𖼊𖽡 𖼮𖽑𖽻 𖼄𖽔 𖼀𖽑𖽚𖾐 𖼺𖽪𖾐 𖼳𖽶𖾐 𖼮𖽡𖽦 𖼊𖽻𖾐
13
1 𖼞𖽑𖽶𖾑 𖼊𖽑𖽡 𖼠𖽸𖾑，𖼷𖽑𖽻𖾐 𖼊𖽑𖽡 𖼹𖽻𖾐 𖼽𖽺𖾐 𖼺𖽪𖾐 𖼖𖽙𖾐 𖼀𖽦𖾐：“𖼰𖽡𖽔𖾐 𖼖𖽡𖾑 𖼖𖽡𖾑 𖼺𖽪𖾐 𖼷𖽑𖽻𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼞𖽑𖽶𖾑 𖼮𖽶𖾐，𖼂𖽡 𖼖𖽔𖾐 𖼍𖽙𖾐 𖼮𖽑𖽢𖾑 𖼄𖽦 𖼀𖽑𖽙 𖼹𖽡𖾐 𖼺𖽺𖾑 𖼺𖽦 𖼦𖽑𖽙𖾐．” 2 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽡 𖼮𖽑𖽻，𖼺𖽦 𖼄𖽳𖾐 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼹𖽻𖾐，𖼠𖽳𖾐 𖼖𖽪𖾐 𖼰𖽡𖽔𖾐 𖼖𖽡𖾑 𖼖𖽡𖾑 𖼺𖽪𖾐 𖼷𖽑𖽻𖾐 𖼦𖽶𖾑 𖼄𖽔 𖼷𖽑𖽶𖾐 𖼽𖽺𖾐 𖼮𖽑𖽡𖽪𖾑 𖼈𖽳 𖼺𖽺𖾑，𖼈𖽡𖾑 𖼞𖽑𖽙 𖼦𖽑𖽺𖾑 𖼳𖽶 𖼷𖽶𖾐 𖼖𖽔？ 3 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼄𖽔 𖼣𖽻𖾐！ 𖼐𖽑𖽡𖾐 𖼈𖽳𖾐 𖼊𖽡 𖼮𖽑𖽻 𖼄𖽔 𖼀𖽑𖽚𖾐 𖼊𖽑𖽡𖾑 𖼣𖽻𖾐，𖼄𖽳𖾑 𖼄𖽳 𖼖𖽺𖾑 𖼳𖽶𖾐 𖼮𖽡𖽦 𖼊𖽻𖾐． 4 𖽃𖽙𖾑 𖼄𖽺 𖼊𖽑𖽙 𖼳𖽡𖾐 𖼖𖽚 𖼽𖽕𖾑 𖼖𖽜𖾐 𖼖𖽦 𖼹𖽺𖾐 𖼖𖽻𖾐，𖼷𖽑𖽻𖾐 𖼷𖽑𖽡𖾐 𖼦𖽑𖽦 𖼽𖽚𖾐 𖼊𖽑𖽺 𖼍𖽺𖾑 𖼳𖽶𖾐 𖼦𖽑𖽙𖾐．𖼐𖽑𖽡𖾐 𖼈𖽳𖾐 𖼊𖽡 𖼮𖽑𖽻，𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼷𖽑𖽻𖾐 𖼦𖽶𖾑 𖼄𖽔 𖼷𖽑𖽶𖾐 𖼽𖽺𖾐 𖼮𖽑𖽡𖽪𖾑 𖼈𖽳 𖼖𖽔？ 5 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼊𖽑𖽧，𖼄𖽔 𖼣𖽻𖾐！ 𖼐𖽑𖽡𖾐 𖼈𖽳𖾐 𖼊𖽡 𖼮𖽑𖽻 𖼄𖽔 𖼀𖽑𖽚𖾐 𖼊𖽑𖽡𖾑 𖼣𖽻𖾐，𖼄𖽳𖾑 𖼄𖽳 𖼖𖽺𖾑 𖼳𖽶𖾐 𖼮𖽡𖽦 𖼊𖽻𖾐．”𖼺𖽳 𖼄𖽙𖾐 𖼄𖽔 𖼊𖽴 𖼺𖽪𖾐 𖼮𖽑𖽡 𖼺𖽳 𖼄𖽡 𖼷𖽡𖾐
6 𖼽𖽺𖾐 𖼺𖽪𖾐 𖼍𖽻𖾐 𖼊𖽻 𖼊𖽑𖽡 𖼊𖽝𖾐 𖼻𖽜 𖼺𖽺𖾑，𖼀𖽦𖾐：“𖼷𖽑𖽻𖾐 𖼊𖽑𖽡 𖼽𖽚𖾐 𖼮𖽑𖽡 𖼺𖽳 𖼄𖽡 𖼊𖽑𖽡 𖼷𖽡𖾐 𖼍𖽳𖾐 𖼽𖽻 𖼞𖽳𖾐 𖼺𖽳 𖼖𖽳 𖼊𖽻𖾐 𖼮𖽨𖾐 𖼖𖽪𖾐 𖼞𖽪𖾐 𖼞𖽑𖽶𖾐 𖼍𖽙𖾑，𖼽𖽻 𖼖𖽻𖾐 𖼺𖽳 𖼷𖽡𖾐 𖼊𖽑𖽺 𖼺𖽳 𖼄𖽙𖾐 𖼰𖽙𖾐，𖼰𖽙𖾐 𖼄𖽔 𖽂𖽙𖾐 𖼺𖽺𖾑， 7 𖼮𖽑𖽨𖾐 𖼖𖽪𖾐 𖼞𖽪𖾐 𖼠𖽕 𖼖𖽦 𖼠𖽸𖾑 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼐𖽦𖾐！ 𖼦𖽑𖽺𖾑 𖼺𖽙𖾐 𖼞𖽑𖽚 𖼣𖽙𖾐 𖼖𖽻𖾐 𖼮𖽑𖽡 𖼺𖽳 𖼄𖽡 𖼦𖽑𖽺𖾑 𖼷𖽡𖾐 𖼊𖽑𖽺 𖼺𖽳 𖼄𖽙𖾐 𖼰𖽙𖾐．𖼦𖽑𖽻𖾐 𖼊𖽑𖽻𖾐，𖼰𖽙𖾐 𖼄𖽔 𖽂𖽙𖾐．𖼊𖽑𖽝 𖼦𖽑𖽙𖾐 𖼻𖽻𖾐！ 𖼽𖽻 𖼞𖽜 𖼞𖽻𖾑 𖼞𖽻 𖼄𖽡𖾐 𖼈𖽧𖾐 𖽃𖽔 𖼊𖽺𖾑 𖼂𖽺𖾐 𖼐𖽺𖾑？’
8 𖼮𖽑𖽨𖾐 𖼖𖽪𖾐 𖼞𖽪𖾐 𖼠𖽕 𖼖𖽦 𖼠𖽸𖾑 𖼀𖽦𖾐：‘ 𖼺𖽡 𖼀𖽑𖽙 𖽃𖽔𖾐！ 𖼊𖽑𖽡 𖼞𖽑𖽚 𖼹𖽺𖾐 𖼍𖽙𖾑 𖼺𖽺，𖼣𖽙𖾐 𖼺𖽳 𖼷𖽡𖾐 𖼞𖽑𖽶𖾐 𖼻𖽶𖾑 𖼻𖽶𖾐 𖼄𖽚 𖼮𖽨𖾐，𖼮𖽑𖽡 𖼖𖽪 𖼰𖽡𖽺𖾐 𖼰𖽨𖾐 𖼐𖽦𖾐， 9 𖼠𖽙𖾑 𖼍𖽻𖾐 𖼺𖽳 𖼄𖽙𖾐 𖼊𖽴 𖼊𖽑𖽡𖾑 𖼣𖽻𖾐 𖼹𖽺𖾐 𖼍𖽙𖾑，𖼄𖽔 𖼊𖽴 𖼊𖽑𖽡𖾑 𖼣𖽻𖾐 𖼊𖽑𖽝 𖼦𖽑𖽙𖾐．’ ”
𖼳𖽡𖽻𖾐 𖼐𖽑𖽡𖾐 𖼞𖽑𖽶𖾐 𖼮𖽚 𖼠𖽪𖾐 𖼺𖽪𖾐 𖼻𖽙 𖼄𖽳 𖼊𖽑𖽺 𖼞𖽪𖾐 𖼞𖽑𖽙
10 𖼳𖽡𖽻𖾐 𖼐𖽑𖽡𖾐 𖼊𖽑𖽡 𖼐𖽑𖽡𖾐，𖼽𖽺𖾐 𖼺𖽪𖾐 𖼻𖽶𖾑 𖼦𖽑𖽺𖾐 𖼊𖽑𖽡 𖼊𖽝𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽺 𖼄𖽪𖾑． 11 𖼻𖽙 𖼄𖽳 𖼊𖽑𖽡 𖼽𖽚𖾐 𖼮𖽻𖾐，𖼐𖽺 𖼮𖽑𖽢𖾑 𖼻𖽸，𖼷𖽑𖽡𖾐 𖼦𖽑𖽦 𖼞𖽑𖽚 𖼐𖽙𖾐 𖼦𖽑𖽙𖾐，𖼮𖽚 𖼠𖽪𖾐 𖼺𖽺𖾑 𖼊𖽑𖽡 𖼀𖽧𖾑 𖼻𖽙 𖼖𖽺𖾑 𖼮𖽻 𖼍𖽪𖾐 𖼖𖽻𖾐 𖼄𖽔 𖼠𖽸𖾑． 12 𖼽𖽺𖾐 𖼺𖽪𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽻 𖼊𖽑𖽺 𖽃𖽶𖾐 𖼠𖽚 𖼖𖽻𖾐，𖼽𖽻 𖼖𖽙𖾐 𖼀𖽦𖾐：“𖼻𖽙 𖼄𖽳，𖼐𖽑𖽡𖾐 𖼐𖽙𖾐 𖼞𖽑𖽙 𖼦𖽑𖽻𖾐！” 13 𖼀𖽦𖾐 𖼦𖽑𖽻𖾐 𖼺𖽺𖾑 𖼖𖽦 𖼷𖽜𖾐 𖼮𖽑𖽡𖽺𖾐 𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼍𖽦𖾐，𖼽𖽻 𖼐𖽕 𖼊𖽺𖾐 𖼮𖽚 𖼈𖽶 𖼮𖽻 𖼍𖽪𖾐 𖼖𖽻𖾐 𖼦𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳．
14 𖼞𖽪𖾐 𖼮𖽡𖽺𖾐，𖼽𖽺𖾐 𖼺𖽪𖾐 𖼳𖽡𖽻𖾐 𖼐𖽑𖽡𖾐 𖼞𖽑𖽶𖾐 𖼐𖽙𖾐 𖼞𖽪𖾐 𖼺𖽺𖾑，𖼻𖽶𖾑 𖼦𖽑𖽺𖾐 𖼠𖽕 𖼖𖽦 𖼠𖽸𖾑 𖼦𖽑𖽔𖾐 𖼮𖽶𖾐 𖼀𖽶 𖼻𖽶，𖼷𖽑𖽻𖾐 𖼷𖽪𖾐 𖼖𖽙𖾐 𖼀𖽦𖾐：“𖼮𖽑𖽡𖽚 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼄𖽡𖽻 𖼄𖽪𖾐 𖼖𖽡𖾐，𖼐𖽙𖾐 𖽂𖽙𖾐 𖼞𖽪𖾐 𖼖𖽻𖾐 𖼊𖽙𖾐．𖼦𖽑𖽻𖾐 𖼊𖽑𖽻𖾐，𖼳𖽡𖽻𖾐 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼄𖽔 𖼷𖽻．”
15 𖼽𖽺𖾐 𖼺𖽪𖾐 𖼺𖽡 𖼀𖽑𖽙 𖼽𖽻 𖼊𖽑𖽺 𖼊𖽻 𖼞𖽑𖽚：“𖼮𖽑𖽡𖽺 𖼊𖽑𖽺 𖼹𖽳𖾐 𖼂𖽺𖾐 𖼺𖽪𖾐 𖼷𖽑𖽻𖾐 𖽃𖽔𖾐！ 𖼳𖽡𖽻𖾐 𖼐𖽑𖽡𖾐 𖼠𖽻𖾐 𖼞𖽑𖽶𖾐，𖼐𖽑𖽡𖾐 𖼈𖽳𖾐 𖼖𖽡𖾑 𖼊𖽑𖽪 𖼀𖽙 𖼮𖽑𖽶𖾐 𖼞𖽳𖾐 𖼮𖽑𖽻𖾐 𖼐𖽑𖽡 𖼐𖽺𖾐 𖼊𖽑𖽳 𖼖𖽳𖾐 𖼄𖽪，𖼄𖽔 𖼀𖽑𖽡𖾐 𖼺𖽶𖾐 𖼂𖽡𖾐 𖼽𖽡𖾐 𖽃𖽔𖾐 𖼮𖽡𖽦𖾐 𖼍𖽻𖾐 𖼖𖽔？ 16 𖼻𖽙 𖼄𖽳 𖼦𖽑𖽺𖾑 𖼽𖽚𖾐 𖼽𖽕𖾑 𖼂𖽚 𖼖𖽔𖾐 𖼦𖽗 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼣𖽻𖾐，𖼺𖽔 𖼍𖽗𖾑 𖼮𖽑𖽢𖾑 𖼷𖽑𖽡𖾐 𖼦𖽑𖽦 𖼞𖽑𖽚 𖼀𖽑𖽳𖾐 𖼍𖽡 𖼦𖽑𖽙𖾐，𖽃𖽔 𖼹𖽻𖾐 𖼳𖽡𖽻𖾐 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼽𖽻 𖼊𖽑𖽺 𖼀𖽑𖽡𖾐 𖼦𖽑𖽙𖾐 𖼄𖽔 𖼷𖽻 𖼖𖽔𖾑？”
17 𖼽𖽺𖾐 𖼺𖽪𖾐 𖼊𖽑𖽺 𖼀𖽑𖽚𖾐 𖼊𖽦 𖼺𖽪𖾐 𖼷𖽑𖽻𖾐 𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼮𖽨 𖼺𖽺𖾑，𖼦𖽑𖽔𖾐 𖼮𖽶𖾐 𖼳𖽡𖽦𖾑 𖼍𖽻𖾐．𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼷𖽪𖾐 𖼽𖽻 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽶 𖼳𖽳𖾐 𖼄𖽡𖽻 𖼖𖽙𖾐 𖼀𖽙𖾐 𖼺𖽺𖾑，𖼦𖽑𖽔𖾐 𖼮𖽶𖾐 𖼖𖽺𖾑 𖼞𖽜𖾐 𖼺𖽜𖾐．
𖼈𖽻 𖼳𖽶𖾑 𖼄𖽙𖾐 𖼐𖽺𖾐 𖼇𖽝𖾐 𖼄𖽶𖾐 𖼞𖽳𖾐 𖼍𖽻𖾐 𖼊𖽻 ( 𖼊𖽑𖽹𖾑 13：31-33；𖼞𖽑𖽜 4：30-32 )
18 𖼽𖽺𖾐 𖼺𖽪𖾐 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖽃𖽔 𖼊𖽺𖾑 𖼳𖽶 𖼖𖽙𖾐 𖼺𖽶𖾑 𖼐𖽺𖾑？𖼣𖽙𖾐 𖽃𖽔 𖼊𖽺𖾑 𖼳𖽶 𖼍𖽻𖾐 𖼊𖽻 𖼻𖽜 𖼽𖽻 𖼊𖽑𖽺 𖼀𖽦𖾐 𖼀𖽑𖽪𖾐 𖼖𖽡𖾐 𖼐𖽺𖾑？ 19 𖼽𖽻 𖼈𖽻 𖼳𖽶𖾑 𖼊𖽑𖽡 𖼄𖽙𖾐 𖼖𖽙𖾐 𖼺𖽶𖾑，𖼷𖽑𖽻𖾐 𖼈𖽺𖾐 𖼂𖽡𖾐 𖼽𖽡𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽑𖽶𖾐 𖼳𖽶𖾑，𖼽𖽚𖾐 𖼈𖽳 𖼍𖽪𖾐 𖼖𖽻𖾐 𖼺𖽧𖾐 𖼷𖽡𖾐 𖼖𖽙𖾐 𖼺𖽶𖾑，𖼄𖽶 𖼖𖽙𖾐 𖼀𖽙 𖼀𖽨𖾐 𖼺𖽪𖾐 𖼣𖽕𖾐 𖼻𖽙 𖼖𖽺𖾑 𖼖𖽻𖾐 𖼞𖽑𖽶𖾑 𖼊𖽑𖽺 𖼮𖽑𖽡𖾐 𖼳𖽡𖽦𖾑．”
20 𖼽𖽺𖾐 𖼺𖽪𖾐 𖼹𖽦𖾑 𖼀𖽦𖾐：“𖼣𖽙𖾐 𖽃𖽔 𖼊𖽺𖾑 𖼳𖽶 𖼍𖽻𖾐 𖼊𖽻 𖼻𖽜 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼊𖽑𖽺 𖼀𖽦𖾐 𖼀𖽑𖽪𖾐 𖼖𖽡𖾐 𖼐𖽺𖾑？ 21 𖼽𖽻 𖼇𖽝𖾐 𖼄𖽶𖾐 𖼖𖽙𖾐 𖼺𖽶𖾑，𖼻𖽙 𖼄𖽳 𖼄𖽡𖾐 𖼐𖽜𖾐 𖼈𖽺𖾐 𖼂𖽡𖾐 𖼽𖽡𖾐 𖼳𖽙𖾐 𖼄𖽶𖾐 𖼺𖽙𖾐 𖼍𖽡𖾐 𖼄𖽙𖾐 \fr 13．21 \ft 𖽃𖽔 𖼖𖽙𖾐 𖼺𖽙𖾐 𖼷𖽑𖽡𖾐 𖼰𖽡𖾐 𖼮𖽻𖾐． 𖼞𖽑𖽶𖾐 𖼰𖽡𖽺𖾐 𖼺𖽺𖾑，𖼠𖽙𖾑 𖼍𖽻𖾐 𖼄𖽳𖾑 𖼄𖽳 𖼇𖽝𖾐 𖼍𖽪𖾐 𖼖𖽻𖾐．”
𖽃𖽔𖾑 𖼊𖽪 𖼰𖽝𖾐 𖼞𖽑𖽶𖾐 𖼊𖽡 𖼽𖽡𖾐 𖼖𖽡𖾐 ( 𖼊𖽑𖽹𖾑 7：13-14，21-23 )
22 𖼽𖽺𖾐 𖼺𖽪𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼽𖽡𖾐，𖼽𖽻 𖼞𖽑𖽙𖾐 𖼮𖽨𖾐 𖼠𖽚 𖼞𖽳𖾐 𖼖𖽪𖾐 𖼐𖽺𖾐 𖼮𖽑𖽡𖽦𖾐 𖼠𖽻𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽺 𖼄𖽪𖾑． 23 𖼷𖽑𖽻𖾐 𖼊𖽑𖽡 𖼽𖽚𖾐 𖼽𖽻 𖼖𖽙𖾐 𖼊𖽻 𖼐𖽙𖾐：“𖼺𖽡 𖼀𖽑𖽙 𖽃𖽔𖾐！ 𖼰𖽨𖾑 𖽂𖽙𖾐 𖼺𖽪𖾐 𖼷𖽑𖽻𖾐 𖼄𖽔 𖼄𖽨 𖼂𖽔𖾑？”
24 𖼽𖽻 𖼷𖽑𖽻𖾐 𖼷𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽂𖽙 𖼊𖽑𖽧 𖼄𖽙𖾐 𖽃𖽔𖾑 𖼊𖽪 𖼰𖽝𖾐 𖼞𖽑𖽶𖾐 𖼊𖽡 𖼽𖽡𖾐 𖼖𖽡𖾐．𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖽃𖽔𖾑 𖼞𖽶𖾐 𖼷𖽑𖽻𖾐 𖼞𖽑𖽙 𖼄𖽙𖾐 𖼊𖽡 𖼽𖽡𖾐 𖼊𖽡 𖼮𖽑𖽻 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖽂𖽙𖾐 𖼊𖽡 𖼽𖽡𖾐 𖼄𖽔 𖼊𖽙𖾐． 25 𖽃𖽔𖾑 𖼞𖽑𖽶𖾐 𖼺𖽡 𖼀𖽑𖽙 𖽃𖽔𖾑 𖼊𖽪 𖼂𖽡𖾑 𖼍𖽡 𖼦𖽑𖽙𖾐 𖼞𖽑𖽶𖾑 𖼮𖽶𖾐 𖼮𖽑𖽡𖾐，𖼐𖽑𖽡𖾐 𖼈𖽳𖾐 𖼐𖽑𖽡𖾑 𖼮𖽻𖾐 𖼀𖽳 𖼦𖽑𖽡𖽚 𖽃𖽔𖾑 𖼊𖽪 𖼊𖽝 𖼊𖽻𖾐，𖼀𖽦𖾐：‘ 𖼺𖽡 𖼀𖽑𖽙 𖽃𖽔𖾐，𖼣𖽙𖾐 𖼈𖽳𖾐 𖼊𖽑𖽺 𖽃𖽔𖾑 𖼊𖽪 𖼀𖽑𖽪𖾐 𖼞𖽜！’ 𖼽𖽻 𖼐𖽑𖽡𖾐 𖼈𖽳𖾐 𖼊𖽑𖽺 𖼊𖽻 𖼞𖽑𖽚 𖼊𖽻𖾐：‘ 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽔 𖼺𖽝𖾑，𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼠𖽻𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐 𖼖𖽺𖾑 𖼣𖽙𖾐 𖼄𖽔 𖼺𖽝𖾑．’ 26 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼀𖽦𖾐 𖼊𖽻𖾐：‘ 𖼣𖽙𖾐 𖼈𖽳𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼷𖽙 𖼠𖽚 𖼊𖽻𖾐 𖼠𖽚，𖼐𖽑𖽡𖾐 𖼖𖽺𖾑 𖼣𖽙𖾐 𖼈𖽳𖾐 𖼞𖽳𖾐 𖼈𖽳𖾐 𖼮𖽶𖾐 𖼊𖽑𖽺 𖼷𖽑𖽻𖾐 𖼖𖽙𖾐 𖼄𖽪𖾑 𖼠𖽚．’ 27 𖼽𖽻 𖼊𖽻 𖼞𖽑𖽚 𖼊𖽻𖾐：‘ 𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼠𖽻𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐 𖼣𖽙𖾐 𖼄𖽔 𖼺𖽝𖾑．𖼄𖽔 𖼹𖽳𖾐 𖼊𖽶𖾐 𖼮𖽑𖽪 𖼂𖽺𖾐 𖼺𖽪𖾐 𖼷𖽑𖽻𖾐 𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼹𖽻𖾐，𖼄𖽳𖾑 𖼄𖽳 𖼣𖽙𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼽𖽡𖾐 𖼻𖽻𖾐！’
28 𖼐𖽑𖽡𖾐 𖼈𖽳𖾐 𖼄𖽡𖽻𖾐 𖼊𖽻𖾐，𖼽𖽕𖾑 𖼂𖽚 𖼖𖽔𖾐 𖼦𖽗、 𖼽𖽡 𖼺𖽔、 𖼽𖽔 𖼠𖽴𖾑 𖼐𖽺𖾐 𖼺𖽡𖾐 𖼻𖽙 𖼞𖽑𖽙𖾐 𖼣𖽻𖾐 𖼺𖽪𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼞𖽑𖽶𖾐 𖼮𖽻𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽕 𖼐𖽑𖽡𖾑 𖼮𖽻𖾐 𖼀𖽳 𖼊𖽑𖽧 𖼺𖽺𖾑，𖼞𖽑𖽶𖾑 𖼠𖽻𖾐 𖼮𖽻𖾐 𖼺𖽜 𖼞𖽙 𖼣𖽶𖾐 𖼊𖽻𖾐． 29 𖼞𖽑𖽶𖾑 𖼮𖽶𖾐，𖼮𖽡𖾐 𖼊𖽚𖾐 𖼄𖽡𖾐、 𖼮𖽡𖾐 𖼖𖽻𖾑 𖼄𖽡𖾐、 𖼠𖽳𖾐 𖼻𖽸 𖼄𖽡𖾐、 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼮𖽑𖽻𖾐，𖼷𖽑𖽻𖾐 𖼖𖽻𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼠𖽚 𖼞𖽑𖽶𖾐 𖼻𖽦 𖼷𖽙 𖼊𖽻𖾐． 30 𖼐𖽦𖾐 𖼄𖽺！ 𖼠𖽙𖾑 𖼍𖽻𖾐 𖼊𖽺𖾐 𖼺𖽪𖾐，𖽃𖽙𖾑 𖼄𖽺 𖼖𖽻𖾑 𖼊𖽻𖾐；𖽃𖽙𖾑 𖼄𖽺 𖼖𖽻𖾑 𖼺𖽪𖾐，𖼠𖽙𖾑 𖼍𖽻𖾐 𖼊𖽺𖾐 𖼊𖽻𖾐．”
𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼖𖽙𖾐 𖼀𖽙𖾐 𖼣𖽶𖾐 ( 𖼊𖽑𖽹𖾑 23：37-39 )
31 𖼞𖽑𖽶𖾑 𖼊𖽑𖽡 𖼠𖽸𖾑，𖼇𖽕 𖼖𖽡𖾑 𖼺𖽦𖾑 𖼷𖽑𖽻𖾐 𖼞𖽑𖽶𖾑 𖼀𖽑𖽺𖾐 𖼞𖽳𖾐 𖼊𖽑𖽡 𖼹𖽻𖾐 𖼖𖽻𖾐 𖼽𖽺𖾐 𖼺𖽪𖾐 𖼖𖽙𖾐 𖼀𖽦𖾐：“𖼳𖽡𖾐 𖼖𖽲𖾑 𖼐𖽑𖽡𖾐 𖼊𖽑𖽺 𖼺𖽦 𖼊𖽡 𖼮𖽑𖽻，𖼐𖽑𖽡𖾐 𖼦𖽑𖽺𖾑 𖼠𖽻𖾐 𖼰𖽡𖾑 𖼦𖽑𖽙𖾐 𖼽𖽡𖾐 𖼻𖽻𖾐！”
32 𖼽𖽺𖾐 𖼺𖽪𖾐 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽡𖾐 𖼈𖽪𖾑 𖼊𖽡 𖼞𖽑𖽶𖾑 𖼊𖽝𖾐 𖼖𖽙𖾐 𖼀𖽦𖾐：‘ 𖽃𖽙𖾑 𖼐𖽑𖽡𖾐、 𖽃𖽔𖾑 𖼞𖽶𖾐 𖼐𖽑𖽡𖾐，𖼣𖽙𖾐 𖼐𖽺 𖼞𖽕 𖼐𖽙𖾐 𖼞𖽪𖾐，𖼺𖽙𖾐 𖼐𖽑𖽡𖾐 𖼖𖽚 𖼞𖽑𖽶𖾑 𖼮𖽶𖾐，𖼣𖽙𖾐 𖼞𖽳𖾐 𖼄𖽡𖽻 𖼂𖽺𖾐 𖼀𖽑𖽢 𖼦𖽑𖽻𖾐 𖼊𖽻𖾐．’ 33 𖽃𖽔 𖼊𖽺𖾐 𖼣𖽻𖾐 𖼦𖽻，𖼣𖽙𖾐 𖽃𖽙𖾑 𖼐𖽑𖽡𖾐、 𖽃𖽔𖾑 𖼞𖽶𖾐 𖼐𖽑𖽡𖾐 𖼐𖽺𖾐 𖼹𖽕𖾑 𖼀𖽑𖽦 𖼐𖽑𖽡𖾐，𖼦𖽑𖽔𖾐 𖼖𖽺𖾑 𖼺𖽜 𖽃𖽙𖾑 𖼄𖽺 𖼽𖽡𖾐 𖼖𖽡𖾐．𖼞𖽪𖾐 𖼮𖽡𖽺𖾐，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼄𖽔 𖼣𖽻𖾐，𖼺𖽡𖾐 𖼻𖽙 𖼊𖽑𖽺 𖼈𖽪𖾑 𖼠𖽻𖾐 𖼀𖽑𖽧𖾐 𖼄𖽶𖾑 𖼄𖽔 𖼠𖽸𖾑．
34 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖽃𖽔𖾐，𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖽃𖽔𖾐！ 𖼐𖽑𖽡𖾐 𖼄𖽔 𖼐𖽙 𖼄𖽙𖾐 𖼺𖽡𖾐 𖼻𖽙 𖼊𖽑𖽺 𖼺𖽦 𖼀𖽑𖽧𖾐，𖼦𖽑𖽔𖾐 𖼖𖽺𖾑 𖽂𖽙 𖼺𖽙𖾐 𖼂𖽙𖾐 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼊𖽑𖽺 𖼖𖽚𖾐 𖼄𖽙𖾐 𖼻𖽜 𖼊𖽝 𖼳𖽶𖾐 𖼦𖽑𖽙𖾐．𖼣𖽙𖾐 𖼞𖽑𖽙 𖼄𖽙𖾐 𖼂𖽦𖾑 𖼄𖽙𖾐 𖼽𖽦𖾐 𖼄𖽙𖾐 𖼽𖽦𖾐 𖼻𖽙 𖼊𖽑𖽺 𖽃𖽶𖾐 𖼊𖽪𖾐 𖼖𖽦 𖼞𖽑𖽶𖾐 𖼈𖽜 𖼖𖽙𖾐 𖼺𖽶𖾑，𖼐𖽑𖽡𖾐 𖼞𖽳𖾐 𖼻𖽙 𖼄𖽡𖾐 𖼐𖽜𖾐 𖼞𖽜 𖼻𖽶𖾑 𖼖𖽻𖾐 𖼊𖽡 𖼮𖽑𖽻．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼖𖽻𖾐 𖼄𖽔 𖼦𖽶𖾐． 35 𖼐𖽦𖾐 𖼄𖽺！ 𖼐𖽑𖽡𖾐 𖼈𖽳𖾐 𖽃𖽔𖾑 𖼞𖽑𖽶𖾐 𖼄𖽡𖾐 𖼮𖽡𖽦𖾐 𖼀𖽑𖽢 𖼊𖽻𖾐．𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧，𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖽂𖽙𖾐 𖼄𖽡𖽻𖾐 𖼄𖽔 𖼊𖽙𖾐，𖼳𖽡𖽻𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼀𖽦𖾐：‘ 𖽂𖽙 𖼺𖽙𖾐 𖼂𖽙𖾐 𖼹𖽡𖾐 𖼂𖽻𖾐 𖼖𖽻𖾐 𖼺𖽪𖾐 𖼊𖽑𖽺 𖼞𖽑𖽪𖾐 𖼮𖽑𖽳 𖼷𖽻 𖼳𖽶 𖼣𖽻𖾐！’ 𖼞𖽑𖽶𖾑 𖼮𖽶𖾐 𖼖𖽙𖾐 𖼮𖽑𖽡𖾐 𖼺𖽺𖾑，𖼹𖽦𖾑 𖼣𖽙𖾐 𖼊𖽑𖽺 𖽂𖽙𖾐 𖼄𖽡𖽻𖾐 𖼊𖽙𖾐．”