Junubu kafare sarika bintandula
27
«I be sarika bintandula ɲiɲala kasiya lɔgɛ le la, a la yanya nɔngɔn loolu, a la yajɛ nɔngɔn loolu, a be mala tunku naani le la. A la towe nɔngɔn saba. 2 I ni binanu ɲiɲa wo tunku naanɛ bɛ ye. Wo binanu nun sarika bintandula be ɲiɲala ɲɔgɔn fɛ le, i ni naa taasa madon a ma. 3 I be miraŋɛnu bɛ ɲiɲala taasa le la: i ni panɛnu ɲiɲa buguta kɔfeŋɛnu la, anun peelenu, anun basi lasɔfeŋɛnu, anun subu sɔgɔfeŋɛnu, anun buguta safeŋɛnu. 4 I mɛn ni tangalaŋɛ taasanɛŋɛ ɲiɲa a ye min be sala ta kunma, i ni naa taasa kurundanu patu a tunku naanɛ bɛ ma. 5 I ni wo tangalaŋɛ sigi sarika bintandula butɔ, a ni majigi han a tɛma. 6 I ni kasiya lɔgɔ kayanmanu malasɛ sarika bintandula ye, i ni taasa madon anu ma. 7 I ni wo lɔgɔ kayanmanu ladon kurundanu tɔ, wo lɔgɛnu ni to sarika bintandula sɔngɔ fila tɔ, a jiganfeŋɛnu la. 8 I ni sarika bintandula ɲiɲa kebeŋɛnu le la, fondo bele a butɔ. Anu be a ɲiɲala le, iko n be min mɔɔle la ko fɔla i ye ka kɔnkɛ kunma.Tatta ɲiɲa koe
9 I ni hɔrɔma dingira tatta ɲiɲa. Wo tatta be ɲiɲala tasɔgɛ kuta le la. Bolo ɲinma mafanna, a la yanya si taga han nɔngɔn kɛmɛ. 10 Wo kuta be bakkula tuga mugan de la, anun anu la sɔfeŋɛ mugaŋɛ, minnu be ɲiɲaren taasa la. Bakkurandeŋɛnu nun nɛgɛ kayanmanu be ɲiɲaren kaalise le la. 11 Bolo mara mafanna, tasɔgɛ kuta do si to le ɲɔ tugun, a la yanya tugun si taga han nɔngɔn kɛmɛ. Anu be bakkula tuga mugan minnu la, nun anu la sɔfeŋɛ mugaŋɛ be ɲiɲala taasa le la; bakkurandeŋɛnu nun nɛgɛ kayanmanu kan be ɲiɲala kaalise le la. 12 Wo tatta la yajɛ, tele jige tɔ, tasɔgɛ kuta nɔngɔn bi loolu le be bakkula tuga tan na, nun anu la sɔfeŋɛ taŋɛ.
13 A tele yɛlɛ tɔ tugun tatta la yajɛ, nɔngɔn bi loolu le mu, dondula be ɲɔ le. 14 Wo dondula sɔngɔ dɔndɔ, tasɔgɛ kuta nɔngɔn tan nun loolu le be bakkula tuga saba la, nun anu la sɔfeŋɛ saba. 15 A sɔngɛ doe tugun tasɔgɛ kuta nɔngɔn tan nun loolu le be bakkula tuga saba la, nun anu la sɔfeŋɛ saba. 16 Hɔrɔma dingira dondula parawan, nɔngɔn mugan de mu. A be ɲiɲala tasɔgɛ kuta le la, gese bululama, a dubalamanɛŋɛ nun a wulenma la. A be bakkula tuga naani le la, anun anu la sɔfen naanɛ.
17 Tuganu minnu be maren hɔrɔma dingira tatta la, anu be labɛnna nɛgɛ kayanmanu le la. Anu la bakkurandeŋɛnu be ɲiɲala kaalise le la; anu la sɔfeŋɛnu kan be ɲiɲala taasa le la. 18 Awa, tatta la yanya ni tabɛn nɔngɔn kɛmɛ ma, a la yajɛ nɔngɔn bi loolu. Tasɔgɛ kuta mayɛlɛ ni tabɛn nɔngɔn loolu ma. A sɔfeŋɛnu be ɲiɲala taasa le la. 19 Miraŋɛ minnu bɛ be walila hɔrɔma dingira la ko tɔ, a bɛ be ɲiɲala taasa le la, nun a bakkuranu, nun tatta bakkuranu minnu be banbanna duge tɔ.
Lanpu sigifeŋɛ anun a lanpuenu la tule la ko
20 Ile Musa, i ni bani Isirayila kaanu yamɔri, anu ni oliwiye tulu nama a ɲinma nati i ye, alako lanpue ni nɔ tola bitaren wagate bɛ. 21 Harona nun a la den kayireŋɛnu si wo lanpue tabɛn bɛndula boŋɛa butɔ parawan banba ɲakɔtɔ, min be bakkuren seedeɲɔgɔya kankira ɲaama. Wo lanpue si bita le nde Alatala ɲakɔtɔ bɔɔla wura la han saguma. Wo ni ma sariya banbale la bani Isirayila bɔnsɛ bɛ ye.»