Ala mataran koe mɔgɛ bɛ ye
2
N be wo yamɔrila min na a fɔlɛ la: Wo ni Ala mataran, wo ni wo madi a ma, wo ni mɔgɛnu la kɔntɔfili dantɛgɛ a ye, wo ni Ala nuwali sa mɔgɛnu bɛ ye. 2 Wo ni Ala mataraŋɛ ma mansanu ye, anun mɔgɛnu bɛ ye minnu be wo mɔ yamɔrila, alako wo mɔ ni mɔ la dunuya tatɛgɛ doni sabare nun jususa butɔ, wo mɔ ni tagaman Ala ɲalakilaŋɛ nun biliya tɔ a ɲinma la. 3 Wolo kaɲin, a mɛn di Ala ye, mɔ lakisilá. 4 Ala be diren de, bɛ ni kisi, anu ni tɔɲa lɔn. 5 Wo butɔ, Ala dɔndɔ kude le mu. Kunma fɔlá dɔndɔ pɛti le be Ala nun mɔgɛnu tɛma. Mɔgɛ le mu min tabɛnden Isa ma, Ala la mɔgɔ masubɛreŋɛ. 6 A ka a yɛtɛ dii sarika la, alako a ni mɔgɛnu bɛ kunsara. Wo koe le be maren seedeɲɔgɔya la Isa la ko tɔ Ala dita a ye wagate min yati tɔ. 7 Ala ka n ma kiilá la n ni wo kuma lake. N te foniya fɔ. ⸂N to be sɔren Ala la mɔgɔ masubɛreŋɛ kɔma⸃, wolo mu n be tɔɲa fɔla, n ko n be kiiren sii tɔɛnu ma, n ni anu karan dɛnkɛnɛya nun tɔɲa la.Musenu anun kayenu yuge
8 Wo butɔ, n be diren de kayenu ni Ala mataran dula bɛ tɔ ka anu bole layɛlɛ kantɔ saŋɛ mafanna, a ni taran de anu juse be saniyanden. Anu kana dumɛn, anu kana sɔnkɔsɔnkɛ layɛlɛ.
9 Musenu kan, n be diren de anu ni anu yɛtɛ majabu yugo ɲinma la min te a ma mɔgɛ juse ni yɛlɛ anu ma, ka donfeŋɛnu don minnu si anu sutura. Anu kana to katala anu la mamajabue ni fatan kunsigi da tasigi koe la, sanu tololadeŋɛnu la, kurunda ɲinmanu la, ka wo ma kutanu la minnu sɔŋɛ bɛlɛ. 10 Kɔnɔ a bɛnta anu la mamajabue ni fatan anu la wali ɲinmanu le la. Wolo kaɲin musenu ye minnu be a fɔren anu be anu la kanunteya toren Ala ma. 11 Karaŋɛ tini be mala, musenu bɛnta le, anu ni anu tolomasɔ sabare nun mamajige butɔ. 12 N te sago dii muse ma, a ni kaye kawandi ka wo ma a ni a yamɔri. Kɔnɔ a bɛnta a ni a sabari. 13 Bayi Adama le fɔlɔ fɔlɔ daata, wo kɔma Hawa naata daa. 14 Sentanɛ ma Adama le latantan, a ka a la muse le latantan han muse ka Ala la yamɔre masɔsɔ. 15 Kɔnɔ Ala be muse lakisila a la den sɔtɛ tɔ, ka a tota dɛnkɛnɛya, kanunteya, saniyaŋɛ anun yuge ɲinma tɔ.