लूका 3

यूहन्‍ना द्वारा यीशुक अयबाक लेल तैयारी

(मत्ती 3.1-12; मरकुस 1.1-8; यूहन्‍ना 1.19-28)

^1-2 कैसर तिबिरियुसक शासन-कालक पन्‍द्रहम वर्ष मे जकरयाहक पुत्र यूहन्‍ना लग निर्जन क्षेत्र मे परमेश्‍वरक दिस सँ सम्‍बाद अयलनि। ओहि समय मे पुन्‍तियुस पिलातुस यहूदिया प्रदेशक राज्‍यपाल छलाह, गलील प्रदेशक शासक हेरोद छलाह, इतूरिया आ त्रखोनीतिस क्षेत्रक शासक हुनकर भाय फिलिपुस और अबिलेन क्षेत्रक शासक लुसानियास छलाह। महापुरोहितक पद पर छलाह हन्‍ना और काइफा। यूहन्‍ना लग परमेश्‍वरक सम्‍बाद एही समय मे अयलनि। ³ ओ यरदन नदीक लग-पासक पूरा इलाका मे घूमि-घूमि कऽ प्रचार करऽ लगलाह जे, “पापक क्षमा पयबाक लेल पश्‍चात्ताप कऽ हृदय-परिवर्तन करू और बपतिस्‍मा लिअ,” ⁴ जेना परमेश्‍वरक प्रवक्‍ता यशायाहक पुस्‍तक मे लिखल अछि जे,

“निर्जन क्षेत्र मे केओ जोर सँ आवाज दऽ रहल अछि—

‘प्रभुक लेल मार्ग तैयार करू,

हुनका लेल सोझ बाट बनाउ।

⁵ प्रत्‍येक गहींर भाग भरि देल जायत,

प्रत्‍येक ऊँच भाग आ पहाड़ नीच कयल जायत,

घुमान बाट सोझ,

और उबर-खाबड़ बाट समतल कयल जायत।

⁶ सभ मनुष्‍य परमेश्‍वर द्वारा प्रदान कयल उद्धार केँ देखत।’ ”

⁷ लोकक भीड़ सभ यूहन्‍ना सँ बपतिस्‍मा लेबऽ अबैत रहैत छल आ ओ ओकरा सभ केँ कहैत छलथिन, “है साँपक सन्‍तान सभ! परमेश्‍वरक आबऽ वला क्रोध सँ बचबाक लेल तोरा सभ केँ के सिखौलकह? ⁸ तोँ सभ जँ अपना पापक लेल पश्‍चात्ताप कऽ कऽ हृदय-परिवर्तन कयने छह, तँ तकर प्रमाण अपना व्‍यवहार द्वारा देखाबह। और अपना मोन मे एना सोचि निश्‍चिन्‍त नहि रहह जे, हमर सभक कुल-पिता अब्राहम छथि, कारण, हम तोरा सभ केँ कहैत छिअह जे परमेश्‍वर एहि पाथर सभ सँ अब्राहमक लेल सन्‍तान उत्‍पन्‍न कऽ सकैत छथि। ⁹ गाछक जड़ि मे कुड़हरि रखा गेल अछि। जे गाछ नीक फल नहि दैत अछि से काटल आ आगि मे फेकल जायत।”

¹⁰ एहि पर लोक सभ यूहन्‍ना सँ पुछऽ लागल, “तँ हम सभ की करू?” ¹¹ ओ उत्तर देलथिन, “जकरा दूटा कुर्ता होइक से एकटा तकरा देअओ जकरा नहि छैक, और जकरा लग भोजनक वस्‍तु होइक सेहो एहिना करओ।”

¹² कर असूल करऽ वला सभ सेहो बपतिस्‍मा लेबऽ आयल आ यूहन्‍ना सँ पुछलकनि, “यौ गुरुजी, हम सभ की करू?” ¹³ ओ उत्तर देलथिन, “जतबा कर निश्‍चित कयल गेल अछि ताहि सँ बेसी नहि लैह।”

¹⁴ एहि पर सैनिक सभ पुछलकनि, “आ हम सभ की करू?” ओ कहलथिन, “ककरो सँ बलजोरी पाइ नहि लैह, आ ने ककरो पर झुट्ठे दोष लगाबह। अपना दरमाहा सँ सन्‍तुष्‍ट रहह।”

¹⁵ जनता मे एकटा बड़का उत्‍सुकता आबि गेल छलैक, आ सभ मोने-मोन यूहन्‍नाक बारे मे सोचि रहल छल जे, कहीं ई उद्धारकर्ता-मसीह तँ नहि छथि? ¹⁶ यूहन्‍ना सभ केँ उत्तर दैत छलथिन, “हम तोरा सभ केँ पानि सँ बपतिस्‍मा दैत छिअह। मुदा हमरा सँ शक्‍तिशाली एक गोटे आबि रहल छथि, जिनकर जुत्तो खोलऽ जोगरक हम नहि छी। ओ तोरा सभ केँ पवित्र आत्‍मा और आगि सँ बपतिस्‍मा देथुन। ¹⁷ ओ अपन खरिहानक अन्‍न साफ करबाक लेल हाथ मे सूप लेने छथि। ओ गहुम केँ बखारी मे राखि लेताह, मुदा भुस्‍सा केँ ओहि आगि मे जरौताह जे कहियो नहि मिझायत।” ¹⁸ ई बात और आरो अन्‍य तरहक बहुत बातक द्वारा यूहन्‍ना लोक सभ केँ बुझा-सुझा कऽ शुभ समाचार सुनबैत रहलथिन।

¹⁹ मुदा जखन यूहन्‍ना शासक हेरोद पर भायक घरवाली हेरोदियासक कारणेँ, तथा आरो कुकर्म सभक कारणेँ जे ओ कयने छलाह, दोष लगौलथिन, ²⁰ तँ हेरोद अपना कुकर्म मे एकटा इहो कुकर्म जोड़ि लेलनि जे, ओ यूहन्‍ना केँ जहल मे बन्‍द करबा देलथिन।

यीशुक बपतिस्‍मा

(मत्ती 3.13-17; मरकुस 1.9-11)

²¹ सभ लोक केँ बपतिस्‍मा लेलाक बाद यीशुओ बपतिस्‍मा लेलनि। बपतिस्‍माक बाद जखन ओ प्रार्थना कऽ रहल छलाह तँ स्‍वर्ग खुजल ²² आ पवित्र आत्‍मा परबाक रूप मे हुनका ऊपर उतरि अयलाह, और स्‍वर्ग सँ आवाज आयल जे, “अहाँ हमर प्रिय पुत्र छी। अहाँ सँ हम बहुत प्रसन्‍न छी।”

यीशुक पूर्वज लोकनि

(मत्ती 1.1-17)

²³ यीशु जखन अपन काज शुरू कयलनि तँ लगभग तीस वर्षक छलाह। एना मानल जाइत छल जे ओ यूसुफक पुत्र छलाह।

यूसुफ एलीक पुत्र छलाह,

²⁴ एली मतातक पुत्र छलाह,

मतात लेवीक पुत्र छलाह,

लेवी मलकीक पुत्र छलाह,

मलकी यन्‍नाक पुत्र छलाह,

यन्‍ना यूसुफक पुत्र छलाह,

²⁵ यूसुफ मततियाक पुत्र छलाह,

मततिया आमोसक पुत्र छलाह,

आमोस नहूमक पुत्र छलाह,

नहूम एसलीक पुत्र छलाह,

एसली नागैक पुत्र छलाह,

²⁶ नागै मातक पुत्र छलाह,

मात मततियाक पुत्र छलाह,

मततिया शिमीक पुत्र छलाह,

शिमी योसेखक पुत्र छलाह,

योसेख योदाहक पुत्र छलाह,

²⁷ योदाह योहनानक पुत्र छलाह,

योहनान रेसाक पुत्र छलाह,

रेसा जरुब्‍बाबेलक पुत्र छलाह,

जरुब्‍बाबेल शालतिएलक पुत्र छलाह,

शालतिएल नेरीक पुत्र छलाह,

²⁸ नेरी मलकीक पुत्र छलाह,

मलकी अद्दीक पुत्र छलाह,

अद्दी कोसामक पुत्र छलाह,

कोसाम इलमोदामक पुत्र छलाह,

इलमोदाम एरक पुत्र छलाह,

²⁹ एर यहोशूक पुत्र छलाह,

यहोशू एलिएजरक पुत्र छलाह,

एलिएजर योरीमक पुत्र छलाह,

योरीम मतातक पुत्र छलाह,

मतात लेवीक पुत्र छलाह,

³⁰ लेवी सिमियोनक पुत्र छलाह,

सिमियोन यहूदाक पुत्र छलाह,

यहूदा यूसुफक पुत्र छलाह,

यूसुफ योनामक पुत्र छलाह,

योनाम एलयाकीमक पुत्र छलाह,

³¹ एलयाकीम मलेआहक पुत्र छलाह,

मलेआह मिन्‍नाहक पुत्र छलाह,

मिन्‍नाह मताताक पुत्र छलाह,

मताता नातानक पुत्र छलाह,

नातान दाऊदक पुत्र छलाह,

³² दाऊद यिशयक पुत्र छलाह,

यिशय ओबेदक पुत्र छलाह,

ओबेद बोअजक पुत्र छलाह,

बोअज सलमोनक पुत्र छलाह,

सलमोन नाशोनक पुत्र छलाह,

³³ नाशोन अमीनादाबक पुत्र छलाह,

अमीनादाब अदमीनक पुत्र छलाह,

अदमीन अरनीक पुत्र छलाह,

अरनी हेस्रोनक पुत्र छलाह,

हेस्रोन पेरसक पुत्र छलाह,

पेरस यहूदाक पुत्र छलाह,

³⁴ यहूदा याकूबक पुत्र छलाह,

याकूब इसहाकक पुत्र छलाह,

इसहाक अब्राहमक पुत्र छलाह,

अब्राहम तेरहक पुत्र छलाह,

तेरह नाहोरक पुत्र छलाह,

³⁵ नाहोर सरूगक पुत्र छलाह,

सरूग रऊक पुत्र छलाह,

रऊ पेलेगक पुत्र छलाह,

पेलेग एबेरक पुत्र छलाह,

एबेर शेलहक पुत्र छलाह,

³⁶ शेलह केनानक पुत्र छलाह,

केनान अर्पक्षदक पुत्र छलाह,

अर्पक्षद शेमक पुत्र छलाह,

शेम नूहक पुत्र छलाह,

नूह लामेकक पुत्र छलाह,

³⁷ लामेक मथूशेलहक पुत्र छलाह,

मथूशेलह हनोकक पुत्र छलाह,

हनोक यारेदक पुत्र छलाह,

यारेद महलालेलक पुत्र छलाह,

महलालेल केनानक पुत्र छलाह,

³⁸ केनान एनोशक पुत्र छलाह,

एनोश शेतक पुत्र छलाह,

शेत आदमक पुत्र छलाह,

और आदम परमेश्‍वरक पुत्र छलाह।