Ala la lahire a nun bani Isirayila kaanu tɛma
24
Ala ka a fɔ Musa ye, a ko: «Yɛlɛ nde Alatala dula yan kɔnkɛ tɔ, ile nun Harona, anun Nadabi, anun Abihu, anun bani Isirayila kayiba mɔgɔ bi wɔrɔwila. Wo kana wo madon n na han, wo mɛn ni sujudu. 2 I dɔrɔn de be i madonna nde Alatala la, wo tɔmanu ni to dula yanfama tɔ. Jama tɔɛ tugun kana yɛlɛ i kɔma.» 3 Musa tagata Alatala la kuma nun a la yamɔre bɛ matanbi jama ma. Jama bɛ ka a jaabi kulɛ dɔndɔ la, anu ko: «Alatala ka min bɛ fɔ, mɔ si a bɛ labatu le.» 4 Alatala ka kuma min bɛ fɔ Musa ye, ale tugun ka a bɛ sɛbɛ. Wo tabantaka, a wulita saguma piri a ka sarika bɔɔ dula sɔ kɔnkɛ kɔtɔ, a ka kuru manditɛreŋɛ tan nun fila sɔ ɲɔ, minnu be misaleren bani Isirayila bɔnsɔ tan nun fila la. 5 A ka bani Isirayila kamareŋɛnu donu lasanba alako anu ni sarika bintannɛŋɛnu bɔɔ, anu mɛn ni tuuranu dii kanunteya sarika la Alatala ma. 6 Musa ka wo kolofeŋɛnu base tafatan fila la: a ka a tɛma sa basi lasɔ feŋɛnu butɔ, a tɛma doe a ka wo wussɛ sarika bɔɔ dula ma. 7 Wo kɔma, Ala ka lahire min kiti a nun bani Isirayila kaanu tɛma, Musa ka wo sɛbɛ kitabue min tɔ, a ka a jigan, a ka a karan a kulɛ mayɛlɛreŋɛ la jama bɛ ɲala. Bani Isirayila jama la wo mɔɛreŋɛ anu bɛ ka a jaabi: «Alatala be min bɛ fɔren, mɔ si a bɛ ma le, mɔ mɛn ni naa a labatu.» 8 Musa ka wo base tɔɛ jigan, a ka a wussɛ jama ma. A ka a fɔ, a ko: «Base le ka Alatala be lahire lakotila min na a nun wole tɛma, anun a la kɛ yamɔrenu bɛ fɛ.»9 Awa, Musa yɛlɛta, ale nun Harona, anun Nadabi, anun Abihu, anun wo bani Isirayila kayiba mɔgɔ bi wɔrɔwila. 10 A ma mɛ, anu ka bani Isirayila kaanu la Ala yen. A be toren iko a be sɔren kuru sɔnbɛlɛŋɛ walaka kunma min be malanna, a bululama iko sankole yati. 11 Ala ma fenfen ma wo bani Isirayila kayibanu la, hali anu to ka a lasaga. Wo bɛ butɔ, anu ka dɔmɔre ma, anu ka je min.
Musa yɛlɛ koe kɔnkɛ la
12 Alatala ka a fɔ Musa ye, a ko: «I mɛn ká i mayɛlɛ n dula kɔnkɛ kunma, i ni naa to yan, n si kuru walanu don i bolo, n na sariya nun n na yamɔre be sɛbɛren minnu ma. I ni bani Isirayila kaanu lakaran anu la.» 13 Awa, Musa wulita, anun a dɛmanna Yosuwe, Musa yɛlɛta Ala la kɔnkɛ tɔ. 14 Wo ka a taran, a saarata kayibanu la, a ko: «Wo ni mɔ kɔnɔn yan han mɔ tini na wo dula wagate min tɔ. Harona nun Huri le ka. Wonu be tola wo kɛnna yan. Ka min dita ko do tabɛnna, a be a lasaagila wondelen ma.» 15 Musa be yɛlɛla wagate min tɔ kɔnkɛ la, luuture dusuta ɲɔ kunma. 16 Alatala la nɔɔra tota Turisinina kɔnkɛ kunma, luuture tota dusuren ɲɔ kunma han tele wɔɔrɔ. A tele wɔrɔwila luŋɛ, Alatala ka Musa kele wo luuture butɔ. 17 Alatala la nɔɔra kɛɲa be toren de bani Isirayila kaanu ye, iko ta banba le be bitaren kɔnkɛ kun tɛma. 18 Musa be yɛlɛla kɔnkɛ kunma, a donta wo luuture butɔ. A tota ɲɔ han tele bi naani, sue nun tele.