Hɔrɛbi fata
17
Bani Isirayila jama bɛ bɔɔta Siini janfue tɔ, Alatala la yamɔre butɔ. Anu be tagala anu tota anu sulenna han anu keta Refidimi. Anu daakata ɲɔ, kɔnɔ anu ma ji minnɛŋɛ sɔtɔ. 2 Wo butɔ, jama ka sɔnkɛ lawuli Musa ma, anu ka a fɔ a ye: «Mɔ kɔ je la, mɔ ni a min.» Musa ka anu jaabi, a ko: «Wo be nde lasɔnkɔla fenna? Wo be Alatala laɲinila fenna?» 3 Wo ka a taran ji sɔgɛ bata gbaa jama la ɲɔ, anu tota Musa maɲimila kuma la, anu ko: «I ɲan ka mɔ labɔɔ fenna Misira? A sɔgɔ be i la le ba, mɔle nun mɔ la deŋɛnu anun mɔ la kolofeŋɛnu ni naa faga ji sɔgɛ la yan?»4 Wolo ka a ma, Musa ka a da ladi Alatala ma, a ko: «N si nɔ fen de mala kɛ jama ye? Donden anu ma n mabun.» 5 Alatala ka a fɔ Musa ye, a ko: «Sɔ jama ɲatɔ, i ni bani Isirayila kayibanu donu doni i fɛ. I ni i la tungare tugun jigan, i ka Nili je botege min na, i ni sɔ anu ɲatɔ. 6 N si sɔ fata kunma i ɲakɔtɔ, fata min be Hɔrɛbi kɔnkɛ tɔ. I ni wo fata botege, je si bɔɔ le a tɔ, jama ni a min.» Musa ka a ma ɲɔgɔnna, bani Isirayila kayibanu ɲala.
7 A ka wo dula tɔgɔ sa Masa nun Meribaa, bayi bani Isirayila kaanu ka sɔnkɛ lawuli le Musa ma ɲɔ, anu mɛn ka Alatala tugun naɲini ɲɔ le, anu ko: «Alatala be wo mɔ tɛma ba, ka a bele wo mɔ tɛma?»
Amaleki kaanu la kɛlɛ
8 Wo kɔma, Amaleki kaanu nata bani Isirayila kaanu kɛlɛdula Refidimi. 9 Musa ka a fɔ Yosuweb ye, a ko: «Kaye donu masubɛ wo mɔ ye, wo ni bɔɔ Amaleki kaanu kɛlɛdula. Nde si naa to sɔren de kɔnkɛ kun tɛma sinan, Ala la tungare be n bole tɔ.» 10 Yosuwe ka a ma iko Musa ka a fɔ a ye ki min na, a tagata Amaleki kaanu kɛlɛdula. Musa tugun anun Harona anun Huri yɛlɛta kɔnkɛ kun tɛma. 11 Musa la kereŋɛ ɲɔ, a tini a bole ma yɛlɛ, bani Isirayila sɛnbɛ ni koloya; kɔnɔ a tini a bole majigi, Amaleki kaanu sɛnbɛ ni koloya. 12 Musa bolenu to fagata a ma, Harona nun Huri ka kuru banba dɔndɔ jigan anu ka a sigi a kɛn kɔtɔ, a sigita wo kunma. Anu sorita a bolenu kɔtɔ, doe tota sɔngɛ doe la, doe tugun tota sɔngɛ doe la. Jɔnɔn a bolenu nɔta sɛnbɛ sɔtɔla han tele la dula. 13 Wo butɔ, Yosuwe ka sɛnbɛ sɔtɔ Amaleki kaanu kunma, a ka anu tɛgɛ fanda fila da diyama la.
14 Wo kɔma, Alatala ka a fɔ Musa ye, a ko: «Kɛ koenu sɛbɛ kitabue tɔ, alako wo kana ɲina a la. I be a karanna le Yosuwe ye: ‹N si naa Amaleki kaanu la ko lamɔdɛ kɛ dunuya, mɔgɔ yo te anu la ko talɔn.› » 15 Musa ka sarika bɔɔ tangalaŋɛ sɔ Ala batu koe la, a ka wo tɔgɔ sa: «Alatala le ka n kun nawuli.» 16 A mɛn ka a fɔ: «Amaleki kaanu to be anu bole tajiganden Alatala la mansa tintiŋɛ le kɛlɛ koe la, Alatala si anu kɛlɛ le han anu bɔnsɔ bɔnsɔ.»