinma la, anu si biliya sɔtɔ le bɛ la, anu mɛn si limaniya siyama sɔtɔ le anu la dɛnkɛnɛya butɔ Ala la mɔgɔ masubɛreŋɛ Isa ma.
Gundo belebele
14 N yili be a ma a te mɛ bitugun n ni taga i fɛlɛdula. Kɔnɔ, n be kɛ bataakɛ sɛbɛla i ma betunna. 15 Ka n tagata mɛ n ma ke i dula, kɛ bataakɛ le be i dɛmanna. Ala la denbaya la tagamanɲa bɛnta a ni to ki min na, kɛ bataakɛ le be wo ɲatabɔla i ye. Ala min be baluren, wo denbaya mu a la dɛnkɛnɛyabaga jama bɛ labɛndeŋɛ le la, minnu be maren tɔɲa tuga la, anu ni tɔɲa tajigan.
16 Iyon, tɔɲa yati le mu, Ala be dɛnkɛnɛya gundo min makɛnɛnden mɔle dɛnkɛnɛyabaganu ma, a kolo, a fɔ koe la:
⸂Ala⸃ be makɛnɛnden ⸂a la mɔgɔ masubɛreŋɛ⸃ wunde yati le tɔ.
Ala Hakkile be a la teleŋɛ yitaren de.
Malekanu ka a yen de.
A la ko kawande mata le seenu tɛma.
Anu dɛnkɛnɛyata a ma dunuya bɛ butɔ.
A layɛlɛta saŋɛ tɔ, a ka nɔɔra sɔtɔ ɲɔ.