ईसु के जलम
(मत्ती 1:18-25)
2
1 ऊ दिनेन में रोमी महरजवा ओगुस्तुसa हुकुम दलके कि रोमी देसा के साभे गोटेन के नामा लिखल जीतो। 2 जखने कुरेनियोस सिरिया के राजपाल हले, ऊ समइया में पेहला-पेहली नामा लिखइया होले। 3 साभे गोटेन अपन नामा लिखवे खतीर अपन अपन सहरवा गले । 4 योसफ, रजवा दाऊद के घरीना आर खनदनवा के हले , येहे खतीर ऊ गलील जिला के नासरेत नगरवा से रजवा दाऊद के यहूदीया जिला के बेतलहेम नगरवा में, 5 अपन बिहावा लागल परयासी कनइया मरियम के जोरे नामा लिखवे खतीर गले। 6 मरियम के वेहे समइया में चेंगरिया होवेक दिना पूरे भे गले। 7 आर ऊ अपन पेहेलका बेटवा के जलम दलके आर ओकरा गोहला घारा में कपड़वा में मोटियाएक पोमरा में राखलके, काहेकि उसभीन खतीर सोंथाएवला घारा डहरा में नाञ मिल्ले।सरगदुतेन दने से गोरखियेन के संदेसवा
8 आर ऊ समइया में, खेता में रेह के अपन अड़वरिया के रतिया में पहरा दियेवलेन ढेर मनी गोरखियेन ऊ देसा में हले। 9 आर परभु के एगो दूता उसभीन के दखार दलके आर परभु के महिमा उसभीन के चारो दने चमकले आर उसभीन बड़ी डेर गले । 10 तखने सरगदूता उसभीन से कहलके, “नाञ डर; काहेकि सुन, हमर जुगुर तोहनी के आर साभे अदमियेन खतीर एगो खुसी के समचरवा हो। 11 आझ रजवा दाऊद के नगरवा में तोहनी खतीर मुकतीदाता जलमल हो, आर येहे मसीहb, हमनी के परभु हको। 12 अकर खतीर तोहनी के इ चिन्हावा हको: एगो अरतवा चेंगरिया कपड़वा से मोटियाएल आर पोमरा में धारल मिलतो।” 13 तखने एगबेग ऊ सरगदूता के जोरे सरगदुतेन के एग पाल आए गले, आर ऊसब परमेसवर के गुन गेते-गेते केहे लागले, 14 “सरगा में परमेसवर के महिमा आर धरतिया में साभे गोटेन जकर से परमेसवर खुस हे, सांती होतो।”
15 जखने सरगदुतेन उसभीन जुगुर से सरगा में चेल गले, ता गोरखियेन अपने में कहलके, “चल, हमनी बेतलहेम जाए के इ बाता जे होएल हे, आर जे हमनी के परभु कहलके, से दखबे।” 16 आर उसभीन तुरते जाए के मरियम आर योसफ के, आर चेंगरिया के पोमरा में धारल दखलके। 17 उन्खरा दखेक बादे गोरखियेन साभे अदमियेन से कहलके कि ई चेंगरिया के बारेम सरगदूतें जे-जे कहले हले। 18 आर सुनेवलेन साभे गोटे गोरखियेन के बातेन से चोंएक जाए हले। 19 लकिन मरियम ई साभे बाता अपन मना में राएख के सोंचते रहले आर धयान करते रहले। 20 जिरंग सरगदूतें गोरखियेन से कहले हले, उरंगे गोरखियेन साभे कुछु दखलके आर सुनलके ; येहे खतीर उसभीन परमेसवर के महिमा आर अराधना करले चेल गले।
ईसु के मेंदला में सोंपेक
21 जखने ऊ चेंगरिया के आठ दिना पूरा भेले आर उन्खर खतनाc के समइया येले, तखने ओकर नामा ईसु धारलके जे सरगदूतें मरियम के पेटाम ईसु के आवे से पेहले कहले हले। 22 जखने मोससd के कितबा के नियमा से युसुफ आर मरियम के सुध करेके नेगा के समइया येले, ता उसभीन ईसु के यरुसलेम में परमेसवर के मेंदला में लानलके कि ओकरा परभु के सोंपते, 23 ( जिरंग यहूदी धरम में लिखल हे कि : “ साभे के पेहलका बेटवा परमेसवर खतीर सोंपल जीतो।”)e 24 आर उसभीन खतीर बली चढ़ावल जीतो, परभु के नियमा के कितबा के बचनवा तरी: “एग जोड़ा पोंड़या चेंहे दुगो कबुतरा के बचवा” लाएन के चढ़ा।f
समोन के गीता
25 यरूसलेम में समोन नामा के एगो अदमियां हले, ऊ परमेसवर के नियमा बेस तरी से मानेवला भगत हले; आर ऊ इसराएल के दुखा से सांती दियेवला मसीह के असरा दखेवला हले आर पवितर आतमा ओकर पर हले। 26 आर पवितर आतमा से ओकरा हाला मिलल हले कि जल तकले परभु मसीह के ऊ देख नाञ लते तल तकले ऊ नाञ मोरते। 27 पवितर आतमा के अगुवा से समोन मेंदला गले। जखने योसफ आर मरियम अरतवा चेंगरिया ईसु के कोरवा में लेके परमेसवर के मेंदलाक भीतर गले कि ओकर खतीर पवितर कितबा के नियमेन पूरा करते, 28 ता समोन चेंगरिया ईसु के अपन कोरवाम ललके आर परमेसवर के धन्नेवाद केरके कहलके, 29 “ हे मालिक, आब तोंह अपन खाएल किरिया से अपन सेवकवा के जीबा सांती से उठाए लोहो, 30 काहेकि अदमियेन के पापा से बचावेवला के जकरा तोंह पठीले हो हाम देख ललियो, 31 जकरा तोंह साभे अदमियेन खतीर बनीले हो, 32 ऊ एगो इंजरा हके जे अदमियेन के जे यहूदी नाञ हके परमेसवर से भेंट करीते आर ऊ इसराएल के गुरूर हके।”g
33 ईसु के बाबु आर ओकर मइया ई बातेन से जे ओकर बारेम केहे हले, ऊ सुइन के चोंएक जा हले। 34 ताब समोन मरियम आर योसफ के असिरबाद देके, ईसु के मइया मरियम से कहलके “सुन, ई चेंगरिया के इसराएल में ढेरी गोटेन के नास आर ढेरी गोटेन के मुकती खतीर चुनल हो। आर ई चेंगरिया परमेसवर के एगो चिन्हावा रहतो, जकरा ढेरी गोटेन बिरोध करतो। 35 ई नियर ढेरी दिलेन के गड़ल बाता ऊभेर के बाहर निकलतो। लकिन तोर जीबा से एगो तलवरिया पार होवे नियर एगो दुखा होतो।
ईसु के बारेम हन्नाह के गवहिया
36 ऊ दिना आसेर वंस के हन्नाह नामा के परमेससवर दने से बोलेवली एग जेनिया मेंदला में हल्थी। ऊ फनुएल के बेटिया हल्थी आर ऊ बड़ी बुढ़ी हल्थी। आर ऊ विहावा होवे के बाद खली सात बरस अपन पोहनुवा जुगुर रहे पारल हले। 37 ऊ चोरासी बरस से बेवा हले, आर ऊ मेंदला के नाञ छोड़े हले, लकिन परमेसवर के राएत दिन सेह के आराधना करे हल्थी आर गोड़ लागे हल्थी । 38 जखने समोन, मरियम आर योसफ बाता करे हले तखने वहांपरी हन्नाह येले आर ऊ परमेसवर के धन्नेवाद करे लागले। ताब ऊ चेंगरिया ईसु के बारेम ढेरी गोटेन के सुनीलके जे परमेसवर यरुसलेम के छुटकारा दियेके असरा में हले।
39 जखने परभु के नियमा से साभे नेगा पुरा केर ललके ईसु के मइया-बप्पा गलील में अपन नगरवा नासरेत में घुइर के येले।h 40 आर चेंगरिया ईसु बाढ़े लागले आर आतमा में बलगर होते गले आर बुधीया से भरते गले आर परमेसवर के किरपा उन्खर पर हले।
चेंगरिया ईसु परमेसवर के मेंदला में
41 ईसु के मइया बप्पा पेत बरस फसहi के परबा करे खतीर यरुसलेम जाएत रेहे हले। 42 जखने ईसु बाराह बरस के हले तखने पेत बरस के नियर ऊ अपन मइया-बप्पा जोरे परबा करे खतीर यरुसलेम गले, 43 परबा खतम होवेक बाद उसभीन घारा घुइर के आवे लागले, तखने चेंगरिया ईसु यरुसलेम में रेह गले ; आर ई बाता उन्खर मइया-बप्पा नाञ जाने हले। 44 ईसु के मइया-बप्पा ई सोंएच के कि आर गोटेन आवेब करे हे ऊ उसभीन जोरे आवे हते, आर एग दिना के डहरा पार भे गले ; आर योसफ आर मरियम अपन घारा वलेन आर चिन्हल-जानल अदमियेन में उन्खरा खोजे लागले। 45 आर नाञ मिलले ता खोजले-खोजले फिरो घुइर के यरुसलेम चेल गले, 46 आर तीन दिना के बादे मरियम आर योसफ उन्खरा मेंदला में यहूदी गुरुवेन के मांझाम बेठल मिल्ले आर चेंगरिया ईसु उसभीन के बाता सुने हले आर कुछु जबबा मांगे हले। 47 आर जतना गोटे मेंदलाम सुने वलेन हले, ईसु के बुधिया से आर उन्खर बाता सुइन के साभे गोटेन के हांथ मूंह काट भेगले । 48 ताब उन्खर मइया-बप्पें उन्खरा देख के चोंएक गले आर उन्खर मइयें ईसु से कहलके “हां बेटा, तों हमनी जोरे इरंग काहे करली ? दखियों, हाम आर तोर बप्पा फिकीर करते हमनी तोरा खोजले घुरेब करे हियो ? 49 ईसु उसभीन से कहलके, “तोहनी हमरा कहील खोजे हीं ? की तोहनी नाञ जाने हीं कि हमरा अपन बप्पा के घारा में रेहेक जरोरी हे?” 50 लकिन जे बाता ईसु मरियम आर योसफ से कहलके, उसभीन बुझे नाञ पारलके। 51 ताब ईसु अपन मइया-बप्पा के जोरे गले आर नासरेत नगरवा येले, आर उसभीन के बाता माएन के रहले ; आर उन्खर मइयें ई साभे बाता अपन मना में राखलके । 52 आर ईसु उमरिया आर बुधिया में,आर परमेसवर आर अदमियेन के किरपा में बाढ़ते गले।j