Sɔɔri kuntige la joŋɛ lakendeya koe
7
Isa to banta a la wo kuma bɛ fɔla jama ɲala, a donta Kapɛrinamu saa tɔ.
2 Sɔɔri kuntige do be ɲɔ, min na joŋɛ be diyaren a ye koola. Wo joŋɛ ma kende, a be faga koe tɔ.
3 Wo sɔɔri kuntige ka Isa la ko mɔɛ wagate min tɔ, a ka Yahude kuntigenu kii a ma, a ko: «Wo taga Isa madiya wo ni a fɔ a ye, a ni na n na joŋɛ lakisi.»
4 Kuntigenu la kereŋɛ Isa ma, anu ka a madiya koola, anu ka a fɔ a ye: «A bɛnta i ni wo sɔɔre dɛman,
5 bayi a be mɔ bɔnsɛ kanuren koola. Ale le faŋɛ ka mɔ la kawandi ma boŋɛ sɔ mɔ ye.»
6 Wo butɔ, anu nun Isa tagata. Anu la sutuyareŋɛ sɔɔre bata la, sɔɔre ka a kafuɲɔgɛnu donu kii Isa ma, anu ni a fɔ a ye: «N marige, i kana i yɛtɛ tɔɔrɔ. I ma bɛn donna n bata, bayi i sɔdula kolo nde ko pon!
7 Wolo ɲan be a maren n yɛtɛ ma bɛn tagala i ma. Kɔnɔ hali kuma dɔndɔ le fɔ min si a ma n na joŋɛ ni kendeya.
8 Nde Adamadeŋɛ be do la yamɔre le kɔtɔ, sɔɔre donu tugun be nde la yamɔre kɔtɔ. N tini min kii, wo si taga; n tini min kele, wo si na; n tini a fɔ n na joŋɛ ye a ni wale min ma, a si a ma.»
9 Isa to ka wo mɔɛ, a kaabɛta a ma. A ka a ɲamatelen jama ma min be a jokkiren, a ka a fɔ anu ye, a ko: «N ni a fɔ wo ye, n ma kɛ dɛnkɛnɛya mɔɔle ɲɔgɔn yen hali bani Isirayila mɔgɛnu tɛma.»
10 Kiilanu to saagita sɔɔri kuntige bata, anu ka a taran wo joŋɛ bata kendeya ken.
Isa la kamaren fagareŋɛ lawuli koe
11 Wo lun tabantaka, Isa bɔɔta Kapɛrinamu a tagata saa do tɔ ka min tɔgɔ Nayin. A la talibenu anun jama banba be sɔren a kɔma.
12 A la sutuyareŋɛ saa dondula la, a ka jama banba do yen bɔɔla saa tɔ, anu be kamareŋɛ fure donila gaburudula tɔ. Wo ka a taran, ale kamareŋɛ nɛɛnɛ la kaye tugun fagata nun. Den bele a bolo, fɔ wo kamaren dɔndɛ.
13 Marige Isa ka wo muse yen, a kinikinita a ma, a ka a fɔ a ye: «I kana di!»
14 A ka a madon balangari la, a ka a bole maga a la. Fure jigannanu sɔta. A ka a fɔ: «Kamareŋɛ, n bata i yamɔri, i ni wuli.»
15 A la wo fɔreŋɛ, fure wulita a sigita, a ka kumare fɔlɔ. Isa ka a don a nɛɛnɛ bolo.
16 Mɔgɛ bɛ kilanta, anu tota Ala matɔgɔla, anu ko: «Nabiyonmɛ belebele bata wuli mɔ tɛma; Ala bata hinnɛ bani Isirayila jama la.»
17 Wolo ka a ma, Isa la ko kibare tuguta Juda duge nun a la miliŋɛ bɛ la.
Yaya la talibenu nun Isa
18 Yaya la talibenu ka Isa la ko kibare bɛ ɲamakaran a ye. Wo butɔ, Yaya ka talibi fila kele anu tɔ,
19 a ka anu kii anu ni taga Marige Isa maɲininka, ka Ala la mɔgɔ masubɛreŋɛ min be nala wolo mu ale la ba, ka anu ni mɔgɔ do le kɔnɔn?
20 Wo talibi fila wulita anu tagata Isa maɲininka, anu ko: «Yaya malasuwɛla le be mɔ kiiren i ma, aa mɔ ni na i maɲininka ka Ala la mɔgɔ masubɛreŋɛ min be nala, aa ka wolo mu ile la ba, ka mɔ ni mɔgɔ do le kɔnɔn?»
21 Wo tɛmuɛ kisanna le, Isa ka bandibaga siyama lakendeya, anun donu minnu be tɔɔrɔren. A ka jinna koroŋɛnu bɔɔ mɔgɛnu kɔma, a ka ɲabɔnɛnu siyama ɲa laka.
22 Wo butɔ, Isa ka Yaya la wo kiila fila jaabi, a ko: «Wo be min yenden yan, wo be min tugun mɔɛren, wo taga a bɛ ɲamakaran Yaya ye, wo ko:
ɲabɔnɛnu ɲa bata laka,
kɛn dɔndɔ tigenu bata tagaman a ɲinma la,
baliwulentɔɛnu bata saniyan,
tolobɔnɛnu tole bata laka,
mɔgɔ fagareŋɛnu bata lawuli,
kibaru ɲinma bata lake fugarenu ma.
23 Hɛra be mɔgɔ ye, min hakkile ma latugu nde la ko la.»
24 Yaya la kiilanu la bɔɔreŋɛ ɲɔ, Isa fɔlɔta kumala jama ye Yaya la ko tɔ, a ko: «Wo tagata fen de fɛlɛdula janfue butɔ? Wo tagata kaliŋɛ le fɛlɛdula ba, fɔɲɛ be min namagala?
25 Wo tagata fen de fɛlɛla ɲɔ? Kuta ɲinma tige ba? Ade! Kaa, minnu be kuta malanna donna, anu be anu yɛtɛ diyanan koe mala, wonu si yen mansa boŋɛnu le tɔ.
26 Wo tagata fen de fɛlɛdula janfue butɔ yati? Wo ma taga Ala la nabiyonmɛ do le fɛlɛ ba? Nabiyonmɛ le yati mu Yaya la! A ɲan fisa nabiyonmɛ ko.
27 Ale le la ko be sɛbɛren Ala la kitabue tɔ. Ala ko: N si n na kiila lasanba le i ɲatɔ, a si i la kila tabɛn i ɲatɔ.a
28 N ni a fɔ wo ye, musu yo ma den sɔtɔ betunna min kolo Yaya ko. Kɔnɔ min dɔgɔ a bɛ ko Ala la mansabaya tɔ, wo kolo fisa Yaya ko.
29 Mɔgɛ minnu ka Yaya la kawande lamɔɛ, hali duuti makelelanu, anu bɛ ka a yen Ala le tɔɲa mu, anu sɔnta Yaya ni anu lasuwɛ je tɔ.
30 Kɔnɔ Farisinu anun sariya karamɔgɛnu ma sɔn anu yɛtɛ ye Ala sagona koe la, anu balanta Yaya ni anu lasuwɛ je tɔ.»
31 Isa mɛn ka a fɔ, a ko: «N si bi mɔgɛnu lamulun ɲɔmɔ fɛ? Anu nun ɲɔmɔ mulunta?
32 Anu be mulunyaren deŋɛnu la, minnu be sigiren saa tɛma, anu be a fɔla ɲɔgɔn ma, anu ko:
‹Mɔ ka serede fe wo ye, kɔnɔ wo ma dɔŋɛ dɔn;
mɔ ka kinikini beete bɔɔ wo ye, kɔnɔ wo ma di.›
33 I ma a yen, Yaya malasuwɛla nata, a ma dɔmɔ ɲinma dɔmɔ, a ma beere min. Wole tugun ka a mɔlɔn jinnatɔɛ la.
34 Nde Adamadeŋɛ tugun bata na, n be dɔmɔre mala n ni minfeŋɛ min. Wole tugun ko n ma aa buula le mu n na, anun beere minna, duuti makelelanu nun junubutɔɛnu kafuɲɔgɛ le mu n na.
35 Kɔnɔ Ala hakkili ɲinma be minnu bɛ ye, wondelen si sɔn Ala le tɔɲa mu.»
Farisi kaye anun musu jeenante la ko
36 Farisi do be ɲɔ min tɔgɔ Simɔn. Lun do, a ka Isa kele dɔmɔri ma koe la a fɛ. Wo butɔ, Isa donta a bata boŋɛ tɔ, anu ka dɔmɔre ma.
37 Musu jeenante do be wo saa tɔ. A ka a mɔɛ Isa be wo Farisi kaye bata, anu be dɔmɔre tɔ. Awa, a wulita, a ka luule bitira jigan, min be faren labundɛ sɔn bɛlɛŋɛ la, a ka a nati.
38 A ka a madon Isa la, a sɔta a kɔma a kɛŋɛnu tabɛŋɛ tɔ, a be dila. A ɲa je bɔɔta, a sulenta Isa kɛŋɛnu ma, a ka anu lakima. Wo butɔ, a ka anu mafitan a kunsige la, a ka anu sunbu, a ka anu sunsan labundɛ la.
39 Farisi kaye min ka Isa kele dɔmɔre ma koe la, a ka muse la wo wale bɛ lasaga, a ka a mira a hakkile tɔ, a ko: «Ka kɛ kaye mu nabiyonmɛ yɛtɛ yɛtɛ le la nun, muse mɔle min be magaren a la, a si a lɔn de nun, ka a fɔla a musu jeenante le la.»
40 Wo butɔ, Isa ka a fɔ Farisi kaye ye, a ko: «Simɔn, n be diren n ni kuma do fɔ i ye.» Simɔn ka a jaabi, a ko: «Karamɔgɔ, awa yiren.»
41 Isa ko: «Nafulu tige do ka mɔgɔ fila dɔntɔ. A ka fɔlɔnɛŋɛ dɔntɔ sanuɛ kolo kɛmɛ loolu la. A ka doe dɔntɔ sanuɛ kolo bi loolu la.
42 Wo mɔgɔ fila tɔ, hali dɔndɔ ma nɔ dɔntɛ lasaagila a tige ma. Wo tige diɲata, a ka anu fila bɛ la dɔntɛ to ɲɔ.» Isa ka Simɔn maɲininka, a ko: «A be kama le? Kɛ mɔgɔ fila tɔ, miniman fisa sanu tige kanula a ni tanbi doe la?»
43 Simɔn ka a jaabi, a ko: «N na mira tɔ, min na dɔntɛ kolo, wolo si nafulu tige kanu a ni tanbi doe la.» Isa ko a ma: «A be ɲɔgɔnna le yati.»
44 Wo butɔ, Isa ka a ɲamatelen muse ma. A ka a fɔ Simɔn ye, a ko: «Simɔn, i ka kɛ muse yen? N donta i bata, i ma je nati n ɲɛ n ni n kɛŋɛnu lako, kɔnɔ ale kan ka n kɛŋɛnu lakima a ɲa je la, a ka anu mafitan a kunsige la.
45 I ma n sunbu kɔntɔre la, kɔnɔ ale kan bɔɔla a donta yan, a ma n kɛŋɛnu sunbu koe boloka.
46 I ma tule madon n kuŋɛ mab, kɔnɔ ale kan bata labundɛ madon n kɛŋɛnu ma.
47 Wolo mu n be a fɔla i ye: a la junube siyata, kɔnɔ anu bɛ bata kafari, wolo ka a ma a bata kanunteya banba yita n na. Kɔnɔ min na junubu kafare ma siya, wo te kanunteya banba yita.»
48 A ka a fɔ muse ye: «I la junubenu bata kafari.»