ईसु के फिरो जिन्दा होवेक
(मत्ती 28:1-10; मरकुस 16:1-8; यूहन्ना 20:1-10)
24
1 हप्ता के पेहलका दिना फरीछ होवे घरी उसभीन जेनियेन गमकेवला समनवेन के जे जोगाड़ करले हले, लेके कबुरवा जुगुर येले। 2 उसभीन दखलके कि ऊ पखला जे कबुरवा के दुहरिया पर झांपले हले, कबुरवा से घुड़मुड़ाएल हले, 3 ता उसभीन कबुरवा के भीतर गले, लकिन परभु ईसु के देहा वहां नाञ पेलके। 4 जखने उसभीन जेनियेन ई बाता देखके डेर के चोंएक गले तखने तुरते दूगो मरदवा चमकलाहा पिन्धनवा पिन्धल परकट होएके उसभीन जुगुर ठड़ा होले। 5 उसभीन जेनियेन डेर गले, आर डर के मारे उसभीन मुड़िया गोंएत के ठड़ा रहले, ताब ऊ दुयो मरदवेन उसभीन से कहलके, “तोंहनी जिन्दका के मोरलहा में कहील खोजे हीं ? 6 ऊ इने नाञ हो, ऊ मोरलहा में से जिन्दा भे गलो। खेहाल कर कि जखने ऊ गलील में तोहनी जोरे रेहे हलो, 7 ऊ ईरंग केहे हलो, “ अदमियां के बेटवा पपियेन के हांथा में पकरावल जीतो आर ओकरा कुरूसवा पर चढ़ाएके मोरावल जीतो, आर तीसरका दिना ऊ फिर से जिन्दा भे जीतो।”a 8 तखने जेनियेन के ईसु के बाता खेहाल येले, 9 आर उसभीन जेनियेन कबुरवा से घुइर जाएके उसभीन एगारो चेलवेन के आर साभे गोटेन के, ई साभे बातेन केह के सुनीलके। 10 उसभीन मरियम मगदलीनी आर योअन्ना आर याकूब के मइया मरियम आर उसभीन के जोरे आर जेनियोन हले। 11 उसभीन जेनियेन के ई बाता मुख्य चेलवेन के खिसवा नियर लागले, आर उसभीन जेनियेन के बाता पर बिसवास नाञ करलके। 12 ताब पतरस उइठ के कबुरवा दने दोरले गले, ऊ कबुरवा में झुइक के दखलके कि खली चेदरिया धारल हे, आर अकर पर ऊ चोंएक के घुइर येले।इम्माऊस के डहरा में चेलवेन जोरे ईसु
(मरकुस 16:12,13)
13 वेहे दिना दूगो चेलवेन इम्माऊस नामा के एग गांवा में जाएब करे हले, जे यरूसलेम से करीबन 11 किलो मीटर दूर पर हले। 14 उसभीन ई बाता जे यरूसलेम में ईसु जोरे होएल हले अपनेम कहले जाएब करे हले, 15 आर जखने ऊ दुनु गोटे बाता करले आर अपनेम पुछपाछ करे हले, ताब एगबेग ईसु भिरिया आएके उसभीन जोरे चले लागले। 16 लकिन ऊ दुयो के अंखिया इरंग बन्द केर दले हले कि ईसु के चिन्हे नाञ पारलके। 17 ईसु उसभीन से पुछलके, “ई कोन बाता हको जे तोहनी जीते जीते अपनेम करे हीं?” उसभीन दुखा से ठड़ा रेह गले। 18 ई बाता सुइन के दुयो गोटे में से किलियोपास नामा के एग अदमियें कहलके, “ की तों यरूसलेम में अस्करे परदेसिया हकी, जे नाञ जाने हीं कि ई दिनेन में यरूसलेम में कोन्ची भेले?” 19 ईसु उसभीन से पुछलके, “कोन बाता ?” उसभीन ईसु से कहलके, “ईसु नासरेतवला के बारेम; ऊ परमेसवर आर अदमियेन जुगुर कामा आर अपन बचनवा में सकतीसाली परमेसवर दने से बोलेवला हले, 20 आर हमनी के मुख्य यजकवेन आर सरदरेन ईसु के पकरवाए दलके कि ओकरा मोरावे के हुकुम दियल जाए; आर ओकरा कुरूस पर चढ़वाएके मोराए दलके। 21 लकिन हमनी के आसा हले कि उहीं इसराएल के छुटकारा दते। लकिन ई साभे बाता के होएके आझ तीसरका दिना हको। 22 आर हमनी के कुछु जेनियोन हमनी के डराए के चोंकाए दले हले, जे फरिछ होवे घरी कबुरवा जुगुर गेल हले; 23 आर जखने ओकर देहा नाञ पेलके ताब ऊ जेनियेन ई कहले येले कि हमनी के सरगदुतेन दखार दलको आर उसभीन कहलके कि ऊ जिन्दा हो। 24 तखने हमर संगेन में से एग गोटे कबुरवा दने गले, आर जिरंग जेनियेन कहले हले ऊ सीरंगे पेलके; लकिन ऊ ईसु के नाञ दखलके।” 25 तखने ईसु उसभीन से कहलके, “ए बगेर बुधियेन, आर परमेसवर दने से बोलेवलेन के साभे बातेन पर बिसवास नाञ करेवलेन बुरबकेहेन! 26 कि ई जरोरी नाञ हले कि मसीह ई दुखा उठाए के अपन महीमा के सिहांसन पर बेठते ?” 27 तखने ईसु मोसस के आर साभे परमेसवर दने से बोलेवलेन के साभे पवितर किताबा में सुरुवे से अपन बारेम लिखल वचनवेन के मतलब, उसभीन के बुझीलके।
28 अतने में उसभीन ऊ गांवा जुगुर गले जहांपरी ऊ दुयो जाएब करे हले, आर उसभीन ईसु के चलिया से सोंचलके कि ईसु आगु जाएल खोजे हे। 29 लकिन ऊ दुयो ई केहके उन्खरा टोएक के कहलके, “संझिया होएब करे हो, चल, हमनी जोरे राह काहेकि बेरिया डुइब गेल हो।” ताब ईसु उसभीन जोरे रेहे खतीर भीतर गले। 30 जखने ईसु उसभीन जोरे खाएल बेठले, ईसु रोटिया ले के धन्नेवाद करलके आर टोएन के उसभीन के दिये लागले। 31 तेसी उसभीन के अंखिया खुइल गले; आर उसभीन उन्खरा चिन्ह ललके, आर ईसु तुरते उसभीन जुगुर से छपीत होए गले। 32 आर उसभीन अपने में कहलके, “जखने ऊ डहरा में हमनी से बाता करे हलो आर पवितर कितबा के बचनवा बुझावे हलो, तखने की हमनी के दिला में अगिया नाञ उठे हलो ? 33 आर उसभीन तखनिये उइठ के तुरते यरुसलेम चेल गले, आर उसभीन एगारोह चेलवेन आर उसभीन के संगेन के एगजुट होवल पेलके। 34 उसभीन केहे हले कि, “परभु सच्चे जिन्दा होए गलो, आर सीमोन ई दखले हो।” 35 ताब ऊ दुनु अदमियेन डहरा में होएल बाता उसभीन के केह दलके आर योहो कहलके कि उसभीन ईसु के रोटिया टोने घरी किरंग चिन्हलके।
ईसु चेलवेन के दखार दियेक
(मत्ती 28:16-20; मरकुस 16:14-18; यूहन्ना 20:19-23; परेरितवेन 1:6-8)
36 उसभीन ई बाता केहेब करे हले तेसी ईसु अपने उसभीन के मांझाम आएक ठड़ा भे गले, आर उसभीन से कहलके, “ तोहनी के सान्ती मिलतो।” 37 लकिन उसभीन घबराए गले आर डेर गले, आर उसभीन सोंचे लागले कि हमनी कोन्हो भुता के दखेब करे हिये। 38 ईसु उसभीन से कहलके, “तोहनी कहिल घबरा हीं? आर तोहनी अपन मना में इरंग कहिल फिकिर करे हीं ? 39 हमर हांथा आर हमर गोड़ा दखी कि हाम वेहे हकियो। हमरा छुइ के देखले, काहेकि भुता के हडिया आर मोसया नाञ रेहे जिरंग हमर देहा में दखे हीं।”
40 ई बाता केह के ईसु अपन हांथा आर गोड़ा दखीलके। 41 ताब खुसी के मारे उसभीन के बिसवास नाञ होले, आर उसभीन ठक भे गले, ता ईसु उसभीन से पुछलके, “की तोहनी जुगुर यहांपरी कुछु खाएवला हो?” 42 उसभीन उन्खरा भुंजलका मछवा के टुकड़वा दलके। 43 आर ईसु ऊ लेके उसभीन जुगुर खेलके। 44 फिरो ईसु उसभीन से कहलके, “ई हमर ऊ बाता हको, जे हाम तोहनी जोरे रेहे घरी तोहनी से कहले हलियो कि ई जतना बाता मोसस के नियमा के कितबा में आर परमेसवर दने से बोलेवलेन के कितबा में आर भजनवेन के कितबा में जे हमर बारेम लिखल हो, ऊ साभे पूरा होतो।” 45 ताब ईसु उसभीन के पवितर कितबा बुझे खतीर उसभीन के बुधिया दलके, 46 आर ईसु उसभीन से कहलके “इरंग पवितर कितबा में लिखल हो कि मसीह दुखा उठीतो, आर तिसरका दिना मोरलाहा में से जिन्दा होएके उइठ जीतो, 47 आर पापा के छोएड़के परमेसवर दने घुरते ताबे पापा से माफी मिलतो ई संदेसवा यरुसलेम से लेके साभे जतियेन में परचारन उन्खरे नामा से करल जीतो। 48 तोहनी ई साभे बातेन के गवहियेन हकी। 49 आर दखी जे किरिया हमर बप्पा परमेसवर खेले हो, हाम ऊ तोहनी पर ढारबो आर जल तकले सरगा से सकतिया नाञ पेबी, तल तकले, तोहनी येहे नगरवा में रहियों।”b
ईसु के सरगा में जाएक
(मरकुस 16:19,20; परेरितवेन 1:9-11)
50 ताब ईसु उसभीन के बेतनिय्याह गांवा तकले बाहर ले गले, आर अपन हांथा उठाए के उसभीन के असिरबाद दलके; 51 आर उसभीन के असिरबाद दले ईसु उसभीन जुगुर से फरक होए गले आर सरगा पर उठाए लियल गले।c 52 ताब उसभीन ईसु के अराधना केरके ढेर खुसी से यरुसलेम चेल गले ; 53 आर उसभीन मेंदला में रोज-रोज एगजुट होए के परमेसवर के अराधना करते रेहे हले।