हुंसियार मुन्सी के उपमा
16
1 फिरो ईसु अपन चेलवेन से कहलके, “एगो अमिरवा अदमियां हले,ओकर एगो मुन्सी हले। अदमियेन अमिरवा अदमियां जुगुर मुन्सिया पर ढेस लगील के कि ऊ तोर साभे दोलतिया ऊड़ाएब करे हो। 2 येहे खतीर ऊ मुन्सिया के बोलाए के ओकर से कहलके, ‘हाम ई कि सुनेब करे हियो की तों हमर दोलतिया उड़ाएब करे हीं? तों हमरा साभे दोलतिया के हिंसाबा दे, काहेकि तोरा ई कामा से हाम निकालेब करे हियो। 3 मुन्सियें अपन मनाम सोंचलके : आब हाम की करबे? काहेकि हमर मलीकवें हमर मुन्सियावला कामा हमर से छिन लेब करे हे। आर हमर देहाम अतना कबुवा नाञ हे कि जे हाम मटिया काएट के कमीबे। आर हमरा भीखियो मांगेम लाज लागे हे। 4 हमर जुगुर एगो उपाए हे, जदि हाम इरंग करबे ता हमर ढेरी सथीवा होए जीते, आर हमरा ई कामा से निकाएल दियेक के बाद हमर ऊ सथीवेन हमरा सम्हाएर लते। 5 ताब मुन्सियें अपन मलिकवा के करजदरवेन के अपन जुगुर अकोगो केरके बोलिलके आर पेहलका अदमियां से पुछलके, ‘ तोर जुगुर हमर मलिकवा के कते करजवा हो ?’ 6 ऊ कहलके, ‘सो किलो तेला,’ ताब मुन्सियें कहलके, ‘जो, अपन खतवा लान आर पचास किलो लिख दिहीं।’ 7 फिरो दोसरका अदमियां से पुछलके, ‘तोर जुगुर हमर मलिकवा के कते करजवा हो ?’ ऊ कहलके, ‘सो मनa गोहमा,’ ताब मुन्सियें कहलके, ‘जो, अपन खतवा लान आर अस्सी मन लिख दिहीं।’8 ऊ अमिरवा मलिकवा ऊ बेमनाहा मुन्सिया के बेस केहे लागले, काहेकि ऊ बड़ी हुंसयारी से कामा करलके। काहेकि परमेसवर के नाञ जानेवलेन अदमियेन परमेसवर के जानेवलेन अदमियेन से बेढ़ के लिये-दिये में जादे हुंसयार रेहे हे। 9 हाम तोहनी से कहे हियो कि अपन दुनिया के दोलतिया से अपन खतीर सथीवेन बनाए लियों, काहेकि जखने तोहनी के दुनिया के दोलतिया खतम होए जीतो, तखने परमेसवर तोहनी के खुसी से सरगा के सदाए के घारा में अपनीतो। 10 जखने तोहनी छोट-छोट बातेन में ईमनदार रहबी ताबे तोहनी बड़केन बातेन में ईमनदार रेहे पारबी। जदि तोहनी छोट-मोट बातेन में बेमानी करबी ता तोहनी बड़केन जिमेदरियेन में ईमनदार नाञ रेहे पारबी। 11 आर जदि तोहनी दुनिया के दोलतिया में इमनदार नाञ हीं, ता तोहनी के सरगा के दोलतिया के सोंपतो ? 12 आर जदि तोहनी दोसराहा दोलतिया के जोरे इमनदार नाञ हीं, ता जे तोहनी के हको, ऊ तोहनी के के दतो?
13 “कोन्हो सेवकवा दुगो मलिकवा के सेवा नाञ केर सके हीं: काहेकि ऊ एग गोटा से घिनीते आर दोसरका से परेम राखते ; चेहें एग गोटा से मिलल रहते आर दोसरका के नकारते। तोहनी परमेसवर आर दोलतिया के दुनु के सेवा नाञ केर सके हीं।”b
फरीसी अदमियेन से चेत के राह
(मत्ती 11:12,13, 5:31,32; मरकुस 10:11,12)
14 फरीसी अदमियेन जे लालची हले, ई साभे बातेन सुइन के ईसु के मजाक उड़ावे लागले। 15 लकिन ईसु उसभीन से कहलके, “तोहनी जे अपने के अदमियेन जुगुर धरमी बने हीं, लकिन परमेसवर तोहनी के मना जाने हो, काहेकि जे चिजा अदमियेन के नजरिया में महान हे, ऊ परमेसवर के नजरिया में घिनाएल हे।
16 ‘यूहन्ना बपतिस्मा दियेवला के समइया तकले मोसस के नियमा आर परमेसवर दने से बोलेवलेन के कितबा चले हले। ऊ समइया से लेके परमेसवर के राज के बेस समचरवा सुनावेल जाएब करे हो आर साभे गोटे परमेसवर के राज में ढुके खतीर बड़ी अगुवाएब करे हे।c 17 सरगा आर धरतिया नास होए जीतो ता होय जीतो लकिन परमेसवर के बचनवा में से अको बिन्दुवो नास नाञ होतो।d
18 “जे कोय अपन कनइया के फरकती केरके दोसर से बिहावा करे हे ऊ व्यभिचार करे हे, आर जे कोय इरंग फरकती करल जेनी से बिहावा करे हे वोहो व्यभिचार करे हे।”e
अमिरवा अदमियां आर कंगाल लाजर
19 एगो अमिरवा हले जे बेंगनी रांगाक मखमल के पिन्धनवा पिन्धे हले आर रोजे-रोजे हंसी-खुसी से आर धुम-धाम से रेहे हले। 20 वहांपरी एगो लाजर नामा के कंगाल अदमियां रेहे हले ओकर देहा में पूरे घाव-घोस से भरल हले, आर अमिरवा अदमियां के घारा के दुहरिया परी बेठल रेहे हले, 21 आर ऊ इरंग खोजे हले कि अमिरवा के टुला से गिरल जुठवा सखरिया खा हले, आर कुकरेन ओकर घावा के चाटते रेहे हले। 22 एग दिना इरंग होले कि ऊ कंगालवा अदमियां मोएर गले आर सरगदुतेन ओकरा अबरहाम के कोरवा में लगलके। आर इरंग भेले कि वोहो अमिरवा अदमियां मोएर गले आर मटिया दे दलके, 23 आर ऊ अमिरवा अदमियां पाताल में तड़पेवला जघावा में गले आर जखने ऊ दुखा-पिरा भोगे लागले ऊ अपन अखिंया ऊपर उठाएके दुरे से देखलके कि लाजर अबराहम के कोरवा में बेठल हले। 24 ताब ऊ हंकाएक कहलके, ‘हो बप्पा अबराहम, हमरो पर दया कर हो आर लाजर से बोल्हीं कि पनिया में ओंगरिया भींजाए के हमर जिहा ठंढा केर दते, काहेकि हाम ई अगिया में तड़पेब करे हियो।’ 25 लकिन अबराहम जबबा दलके, “हे बेटवा, खेहाल कर तों अपन जिनगिया में सुख भोएग लल्हीं आर उरंगे लाजर दुखा भोगले हले; लकिन आब लाजर यहांपरी सुख पाएब करे हे आर तों तड़पेब करे हीं। 26 ई सब बाता के छोड़ हमनीक आर तोर मांझा में एगो बड़ गढ़ा हो आर जे यहां से ऊ पार तोर जुगुर जाएल खोजते ऊ नाञ जाए पारते ; आर नाञ कोय वहां से यहांपरी हमनी जुगुर आवे पारते। 27 अमिरवा अदमियें कहलके, “हे बप्पा, हाम तोर से हांथा जोरे हियो कि लाजर के तोंह हमर बप्पा के घारा पठाए दिहीं, 28 काहेकि हमर पांच गो भेयवा हे ; आर ऊ उसभीन जुगुर ई बाता के गवहिया दतो, इरंग नाञ होवे कि वोहो सभीन ई दुखा-पीरावला जघावा में येते।’ 29 अबराहम ओकर से कहलके, ‘उसभीन जुगुर मोसस आर परमेसवर दने से बोलेवलेन के कितबा हे, उसभीन के ऊ कितबेन के सुनेल दे।’ 30 अमिरवा अदमियें कहलके, नाञ, हो बप्पा अबराहम ;लकिन जदि कोन्हो मोरलेहेन में से उसभीन जुगुर जीते, ता उसभीन पापा के छोएड़ के परमेसवर दने घुरते। 31 ताब अबराहम ओकर से कहलके, ‘जदि उसभीन मोसस आर परमेसवर दने से बोलेवलेन के नाञ सुने हे, ता मोरलेहेन में से कोय जिन्दा भे जीते, तय्यो पर उसभीन ओकर नाञ मानतो’।”