32
Laban wulita saguma piri, a ka a bolenu milimili a la deŋɛnu ma anun a mamareŋɛnu. A dubata anu ye, wo kɔma a saagita a bata.
Yaguba tabɛn koe Esayu labɛndula
2 Yaguba to ka kila bita, a be tagala, Ala la maleka donu tagata a labɛndula.
3 Yaguba to ka malekanu yen, a ka a fɔ, a ko: «Kɛ malekanu mu Ala la tatta le la yan.» A ka wo dula ɲɔ tɔgɔ sa Mahanayimu, wo be a fɔren de «Jama fila».
4 Yaguba ka kiilanu lasanba ɲatɔ a kɔtɔ Esayu ma Edɔmi saa butɔ, Seyiri jamanɛ tɔ.
5 A ka a yamɔre don anu bolo, a ko: «Wo be kɛlɛ fɔla n tige Esayu ye: I la joŋɛ Yaguba le be kumaren, a ko: N bata luntanya ma Laban bata, n bata mɛ ɲɔ han, kɔnɔ n bata bɔɔ ɲɔ.
6 Ningenu be n bolo, anun sofalenu, anun saakanu, anun baanu. Jon kayenu anun jon musenu tugun be n bolo. N be kiilanu lasanbaren i ma wolo la, anu ni na wo fɔ i ye, n tige, alako i ni n mabita a ɲinma la.»
7 Kiilanu saagita, anu ka a fɔ Yaguba ye, anu ko: «Mɔ bata taga han mɔ keta i kɔtɔ Esayu ma, ale tugun be nala i labɛndula, anun kayi mɔgɔ kɛmɛ naani.»
8 Wo kuma ka Yaguba kilan han a juse bɔɔta. Mɔgɛnu minnu be a bolo, a ka anu fatan jama fila. A ka saakanu anun baanu tugun fatan sigi fila, anun ningenu, anun ɲɔgɔmɛnu.
9 A ka a fɔ a juse tɔ, a ko: «Ka Esayu nata jama dɔndɔ kɛlɛ, jama tɔɛ si nɔ borila.»
10 Wo kɔma, Yaguba ka Ala mataran, a ko: «N mankayi Iburahima Marigi Ala, anun n baaba Isiyaka Marigi Ala. Ile Alatala, i ka a fɔ le n ɲɛ i ko: aa n ni saagi n na duge tɔ, n bareŋɛnu dula. N tini saagi, i si ko ɲinma ma le n ɲɛ.»
11 Yaguba mɛn ka a fɔ Ala ye, a ko: «Nde dɔgɔ kɛ koe sɔtɔ koe la, i ka ko ɲinma min nagiri n ɲɛ. I bata i la lahire lakamali nde i la jondeŋɛ ye. N be tɛgɛla tɛmuɛ min tɔ nun Yurudɛn, n na tungare dɔrɔn de be bitaren n bolo nun. Kɔnɔ kɔtɛ, mɔ nun jama fila le be saagila.
12 N bata i táran, i ni n natanga n kɔtɔ Esayu ma, bayi n bata kilan a la. N be kilanden de a kana na n kɛlɛ a ni n na denbayanu tugun faga.
13 I ma a fɔ le n ɲɛ, i ko aa i si naa ko ɲinma ma le n ɲɛ? I si naa n bɔnsɛ lasiya le iko mɛɲɛŋɛ min be ba dala, a kɔnte te nɔ lɔnna.»
14 Yaguba kita wo dula tɔ ɲɔ. Kolofeŋɛ min bɛ be a bolo, a ka donu masubɛ anu tɔ a kɔtɔ Esayu majɛjɛfeŋɛ la:
15 baa musu kɛmɛ fila anun sikule mugan, saaka musu kɛmɛ fila anun a kontoŋɛ mugan,
16 ɲɔgɔmɛ konbira bi saba anun anu la deŋɛnu, ningi musu bi naani anun tuura tɔntɔndeŋɛ tan, sofale muse mugan anun a kaye tan.
17 A ka kɛ kolofeŋɛnu fatan a la walila kayenu ma, bɔnsɛ bɔnsɛ. A ka a fɔ anu ye, a ko: «Wo sɔ ɲatɔ, wo ni naaniŋɛ to kolofeŋɛnu tɛma.»
18 A ka kɛ kuma fɔ a la walila kayi fɔlɛ ye min be kolofeŋɛnu ɲatɔ, a ko: «Wo nun n kɔtɔ Esayu tini bɛn, a si naa i maɲininka, a ni a fɔ: ‹I tige mu ɲɔmɔ le la? I be tagala mina le? Kɛ kolofeŋɛnu minnu be sɔren i kɔma, ɲɔmɔ le tɛn mu anu la?›
19 I si naa a jaabi, i ko: ‹I la joŋɛ Yaguba le tɛn mu anu la. A be a tige Esayu sanbaren kɛndelen na; ale tugun be nala kɔma.› »
20 A ka wo kuma tafɔ a la walila filaɲɔgɛ tugun ye, anun a sabaɲɔgɛ, anun mɔgɛnu minnu bɛ be sɔren kɛ kolofeŋɛnu kɔma, a ka kɛ kuma mɔɔli dɔndɛ fɔ anu bɛ ye, a ko: «Wo nun Esayu tini bɛn tɛmuɛ min tɔ, wo be kɛlɛ fɔla a ye.
21 Wo si kɛ sa n na kuma kunma: ‹I la joŋɛ Yaguba tugun be nala kɔma.› » Yaguba ka a fɔ a juse tɔ, a ko: «Kɔtɛ n be a majɛjɛla kɛ sanbanu le la. Wo kɔma ka mɔ ka ɲɔgɔn yen, tumado a si n mabita a ɲinma la.»
22 Yaguba ka sanbanu lasɔ ɲatɔ, ale kita wɔɔrɛ tɔ.
Yaguba la kɛlɛ
23 Yaguba wulita wo sue tɔ, a ka a la musu fila nun a la jon musu fila jigan, anun a la den kayiren mɔgɔ tan nun dɔndɛ. A ka anu latɛgɛ kɔɛɛ la ka min mu fatawansaŋɛ la, a tɔgɔ Yaboki.
24 A to ka anu latɛgɛ Yaboki kɔɛɛ kɔkɔma a ka a bolofeŋɛ tugun bɛ latɛgɛ.
25 Yaguba dɔrɔn de tasaagita kɔɛɛ kɔkɔma.
Kaye do nata bɔɔ a ma wo sue tɔ, anu tirinta han ɲɔ lakɛnɛ fɛ.
26 Kaye to bata a yen, anu la tiriŋɛ butɔ, a bele nɔ sɔtɔla Yaguba ma, a ka Yaguba garin a togoloŋɛ ma. A togoloŋɛ yɛlɛta a tɔ.
27 Kaye ka a fɔ, a ko: «A to n ni taga bayi ɲɔ bata kɛnɛ.» Kɔnɔ Yaguba ka a fɔ: «N te a to i ni taga, fɔ i tini duba n ɲɛ betunna.»
28 Kaye ka a maɲininka, a ko: «I tɔgɔ kama le?» Yaguba ka a jaabi, a ko: «N tɔgɔ le Yaguba.»
29 Kaye ka a fɔ: «I tɔgɛ te fɔ bitugun Yaguba. A be fɔla le Isirayila, bayi i nun Ala le kɛlɛta, anun mɔgɛnu. Ile bata nɔɛ sɔtɔ anu kunma.»
30 Yaguba ka ɲininkare ma, a ko: «N bata i táran i ni i tɔgɛ labeya n ma.» Kaye ka a fɔ, a ko: «I be n maɲininkala n tɔgɛ la fenna?» Wo kɔma a dubata Yaguba ye ɲɔ.
31 Yaguba ka a fɔ, a ko: «N ka Ala ɲa kɔtɔ yen de n tabɛŋɛ tɔ, n tota n ma faga.» A ka wo dula tɔgɔ sa Penuyeli, wo be a fɔren de «Ala ɲa kɔtɔ».
32 Tele be yɛlɛla tɛmuɛ min tɔ, Yaguba tanbita Penuyeli la, a be jigila a togoloŋɛ ma.
33 Wolo be a maren han bi, fasa min be togoloŋɛ tɔ, bani Isirayila kaanu te a dɔmɔ, bayi a ka Yaguba masɔtɔ a togolon tɔ fasa le ma.