Musu jigan murade Kaana saa tɔ
2
A tele saba luŋɛ, musu jigan murade do mata Kaana saa tɔ min be Galile duge tɔ. Wo ka a taran, Isa nɛɛnɛ be ɲɔ.
2 Anu be Isa nun a la talibenu tugun keleren wo murade tɔ. Anu nata.
3 Wagate do to keta, beere banta. Wo la bandeŋɛ, Isa nɛɛnɛ ka a fɔ a ye: «Beere bata ban kɛnu bolo.»
4 Isa ka a fɔ a ye: «N na, i be diren fen de ye n na? N na wagate ma ke betunna.»
5 Wo butɔ, a nɛɛnɛ tagata a fɔ walilanu ye: «A ka fenfen fɔ wo ye, wo ni wo ma.»
6 Wo ka a taran, lɔndɔ banba kurunɛŋɛ wɔɔrɔ be sigiren ɲɔ, Yahudenu la malasaniyan je safeŋɛ la. Dɔndɔ yo dɔndɔ si nɔ litari bisagin han kɛmɛ nun mugan sala le.
7 Wo kɔma, Isa ka a fɔ walilanu ye: «Wo kɛ lɔndɔ banbanu lafa je la.» Anu tagata anu bɛ lafa han anu dala.
8 A mɛn ka a fɔ anu ye: «Wo do sori lɔndɛ tɔ kɔtɛ, wo ni taga a doni murade parɛn ye.» Anu tagata a doni a ye.
9 Murade parɛn ka a nɛmunɛmu, a ka a taran je bata yɛlɛman beere la. Kɔnɔ a ma wo beere bɔɔdula lɔn, walilanu minnu ka a sori, wonu kan ka a bɔɔdula lɔn. Wo butɔ, a ka musu tige kele,
10 a ka a fɔ a ye: «Mɔgɛ bɛ be beere ɲinma le fɔlɔ diila muradilanu ma. Wonu tini beere siyama min, jɔnɔn beere min ma ke doe la wo ni wo dii. Kɔnɔ fen de ile bata a ɲinma mandi han kɛ wagate?»
11 Awa, Isa ka kɛ-lɛ ma a la kabanako fɔlɛ la Kaana saa tɔ, Galile duge tɔ. Wo butɔ, a ka a la nɔɔra yita ɲɔ, han a la talibenu dɛnkɛnɛyata a ma.
12 Wo tanbi kɔma, Isa nun a nɛɛnɛ, nun a dɔgɔ kayimanu, nun a la talibenu naata na jigi Kapɛrinamu saa tɔ. Anu ma tele siyama ma ɲɔ.
Isa la julanu bee koe Ala batu boŋɛ dala
13 Yahudenu la Hɔrɔya Sale la sutuyareŋɛ, Isa tagata yɛlɛ Darisalamu.
14 A ka a taran, ningi mayitalanu nun saaka nun gabu mayitalanu be sigiren Ala batu bon banba dala. Nafulu mafalinnanu tugun be sigiren anu la teebile kɔma.
15 A ka julenu fugan lonba la, a ka anu nun saakanu, nun ningenu bɛ bee, a ka anu labɔɔ Ala batu bon banba dala, a ka nafulu mafalinnanu la teebilenu laboe, han anu la nafule malansanta.
16 A mɛn ka a fɔ gabu mayitalanu ye, a ko: «Wo anu bɛ bɔɔ yan! Wo kana kɛnɛ n Baaba la boŋɛ mala julaya boŋɛ la.»
17 Wo butɔ, a la talibenu ka a talɔn a be sɛbɛren de, a ko:
«I la batu boŋɛ la ko hanmɛ si n faga le.» a
18 Kɔnɔ Yahude kuntigenu ka a maɲininka, anu ko: «I be tɔnkuma miniman de yitala mɔ la, ka a fɔla Ala bata i yamɔri i ni kɛ ma?»
19 Isa ka anu jaabi, a ko anu ma: «Ka wo ka kɛ hɔrɔma dingira laboe, n si naa a lawuli tele saba kɔtɔ.»
20 Yahudenu ka a fɔ wo butɔ, anu ko: «San bi naani nun wɔɔrɔ le mata kɛ hɔrɔma dingira sɔ koe la, ile si nɔ wo lawulila tele saba kɔtɔ ba?»
21 Kɔnɔ Isa kan be hɔrɔma dingira min ma, wolo mu a bali bangue la.
22 A la talibenu ma wo kuma fahamu, fɔ Isa to wulita fagabaganu tɛma wagate min tɔ, anu naata na a talɔn ka a fɔla, a tota wo fɔla le anu ye nun. Wolo ka a ma, anu naata na laa Ala la sɛbɛre la anun Isa tugun ka kuma min fɔ.
Isa nun Adamadeŋɛ jusu butɔ koe
23 Awa, Isa be Darisalamu wagate min tɔ, anu be Hɔrɔya sale tɔ. Wo butɔ, mɔgɔ siyama be a la tɔnkumanu yenna le a be tola minnu mala. Wolo ka a ma, anu dɛnkɛnɛyata a tɔgɛ ma.
24 Kɔnɔ Isa ma laa wo mɔgɛnu la, bayi a ka Adamadeŋɛ bɛ lɔn.
25 Adamadeŋɛ la ko ɲatabɔla Isa ye, wo sɔdula yo bele, bayi a yɛtɛ be mɔgɛ bɛ jusu butɔ koe lɔnden.