Yaguba saagi koe Kanana duge tɔ
31
Lun do, Yaguba ka a mɔɛ Laban na den kayireŋɛnu be min fɔla a la ko tɔ, anu ko: «Feŋɛ min bɛ mu mɔ baaba tɛŋɛ la, Yaguba ka a bɛ jigan. I ma a yen, wolo be a maren a bata fondo banba sɔtɔ mɔ baaba bolo.»
2 Yaguba mɛn bata Laban ɲakɔtɔ yen ka a fɔla a la ko bele a ye bitugun iko fɔlɔ.
3 Alatala mɛn kumata Yaguba ye, a ko: «Sagi i baabanu nun i sɔtɔɲɔgɛnu la duge tɔ, i be bɔɔren ka min na. N si to i fɛ.»
4 Yaguba ka Rakeli nun Leya kele, anu ni na ɲagama butɔ a nun a la kolofeŋɛnu be ka min na.
5 A ka a fɔ anu ye, a ko: «N bata a yen wo baaba ɲa kɔtɔ bele n ɲɛ bitugun iko fɔlɔ. Kɔnɔ n baaba Marigi Ala be toren n fɛ.
6 Wole yati ka a lɔn ka a fɔla n walita wo baaba ye n sɛnbɛ bɛ le la.
7 Kɔnɔ wo baaba bata n madakuya. A ka n wali sɔŋɛ mafalin kunɲama tan na. Kɔnɔ Ala ma sɔn a ni ko koron ma n na.
8 Ka wo baaba tota a fɔla aa ɲɛgɛŋɛ be kolofeŋɛ min bɛ ma, wondelen be mala n sɔŋɛ la, wo ka a taran, kolofeŋɛnu be naala deŋɛnu minnu sɔtɔla, a bɛ be maɲɛgɛnden. Ka a mɛn tota a fɔla, aa kaarin kaariŋɛ be kolofeŋɛnu min bɛ ma, wondelen be mala n sɔŋɛ la, wo ka a taran, kolofeŋɛnu be naala deŋɛnu minnu sɔtɔla, kaarin kaariŋɛ be a bɛ ma.
9 Ala le bata wo baaba la kolofeŋɛnu bosi a bolo, a ka anu dii nde ma.
10 Kɛ kolofeŋɛnu be yɛlɛla ɲɔgɔn ma tɛmuɛ min tɔ, n ka a yen de kiboe tɔ, kolofen kaye minnu yɛlɛta kolofen musenu ma, ɲɛgɛŋɛ nun kaarin kaariŋɛ anun tonbitonbe be anu bɛ ma.
11 N na kiboe tɔ, Ala la maleka ka n kele, a ko: ‹Yaguba!› N ka a labita, n ko: ‹Naamu!›
12 A ka a fɔ, a ko: ‹I ɲa sɔ i ni a fɛlɛ, kolofen kayenu minnu bɛ yɛlɛta kolofen musenu ma, ɲɛgɛŋɛ nun kaarin kaariŋɛ nun tonbitonbe be anu ma, bayi Laban ka min bɛ ma i la, n ka a bɛ yen.
13 Nde le mu Ala la min bɔɔta i ma Betɛli, i ka kure sigi manditɛ la ka min na, i ka lahire jigan n ɲɛ ɲɔ. Kɔtɛ, wuli, i ni bɔɔ kɛ duge tɔ, i ni saagi i sɔtɔ duge tɔ.› »
14 Rakeli nun Leya ka Yaguba jaabi, anu ko: «Kɛɛ yo bele mɔ ye bitugun min si ma mɔ tɛŋɛ la mɔ baaba bata.
15 A be mɔ bitaren de iko luntaŋɛnu, bayi a ka mɔ san, a ka mɔ la nafule tugun bɛ dɔmɔ.
16 Ala ka harige min bɛ bosi mɔ baaba bolo, a bata ma mɔ nun mɔ la deŋɛnu tɛŋɛ la. Kɔtɛ, Ala ka koe min bɛ fɔ i ye, a bɛ ma.»
17 Awa, Yaguba ka a tabɛn taga koe la, a ka a la musenu nun a la deŋɛnu layɛlɛ ɲɔgɔmɛnu kanna.
18 A ka kolofeŋɛ nun harige min bɛ sɔtɔ Padan Arami, a ka a bɛ jigan, a ka kila bita sagila a baaba Isiyaka bata, Kanana duge tɔ.
19 Laban be tagaren a la kolofeŋɛnu te matɛgɛ dula anu ma tɛmuɛ min tɔ, a la den Rakeli ka a la bon kantaran kuyenu kanka.
20 Yaguba tugun ka Laban Arami kaa janfa. A borita, a ma saara a la.
21 Feŋɛ min bɛ mu a tɛŋɛ la, a ka a bɛ labori, a tagata tɛgɛ kɔɛɛ tɔ. A ka a kun sɔ Galadi kɔnkɛnu mafanna ye.
Laban na Yaguba jokki koe
22 A tele saba luŋɛ anu ka Laban nalɔn ka a fɔla Yaguba bata bori.
23 Laban ka a bareŋɛnu jigan anu bɔɔta Yaguba ɲinidula. Tele wɔrɔwila anu be a ɲinila. Anu ka a yen Galadi kɔnkɛnu tɔ.
24 Kɔnɔ sue tɔ, Ala ka a yɛtɛ labɔɔ Laban Arami kaa ma, kiboe tɔ. A ka a fɔ a ye, a ko: «I yɛtɛ latanga Yaguba ma koe mɔɔle bɛ fɔ koe la.»
25 Laban ka Yaguba taran. A be a la tanta lafontiren kɔnkɛ kunma. Laban tugun nun a la mɔgɛnu ka anu tɛŋɛ lafonti Galadi kɔnkɛ kunma.
26 Laban ka a fɔ Yaguba ye, a ko: «I be fen maren ka? I ka n janfa, i ka n na den musereŋɛnu nati iko mɔgɔ bitareŋɛnu minnu bitata kɛlɛ tɔ.
27 I dogonta fenna, i borita? I bata janfanteya ma n na. I ma saara n na. Ka i saarata n na nun, n si i boloka le, n ni murade sɔ i ye nun, sige nun boote la anun kɔra la, i ni taga sɛɛwa butɔ.
28 I ma a to yati n ni nɔ n bolenu milimilila n na den musereŋɛnu ma, anun n mamareŋɛnu. Kɔnɔ i bata wali iko hakkilibɔnɛ.
29 Nɔɛ be n bolo ko koroŋɛ ma koe la wo la. Kɔnɔ i baaba Marigi Ala ka yɛtɛ labɔɔ n ma kunun sue tɔ, a ko: ‹I yɛtɛ latanga Yaguba ma ko ɲinma nun ko koroŋɛ mɔɔle bɛ fɔ koe la a ye.›
30 Awa, i be tagala i baaba bata kɔtɛ bayi ɲɔ sɔgɛ bata i bita, kɔnɔ i ka n na kuyenu kanka n ma fenna?»
31 Yaguba ka Laban jaabi, a ko: «N kilanta le, a tota n ɲɛ tumado i si i la den musereŋɛnu bosi le n bolo.
32 Kɔnɔ ka i ka i la kuyenu yen n na mɔgɔ yo bolo, wo tigi si faga le. Tefire ma wo mɔ bareŋɛnu bɛ ɲala, feŋɛ min bɛ mu i tɛŋɛ la n bata, i ni anu jigan.» Kɔnɔ Yaguba ma a lɔn ka a fɔla Rakeli le ka a baaba la kuyenu kanka.
33 Laban donta Yaguba la tanta butɔ, a donta Leya bata, a donta a la jon musu fila bata, a ma fenfen yen. A bɔɔta Leya la tanta tɔ, a donta Rakeli bata.
34 Kɔnɔ Rakeli le ka a baaba la kuyenu kanka. A ka anu dogon ɲɔgɔmɛ sigifeŋɛ kɔtɔ. A sigita a kunma. Laban ka tanta butɔ bɛ fɛlɛ a ma fenfen yen.
35 Rakeli ka a fɔ a baaba ye, a ko: «N baaba, i kana dumɛn n ma. N te nɔ wulila i ɲala, bayi n be kari wale tɔ.» Laban ka kuyenu ɲini, a ma anu yen.
36 Yaguba juse yɛlɛta, a ka kuma dumɛndeŋɛ fɔ Laban ma. A ka a fɔ, a ko: «N be alibalau ko miniman maren, n be hakkɛ ko miniman maren han i ni bɔɔ n ɲinidula kɛ mɔɔle la?
37 I bata n na kotenu bɛ fɛlɛ, i ka i bolofen miniman yen ɲɔ? A yita n na n bareŋɛnu nun i bareŋɛnu ɲala, anu ni kiiti mɔ fila ma.
38 N ka san mugan de ma i bolo, kɔnɔ i la saaka musenu, anun i la baa musenu hali dɔndɔ bue ma tiɲa n bolo. N mɛn ma sikulu yo dɔmɔ i la kolofeŋɛnu tɔ.
39 N ma kolofeŋɛ do nati i ma, burun butɔ subenu be min fagaren. Nde len ka a bɛlɛya bɛ doni. Kolofeŋɛ min bɛ be kankala n ma sue nun tele, i be kɛnɛ a bɛ maɲininkala nde len ma.
40 Woose ni n tɔɔrɔ tele tɔ, kima tugun ni n tɔɔrɔ sue tɔ han n ni gali n ɲa sala a foroŋɛ tɔ.
41 N ka san mugan ma i bolo. N ka san tan nun naani wale ma alako n ni i la den museren fila sigi. N mɛn ka san wɔɔrɔ sa a kunma i la kolofeŋɛnu kanta koe la. Kɔnɔ i ka n sɔŋɛ mafalin kunɲama tan.
42 N baaba Isiyaka be kilanden Ala min na, Iburahima Marigi Ala, ka a ma sɔ n fɛ nun, i be n nasaagila n bolo tɛsɛŋɛ le la nun bi. Kɔnɔ Ala bata n na kunmajige yen, anun n be wali bɛlɛŋɛ minnu mala. A ka n na kiite sa kɛ su tanbireŋɛ la.»
43 Laban ka Yaguba jaabi, a ko: «I la musenu mu n na deŋɛnu le la, i la deŋɛnu mu n mamareŋɛnu le la, kɛ kolofeŋɛnu mu n tɛŋɛnu le la, i be feŋɛ min bɛ yenden ka, nde len tan mu anu la. Kɔnɔ n si nɔ fen mala bi n na den musereŋɛnu nun anu la deŋɛnu ye, anu ka minnu sɔtɔ?
44 Kɔtɛ na mɔ fila ni lahire kiti, seede ni to mɔ tɛma.»
45 Wo butɔ, Yaguba ka kure jigan, a ka a sɔ manditɛ la.
46 Wo kɔma, Yaguba ka a fɔ a bareŋɛnu ye anu ni kurenu matɔnbɔn. Anu ka anu matɔnbɔn anu ka anu madɛn kan dɔndɔ. Anu bɛ ka dɔmɔre ma wo kuru madɛŋɛ kunma.
47 Laban ka wo dula tɔgɔ fɔ Yegara Sahaduta. Yaguba kan ka ɲɔ tɔgɔ fɔ Galede.
48 Laban ka a fɔ, a ko: «Kɛ kuru madɛŋɛ bata ma bi mɔ fila tɛma seedeɲɔgɔya la.» Wolo ka a ma ɲɔ be tɔgɔ fɔren Galede.
49 Ɲɔ mɛn tɔgɔ be fɔla le Misipa, bayi Laban ka a fɔ le, a ko: «Hali ka mɔ fatanta le, Alatala mu a hakkile tola mɔ fila la ko ma, a ni mɔ kɛnkɛn.
50 Ka i ka n na deŋɛnu dɔgɔya, ka wo ma i ka muse do jigan, i bɛnta hakkili sɔtɔla, bayi mɔgɛ le bele maren mɔ fila tɛma seede la fɔ Ala.»
51 Wo kɔma Laban ka a fɔ Yaguba ye, a ko: «I ɲa sɔ kɛ kuru madɛŋɛ anun kɛ kuru manditɛreŋɛ la n be min saren mɔ tɛma.
52 Anu be maren seede le la, ka a fɔla a ma bɛn n ni tanbi yanna n ni ko koroŋɛ ma i la min be n juse tɔ. Ile tugun ma bɛn tanbila kɛ kuru madɛŋɛ nun kɛ kuru manditɛreŋɛ la, i ni ko koroŋɛ ma n na min be i juse tɔ.
53 Iburahima nun Nakɔri Marigi Ala ni ma mɔle fila makiitilá la.»