Íꞌdóŋá 35

Ãdróŋâ ꞌbã sụ̃sụ́ wijó Yãkóꞌbõní Bẹ̃tẹ́lị̃ gá rĩ

¹ Ãdróŋá jọ, “Yãkóꞌbõ, ímụ Bẹ̃tẹ́lị̃ gá uꞌálé ꞌdãá. Mí idé ãko ꞌbá nî sĩ uwiŋá idéjó rĩ mánî Ãdróŋá ándráru iꞌdalé pi míní ụ́ꞌdụ́ mî apájó mî ádrị́pị Ị́sãwụ̃ sĩ rĩ ꞌi.”

² Yãkóꞌbõ jọ ꞌbá ĩꞌdidrị́ jó agá ꞌdĩ ꞌbaní, ꞌbá pírí uꞌálépi ĩꞌdidrị́ko gá ꞌdĩ abe, “Ĩmi idé ĩmi ásị́ kí ãlá ru, ĩmi aꞌbe ãdroŋa ĩmî ajílé ꞌbá ãzí ꞌbã ãngũ gá ꞌdĩ kí cã. ³ Ãma kí mụ mụlé ãngũ ꞌdĩ aꞌbelé mụjó Bẹ̃tẹ́lị̃ gá, ma sĩ mụ ãngũ uwiŋá idéjó rĩ sịlé Ãdróŋá ãma ãzã kolépi ũcõgõ má drị̂ kí agá ãzíla adrulépi má be ãngũ pírí mâ acị́jó rĩ agá rĩ drị́.” ⁴ Fẽ kî dó Yãkóꞌbõ drị́ ãdroŋa ĩꞌbã kí ajílé ꞌbá ãzí ꞌbã ãngũ gá rĩ kí ngílíngílí ĩꞌbã kí ándrá ũgĩlé bị́lẹ́ gá rĩ kí abe. Ị̃sị̃ kí ife ãzí ị̃ndụ́ gá ãni rú Sẹ̃kẹ́mụ̃ andre gá.

⁵ Ko kí dó drị̃, Ãdróŋá ají ụ̃rị̃ ãmbógó la fi kí ásị́ gá tọ̃rọ́mẹ́ kí aga gá ꞌdãá rĩ abe pírí cí, ꞌbá ãzí bĩ dó kí vú ku. ⁶ Yãkóꞌbõ kí ꞌbá ĩꞌdidrị́ko gá ꞌdãá rĩ abe pírí amụ́ kî dó Lụ́zị̃ (ándrá umvelé Bẹ̃tẹ́lị̃ ꞌi rĩ) ãngũ Kãnánĩ gá rĩ gá. ⁷ ꞌDãá sị ãngũ uwiŋá idéjó rĩ, umve dó ãngũ ꞌdã rụ́ Élĩ-Bẹ̃tẹ́lị̃ ꞌi ãꞌdusĩku ꞌdĩ ándrá ãngũ Ãdróŋâ ꞌbã sĩru iꞌdajó ĩꞌdiní ĩꞌdĩ ándrá apájó ádrị́pị̃ sĩ rĩ ꞌi. ⁸ Rẽbékã ꞌbã ũkú ĩꞌdi ĩtẽtẽnãlépi Dẽꞌbórã drã dó rá ị̂sị̃ dó ĩꞌdi kọmọrọ́ ị̃ndụ́ gá. Úꞌda dô sĩ rụ́ la kọmọrọ́ awájó rĩ ꞌi. ⁹ Yãkóꞌbõ dó mụ ãgõlé Pãdánĩ Ãrámũ gâlé ꞌbo, Ãdróŋá iꞌdaru ĩꞌdiní wi vâ ĩꞌdiní sụ̃sụ́. ¹⁰ Ãdróŋá jọ ĩꞌdiní, “Ími rụ́ Yãkóꞌbõ ꞌi, wó ûmve dó mi Yãkóꞌbõ ꞌi ị̃dị́ ku; ími rụ́ la dó adru Ịsịrayị́lị̃ ꞌi.” ꞌDa dô sĩ rụ́ la Ịsịrayị́lị̃ ꞌi.

¹¹ Ãdróŋá jọ ĩꞌdiní, “Ma Ãdróŋá Ũkpó ꞌdị́pị ꞌi; ími drị̃lẹ́ ꞌbã kpẹ̃ ũꞌbíkãnáru sụ́rụ́ kî sĩ ãfũ ími agá ꞌdâ, mi dó sĩ adru áꞌbị́ ũpi ꞌbã ãni. ¹² Ma ãngũ ándrá mâ fẽlé Ịbụrahị́mụ̃ ꞌbaní Ĩsákã be rĩ fẽ mínî ãzíla ma vâ ĩꞌdi fẽ drị̃lẹ́ mídrị̂ ꞌbaní ími vúlé gá ꞌdâ.” ¹³ Ãdróŋá aꞌbe dó ĩꞌdi rá. ¹⁴ Yãkóꞌbõ ịꞌdị dó írã pịpịrịrú ãngũ Ãdróŋâ ꞌbã ị́jọ́ jọjó ĩꞌdi be ꞌdã gá, ũsũ uwiŋáru wáyĩnĩ mvụlé mvụ̃-mvụ̃ rĩ ãzíla ãdu trũ uwiŋáru drị̃ la gá. ¹⁵ Yãkóꞌbõ nga dô sĩ ãngũ Ãdróŋâ ꞌbã sĩ ị́jọ́ jọjó ĩꞌdi be ꞌdã ꞌbã rụ́ ꞌdalé Bẹ̃tẹ́lị̃ ꞌi.

Drã Rãkẹ́lị̃ drị̂

¹⁶ Yãkóꞌbõ kí ꞌbá ĩꞌdidrị́ko gá rĩ abe aꞌbe kí ãngũ Bẹ̃tẹ́lị̃ gá rĩ ꞌi, Rãkẹ́lị̃ sáwã ĩꞌdiní lẽjó ngọ́tị́ŋâ tịjó rĩ acá rá ịsụ́ acá kí drĩ Ẽfĩrátĩ gá ku. ¹⁷ Ngọ́tị̂ la mụ azá ĩꞌdi rụ̂lé ũnzí, ũkú ngọ́tị́ tĩlépi rĩ jọ ĩꞌdiní, “Mí ide ụ̃rị̃ sĩ ku Rãkẹ́lị̃; ꞌdĩ ngọ́tị́ ágọ́bị́ ãzí rĩ ꞌi.” ¹⁸ Wó ĩꞌdiní lẽ agá drã agá drã-drã, ꞌda ngọ́pị̃ rụ́ Bénõnĩ ꞌi wó átẹ́pị̃ ꞌda rụ́ la Bénzãmĩnĩ ꞌi.

¹⁹ Rãkẹ́lị̃ la mụ drãlé ꞌbo, ị̂sị̃ ĩꞌdi gẹ̃rị̃ Ẽfĩrátĩ ꞌbã ãni umvelé sáwã ꞌdĩ sĩ Bẹ̃tẹ̃lẹ̃hẹ́mụ̃ ꞌi rĩ tị gá. ²⁰ Yãkóꞌbõ su írã Rãkẹ́lị̃ ꞌbã ị́jọ́ igájó rĩ ꞌdãá, ĩꞌdi kpere sáwã ꞌdĩ sĩ ị̃nádrị̃ Rãkẹ́lị̃ drị̂ iꞌda. ²¹ Yãkóꞌbõ mụ drị̃lẹ́ gá bụ́rụ́jọ́ ĩꞌdidrị̂ sịlé ãngũ Ẽdérĩ ꞌbã wókõ gá.

Anzị Yãkóꞌbõ drị̂ kî

²² Yãkóꞌbõ ꞌbaní uꞌá agá ãngũ ꞌdã agá, ngọ́pị̃ Rụ́bẹ̃nị̃ fi ĩzóŋá Rãkẹ́lị̃ ãzã kolépi Bílã drị́ jó agá, Yãkóꞌbõ la mụ ị́jọ́ ꞌdĩ arelé ꞌbo, ala iꞌdó velé ũnzí. Yãkóꞌbõ ándrá anzị trũ mụdrị́ drị̃ ị̃rị̃. ²³ Anzị Léyã drị̂ kí; Rụ́bẹ̃nị̃ (Yãkóꞌbõ ꞌbã ngọ́tị́ ágọ́bị́ kãjãní rĩ ꞌi), Sị̃mọ́nị̃ ꞌi, Lẹ́vị̃ ꞌi, Yụ́dã ꞌi, Ĩsãkárĩ ꞌi, ãzíla Zãbụ̃lọ́nị̃ ꞌi. ²⁴ Anzị Rãkẹ́lị̃ drị̂ kí; Yụ̃sụ́fụ̃ ꞌi ãzíla Bénzãmĩnĩ ꞌi. ²⁵ Anzị ĩzóŋá Rãkẹ́lị̃ ãzã kolépi Bílã drị̂ kí; Dánĩ ꞌi, ãzíla Nãfũtálĩ ꞌi. ²⁶ Anzị ĩzóŋá Léyã ãzã kolépi Zị̃lị́pã drị̂ kí; Gádĩ ꞌi ãzíla Ásẹ̃rị̃ ꞌi. Anzị ꞌdĩ kí ụ́tị kí pírí ãngũ Mẽsõpõtámĩyã gá.

Drã Ĩsákã drị̂

²⁷ Yãkóꞌbõ mụ átẹ́pị̃ Ĩsákã rụ́ ãngũ ándrá Ịbụrahị́mụ̃ ꞌbaní uꞌájó Ĩsákã trũ Mãmírẽ umvelé Hẽbũrónĩ ꞌi rĩ gâlé. ²⁸ Ĩsákã uꞌá ílí túrú ãlu kãlị́ ãrõ, ²⁹ drã dó ịsụ́ ĩꞌdi dó ꞌbá ãmbá ru. Ngọ́pịka Ị́sãwụ̃ kí Yãkóꞌbõ be ị̃sị̃ kî dó ĩꞌdi nĩ.