Isa la malasenu
17
Lun do, Isa ka a fɔ a la talibenu ye, a ko: «Sikkɛ bele a tɔ, fɔ koenu ni ma tekku minnu si mɔgɛnu latantan. Kɔnɔ mɔgɛ min be mala sabu la a ni mɔgɛnu latantan, ɲagankata be wo tigi le ye.
2 Yannun wo tige ni kɛ mɔgɔnden hali dɔndɔ latantan, a fisa a ye, anu ni kuru belebele kiti a kaŋɛ la, anu ni a lafili ba tɔ.
3 Wo ni wo yɛtɛ mɛnni!
Ka i bareŋɛ do ka hakkɛ sɔtɔ i la, i ni a lasii. Ka a nimisata, i si diɲa le a ye.
4 Ka i bareŋɛ bata hakkɛ sɔtɔ i la tele dɔndɔ kɔtɔ han kunɲama wɔrɔwila, a mɛn tasaagita i ma tugun kunɲama wɔrɔwila a ni a fɔ aa a bata tuubɛ, i si diɲa le a ye.»
5 Lun do, Isa la kiilanu ka a fɔ a ye, anu ko: «Marige, do sa mɔ la dɛnkɛnɛya kunma.»
6 Marige Isa ka anu jaabi, a ko: «Hali wo la dɛnkɛnɛya dɔgɔ iko fondo kole do, a si to le nun, wo ni nɔ a fɔla kɛ lɔgɔ kute ye a ni wutun yan ka taga sɔ ba tɔ, a si wo kulɛ bita le.»
Joŋɛ nun a la wali sɔŋɛ
7 Isa mɛn ko: «Ka i la joŋɛ do bɔɔta sɛnɛ wɔtɔ dula, ka wo ma kolofeŋɛnu kanta dula, ka a donta saa tɔ, ɲɔmɔ le be wo tɛma min si a fɔ le a ye: ‹Na sigi kisanna mɔ ni dɔmɛ dɔmɔ›?
8 Ade! I te a yamɔri, i ko a ma: ‹Teriya i ni dɔmɛ ɲiɲa n ni n daɲini. I ni i tɛ kiti wale la, i be dɔmɛ natila n ɲɛ, han n ni dɔmɔre ban, n ni ji miŋɛ ban. Wo kɔma, ile tugun si dɔmɔre ma i ni je min.›
9 I la joŋɛ yamɔrita wale minnu la, ka a ka wonu ma, a bɛnta le ba i ni a la wali sa?»
10 Isa ko: «Wole tugun be ɲɔgɔnna le. Ala ka wo yamɔri koe min bɛ la, wo tini ban wo mala wagate min tɔ, wo ni a fɔ: ‹Fenfen ma mɔ la fɔ joŋɛ tun, sɔn bele mɔ ye. Mɔ bɛnta min mala, mɔ bata wo ma.› »
Baliwulentɔɛ tan nakendeya koe
11 Isa be tagala Darisalamu wagate min tɔ, a tanbita bɔɔla Samari duge, anun Galile duge naaniŋɛ tɔ le la.
12 A la dondeŋɛ saa lanma do tɔ, baliwulentɔɛ mɔgɔ tan nata Isa labɛndula, anu tagata sɔ kan yanfa,
13 anu ka anu kulɛ labɔɔ a ma, anu ko: «Marige Isa, kinikini mɔ ma.»
14 A to ka anu yen, a ka a fɔ anu ye: «Wo taga wo fan dantɛgɛ sarika lakelanu ye.» Wo butɔ, anu taga tɛmuɛ kila la, anu bɛ saniyanta.
15 Dɔndɔ be anu tɛma, a to ka a yen a bata kendeya, a saagita nala, a tota Ala tantula a kulɛ mayɛlɛreŋɛ la.
16 A boeta Isa kɛn kɔtɔ, a ɲa kɔtɔ tota duge tɔ, a tota a la wali sala. Adun ale mu Samari bɔnsɛ le la.
17 Wo butɔ, Isa ka a fɔ, a ko: «Mɔgɔ tan ma saniyan ba? Mɔgɔ kɔnɔntɛ min be toren, anu be mina?
18 Mɔgɔ yo ma sɔtɔ min saagita a ni Ala tantu fɔ kɛ luntaŋɛ dɔrɔn, Yahude ma min na?»
19 A mɛn ka a fɔ Samari kaa ye, a ko: «Wuli, i ni taga, i la dɛnkɛnɛya bata i lakisi.»
Ala la mansabaya na koe
20 Wo wagate, Farisinu ka Isa maɲininka, anu ko: «Ala la mansabaya be nala muntuma le?» A ka anu jaabi, a ko: «Ala la mansabaya te yen ɲa la.
21 Mɔgɔ yo te naa a fɔ: ‹Ala la mansabaya le ka!›, ka wo ma ‹A be kala!›. Wo ni a lɔn, Ala la mansabaya ɲan be wo tɛma.»
22 Isa ka a fɔ a la talibenu ye, a ko: «Tɛmuɛ do si naa ke, a sɔgɔ si wo bita wo ni nde Adamadeŋɛ la lɔ́gɛ́nu hali tele dɔndɔ yen, kɔnɔ wo te wo yen.
23 Mɔgɛnu tini a fɔ wo ye: ‹Adamadeŋɛ fɛlɛ, a be kala!› ka wo ma: ‹Ale le ka!›, wo kana taga, wo kana bori wo kɔma.
24 Nde Adamadeŋɛ tini be tanala lun min na, n na ko si to iko sangi malaŋɛ be bɔɔla sankole sɔngɔ dɔndɔ tɔ han a ni taga ke a sɔngɛ doe tɔ ki min na.
25 Kɔnɔ a fɛrɛ bele fɔ bi mɔgɛnu ni n ɲagankata betunna koola, anu ni n aɲɛ.
26 Yannun nde Adamadeŋɛ ni tana, koe minnu mata Nuha jamanɛ, wonu ɲɔgɔn si ma.
27 Nuha jamanɛ, mɔgɛnu tota dɔmɔre mala ka minfeŋɛ min, anu tota fute mala, ka muse dii kaye ma. A tota mala ɲɔgɔnna le han Nuha donta kulun banba butɔ lun min na. Wo lun dɔndɛ le banbaraŋɛ nata, a ka mɔgɛ bɛ lasama.
28 Koe tugun minnu mata Luti jamanɛ wonu ɲɔgɔn si ma nde be tanala wagate min tɔ. Luti jamanɛ mɔgɛnu tota dɔmɔre mala le, ka minfeŋɛ min, anu tota fere sanna, ka makite mayita, anu tota kifeŋɛ kila ka bon sɔɛ ma;
29 Luti borita lun min na Sodɔmu saa tɔ, wo lun dɔndɛ le, ta sodanɛŋɛ bɔɔta saŋɛ tɔ, a boeta iko sange, a ka saa mɔgɛnu bɛ halagi.
30 Nde Adamadeŋɛ be tanala lun min na, n tini makɛnɛn, a be mala ɲɔgɔnna le.
31 Ka wo lun keta, wo ka a taran mɔgɛ min be a la boŋɛ ɲinbe kɔtɔ, a bolofeŋɛnu be boŋɛ butɔ, a kana don a bolofeŋɛnu jigandula. Min be sɛnɛ tɔ, wo tugun be ɲɔgɔnna le, a kana a kɔma tafɛlɛ.
32 Ko koroŋɛ min mata Luti la muse la, wo ni wo hakkile to wo ma.a
33 Mɔgɛ min be katala a nɛ lakisi koe la dunuya, wo si fo kise la sinan. Kɔnɔ min be fola a nɛ la dunuya, wo si kisi le sinan.
34 N ni a fɔ wo ye, n be tanala lun min na, wo sue tɔ mɔgɔ fila si taran saren benbi dɔndɔ tɔ, n si dɔndɔ doni n fɛ, n ni doe to ɲɔ.
35 Musu fila si taran tugure mala kandula dɔndɔ tɔ, n si dɔndɔ doni n fɛ, n ni doe to ɲɔ.
36 Kayi fila si taran sɛnɛ tɔ, n si dɔndɔ doni n fɛ, n ni doe to ɲɔ.»
37 Talibenu ka Isa maɲininka, anu ko: «Marige, wo be mala mina le?» Isa ka anu jaabi, a ko: «Subu fagareŋɛ be saren dula min tɔ, jiganu tugun be madɛnna ɲɔ le.»