3
Pwony ka Jon Abatica ï thim
(Mateo 3:1-12; Marako 1:1-8; Jon 1:19-28)
1 Onwongo obedo mwaka më apar abic më löc ka Cija Tiberio ï ker më Roma. Ï karë nön, Pontio Pilato onwongo obedo alöc më Yudea. Erode onwongo obedo alöc më Galilaya, ëka ömïn mërë Pilipo onwongo obedo alöc më Ituria ëka alöc më Tarakoniti. Ëka Lucania onwongo obedo alöc më lobo Abilene. 2 Anac ëka Kaipa onwongo obedo gïnï ëlamdhök na dito. Ï karë nonu, Jon Abatica wod ka Jakariya, owinyo köp k'Obanga n'onwongo ën ut ï thim. 3 Ën owotho ï lobe kïbëc n'örïkö kulo Jordan, na pwonyo jii nï myero ongut gïnï kï kom balgï ëka ebaticagï, ëk Obanga ötïm nïgï kïca. 4 Kite n'ëcöö ï buk k'adwarpïny Icaya nïkë,
“Dwön ngat mörö redo ï thim nï,
‘Yüb unu yoo pï Rwoth,
mïï unu yoo ocung nïnë atïr.
5 Ora kïbëc myero epir ökö,
kite kïbëc myero erwob ödök pïny na röm.
Yodhi n'ogom mene myero ëmïï ocung atïr.
Yodhi na gwaü bino dökö na pwöth.
6 Cë jö kïbëc bino nënö lar k'Obanga.’ ”
7 Jon Abatica okobo nï lwak n'obino bothe ëk ebaticagï nïkë, “Un jö na reco calö ëthïn ororo! Nga n'okobo niwu nï iring unu ökö kï ï akëmö k'Obanga na bino ni? 8 Kitewu myero onyuth nï inguto unu dong ökö kï kom balwu. Kür dök icak unu kobo ï kinwu kenwu nï, ‘Wan ëthïnö më dhogola k'Abram.’ Ëk akob niwu nï kï ï kom kite ni, Obanga römö yübö ëthïnö pï Abram. 9 Ngölö-köp k'Obanga obino ökö, na calö ngat n'ömakö atong më tongo yath. Yath na ba bino nyakö nyige na bër ebino tongo ökö pïny, cë ebolo ï mac.”
10 Lwak openyo Jon nïkë, “Ëtïm ngö dong?”
11 Jon Abatica ögamö nïgï nïkë, “Ngat na ute kï böng arïö myero opok both ngat n'ope ködë, ëka ngat na ute kï cem myero ötïm mene kömanön.”
12 Ëcök ocoroa mene obino ëk ebaticagï. Gïn openyo ën nïkë, “Apwony, wan myero ëtïm ngö?”
13 Ën okobo nïgï nïkë, “Kür icoku ocoro na kadho wel n'ëcïköwu ködë.” 14 Emwony mökö öthëkö penyo ën nïkë, “Cë wan kono ëtïm ngö?”
Ën okobo nïgï nïkë, “Kür ima unu cïlïng kï both dhano mörö tëtëk, ëka kür idoth unu dhano mörö twodo twodo. Ëntö yeng unu kï cülwu.”
15 Lwak onwongo kürö kï gen, na gïn kïbëc onwongo thamö kï ï cwinygï nï ködë ba Jon ënë obedo Kiricito. 16 Cë Jon Abatica ögamö nïkë, “An abaticawu kï pii, ëntö ngat mörö na dit na löa tye ka bino, na an ba apora më bedo atic mërë, ëka më gönyö thöl wörë. Ën bino baticawu kï Tipo Naleng ëka mac. 17 Ën bino poko jö na kitegï atïr kï kom jö na reco, na calö dhano na pyëdhö bël k'odheru, ën cökö bël cë ketho ï od dërö. Ëntö ën bino wangö cüngë kï mac na ba bino nekere.”
18 Jon Abatica okobo köp na bër n'eoro ën ködë kï köp nökënë na pol. Ën öcükö cwiny lwak më wëkö bal, ëka opwonyogï k'Emuth na Bër k'Obanga. 19 Ëntö Jon dökï öjükö rwoth Erode pï bedo kï Erodia dhakö ka Pilipo n'obedo ömïn Erode, ëka pï ngö na reco kïbëc na ën obedo tïmö. 20 Cë rwoth Erode dök ömëdö bal nökënë dökï na rac më tweo Jon ï buc.
Jon obatica Yecu
(Mateo 3:13-17; Marako 1:9-11)
21 Na Jon dong obatica jö kïbëc, ebatica Yecu mene. Ï caa na Yecu lëgö, polo öyabërë 22 ëka Tipo Naleng obino kï malö ï cal k'amam cë opye ï kome. Cë dwön Obanga owinyere kï ï polo na kobo nïkë, “In ënë Woda na an amarö, na ïa yom ï kome.”
Kwere ka Yecu
(Mateo 1:1-17)
23 Yecu onwongo dong ute kï mwaka pyer adek ï karë na ën cakö tic mërë. Jii onwongo thamö nï ën obedo wod ka Yocepu.
Yocepu ni onwongo obedo wod k'Eli.
24 Eli wod ka Mathat,
Mathat wod ka Lebi,
Lebi wod ka Melki,
Melki wod ka Janai,
Janai wod ka Yocepu.
25 Yocepu wod ka Matathïa,
Matathïa wod k'Amoc,
Amoc wod ka Nakum,
Nakum wod k'Eceli,
Eceli wod ka Nagai.
26 Nagai wod ka Math,
Math wod ka Matathïa,
Matathïa wod ka Cemein,
Cemein wod ka Yocek,
Yocek wod ka Yoda.
27 Yoda wod ka Joanan,
Joanan wod ka Reca,
Reca wod ka Jerubabel,
Jerubabel wod ka Celatiel,
Celatiel wod ka Neri.
28 Neri wod ka Melki,
Melki wod k'Adi,
Adi wod ka Kocam,
Kocam wod ka Elemadam,
Elemadam wod ka Er.
29 Er wod ka Yocua,
Yocua wod ka Elieja,
Elieja wod ka Yorim,
Yorim wod ka Mathat,
Mathat wod ka Lebi.
30 Lebi wod ka Cimeon,
Cimeon wod ka Yuda,
Yuda wod ka Yocepu,
Yocepu wod ka Yonam,
Yonam wod ka Eliyakim.
31 Eliyakim wod ka Melea,
Melea wod ka Mena,
Mena wod ka Matatha,
Matatha wod ka Nathan,
Nathan wod ka Daudi.
32 Daudi wod ka Yece,
Yece wod k'Obed,
Obed wod ka Boaj,
Boaj wod ka Calomon,
Calomon wod ka Na con.
33 Na con wod k'Aminadab,
Aminadab wod k'Adimin,b
Adimin wod ka Perej,
Perej wod ka Yuda.
34 Yuda wod ka Jakob,
Jakob wod ka Ecaka,
Ecaka wod k'Abram,
Abram wod ka Tera,
Tera wod ka Nakor.
35 Nakor wod ka Cerug,
Cerug wod ka Reu,
Reu wod ka Peleg,
Peleg wod k'Eber,
Eber wod ka Cela.
36 Cela wod ka Kainan,
Kainan wod k'Apacad,
Apacad wod ka Cem,
Cem wod ka Nua,
Nua wod ka Lamek.
37 Lamek wod ka Methucela,
Methucela wod ka Enok,
Enok wod ka Jared,
Jared wod ka Maalalel,
Maalalel wod ka Kainan.
38 Kainan wod ka Enoc,
Enoc wod ka Cet,
Cet wod k'Adam,
ëka Adam wod k'Obanga.