Sorayi saniyandeŋɛ bintandula
30
«I si kasiya lɔgɛ ɲiɲa le sorayi saniyandeŋɛ bintandula la. 2 A la yanya, nɔngɔn dɔndɔ, a la yajɛ nɔngɔn dɔndɔ, a kɔtɔ ni ma tunku naani le la, a la towe nɔngɔn fila. Binanu si to le a tunkenu tɔ; anu nun sorayi bintandula bɛ be ɲiɲala ɲɔgɔn fɛ le. 3 I be sanuɛ yati le madonna a kunma ma, anun a kɔma bɛ ma, anun a binanu. I ni a dabole lamiliŋɛ ɲiɲa sanuɛ la. 4 I si kurunda fila ɲiɲa le sanuɛ la, a sɔngɔ fila tɔ, a dabole kɔtɔ la. Lɔgɔ kayanmanu be donna wolo tɔ, a jiganfeŋɛnu la. 5 I be kasiya lɔgɛnu le ɲiɲala a jiganfeŋɛnu la, i ni naa sanuɛ madon anu ma. 6 I be wo sorayi saniyandeŋɛ bintandula sigila parawan banba le ɲakɔtɔ, min be seedeɲɔgɔya kankira ɲamadogonna, anun a dataguraŋɛ, mɔ be bɛnna ka min na. 7 Saguma yo saguma Harona tini be lanpuenu tabɛnna, a be sorayi saniyandeŋɛ kuɲɛ diyama bintanna ɲɔ le, a siise ni yɛlɛ. 8 A tini be lanpuenu labitala fitiri warawara ma, a mɛn si wo sorayi bintan de. Sorayi saniyandeŋɛ le mu min be bintanna tɛmuɛ bɛ tɔ nde Alatala ɲala, bɔɔla bɔnsɔ han bɔnsɔ. 9 Wo kana sorayi mɔɔle do bintan kɛ sorayi bintandula kunma de, ka wo ma sarika bintannɛŋɛ, ka wo ma fangadanma, wo mɛn kana rɛsɛn je bɔn a kunma. 10 San yo san kunɲama dɔndɔ, Harona be wo sorayi saniyandeŋɛ bintandula lasaniyanna base la: a ni junubu kafari sarika base do jigan, a ni a madon sorayi saniyandeŋɛ bintandula binanu ma. Wo be wolo mala bɔɔla bɔnsɔ han bɔnsɔ. Wo sorayi saniyandeŋɛ bintandula be mala fondo saniyandeŋɛ fisamante le la nde Alatala ɲala.»Bani Isirayila jama kɔnte koe duute dii koe la
11 Alatala kumata Musa ye, a ko: 12 «I tini be bani Isirayila kaanu kɔntila wagate min tɔ, bɛ ni a kunka dii Alatala ma. Wolo si a ma, jihadi yo te ke anu ma anu kɔnti tɛmuɛ. 13 Kaye yo kɔntita, a bɛ be kaalise giramu loolu le diila nde Alatala ma. Wo ni a suman hɔrɔma dingira sumarifeŋɛ kɛɲa le ma. 14 Min yo la simaya bata san mugan bɔɔ han wo ɲatɔ, a bata to kɔnte ɲaama, wo tigi si a kunka dii le nde Alatala ma. 15 Fondo tige te fondo sa wo giramu loole kunma, fondobɔnɛ tugun te do bɔɔ a la: a bɛ be wolo diila nde Alatala ma a ni ma anu kunka la. 16 I tini kaalise min nabita bani Isirayila kaanu bolo, i ni a ladon hɔrɔma dingira la ko wale tɔ. A be mala bani Isirayila kaanu ye hakkili lataga le la nde Alatala ɲala anu kunka la ko la.»
Ji madɛnfeŋɛ
17 Alatala mɛn ka a fɔ Musa ye, a ko: 18 «I be ji madɛnfeŋɛ anun a sigifeŋɛ ɲiɲala taasa le la, je be sala min butɔ saniyanfeŋɛ la. I be a sigila bɛndula boŋɛ nun sarika bintandula le tɛma, i mɛn ni kɛnɛ je sala a butɔ. 19 Harona nun a la den kayireŋɛnu be anu bolenu nun anu kɛŋɛnu lakola ɲɔ le. 20 Yannun anu ni don bɛndula boŋɛ butɔ, anu be anu kola wo je le la, alako anu kana faga; anu mɛn tini be anu madonna sarika bintandula la anu ni wale ma, anu ni sarika bintan Alatala ye, 21 anu be anu bolenu nun anu kɛŋɛnu lakola le, alako anu kana faga. Wo be mala sariya banbale le la Harona nun a bɔnsɛ ye, bɔɔla bɔnsɔ han bɔnsɔ.»
Tulu saniyandeŋɛ
22 Alatala mɛn ka a fɔ Musa ye, a ko: 23 «Fondo kuɲɛ diyama ɲinmanu le ka i si minnu jigan: lɔgɔ ɲaje min tɔgɔ Miri, a kilo loolu, anun lɔgɔ kobole min tɔgɔ Sinamɔn, a munge kilo fila nun a tɛma, anun kaliŋɛ kuɲɛ diyama, kilo fila nun a tɛma, 24 anun lɔgɔ kobole min tɔgɔ kasi, a munge kilo loolu, wo bɛ be sumanna hɔrɔma dingira sumarifeŋɛ kɛɲa le ma; anun oliwiye tule litari wɔɔrɔ. 25 I be tulu saniyandeŋɛ ɲiɲala wondelen na, iko labundɛ ɲiɲala be a ɲiɲala ki min na; tulu saniyandeŋɛ le mu min si koenu kɛrɛkɛrɛ. 26 I si kɛ tule do sa le bɛndula boŋɛ anun seedeɲɔgɔya kankira ma, anu ni kɛrɛkɛrɛ; 27 i mɛn ni a do sa teebile nun a miraŋɛnu bɛ ma, lanpue nun a miraŋɛnu, anun sorayi saniyandeŋɛ bintandula, 28 anun sarika bintandula nun a miraŋɛnu, anun ji madɛnfeŋɛ nun a sigifeŋɛ. 29 I be wonu kɛrɛkɛrɛla le, anu be mala fondo saniyandeŋɛ fisamante le la. Ka fenfen magata wonu la, a bata saniyan. 30 I be tule sala le Harona nun a la den kayireŋɛnu tugun ma, alako anu ni kɛrɛkɛrɛ, ka n na sarika lake wale ma.
31 I si a fɔ le bani Isirayila kaanu ye, i ko: ‹Tulu saniyandeŋɛ le mu kɛ la min si koenu kɛrɛkɛrɛ, nde Alatala le tan mu a la, bɔɔla bɔnsɛ ma han bɔnsɛ. 32 A te sa mɔgɔ tun bale ma, wo mɛn te a mɔɔle ɲiɲa. A saniyanta, a mɛn ni to wo ye ɲɔgɔnna. 33 Min yo ka a mɔɔle ɲiɲa, a mɛn ka a sa mɔgɔ do ma, anu si wo tigi labɔɔ le jama ɲaama.› »
Sorayi ɲiɲa koe
34 Alatala ka a fɔ Musa ye, a ko: «Fondo kuɲɛ diyamanu le ka i si minnu jigan: toraki lɔgɛ, oniki lɔgɛ anun galibanomu lɔgɛ ɲaje, i ni wonu mabasan sorayi ɲinma le yati fɛ, anu bɛ kɔnte jigandeŋɛ ni kan. 35 I be fondo kuɲɛ diyamanu le ɲiɲala wonu la, iko labundɛ ɲiɲalá be a ɲiɲala ki min na, a ni ma sorayi bintannɛŋɛ la. I ni kɔɔkɛ sa, a ni ma sorayi ɲinma saniyandeŋɛ le la. 36 I be a sɔngɔ buntenna le, a munge do be sala seedeɲɔgɔya kankira le kɛnna bɛndula boŋɛ butɔ, mɔ be bɛnna ka min na. A be mala wo ye fondo saniyandeŋɛ fisamante le la. 37 Wo te kɛ sorayi mɔɔle ɲiɲa wo fan ye. Fondo saniyandeŋɛ le mu min be lawalila nde Alatala dɔrɔn ye. 38 Min yo ka a mɔɔle ɲiɲa, alako a ni a kuɲɛ diyama mɔɛ, anu si wo tigi labɔɔ le jama ɲaama.»