Yusufu la toe Potifari Misira kaa bata
39
Isumayila bɔnsɛ tagata Yusufu fɛ Misira. Misira mansa ka kaye min sɔ a la boŋɛ mɔgɛ bɛ kunma, a kantalanu kuŋɛ Potifari, wolo ka Yusufu san.
2 Alatala be Yusufu dɛmanna. A be koe min bɛ mala, a bɛ be sɔnɔyaren a bolo. A be sabatiren a marige Misira kaa bata.
3 A marige ka a lɔn Alatala be Yusufu dɛmanna, bayi a be koe min bɛ mala, Alatala bata a bɛ sɔnɔya a ye.
4 A la ko diyata Potifari ye, a ka a sɔ a la wale la, a ka a ma a la bon kuŋɛ la. A ka a la harige bɛ taaku a la.
5 Bɔɔla Yusufu mata a la boŋɛ nun a la harige bɛ kuŋɛ la, Alatala ka barikɛ sa Misira kaa la boŋɛ tɔ Yusufu sabu la. Feŋɛ min bɛ be a bolo, Alatala ka barikɛ sa a bɛ tɔ, ka bɔɔ a la boŋɛ ma han a la sɛnɛnu.
6 Wolo ka a ma feŋɛ min bɛ be Potifari bolo, a ka a bɛ to Yusufu sagoe tɔ. A ma a hakkili sɔ fenfen ma bitugun fɔ a be dɔmɛ min dɔmɔla.
Yusufu nun Potifari la muse
Yusufu mu kayi le la min majabuta, a bɛnta han.
7 A la mɛreŋɛ, Potifari la muse ɲa sɔta Yusufu la. A ka a fɔ a ye, a ko: «Na yan mɔ ni kafu.»
8 Yusufu ma sɔn, a ka a fɔ a marige la muse ye: «I ka a lɔn, bɔɔla n nata n marige bata, a bele a hakkili sɔren fenfen ma bitugun a la boŋɛ butɔ. A bata a la harige bɛ to n sagoe tɔ n ni a mɛnni.
9 Nde le tanbita a la boŋɛ butɔ mɔgɛ bɛ la. A bele n natɔnden fenfen ma, fɔ ile dɔrɔn, bayi ile bata ma a la muse la. Fen de be a mala n ni ko koroŋɛ banba ma, min mu junubu koe la Ala ye?»
10 Ale muse sɔta Yusufu kɔma, lun go lun a ni kɛnɛ sa koe fɔla a ye. Kɔnɔ Yusufu ma sɔn a bolo anu ni sa, anu ni kafu.
11 Lun do, Yusufu donta a la wale madula boŋɛ butɔ, wo tɛmuɛ walilá yo bele ɲɔ butɔ.
12 Potifari la muse ka a bita a la doroke ma, a ka a fɔ a ye: «Mɔ kafu.» Kɔnɔ Yusufu ka a la doroke to a bolo, a borita bɔɔla bara tɔ.
13 Muse to ka a yen a bata a la doroke to a bolo, a be borila bɔɔla bara tɔ,
14 a ka a la bon butɔ mɔgɛnu kele a ka wo kuma fɔ anu ye, a ko: «Wo ka kɛ yen, n na kaye be naren Hebure kaye min fɛ a bata yo mɔ la. A nata le n dula a ko mɔ ni sa, kɔnɔ n belebeleta sɛnbɛ la.
15 Bɔɔla a ka a yen n belebeleta n ka kelere ma, a ka a la doroke to n kɛnna, a borita bɔɔla bara tɔ.»
16 A ka Yusufu la doroke to saren a kɛnna han a la kaye nata boŋɛ tɔ.
17 A mɛn ka kɛ kuma ɲamakaran a ye, a ko: «I be kɛ Hebure jon kaye min natiren mɔ ye yan, a bata na yo n na.
18 Kɔnɔ n to belebeleta n ka kelere ma, a ka a la doroke to n kɛnna, a borita bɔɔla bara tɔ.»
19-20 A la kaye Potifari to banta a la kumanu mɔɛla, a la jon kaye Yusufu ka min ma a la, Yusufu marige Potifari juse yɛlɛta a koroŋɛ la. A ka Yusufu lasɔ, a ka a balan Misira mansa la gelemanɛnu be balanden ka min na. Yusufu tota geele tɔ ɲɔ.Yusufu la toe geele tɔ
21 Kɔnɔ Alatala be Yusufu dɛmanna le ɲɔ tugun. A hinnɛta a la, Yusufu la ko diyata geele mansa ye.
22 Geele mansa ka gelemanɛnu bɛ taaku Yusufu la. Koe min bɛ be mala, a ka Yusufu ma a bɛ kuŋɛ la.
23 Geele mansa bele Yusufu la walenu fɛlɛla a be minnu taakuren a la, bayi Alatala be a dɛmanna. Alatala bata koe bɛ sɔnɔya a ye a be min mala.