Ikadua a Sulat'i Yuhan
Su Salam enggu su Palihala
1
Su nia a sulat na ganat sa laki a isa kanu kalukesan nu lumpukan nu 'bpamaginugut. San i nia pakatumpa kanu Babaya a pinamili nu Kadenan enggu kanu manga watab nin. Na sangat a ipegkalimu ku sekanu sia luyud kanu bantang enggu dikena bu saki ka apeg den nu langun nu nakatuntay kanu bantang. 2 Ipegkalimu nami sekanu sabap kanu bantang a sia den sa lekitanu taman sa taman.3 Na malalayun sia sa lekitanu su palihala, limu enggu kalilintad a ebpun kanu Ama tanu a su Kadenan enggu kanu Tunggal'inc a su Isa al-Masih sia kanu kapaguyag-uyag tanu a luyud kanu bantang enggu kanu kalimu.
Su Kagkakalimua enggu su Kaingat kanu manga Salakaw i Ibpamamandu nin
4 Na sangat a magalaw aku, ka nailay ku su ped a manga wata nengka a 'bpaguyag-uyag sia luyud kanu bantang a mana su inisugu sa lekitanu nu Ama. 5 Na kagina ka maitu na 'bpangenin ku sa leka i 'gkakalimua tanu langun. Dikena i nia bagu a kasuguan ka andang den i nia sa lekitanu. 6 Na pakapailay tanu su kakalimu sia kanu kanggulalan kanu manga kasuguan nu Kadenan. Na su kasuguan a nia a nakineg'u den kanu paganay na su kapaguyag-uyag sia luyud kanu kagkakalimua. 7 Kagina namakatagayak den sia sa dunia su manga tagakalen a manga taw a dikena 'bpangimbenal sa su Isa al-Masih na mimbaluy a manusia. Na su entu ba a manga taw na silan su tagakalen enggu pedsungkang kanu Isa al-Masih. 8 Na pangingati nu i di madadag su pinggumalasayan tanu ka enggu nu matalima su talutup a balas.
9 Na apia entain i di mapalalayun kanu panduan nu Isa al-Masih enggu pangumanan nin pan su entu a panduan nu Isa al-Masih na dikena sekanin lusud kanu Kadenan. Ugaid'a apia entain menem i mapalalayun kanu panduan nu Isa al-Masih na lusud sekanin kanu Ama enggu kanu Tunggal'in. 10 Na amaika aden makauma sa lekanu a salakaw i panduan nin na di nu papedtalusa kanu walay nu enggu di nu bun semalam. 11 Kagina u entain i edsakaw-sakaw lun na makaamung sekanin kanu mawag a galebek'in.
Su Mauli a Salam
12 Madakel pan i pegkiugan ku pedtalu sa lekanu ugaid'a da ku den idalem sia kagina 'gkapangingalap ku i makasan aku bun sa lekanu asal'a makambibitiala tanu ka enggu matalutup su kagalaw tanu.
13 Pedsalamen kanu bun nu manga wata nu suled'engka a nia a babayd a pinamili bun nu Kadenan.
Wassalam