लूका लिखल बेस समचरवा
1
1 ए सीरीमान थियोफिलुसa, ढेरी गोटेन हमनी के बीचाम होएल साभे परमेसवर के चमक्कार के घटनवेन के बारे में लिखले हे। 2 आर जे अदमियेन अपन अंखिया से ई बतेन के दखले हले उसभीन से हमनी ऊ साभे बातेन के बारे में सुनले हलियो; आर जे परमेसवर के बचनवा के परचारन करेवलेन सेवकवोन हले, उसभिन सुरुवे से लेके ई घटनवेन के हमनी के सुनीले हले। 3 हाम ओकर बारे में अपने धयान से परखलियो जे कुछु ई अदमियेन लिखले हले आर पढ़ीले हले, येहे खतीर इसब बतेन के पारी-पारी केरके हमु तोहर खतीर लिखेल खोजलियो 4 हाम ई कामा येहे खतीर करे हियो कि तों अकर बारे में जे तोंह सीखले हली, जाएन ले कि सच्चे हको।यूहन्ना के जलम के सुनवाए
5 यहूदिया के रजवा हेरोदेस के समइया में, अबिय्याहb के जोरहयाc में जकरयाह नामा के एगो यहूदी यजकवाd हले; ओकर कनइयो हारुनe खनदनवा के हले, जकर नामा इलीसिबा हले। 6 ऊ दुनु गोटे परमेसवर जुगुर धरमी हले, आर परभु के साभे नियमा आर आग्या पर निरदोस चलेवलेन हले। 7 लकीन उसभीन के अकोगो चेंगेर-बुतरु नाञ हले, काहेकि इलीसिबा बांझ हले, आर ऊ दुयो गोटे बुढ़ाए गेल हले।
8 जखने जकरयाह अपन जोरहया के परिया में परमेसवर जुगुर याजक के कामा करे हले, 9 तखने यजकवेन के नियमा से जकरयाह के नामा पर चीठिया निकल्ले कि परभु के मेंदला में जाएके हुमदिया दते। 10 हुमदिया दिये घरी आराधना करे खतीर आएल साभे अदमियेन के झुंडा बहार में पराथना करेब करे हले। 11 तखने परभु के एगो सरगदूता बेदिया के देहना दने ठड़ा होवल दखार दलके। 12 जकरयाह उन्खरा दखते चोट घबराए गले आर हद्दस भे गले। 13 लकिन सरगदूतें ओकर से कहलके, “हे जकरयाह, नाञ घबरो तोंह, काहेकि परमेसवर तोर पराथना सुइन ललको; आर तोर कनइया इलीसिबा से तोर खतीर एगो बेटा होतो, आर ओकर नामा तों यूहन्ना राखियों। 14 उत तोरा आनंद आर खुसी दतो, आर ढेरी गोटेन ओकर जलमेक चलतीस खुस रहतो, 15 काहेकि परभु जुगुर ऊ महान रहतो, आर ऊ अंगुरवा के रासा आर दरुवा कहियोन पितोf; आर ऊ जलमेस पेहले पवितर आतमा से भरल जीतो; 16 आर ढेरीमनी भटकलेहेन इसराएलियेनg के अपन परभु परमेसवर के दने मना घुरीते। 17 ऊ परमेसवर दने से बोलेवला एलिय्याह के नियर आतमा आर सकतिया में होए के परभु आवे से पेहले येतो; आर ऊ बप्पेन अपन बाल बचेन के जोरे मेल-मीलाप करीतो; आर बाता नाञ मानेवलेन के धरमियेन के बुधिया में लानतो; आर परभु खतीर अदमियेन के मना तेयार करतोh।
18 जकरयाह सरगदूता से पुछलके, “ई हाम किरंग जानबो ? काहेकि हाम बुढ़ आदमी हकियो आर हमर कनइयो बुढ़ाए गेल हे।” 19 सरगदूतें जकरयाह के जबबा दलके, “हाम जिबराएल सरगदूता हकियो जे परमेसवर जुगुर ठड़ा रहे हियो। तोर से बाता करे खतीर आर तोरा ई बेस समचरवा सुनावे खतीर परमेसवर दने से हमरा पठावल गेल हो।i 20 सुन, तों, जे दिना तकले ई बाता पूरा नाञ भेतो ऊ दिना तकले कोंक रहबी आर बोले नाञ पारबी, काहेकि तोंह हमर ठीक समइया में पूरा होवेवला बातेन के बिसवास नाञ करली।” 21 ऊ समइया में अदमियेन जकरयाह के बहार आवे खतीर असरा दखते रहले। उसभीन चोंएक गेल हले कि जकरयाह मेंदला में अतना देरी कहील करले हे। 22 जखने ऊ बहार येले तखने उसब दखलके कि ऊ बोले नाञ पारलके। अदमियेन बुइझ गले कि मेंदला में ओकरा दखार मिलल हे; आर ऊ अदमियेन से इसरवा से बाता करते रहले आर कोंक रेह गले। 23 जखने जकरयाह के मेंदला के सेवा के दिना पूरा भे गले ताब ऊ अपन घारा चेल गले। 24 ई घटनवा के बादे जकरयाह के कनइया इलीसिबा परयासी भेले; आर ऊ अपने के पांच मेहना तकले नुकाएक राखलके। 25 ऊ कहल्थी कि “परभु कतना दयालु हे! ऊ हमर बांझ होवे के बेजतिया दुर केर दल्थी।”
ईसु के जलम के सुनवाए
26 इलीसिबा परयासी होवे के छठमा मेहनवा में परमेसवर दने से जिबराएल सरगदूता के, गलील जिला के नासरेत नगरवा में, 27 एगो कुमारी छोंड़ी जुगुर पठिलके जकर बिहावा योसफ नामा के दाऊदj के खनदनवा के एग छोंड़ा से लाएग गेल हले। ओकर नामा मरियम हले। 28 जिबराएल सरगदूता मरियम जुगुर आएके कहलके, “गोड़ लागे हियो, मरियम! परभु तोहर जोरे हो आर उन्खर बड़ी दया तोर पर हो।” 29 मरियम ओकर बाता से पूरे घबराए लागले, आर सोंचे लागले कि ई किरंग बाता हके ? 30 लकिन सरगदूता मरियम से कहलके, “हे मरियम, घबरो नाञ, काहेकि परमेसवर के किरपा तोहर पर होएल हो। 31 सुन, तों परयासी होबी, आर तोर एगो बेटा होतो; तों ओकर नामा ईसु धारियों।k 32 ऊ महान होतो आर परमपरधान के बेटवा कहितो; आर परभु परमेसवर ओकर छेर-बोवा दाऊद के नियर ओकरा रजवा बनीतो। 33 आर ऊ याकूब के पिढ़ियेन पर सदाय राज करतो; आर उन्खर राज कहियो नाञ खतम होतो।”l 34 तखने मरियम सरगदूता से कहलके, “ई किरंग होते, काहेकि हाम अनछुवल कुमारी हिये।” 35 ताब सरगदूतें मरियम से कहलके, “पवितर आतमा तोर पर येतो आर परम परधान परमेसवर के सकतिया तोर पर छाह करतो; येहे खतीर तोर से जे बेटवा जलमतो ऊ पवितर होतो आर ऊ परमेसवर के बेटवा कहीतो। 36 आर दख, तोर जोरा-नारा इलीसिबा के बुढ़िया में एगो चेंगरिया होवेवला हो, ई ओकर जे बांझ कहा हले छठमा मेहना हके। 37 काहेकि परमेसवर से नाञ होय पारते इरंग कोय चीजा नाञ हे।” 38 मरियम कहलके, “दख, हाम परभु के दासी हकियो, जिरंग तों हमर खतीर कहली, उरंगे होतो।” तखने सरगदूता मरियम जुगुर से चेल गले।
मरियम के इलीसिबा से मिलेल जाएक
39 कुछु दिना के बादे मरियम यहूदा जिला के एगो पहरिया के नगरवा में धराफरी गले; 40 आर ऊ जकरयाह के घारा में जाएके इलीसिबा के परनाम करलके। 41 जेसे इलीसिबा मरियम के परनाम सुनल्थी तेसी बचवा उन्खर पेटा में उछलले, आर इलीसिबा पवितर आतमा से भेर गले। 42 आर इलीसिबा जोर से मरियम से कहलके, “तोंह साभे जेनियेन में परमेसवर के दने से धेन्य ठहरावल गेल हीं, आर तोहर पेटा के चेंगरियो धेन्य हो ! 43 अतना बड़ा किरपा हमर पर किरंग भेले कि हमर परभु के मइया हमर से भेंट करेल येल्थी ? 44 जेसी तोहर परनाम के अवजिया हमर काना में सुनीलो तेसी बचवा हमर पेटा में खुसी से उछेल गलो। 45 तोंह धेन्य हीं, काहेकि तोंह बिसवास करली कि परमेसवर जिरंग कहले हो उरंगे पूरा भे जीतो।”
मरियम के गीता
46 तखने मरियम कहलके,“ हमर जिया परभु के गुन गावे हे 47 आर हमर आतमा हमर मुकती दियेवला परमेसवर से ढेर खुसी होवे हे, 48 काहेकि ऊ अपन दीन दासी पर नजरिया करलकेm, येहे खतीर दख, अभिये से जुगा-जुगा के साभे गोटेन हमरा धेन्य कहते, 49 काहेकि साभे से सकतीसाली हमर खतीर बोड़-बोड़ कामा करले हे, उन्खर नामा पवितर हे, 50 आर उन्खर दया उसभीन पर, जे उन्खरा माने हे, पीढ़ी दर पीढ़ी बनल रहते। 51 उन्खर हांथा बड़-बड़ कामा करले हे, आर जे अपने के ऊंच बुझे हले उसभीन के छीट-धुइन दलके। 52 ऊ बलगरेहेन के उसभीन के राजपाट से गिराए दलके आर दीन अदमियेन के ऊंच करलके।n 53 ऊ भुखलेहेन के बेस समनवा से भेर दलके,आर अमिरवेन के छुछे हांथ निकाएल दलके। 54 हमनीक बोवेन-छेरबोवेन के जोरे करल एकरार के चलतीस ऊ अपन सेवकवा इसराएल के मदत करेल येले, 55 ओकरा अबराहमo आर ओकर पुरखेन पर सदाए-सदाए दया दखावे के खेहाल रहते।”p 56 मरियम करीबन तीन मेहना तकले इलीसिबा के जोरे रेह के अपन घारा चेल गले।
यूहन्ना बपतिस्मा दियेवला के जलम
57 जखने इलीसिबा के बचवा जलम दिये के दिना पूरा भेले तखने ऊ एगो बेटा के जलम दलके। 58 ओकर यगल-बगल के अदमियेन आर ओकर घरीहनो ई सुइन के कि परभु ओकर पर बड़ी दया करले हे, साभे गोटे ओकर जोरे खुसयाली मनीलके। 59 जखने चेंगरिया के आठ दिना भे गले तखने उसभीन ओकर खतनवाq करे खतीर येले, आर उसभीन ओकर बप्पा के नामा नियर ओकर नामा जकरयाह धारे लागले। 60 तेसे चेंगरिया के मइयें इलीसिबा कहलके, “नाञ, ओकर नामा यूहन्ना धारल जीतो।” 61 उसभीन इलीसिबा से कहलके, “तोर जोरा-नारा में ककरो ई नामा नाञ हो !” 62 ता अदमियेन जकरयाह से इसरवा केरके पुछलके कि तोंह चेंगरिया के नामा कोन्ची धारेल खोजे हीं। 63 ऊ इसरवा केरके लिखेवला पट्टिया मंगीलके आर लिख दलके कि ‘ओकर नामा यूहन्ना हको’, आर साभे गोटेन चोंएक गले। 64 ताब जकरयाह के मुहां आर जीहा तुरंते खुल गले आर ऊ बोले लागले आर परमेसवर के धन्नेवाद करे लागले। 65 आर ओकर यगल-बगल के रेहेवलेन साभे गोटेन पर भेय लागे लागले; आर ऊ साभे बाता यहूदिया के साभे पहरिया जिला में गोहाइर होए गले, 66 आर साभे सुनेवलेन अपन अपन मना में सोंचे लागले, “ई चेंगरिया बाएढ़ के कोन्ची बनते ?” काहेकि परभु के सकतिया ओकर संगे हले।
जकरयाह के गीता
67 ऊ चेंगरिया के बप्पा जकरयाह पवितर आतमा से भेर गले, आर परमेसवर दने से बोलेवला करे लागले : 68 “परभु इसराएल के परमेसवर धेन्य हो, काहेकि ऊ अपन अदमियेन पर दया से दखले आर अपन अदमियेन के छुटकारा दलके, 69 आर अपन सेवकवा दाऊद के खन्दनवा में हमनी खतीर एगो सकतीसाली मुकतीदाता दलके, 70 (जिरंग ऊ अपन दने से बोलेवलेन पवितर अदमियेन जे ढेरी बरस पेहले से होते आएल हे, कहले हले,) 71 मने हमनी के दुसमनेन से आर ऊ साभे के हांथा से जे हमनी से घिन करे हे, हमनी के मुकती दलके, 72 कि हमनी के बोवा-छेरबोवेन पर दया केरके ऊ अबराहम के जोरे अपन पवितर एकरार के खेहाल करतो, 73 ऊ किरिया जे परमेसवर हमनी के बप्पा अबराहम से खेले हले, 74 कि ऊ हमनी के ऊ दतो कि हमनी अपन दुसमनेन के हांथा से छुइट के, 75 उन्खर जुगुर पवितर आर बेस रेहेक लाएग होएके जिनगी भेर निडर रेह के उन्खर सेवा करते रहबे। 76 आर ए चेंगरिया, आब तों परम परधान के दने से बोलेवला कहीबी, काहेकि तों परभु के आगु-आगु जाए के उन्खर डहरा बनीबीr, 77 कि उन्खर अदमियेन के तों बतेबी कि पापा के माफी से मुकती किरंग मीलते। 78 ई हमनीक परमेसवर के वेहे बड़ी दया के चलतीस होतो, जकर चलतीस सरगा से हमनी पर भोरवा के किरनिया उगतो। 79 ताबे ई इंजरा अंधेरिया में आर मोरेक छोहरिया में बेठल अदमियेन के इंजरा दते आर हमनी के गोड़ा के सांती के डहरा में सोझे चलीते।”s
80 आर बचवा यूहन्ना सयान होते गले आर अपन आतमा में बलगर होते गले, आर जल तकले ऊ इसराएल के अदमियेन जुगुर अपन सेवा के सुरु नाञ करलके तल तकले यूहन्ना सुनसपाटा जघावा में रहले।