Echamu ya okhwira Yesu
(Matayo 26:1-5, 14-16; Mariko 14:1-2, 10-11; Yohana 11:45-53)
22
1 Nono yikhoyo ya omukati kukhalimo limela ta yilangwangwa yiri Pasaka, yali yilembiyanga. 2 Abasaayi abakhulundu nende abechesi ba amalaka ka Musa bali balakakanga yinjila ya okhwira Yesu mu obwikisi, sikila bali baarire abandu.3 Kho Sietani khenjila mu Yuta wa balanganga bari Iskarioti, mulalakho wa abarume likhumi na babili. 4 Warula wacha walakaya nende abasaayi abakhulundu nende abasikari ba mu litembeli khuli anyala okhuchama Yesu. 5 Basangaala khandi bafukilila okhumuha chisenti. 6 Kho weyama khandi wakaka obwiyangu bwa okhumuchama wa lituli lia abandu likhali ta.
Yesu werekekhela yikhoyo ya lipasika
(Matayo 26:17-25; Mariko 14:12-21; Yohana 13:21-30)
7 Yinyinga ya yikhoyo ya omukati kukhalimo limela ta yatukha, yinyinga ya bachinjanga akhameme khalichese kho yikhoyo ya lipasikaa yikholekhe. 8 Yesu waruma Petero nende Yohana ne basungila ari, “Cha murekekhe yikhoyo ya lipasika kho khulie.” 9 Bamureeba bari, “Wenya khurekekhe hena?” 10 Wabasungila ari, “Lwa mulengila mulukoba, mulalengela omundu wuchingile yisiongo ya amachi alechanga mwakanane. Mulondekho mwinjile munju ya alenjilamo. 11 Mureebe omwene yinju muri, ‘Omwechesi alareebanga ari yinju ya abacheni yibeele hena, wa anyala walila yikhoyo ya lipasika nende abarume babe?’ 12 Alamwechesia yinju yingali ya hekulu khu ekorofa, yibelemo buli esindu. Rekekhela ebindu bia yikhoyo abwene yaho.” 13 Baacha baanyola khuli yali ne basungile. Barekekhela yikhoyo ya lipasika ebweneyo.
Omwami alia Lipasika nende abarume baabe
(Matayo 26:26-30; Mariko 14:22-26)
14 Lwa yisa yatukha, Yesu wekhala amesa okhulia nende abarume baabe. 15 Wabasungila ari, “Nabele nayekomba okhulia ninanywe yikhoyo ya Lipasika lino ne ekhenjila mu esinyasio sianje ta. 16 Sikila endamusungilanga, sekhayiliekho khandi ta nabwila kechusibwe mu obwami bwa Wele.”
17 Kho wabukula esikombe sialimo yindali, wopa orioo mani wasunga ari, “Bukula sino, mukabanemo. 18 Sikila endamusungilanga okhurulila bulano se ndanywakho yindali ta, nabwila obwami bwa Wele bukheche.”
19 Mani wabukula omukati wakhupa orioo, watonyamo mani wabawa, wasunga ari, “Kuno omubili kwanje kurusibwe sikila enywe. Mukholenge muri mu okhwichulila esie.”
20 Kariokario nebakhamala okhulia wabukula esikombe, wasunga ari, “Esikombe sino sibeele yindakano yimbia okhubirira khu amabanga kanje, kachichukhe sikila enywe. 21 Nebuchwa lengela, omundu wulanjama wubeele ninasie khumesa khuno. 22 Sikila Omwana wa Omundu alafwa atakheho khuli kakhoyele kabe, nebuchwa ni esinyasio khu omundu wulamuchama!” 23 Abechi baabe barakikha okhurebana mulala khu wundi, wina akari wabo wali ne alachichanga okhukhola amakhuwa kano.
Wina wuli omukhongo okhukhila boosi
24 Abechi baabe barakikha okhuyingana, kho bamanye wina wali omukhongo khu boosi. 25 Yesu wabasungila ari, “Abaami ba chikholo chindi barukanga abandu baabo nende obunyali, mani belanganga bari, ‘Abasaale ba abandu.’ 26 Nebuchwa sekali kario khu enywe ta. Lekha wulia wuli omukhongo yetutuyie khuli omwana omutiti, na omwimelesi yetutuyie khuli omukhalabani. 27 Sikila wina niye omukhongo, wikhalanga khumesa naho wutendanga? Se ali wikhalanga khumesa? Nabuchwa esie namenya mwinywe khuli omutendi. 28 Enywe ninywe musinjile ninasie mu amakhako kanje. 29 Khwako, endamukholanga okhuba abami, khuli papa wanje yakhola esie. 30 Kho mulie nemunywela khumesa mu obwami bwanje, mani mwikhale khu bisaala bia obwami nemukhalakila chikholo likhumi na chibili cha Israeli.
Yesu ang'ola ari Petero akhamwikane
(Matayo 26:31-35; Mariko 14:27-31; Yohana 13:36-38)
31 “Simoni, Simoni, rekeresia obulayi, Sietani yenyile ari akhubukule akhusese khuli wusesa yinganu. 32 Nebuchwa esie ekhusabiile endi lisubila lilio likhakwa ta, khandi ne wakhangalukhila, otinyilisie wandaye baabo.”
33 Petero wasunga ari, “Omwami, esie nirekekhe okhucha ninawe hosihosi, mu esiboe naho okhufwa ninawe.”
34 Yesu wamusungila ari, “Bulano etwaya neyikhakholiokha ta, olanjikana amakhabi kataru.”
35 Wabasungila ari, “Lwa namuruma endi muche mani mukhachinga chisendi, esikapu naho ofuralo ta, mwatakhakho esindu siosisiosi?” Basunga bari, “Tawe.” 36 Wabasungila ari, “Nebuchwa bulano, wuli nende chisendi achinge, yakhaba wuli nende esikapu. Wulia wukhali nende olupanga ta akusie yingubo yiye akule olupanga. 37 Sikila endamusungilanga likhuwa lino likhoya likholekhe khu esie, ‘Yabalilwa mu abandu ba obwoni.’ Sikila liosiliosi liahandikwa sikila esie likhoya likholekhe.” 38 Bamusungila bari, “Lengela Omwami, khubeele nende amapanga kabili.” Wabasungila ari, “Munyalile!”
Yesu wacha okhusaya khu Esikulu sia Miseituni
(Matayo 26:36-46; Mariko 14:32-42)
39 Warula elwanyi wacha khu Esikulu sia Miseituni, okhulondekhana nende omwima kukwe, abechi baabe bamulondakho. 40 Lwa yatukha abundu halia wabasungila ari, “Musaye kho mukhengila mu amakhako ta.” 41 Wabarulamo wesenda abundu wa onyala wasukuna likina liatukha, wasikama warakikha okhusaya. 42 Wasunga ari, “Papa, waba bari wenya ndusilieho esikombe sia esinyasio sino. Nebuchwa okhakhola okhulondekhana nende elienya lianje ta, nekhali okhulondekhana nende elienya lilio.” 43 Yingeloosi okhurula mwikulu yamulolekhela, yamutinyilisia. 44 Wasaya nende amani nali mu obuchuni, oluchesi lulwe lwakalukhana khuli amabanga neluronya hasi.b
45 Lwa yamala okhusaya wabukha wacha wa abechi baabe bali, wabanyola bakonile sikila bali baluyile okhurulana nende esibela esikali. 46 Wabasungila ari, “Sina sikila enywe ne mukona? Buukha musaye kho mukhengila mu amakhako ta.”
Okhuchamwa nende okhutilwa khwa Yesu
(Matayo 26:47-56; Mariko 14:43-50; Yohana 18:3-11)
47 Yesu nasilakaya ario, lituli lia abandu liecha, omundu mulala wa balanganga bari Yuta, mulalakho wa abarume likhumi na babili yali wubemiile. Wacha wa Yesu yali wamwikwayila. 48 Nebuchwa Yesu wamusungila ari, “Yuta, olachamanga Omwana wa Omundu khu lwa okhumwikwayila?” 49 Lwa abarume bandi balengela kali nakalenyanga okhukholekha basunga bari, “Omwami, khurumikhile amapanga kefu?” 50 Mulala waabo warusia olupanga lulwe wachingila omukhalabani wa omusaayi omukhulundu, wamurema lirwi lia omukhono omusacha liakwa. 51 Nebuchwa Yesu wasunga ari, “Mukhachililila murio ta!” Watila okhurwi khukhwe wamuhonia. 52 Kho Yesu wasungila abasaayi abakhulundu, abasikari ba mu litembeli, nende abasakhulu bali nabechile okhumutila ari, “Mwichile nende amapanga nende ebikong'o khuli abandu ba okhufumila omwifwi? 53 Nabeelenge ninanywe buli yinyinga mu litembeli, se mwandila ta. Nebuchwa bino nibyo ebise bienyu, nende bia amani ka esilima.”
Petero yekana Yesu
(Matayo 26:57-58, 69-75; Mariko 14:53-54, 66-72; Yohana 18:12-18, 25-27)
54 Bamutila bacha ninaye, bamuyila munju ya omusaayi omukhulundu. Petero yali wubalondilekho sinaho yinyuma. 55 Lwa baburusia omulilo akarikari wa oluya, bekhalaho naboora. Petero yesi wabekhalamo. 56 Omukhalabani wa esikhana walengela Petero mu obuwanga bwa omulilo kulia, wasunga ari, “Omundu wuno yesi yabelenge nende Yesu.”
57 Nebuchwa, Petero wekana wasunga ari, “Mukhasi ewe, esie se emumanyile ta.”
58 Ebise ne bikhesenda ta, omundu wundi wamulengela wamusungila ari, “Ewe wubele mulala waabo.”
Nebuchwa Petero wasunga ari, “Mundu ewe, esie sendi mulala wabo ta.”
59 Khandi lwa yisa ndala yabira omundu wundi wakhayilila ari, “Omundu wuno yesi abele ninaye, sikila yesi Omukalilaya niye.” 60 Nebuchwa Petero wasunga ari, “Mundu ewe, esie se emanya ka olalakayanga ta.” Abwene na abwene nasilakaya, etwaya yakholiokha. 61 Omwami wasiukhana walengela Petero. Petero wechulila amakhuwa ka Omwami, khuli yamusungila ari, “Etwaya ne yikhakholiokha bulano ta, olanjikana amakhabi kataru.” 62 Mani warula wacha walila obululu.
Yesu akholelwa esihanyahenyi nende okhupwa
(Matayo 26:67-68; Mariko 14:65)
63 Nono abandu bali ne bafumile Yesu bali balamukholelanga esihanyahenyi nibamukhupa. 64 Bali bamufunikhe chimoni ne bamureeba bari, “Ng'oola! Wina wakhakhupa?” 65 Khandi bamuseya na amakhuwa kandi amakali.
Yesu yimbeli wa omuse
(Matayo 26:59-66; Mariko 14:55-64; Yohana 18:19-24)
66 Nebwakhasia, abasakhulu ba omuse ba Abayahuti becha halala, ne balimo abasaayi abakhulundu nende abechesi ba amalaka ka Musa. Bamuyila mu omuse kwabo, basunga bari, 67 “Kaaba bari ewe Kristo khusungile.”
Nebuchwa wabakalusia wasunga ari, “Ne emusungila se mulasuubila esie ta. 68 Khandi ne emureeba lireeba se mulangalusia ta. 69 Nebuchwa okhurulila yisa yino okhuchililila Omwana wa Omundu alekhasibwa olubeka lwa omukhono omusacha kwa Wele amani koosi.”