47
Yusufu tagata a lasaagi Misira mansa ma, a ka a fɔ a ye, a ko: «N baaba nun n baaba dɔndɛnu bata na kabɔɔ Kanana duge tɔ, anun anu la kolofen lanmanu nun a banbanu bɛ, sa anu sɔtɔfeŋɛnu bɛ kunma min be anu bolo. Anu bata na Gosɛn duge tɔ ka.»
2 A ka a kɔtɔ mɔgɔ loolu nati, a ka anu dantɛgɛ Misira mansa ye.
3 Misira mansa ka Yusufu kɔtɔnu maɲininka, a ko: «Wo la wale mu fen de la?» Anu ka Misira mansa jaabi, anu ko: «I la joŋɛnu, mɔ mu kolofen daɲinila le la, iko mɔ benbanu ka a ma ki min na nun.»
4 Anu mɛn ka a fɔ Misira mansa ye: «Mɔ be naren luntanya le la kɛ duge tɔ betunna, bayi kɔnkɛ bata sɛnbɛ sɔtɔ Kanana duge tɔ. Dɔmɔ bele i la joŋɛnu la kolofeŋɛnu ye bitugun. Mɔ bata i táran, i ni i la joŋɛnu sago dii anu ni sigi Gosɛn duge tɔ.»
5 Misira mansa ka a fɔ Yusufu ye: «I baaba nun i baaba dɔndɛnu to bata na i bata,
6 Misira jamanɛ be i sagoe tɔ. Kandula ɲinma ɲini kɛ jamanɛ tɔ, i baaba nun i baaba dɔndɛnu si sigi ka min na. Anu si nɔ sigila Gosɛn duge tɔ. Ka i ka mɔgɛnu lɔn anu tɔ minnu ka wale lɔn, anu jigan anu ni ma n na kolofen kantalanu kuŋɛnu la.»
7 Yusufu ka a baaba Yaguba nati, a ka a dantɛgɛ Misira mansa ye. Yaguba dubata Misira mansa ye.
8 Misira mansa ka Yaguba maɲininka, a ko: «I san jelu le ka?»
9 Yaguba ka a jaabi, a ko: «N na simaya san kɛmɛ san bi saba le ka. N be yirindi yirindila, bɔɔla jamanɛ do tɔ n ni taga do tɔ. N ɲan ma simaya banba sɔtɔ iko n baabanu ka a sɔtɔ ki min na, minnu tota yirindila nun anu ni taga dula do tɔ. Wo butɔ, n mɛn bata tɔɔrɔ banba sɔtɔ dunuya.»
10 Yaguba mɛn dubata Misira mansa ye, a bɔɔta a kɛnna.
11 Wo la tanbireŋɛ, Yusufu tugun ka a baaba nun a kɔtɔnu sigi Misira jamanɛ tɔ, a ka duge kan ɲinma dii anu ma Ramisɛsi duge tɔ, iko Misira mansa ka a yamɔri ki min na.
12 A be a baaba nun a baaba dɔndɛnu nun a baaba la denbayanu bɛ kɔtɔ sɔren, hali den mɛsɛŋɛnu.
Yusufu la mansaya
13 Kɔnkɛ bata ban sɛnbɛ sɔtɔla, dɔmɛ bele yenna duge kan do kan tɔ, kabɔɔ Misira han ka sigi Kanana la. Kɔnkɛ la ko sabu bata mɔgɛnu bara.
14 Mɔgɛnu minnu bɔɔta Misira nun Kanana duge tɔ, wonu ka anu la nafule bɛ nati anu ka a san dɔmɛ la. Yusufu ka wo nafule madɛn a ka a mandi Misira mansa la boŋɛ butɔ.
15 Nafule to banta Misira anun Kanana kaanu bolo, Misira kaanu bɛ nata Yusufu bata, anu tota a fɔla a ye: «Mɔ kɔ dɔmɛ! Ka i ma mɔ dɛman, mɔ si faga le i ɲala, bayi nafulu bele mɔ bolo bitugun!»
16 Yusufu ka anu jaabi, a ko: «Ka nafule bele wo bolo, wo wo la kolofeŋɛnu nati, n ni anu mafalin dɔmɛ la.»
17 Anu ka anu la kolofeŋɛnu nati Yusufu bata. Ale tugun ka dɔmɛ don anu bolo, anu la soeenu faliŋɛ la, anun saakanu, anun ningenu, anun sofalenu. Wo saŋɛ la, a ka anu kɔtɔ sɔ dɔmɛ la anu la kolofeŋɛnu bɛ faliŋɛ la.
18 Wo saŋɛ to tanbita, anu ka a fɔ Yusufu ye, wo san tɔ saage, anu ko: «Mɔ te nɔ dogonna mɔ marige la. Nafulu yo bele mɔ bolo. Mɔ la kolofeŋɛnu tugun bɛ bata ma ile mɔ marige tɛŋɛ la. Fenfen bele toren mɔ marige ye bitugun fɔ mɔ wunde anun mɔ la duge.
19 I kana a to mɔ ni faga i ɲala, mɔ la dugenu ni boloka. Mɔ nun mɔ la dugenu mafalin dɔmɛ la, mɔ ni ma Misira mansa la joŋɛnu la, mɔ la dugenu ni ma a tɛŋɛ la. Suge don mɔ bolo mɔ ni a lawali, alako mɔ ni balu, mɔ kana faga, duge kana naa bolokala.»
20 Wo ka a taran, kɔnkɛ bata a tɛ kiti anu la. Wo butɔ, Yusufu ka Misira duge bɛ san Misira mansa ye, bayi Misira kaanu bɛ ka anu la duge mayita le. Duge bɛ mata Misira mansa tɛŋɛ la ɲɔgɔnna le.
21 A ka jama ma joŋɛ la, ka bɔɔ Misira naaniŋɛnu sonkiŋɛ tɔ, han tagala sigila sonkiŋɛ doe tɔ.
22 Hali wo bɛ to mata, a ma sarika lakelanu la duge san, bayi Misira mansa bata sariya ɲinma jigan anu la ko tɔ, Misira mansa ni kɛnɛ dɔmɛ fatanna anu ma. Wolo mu, anu ma anu la duge mayita.
23 Yusufu ka a fɔ jama ye: «Kɔtɛ, n bata wo nun wo la dugenu san Misira mansa ye. Wo la sugenu le ka, wo ni dugenu lawali.
24 A tɛgɛ tɛmuɛ tini ke, wo be a sigi looluɲɔgɛ le donna Misira mansa bolo. Sigi naanɛ min tota wo si ma suge la anun wo nun wo la deŋɛnu balue la, anun mɔgɛnu minnu be wo bolo wo la boŋɛnu butɔ.»
25 Anu ka a jaabi: «I bata mɔ lakisi! Mɔ bata mɔ marige la hinnɛnteya yen i be min maren mɔ ye. Mɔ be mala kɔtɛ Misira mansa la joŋɛnu le la.»
26 Yusufu ka wo ma sariya la Misira duge tɔ, han bi wolo be sabatiren. Sigi looluɲɔgɛ ni ma Misira mansa tɛŋɛ la, fɔ sarika lakelanu la dugenu, wolo te ma Misira mansa tɛŋɛ la.
Yaguba la simaya tɔɛ
27 Yaguba bɔnsɛ sabatita Misira jamanɛ tɔ, Gosɛn duge tɔ. Wo duge mata anu tɛŋɛ la. Anu jiidita, anu siyata han.
28 Yaguba ka san tan nun wɔrɔwila le ma Misira jamanɛ tɔ. Yaguba la simaya bɛ labɛndeŋɛ tabɛnta san kɛmɛ san bi naani nun wɔrɔwila.
29 A faga tɛmuɛ to bata sutuya, a ka a la den Yusufu kele, a ka a fɔ a ye: «Ka i be diren hinnɛnteya mala n ɲɛ, n bata i táran i ni i bole lasori n wote kɔtɔ, i ni i lakali n ɲɛ. I ni telen n ɲɛ kanunteya la. N bata i táran i kana n mandi Misira duge tɔ.
30 Ka n fagata tɛmuɛ min tɔ iko n baabanu fagata ki min na, i si n nabɔɔ le Misira, i ni taga n mandi anu la gaburudula tɔ.» Yusufu ka a jaabi, a ko: «I be min fɔren n ɲɛ, n si a ma le.»
31 Yaguba ka a fɔ: «I kali n ɲɛ.» Yusufu ka a kali a ye. Wo kɔma, Yaguba ka a lawali sa, a butinta a la benbe kunsadula.