Juda nun Tamari
38
Wo tɛmuɛ, Juda bɔɔta a bareŋɛnu kunma, a tagata sigi Adulami kaa do kɛnna, a tɔgɔ Hira.
2 Juda ka Suya Kanana kaa la den musereŋɛ yen ɲɔ. A ka a futu, a ka a ma a la muse la. Anu tota ɲɔgɔn na.
3 Muse ka bue jigan, a ka den kayiren dɔndɔ sɔtɔ. Juda ka a tɔgɔ sa Eri.
4 A mɛn ka bue jigan, a ka den kayireŋɛ sɔtɔ. A ka wo deŋɛ tɔgɔ sa Onan.
5 Wo kɔma, a mɛn ka den kayireŋɛ do tugun sɔtɔ, a ka wo tɔgɔ sa Sela. A be kɛ deŋɛ sɔtɔla tɛmuɛ min tɔ, wo ka a taran Juda be Kesibe.
6 Juda ka muse futu a la den fɔlɛ Eri ye, ale muse tɔgɔ Tamari.
7 Alatala ye, mɔgɔ koroŋɛ le be tabɛnden Juda la den fɔlɛ Eri ma. Wolo ka a ma han Alatala ka a faga.
8 Wo kɔma, Juda ka a fɔ Onan ye: «I kɔtɔ la muse jigan, a ni ma i la muse la, alako i ni deŋɛ sɔtɔ i kɔtɔ ye.»
9 Kɔnɔ Onan ka a lɔn wo deŋɛ te naa ma a tɛŋɛ la. Wolo ka a ma a nun a nimɔgɛ tini kafu, a ni a la manije sa duge tɔ, alako a kana naala deŋɛ sɔtɔla a kɔtɔ ye.
10 A be wo min mala, wo koron Alatala ye. Wolo ka a ma, a ka ale tugun faga.
11 Awa, Juda ka a fɔ a la deŋɛnu la furuɲa muse Tamari ye, a ko: «Furuɲaya doni i baaba bata han n na den Sela tini koloya tɛmuɛ min tɔ.» A ka a mira le tumado Sela tugun si faga le iko a kɔtɔnu fagata ki min na. Tamari tagata to a baaba bata.
12 A la mɛreŋɛ, Suya la den musereŋɛ, min be sigiren Juda ye, a fagata. Faga koe to bɔɔta a la, Juda tagata Timina a la kolofeŋɛnu ti matɛgɛlanu bata anun a filaɲɔgɔ Hira Adulami kaa.
13 Donu ka a fɔ Tamari ye: «I ma a yen i bitan kaye be tagala a la kolofeŋɛnu te matɛgɛ dula Timina.» Bɔɔla wo fɔta a ye ka min na,
14 a ka a la furuɲa kutanu bɔɔ a ma, a ka a ɲa kɔtɔ mabutin tijaraŋɛ la, a tagata sigi Enayin dondula tɔ, Timina kila la. A bata a yen yati Sela bata kamarenya, kɔnɔ anu ma a dii a ma a ni ma a la muse la.
15 Juda to bata a yen, a ka a mira langbe le la, bayi a ɲa kɔtɔ be mabutinden.
16 A ka a madon a la kila dala. A ka a fɔ a ye: «A sɔgɔ be n na mɔ ni ma i bata.» A ma a lɔn a la deŋɛ la muse le. Tamari ka Juda maɲininka: «I be fen de diila n ma?»
17 A ka a jaabi, a ko: «N si baa deŋɛ dɔndɔ bita n na kolofeŋɛnu tɛma n ni a lasanba i ma.» Muse ka a jaabi, a ko: «Awa, sɛɛkɛ do to n bolo yan betunna han yannun i be baa natila tɛmuɛ min tɔ.»
18 A ka a maɲininka, a ko: «I be diren n ni fen de don i bolo sɛɛkɛ la?» Tamari ka a jaabi, a ko: «I ni i la manditɛ safeŋɛ jule, anun i la bolobitaran tungare don n bolo i tɔgɛ be sɛbɛren min ma.» A ka wonu don a bolo jɔnɔn anu kafuta. Tamari ka Juda la bue jigan.
19 Tamari saagita a bata. A ka a la tijaraŋɛ bɔɔ a kunma, a mɛn ka a la furuɲa kutanu lajigi a ma.
20 Juda ka a filaɲɔgɛ Adulami kaa kii, a ni baa doni Tamari ye, alako a ka feŋɛnu min don a bolo sɛɛkɛ la a ni anu nati. A tagata kɔnɔ a ma a yen.
21 A ka Enayin mɔgɛnu maɲininka, a ko: «Kɛ langbe muse min be nun Enayin kila la, a be mina le?» Anu ka a jaabi, anu ko: «Langbe bele yan feu.»
22 A mɛn tasaagita Juda ma, a ka a fɔ a ye: «N ma a taran ɲɔ. Wo tɛma mɔgɛnu mɛn bata a fɔ n ɲɛ aa langbe yo bele anu bata.»
23 Juda ka a fɔ, a ko: «Awa, ale ka to wo feŋɛnu la. Mɔ kana mɔ fan namalu. A dɔ, nde kan bata baa deŋɛ don i bolo i ni taga a don a bolo. Kɔnɔ i ma a taran ɲɔ.»
24 Kari saba tanbi kɔma, anu ka a fɔ Juda ye: «I la deŋɛ la musu Tamari bata ma langbe la, a bata buuma a la langbeya la.» Juda ka a yamɔri: «Wo a labɔɔ, a ni bintan.»
25 Anu be Tamari labɔɔla tɛmuɛ min tɔ, a ka kiilá doni a la kaye baaba Juda ma. Tamari ka a fɔ a ye, a ko: «Kɛ miraŋɛnu fɛlɛ ba minnu be n bolo, kɛ manditɛ safeŋɛ jule anun kɛ bolobitaran tungare maren mɔgɔ le tɛŋɛ la min ka n nabuuma. A bɛnta le i ni kɛ tigi talɔn.»
26 Juda ka wo miraŋɛnu talɔn. A ka a fɔ, a ko: «A bata sariya makanta fisa nde ko, bayi n ma a dii n na den Sela ma.» Juda ma a lɔn musu la bitugun.
27 A la den sɔtɔ tɛmuɛ la kereŋɛ, anu ka a lɔn ka a fɔla fɛrɛŋɛnu le be a bue tɔ.
28 A den sɔtɔ tɛmuɛ, dɔndɔ ka a bole labɔɔ. Den nabitala muse ka a bole bita, a ka gese wuleŋɛ kiti a bole la, a ka a fɔ: «Kɛ-lɛ fɔlɔ sɔtɔta.»
29 Kɔnɔ wo bɔɔbɛ ka a bole ladon, a dɔgɛ sɔtɔta. Den nabitala muse ka a fɔ, a ko: «I be naren sɛnbɛ miniman fɛ ka?» Wolo mu anu ka a tɔgɔ sa Perɛsi.
30 Wo kɔma a fɛrɛnɲɔgɛ tugun sɔtɔta, gese wuleŋɛ be kitiren wo bole la. A tɔgɔ sata Sera.