𖼐𖽑𖽧 𖼳𖽡𖾐 𖼄𖽡 𖼺𖽪𖾑 9

𖼷𖽑𖽻𖾐 𖼀𖽺 𖼷𖽙𖾐 𖼷𖽜𖾐 𖼽𖽺𖾐 𖼮𖽑𖽡𖽡𖾑𖽪𖾑 𖼵𖽜𖾑

1 𖼦𖽑𖽺𖾑 𖼊𖽑𖽡 𖼳𖽨𖾐 𖼐𖽑𖽡 𖼷𖽑𖽡𖾐 𖼖𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐， 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐， 𖼊𖽑𖽡 𖼊𖽑𖽜 𖼷𖽙𖾐 𖼷𖽜𖾐， 𖼽𖽦 𖼄𖽳𖾐 𖼀𖽑𖽡𖽻𖾐 𖼈𖽦， 𖼞𖽑𖽪 𖼖𖽪𖾐 𖼈𖽺𖾐 𖼈𖽪𖾑 𖼊𖽡𖾐 𖼍𖽦𖾐． 2 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼖𖽙𖾐 𖼮𖽑𖽻𖾐 𖼀𖽜𖾐 𖼀𖽑𖽪𖾐 𖼦𖽑𖽙𖾐， 𖼦𖽑𖽡𖽚 𖼍𖽪𖾐 𖼖𖽻𖾐 𖼺𖽺𖾑， 𖼽𖽻 𖼄𖽳𖾑 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼐𖽺𖾐 𖼽𖽻 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼵𖽜𖾑． 3 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼖𖽡𖾐 𖼀𖽜𖾐 𖼊𖽑𖽡 𖼀𖽜𖾐 𖼞𖽳𖾐 𖼐𖽑𖽡𖾐 𖼦𖽑𖽦， 𖼽𖽻 𖼈𖽳𖾐 𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼞𖽳𖾐 𖼦𖽑𖽡𖽚， 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼳𖽪𖾐 𖼮𖽨𖾐 𖼺𖽪𖾑 𖼊𖽑𖽺 𖼷𖽻𖾐；𖼠𖽳𖾐 𖼖𖽪𖾐 𖼖𖽡𖾐 𖼀𖽜𖾐 𖼊𖽑𖽡 𖼀𖽜𖾐 𖼞𖽳𖾐 𖼐𖽑𖽡𖾐 𖼦𖽑𖽦， 𖼽𖽻 𖼈𖽳𖾐 𖼽𖽺𖾐 𖼮𖽑𖽡𖽪𖾑 𖼵𖽜𖾑、 𖼽𖽻 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽡𖾐 𖼊𖽑𖽴． 4 𖼽𖽺𖾐 𖼳𖽪𖾐 𖼽𖽕𖾑、 𖼂𖽔𖾐 𖼐𖽑𖽧、 𖼰𖽡𖽕 𖼄𖽡𖽦𖾑、 𖼳𖽶𖾑 𖼂𖽔𖾐 𖼐𖽑𖽧、 𖼂𖽪𖾑 𖼐𖽑𖽧、 𖼳𖽶𖾑 𖼖𖽡𖾑 𖼂𖽡、 𖼂𖽔𖾐 𖼐𖽑𖽧 𖼐𖽺𖾐 𖼰𖽡𖾐 𖼐𖽕 𖼐𖽑𖽧 ， 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼺𖽧𖾐 𖼷𖽻𖾐 𖼊𖽑𖽺 𖼦𖽑𖽡𖽚， 𖼮𖽑𖽡𖽪 𖼈𖽳 𖼄𖽙𖾐 𖼽𖽻 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐．

𖼞𖽑𖽪𖾐 𖼮𖽑𖽳 𖼐𖽺𖾐 𖼮𖽑𖽡 𖼮𖽡𖽺𖾐

5 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽺𖾐 𖼳𖽪𖾐 𖼽𖽕𖾑、 𖼰𖽡𖽕 𖼄𖽡𖽦𖾑、 𖼂𖽔𖾐 𖼐𖽑𖽧、 𖼦𖽑𖽔𖾐 𖼳𖽔𖾐 𖼐𖽑𖽧、 𖼳𖽶𖾑 𖼖𖽡𖾑 𖼂𖽡、 𖼦𖽴 𖼍𖽧𖾑 𖼽𖽔、 𖼳𖽶𖾑 𖼂𖽔𖾐 𖼐𖽑𖽧 𖼐𖽺𖾐 𖼀𖽑𖽧 𖼊𖽑𖽔𖾐 𖼳𖽡𖾐 𖼽𖽔 𖼀𖽦𖾐：“𖼐𖽑𖽡𖾐 𖼈𖽳𖾐 𖼦𖽑𖽡𖽚 𖼍𖽪𖾐 𖼖𖽻𖾐 𖼺𖽺𖾑， 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽑𖽪𖾐 𖼮𖽑𖽳， 𖼻𖽳𖾐 𖼻𖽳𖾐 𖼹𖽦𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼖𖽡𖾐．”

“𖼽𖽺𖾐 𖼦𖽴 𖼦𖽫 𖽃𖽔𖾐! 𖼐𖽑𖽡𖾐 𖼄𖽶 𖼳𖽳𖾐 𖼞𖽳𖾐 𖼄𖽡𖾐 𖼊𖽑𖽺 𖼞𖽑𖽪𖾐 𖼮𖽑𖽳 𖼷𖽻， 𖼷𖽑𖽻𖾐 𖼐𖽑𖽡𖾐 𖼞𖽳𖾐 𖼄𖽡𖾐 𖼊𖽑𖽺 𖼐𖽦𖾐 𖼍𖽪𖾐， 𖼞𖽑𖽙𖾐 𖼣𖽻𖾐 𖼳𖽶 𖼮𖽻 𖼮𖽑𖽡𖽪 𖼐𖽺𖾐 𖼞𖽑𖽪𖾐 𖼮𖽑𖽳 𖼊𖽑𖽺 𖼠𖽳𖾐 𖼖𖽡𖾐．

6 𖽂𖽙 𖼺𖽙𖾐 𖼂𖽙𖾐 𖽃𖽔𖾐! 𖼐𖽑𖽡𖾐 𖼍𖽺𖾑 𖼽𖽺𖾐 𖼦𖽴 𖼦𖽫 𖼣𖽻𖾐， 𖼐𖽑𖽡𖾐 𖼄𖽶 𖼠𖽻𖾐 𖼹𖽸𖾑， 𖼄𖽶 𖼠𖽻𖾐 𖼊𖽑𖽺 𖼄𖽶 𖼠𖽻𖾐 𖼐𖽺𖾐 𖼄𖽶 𖼄𖽦 𖼀𖽑𖽙， 𖼄𖽡𖾑 𖼐𖽦𖾐 𖼐𖽺𖾐 𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖼺𖽪𖾐 𖼞𖽑𖽙𖾐 𖼣𖽻𖾐 𖼳𖽶， 𖼦𖽜𖾐 𖼄𖽙𖾐 𖼐𖽺𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐， 𖼐𖽑𖽡𖾐 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼞𖽜 𖽂𖽙𖾐 𖼠𖽙𖾑， 𖼄𖽶 𖼄𖽦 𖼀𖽑𖽙 𖼖𖽺𖾑 𖼐𖽑𖽡𖾐 𖼊𖽑𖽺 𖼊𖽑𖽴 𖼳𖽶 𖼣𖽻𖾐．

7 𖼐𖽑𖽡𖾐 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼣𖽻𖾐， 𖼐𖽑𖽡𖾐 𖼽𖽕𖾑 𖼂𖽚 𖼖𖽕 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐， 𖼽𖽻 𖼊𖽑𖽺 𖼰𖽡𖽔𖾐 𖼖𖽴𖾑 𖼍𖽡 𖼄𖽡𖾐 𖼊𖽺𖾐 𖼈𖽮 𖽃𖽳 𖼖𖽪𖾐 𖼞𖽳𖾐 𖼮𖽑𖽻𖾐 𖼦𖽳 𖼊𖽑𖽧 𖼖𖽻𖾐， 𖼹𖽦𖾑 𖼽𖽻 𖼊𖽑𖽺 𖼽𖽕𖾑 𖼂𖽚 𖼖𖽔𖾐 𖼦𖽕 𖼐𖽺𖾐 𖼄𖽡𖾐 𖼂𖽚𖾐． 8 𖼐𖽑𖽡𖾐 𖼐𖽦𖾐 𖼄𖽡𖽻𖾐 𖼽𖽻 𖼐𖽑𖽡𖾐 𖼊𖽑𖽺 𖼊𖽻 𖼮𖽶𖾐 𖼐𖽑𖽧𖾐 𖼻𖽺𖾐， 𖽃𖽔𖾐 𖼺𖽺𖾑 𖼽𖽻 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐， 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐、 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐、 𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐， 𖼂𖽡 𖼖𖽡𖾑 𖼳𖽡 𖼮𖽑𖽪𖾐 𖼳𖽶 𖼷𖽑𖽻𖾐、 𖼽𖽺𖾐 𖼂𖽪𖾑 𖼺𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼠𖽴 𖼰𖽡𖽔𖾐 𖼺𖽔 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐， 𖼖𖽪 𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼞𖽜． 𖼐𖽑𖽡𖾐 𖼞𖽑𖽙𖾐 𖼀𖽦𖾐 𖼠𖽚 𖼺𖽪𖾐 𖼐𖽑𖽡𖾐 𖼂𖽺𖾐 𖼮𖽑𖽡𖾐 𖼦𖽑𖽻𖾐， 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼀𖽳𖾐 𖼈𖽡𖾐 𖼮𖽻𖾐 𖼺𖽪𖾐 𖼣𖽻𖾐．

9 𖼐𖽑𖽡𖾐 𖼣𖽙𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼠𖽻𖾐 𖼰𖽡𖽳𖾐 𖼞𖽑𖽶𖾑 𖼊𖽑𖽺 𖼐𖽦𖾐 𖼄𖽡𖽻𖾐， 𖼐𖽑𖽡𖾐 𖼽𖽻 𖼈𖽳𖾐 𖼦𖽜𖾐 𖼄𖽙𖾐 𖼐𖽑𖽡𖾐 𖼞𖽳𖾐 𖼮𖽻𖾐 𖼞𖽑𖽙𖾐 𖼮𖽑𖽡 𖼮𖽡𖽺𖾐 𖼺𖽪𖾐 𖼊𖽑𖽺 𖼊𖽻 𖼞𖽑𖽚． 10 𖼞𖽪𖾐 𖼮𖽡𖽺𖾐， 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖽃𖽔 𖼊𖽺𖾐 𖼳𖽡𖽦 𖼈𖽳， 𖼽𖽻 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼞𖽑𖽶𖾑 𖼐𖽑𖽡𖾐 𖼺𖽝𖾑， 𖽃𖽔𖾐 𖼺𖽺𖾑 𖼞𖽑𖽙𖾐 𖼣𖽝 𖼺𖽪𖾐 𖼺𖽡𖾐 𖼂𖽺𖾐 𖼊𖽪𖾐 𖼂𖽺𖾐， 𖼇𖽕 𖼖𖽻 𖼐𖽺𖾐 𖼽𖽻 𖼮𖽑𖽡𖾐 𖼞𖽑𖽶𖾐 𖼞𖽳𖾐 𖼷𖽶 𖼄𖽻， 𖼹𖽦𖾑 𖼽𖽻 𖼠𖽚 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼞𖽜 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐， 𖼐𖽑𖽡𖾐 𖼄𖽡𖾐 𖼊𖽻 𖼦𖽑𖽺𖾑 𖽃𖽔𖾑 𖼄𖽳𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼮𖽻𖾐 𖼍𖽳𖾐 𖼺𖽺． 11 𖼐𖽑𖽡𖾐 𖼹𖽦𖾑 𖼣𖽙𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖽃𖽙𖾑 𖼄𖽺 𖼮𖽑𖽡𖽺 𖼦𖽜𖾐 𖼄𖽙𖾐 𖼞𖽜 𖼷𖽑𖽦𖾐 𖼐𖽑𖽡 𖼊𖽑𖽜𖾐 𖼀𖽑𖽢， 𖼽𖽻 𖼈𖽳𖾐 𖼞𖽜 𖼦𖽜𖾐 𖼄𖽙𖾐 𖼠𖽻𖾐 𖼞𖽑𖽶𖾐 𖼦𖽡𖽳𖾑 𖼄𖽡𖾐 𖼊𖽑𖽺 𖼺𖽜 𖼠𖽚 𖼽𖽡𖾐， 𖼽𖽻 𖼈𖽳𖾐 𖼊𖽑𖽺 𖼞𖽕 𖼖𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼷𖽴𖾐 𖼦𖽜𖾐 𖼄𖽙𖾐 𖼊𖽑𖽻𖾐 𖼐𖽦𖾑 𖼹𖽺𖾐， 𖼞𖽑𖽶𖾑 𖼖𖽚𖾐 𖼄𖽙𖾐 𖼷𖽴𖾐 𖼺𖽺𖾑 𖼈𖽡𖾐 𖼹𖽧𖾑 𖼮𖽝 𖼍𖽪𖾐 𖼖𖽻𖾐 𖼺𖽪𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼹𖽺𖾐 𖼖𖽙𖾐 𖼺𖽶𖾑． 12 𖽃𖽔𖾑 𖼐𖽑𖽡 𖼞𖽪𖾐 𖼍𖽡𖾐 𖼻𖽶𖾐 𖼻𖽜 𖼽𖽻 𖼈𖽳𖾐 𖼊𖽑𖽺 𖼮𖽨𖾐 𖼦𖽳， 𖽃𖽔𖾑 𖼄𖽶 𖼮𖽑𖽧 𖼍𖽚𖾑 𖼻𖽶𖾐 𖼻𖽜 𖼽𖽻 𖼈𖽳𖾐 𖼞𖽑𖽙𖾐 𖼺𖽜 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼀𖽜𖾐 𖼖𖽜𖾐 𖼂𖽺𖾐．

13 𖼐𖽑𖽡𖾐 𖼹𖽺𖾐 𖼖𖽻𖾐 𖼳𖽡𖾐 𖼐𖽦𖾑 𖽂𖽙 𖼰𖽡𖽺𖾐 𖼊𖽑𖽺 𖼮𖽻𖾐， 𖼄𖽶 𖼠𖽻𖾐 𖼊𖽑𖽺 𖼮𖽻𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐， 𖼐𖽑𖽡𖾐 𖼀𖽳𖾐 𖼈𖽡𖾐 𖼺𖽪𖾐 𖼐𖽑𖽡𖾐 𖼮𖽡𖽺𖾐、 𖼠𖽕𖾐 𖼰𖽶𖾐 𖼺𖽪𖾐 𖼳𖽪𖾐 𖼮𖽨𖾐、 𖼹𖽳𖾐 𖼮𖽻𖾐 𖼺𖽪𖾐 𖼄𖽪𖾑 𖼊𖽻 𖼐𖽺𖾐 𖼷𖽑𖽦𖾐 𖼮𖽡𖽺𖾐， 𖼖𖽪 𖼽𖽻 𖼈𖽳𖾐 𖼊𖽑𖽺 𖼞𖽜． 14 𖼐𖽑𖽡𖾐 𖼽𖽻 𖼈𖽳𖾐 𖼞𖽜 𖼐𖽑𖽡𖾐 𖼞𖽳𖾐 𖼺𖽡 𖼮𖽡𖾐 𖼺𖽪𖾐 𖼳𖽡𖽻𖾐 𖼐𖽑𖽡𖾐 𖼊𖽑𖽺 𖼺𖽝𖾑 𖼄𖽶𖾑， 𖼐𖽑𖽡𖾐 𖼄𖽚 𖼳𖽡𖾐 𖼊𖽑𖽺 𖼻𖽜 𖼺𖽺𖾑， 𖼽𖽻 𖼈𖽳𖾐 𖼊𖽑𖽺 𖼷𖽑𖽦𖾐 𖼮𖽡𖽺𖾐、 𖼐𖽑𖽡𖾐 𖼮𖽡𖽺𖾐 𖼐𖽺𖾐 𖼳𖽨𖾐 𖼮𖽨𖾐 𖼄𖽪𖾑 𖼍𖽴𖾑．

15 𖼽𖽻 𖼈𖽳𖾐 𖼦𖽑𖽦 𖼞𖽑𖽶𖾑 𖼮𖽶𖾐， 𖼐𖽑𖽡𖾐 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼷𖽙 𖼊𖽪𖾐 𖼖𖽪 𖼽𖽻 𖼈𖽳𖾐 𖼞𖽜 𖼷𖽙；𖼽𖽻 𖼈𖽳𖾐 𖼺𖽧 𖼞𖽑𖽶𖾑 𖼮𖽶𖾐， 𖼐𖽑𖽡𖾐 𖼖𖽚𖾐 𖼳𖽕𖾐 𖼊𖽑𖽺𖾐 𖼊𖽑𖽺 𖼄𖽪𖾑 𖼍𖽴𖾑 𖽃𖽔𖾐 𖼮𖽡𖽦𖾐 𖼊𖽚𖾐 𖼊𖽑𖽧 𖼖𖽻𖾐 𖼽𖽻 𖼈𖽳𖾐 𖼞𖽜 𖼊𖽻𖾐；𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼄𖽪𖾑 𖼍𖽴𖾑 𖼺𖽺𖾑， 𖼽𖽡𖾐 𖼐𖽑𖽡𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼖𖽪 𖼽𖽻 𖼈𖽳𖾐 𖼊𖽑𖽺 𖼞𖽜 𖼊𖽻𖾐 𖼺𖽪𖾐 𖼄𖽡𖾐 𖼊𖽺𖾐 𖼊𖽑𖽺 𖼊𖽝 𖽂𖽙𖾐 𖼖𖽡𖾐．

16 𖼦𖽑𖽻𖾐 𖼊𖽑𖽻𖾐， 𖼣𖽙𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼽𖽻 𖼄𖽳𖾑 𖼞𖽚 𖼳𖽡𖽦 𖼈𖽳， 𖼐𖽑𖽧𖾐 𖼠𖽴𖾐 𖼖𖽺𖾐 𖼈𖽳𖾑、 𖼐𖽑𖽡𖾐 𖼄𖽪𖾑 𖼍𖽴𖾑 𖼺𖽪𖾐 𖼖𖽙𖾐 𖼄𖽔 𖼮𖽑𖽻𖾐． 17 𖼽𖽻 𖼈𖽳𖾐 𖼐𖽑𖽡𖾐 𖼊𖽑𖽺 𖼊𖽻 𖼮𖽶𖾐 𖼄𖽔 𖼦𖽶𖾐， 𖼐𖽑𖽡𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼞𖽑𖽙𖾐 𖼂𖽺𖾐 𖼺𖽪𖾐 𖼞𖽑𖽙 𖼣𖽝 𖼄𖽡𖽻 𖼖𖽺𖾑 𖼽𖽻 𖼈𖽳𖾐 𖼄𖽔 𖼦𖽙𖾑 𖼮𖽑𖽡， 𖼽𖽻 𖼈𖽳𖾐 𖼐𖽑𖽧𖾐 𖼠𖽴𖾐 𖼖𖽺𖾐 𖼈𖽳𖾑、 𖼐𖽑𖽡𖾐 𖼊𖽑𖽺 𖼀𖽑𖽚𖾐 𖼊𖽦、 𖼈𖽪𖾑 𖼷𖽪𖾐 𖼺𖽺𖾐 𖼺𖽺𖾑， 𖼀𖽑𖽚𖾐 𖼽𖽻 𖼈𖽳𖾐 𖼀𖽑𖽚𖾐 𖼀𖽑𖽙 𖼀𖽑𖽚𖾐 𖼄𖽙𖾐 𖼂𖽺𖾐 𖼞𖽳𖾐 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼊𖽻𖾐． 𖼦𖽑𖽻𖾐 𖼊𖽑𖽻𖾐， 𖼐𖽑𖽡𖾐 𖼦𖽑𖽺𖾑 𖼐𖽑𖽧𖾐 𖼺𖽳 𖼷𖽑𖽻𖾐 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼄𖽡𖽺 𖼦𖽑𖽙𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐， 𖼐𖽑𖽡𖾐 𖼮𖽡 𖼽𖽡𖾑 𖼮𖽻𖾐， 𖼐𖽑𖽧𖾐 𖼮𖽡𖽻𖾐 𖼮𖽻𖾐， 𖼄𖽔 𖼠𖽕𖾐 𖼄𖽔 𖼀𖽶 𖼻𖽶， 𖼦𖽑𖽔𖾐 𖼖𖽺𖾑 𖼐𖽙𖾑 𖼣𖽜 𖼀𖽻𖾐 𖼀𖽡𖾐 𖼄𖽙𖾐 𖼮𖽻𖾐， 𖽃𖽔𖾐 𖼺𖽺𖾑 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼄𖽔 𖼷𖽴𖾐 𖼦𖽑𖽙𖾐． 18 𖼽𖽻 𖼈𖽳𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼳𖽳𖾐 𖼐𖽑𖽡 𖼻𖽙 𖼮𖽑𖽡𖽻𖾐 𖼊𖽑𖽡 𖼮𖽑𖽡𖾐 𖼷𖽑𖽧𖾐 𖼊𖽑𖽧 𖼖𖽻𖾐 𖼺𖽺𖾑， 𖼀𖽦𖾐：‘ 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽦𖾐 𖼖𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐．’ 𖼽𖽻 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨．

19 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼐𖽙𖾑 𖼣𖽜 𖼀𖽻𖾐 𖼀𖽡𖾐 𖼮𖽻𖾐 𖼺𖽺𖾑， 𖼽𖽻 𖼈𖽳𖾐 𖼊𖽑𖽺 𖼄𖽔 𖼰𖽡𖾑 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼍𖽙𖾑， 𖽃𖽔𖾑 𖼐𖽑𖽡 𖼞𖽪𖾐 𖼍𖽡𖾐 𖼻𖽶𖾐 𖼽𖽻 𖼈𖽳𖾐 𖼊𖽑𖽺 𖼄𖽔 𖼰𖽡𖾑 𖼦𖽑𖽙𖾐， 𖼹𖽦𖾑 𖼽𖽻 𖼈𖽳𖾐 𖼊𖽑𖽺 𖼮𖽨𖾐 𖼄𖽙𖾐 𖼦𖽳 𖼺𖽜， 𖽃𖽔𖾑 𖼄𖽶 𖼮𖽑𖽧 𖼍𖽚𖾑 𖼻𖽶𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼄𖽔 𖼰𖽡𖾑 𖼦𖽑𖽙𖾐， 𖼦𖽑𖽔𖾐 𖼖𖽺𖾑 𖼀𖽜𖾐 𖼖𖽜𖾐 𖼊𖽚𖾐 𖼽𖽻 𖼈𖽳𖾐 𖼺𖽜𖾐 𖼺𖽪𖾐 𖼮𖽨𖾐 𖼄𖽙𖾐 𖼊𖽑𖽺 𖼄𖽡𖽻𖾐． 20 𖼐𖽑𖽡𖾐 𖼳𖽨𖾐 𖼹𖽳𖾐 𖼹𖽡𖾐 𖼹𖽺𖾐 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼄𖽪𖾑 𖼍𖽴𖾑， 𖼐𖽑𖽡𖾐 𖼄𖽔 𖼐𖽕 𖼹𖽺𖾐 𖼍𖽙𖾑 𖼽𖽻 𖼈𖽳𖾐 𖼞𖽜 𖼄𖽔 𖼷𖽙 𖼐𖽺𖾐 𖼄𖽔 𖼂𖽺𖾐， 𖼐𖽑𖽡𖾐 𖽃𖽔𖾐 𖼮𖽡𖽦𖾐 𖼽𖽻 𖼈𖽳𖾐 𖼊𖽑𖽺 𖼍𖽻𖾐， 𖼽𖽻 𖼈𖽳𖾐 𖼞𖽜 𖼺𖽧 𖼞𖽑𖽙． 21 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐 𖼞𖽳𖾐 𖼖𖽡𖾐 𖼷𖽑𖽡𖾐 𖼞𖽑𖽚 𖼠𖽻𖾐 𖼞𖽑𖽶𖾐， 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼍𖽻𖾐 𖼠𖽙𖾑， 𖼽𖽻 𖼈𖽳𖾐 𖼄𖽔 𖼖𖽚 𖼊𖽪 𖼊𖽑𖽡 𖼳𖽶 𖼖𖽺𖾑 𖼄𖽔 𖼮𖽻𖾐， 𖼀𖽑𖽡𖽻𖾐 𖼷𖽑𖽶 𖼖𖽺𖾑 𖼄𖽔 𖼈𖽦 𖼮𖽑𖽡𖽦， 𖼽𖽻 𖼈𖽳𖾐 𖼮𖽑𖽡𖾑 𖼀𖽑𖽦𖾐 𖼖𖽺𖾑 𖼄𖽔 𖼀𖽑𖽴 𖼄𖽔 𖼐𖽙𖾐．

22 𖼐𖽑𖽡𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼄𖽡𖾐 𖼊𖽺𖾐 𖼰𖽡𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐， 𖼐𖽑𖽡𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽳𖾐 𖼄𖽡𖾐 𖼊𖽺𖾐 𖼀𖽜𖾐 𖼽𖽻 𖼈𖽳𖾐 𖼞𖽜 𖼄𖽡𖾐 𖼳𖽡𖽪 𖼂𖽺𖾐 𖼺𖽺𖾑， 𖼽𖽻 𖼈𖽳𖾐 𖼳𖽡𖾐 𖼦𖽚 𖼈𖽪𖾐 𖼍𖽦 𖼞𖽳𖾐 𖼄𖽡𖾐 𖼊𖽺𖾐， 𖼳𖽡𖾐 𖼳𖽸 𖼂𖽜 𖼖𖽪𖾐 𖼐𖽺𖾐 𖼂𖽔𖾐 𖼳𖽔𖾐 𖼄𖽡𖾐 𖼊𖽺𖾐 𖼠𖽕 𖼺𖽪𖾐 𖼈𖽪𖾐 𖼍𖽦 𖽃𖽴𖾑 𖼞𖽳𖾐 𖼄𖽡𖾐 𖼊𖽺𖾐 𖼊𖽝 𖽂𖽙𖾐． 23 𖼐𖽑𖽡𖾐 𖼽𖽻 𖼈𖽳𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼄𖽶 𖼠𖽻𖾐 𖼊𖽑𖽺 𖼠𖽳𖾐 𖼖𖽙𖾐 𖼺𖽶𖾑 𖼄𖽨， 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼦𖽳 𖼺𖽺𖾑， 𖼐𖽑𖽡𖾐 𖼽𖽻 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼊𖽑𖽺 𖼞𖽜 𖼮𖽙𖾐 𖼺𖽪𖾐 𖼄𖽡𖾐 𖼳𖽡𖽪 𖼞𖽳𖾐 𖼄𖽡𖾐 𖼊𖽺𖾐 𖼽𖽡𖾐．

24 𖽃𖽔𖾐 𖼺𖽺𖾑， 𖼽𖽻 𖼈𖽳𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽡 𖼽𖽡𖾐， 𖼞𖽑𖽶𖾑 𖼄𖽡𖾐 𖼊𖽺𖾐 𖽂𖽙𖾐 𖼮𖽻𖾐． 𖼐𖽑𖽡𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽻𖾐 𖼺𖽪𖾐 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼊𖽑𖽺 𖼮𖽡𖽮𖾐 𖼮𖽻𖾑 𖼊𖽴， 𖼹𖽦𖾑 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼞𖽳𖾐 𖼈𖽪𖾐 𖼍𖽦 𖼐𖽺𖾐 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼊𖽑𖽺 𖼰𖽡𖽻𖾐 𖼺𖽺𖾑， 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐， 𖼽𖽻 𖼈𖽳𖾐 𖼞𖽜 𖼽𖽻 𖼄𖽳𖾑 𖼐𖽑𖽧𖾐 𖼺𖽳 𖼖𖽙𖾐 𖼮𖽑𖽻𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼊𖽑𖽺 𖽂𖽙𖾐 𖼠𖽕 𖼊𖽙𖾐． 25 𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖽂𖽙 𖼊𖽙𖾐 𖼺𖽪𖾐 𖼖𖽪𖾐 𖼐𖽺𖾐 𖼄𖽡𖾐 𖼹𖽳𖾐 𖼄𖽡𖾐 𖼷𖽑𖽪𖾐 𖼊𖽑𖽺 𖼐𖽻𖾑 𖽂𖽙𖾐， 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽶 𖼊𖽴 𖼹𖽳𖾐 𖼖𖽪𖾐 𖼰𖽡𖽺𖾐 𖼺𖽪𖾐 𖼦𖽑𖽺𖾐、 𖼠𖽢𖾑 𖼀𖽑𖽢 𖼦𖽑𖽻𖾐 𖼺𖽪𖾐 𖼈𖽡𖾐 𖼊𖽪、 𖼺𖽳 𖼖𖽳 𖼊𖽻𖾐 𖼮𖽑𖽨𖾐 𖼖𖽪𖾐 𖼞𖽪𖾐、 𖽃𖽔 𖼮𖽑𖽙 𖼮𖽑𖽨𖾐 𖼖𖽪𖾐 𖼞𖽪𖾐 𖼐𖽺𖾐 𖼞𖽑𖽙𖾐 𖼣𖽻𖾐 𖼳𖽶 𖼺𖽳 𖼷𖽡𖾐 𖼐𖽻𖾑 𖽂𖽙𖾐， 𖼽𖽻 𖼈𖽳𖾐 𖽂𖽙𖾐 𖼷𖽙 𖼀𖽚𖾐， 𖼞𖽶𖾐 𖼮𖽑𖽶 𖼷𖽑𖽪𖾐 𖼍𖽪𖾐 𖼖𖽻𖾐， 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼞𖽳𖾐 𖼮𖽡 𖼽𖽡𖾑 𖼈𖽳 𖼺𖽺𖾑， 𖼽𖽻 𖼈𖽳𖾐 𖼮𖽻𖾐 𖼷𖽡𖾑 𖼮𖽻𖾐 𖼺𖽙 𖽂𖽙𖾐．

𖼖𖽺𖾐 𖼈𖽳𖾑 𖼞𖽳𖾐 𖼽𖽺𖾐 𖼮𖽑𖽡𖽪𖾑

26 𖼦𖽑𖽻𖾐 𖼊𖽑𖽻𖾐， 𖼽𖽻 𖼈𖽳𖾐 𖼐𖽑𖽡𖾐 𖼊𖽑𖽺 𖼖𖽺𖾐 𖼈𖽳𖾑， 𖼐𖽑𖽡𖾐 𖼊𖽑𖽺 𖼀𖽑𖽚𖾐 𖼊𖽦， 𖼐𖽑𖽡𖾐 𖼞𖽳𖾐 𖼳𖽪𖾐 𖼮𖽨𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐． 𖼺𖽡𖾐 𖼻𖽙 𖼽𖽻 𖼈𖽳𖾐 𖼊𖽑𖽺 𖼦𖽑𖽳𖾐 𖼄𖽪𖾑， 𖼽𖽻 𖼈𖽳𖾐 𖼊𖽑𖽺 𖼞𖽑𖽜𖾑 𖼐𖽑𖽡𖾐 𖼖𖽙𖾐 𖼮𖽻𖾑 𖼊𖽴， 𖼦𖽑𖽻𖾐 𖼊𖽑𖽻𖾐 𖼽𖽻 𖼈𖽳𖾐 𖼐𖽑𖽡𖾐 𖼞𖽳𖾐 𖼺𖽡𖾐 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼺𖽦 𖼦𖽑𖽙𖾐， 𖼽𖽻 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼺𖽪𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨． 27 𖽃𖽔𖾐 𖼺𖽺𖾑， 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼀𖽑𖽨 𖼮𖽡𖾐 𖼂𖽦𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐， 𖼽𖽻 𖼈𖽳𖾐 𖼞𖽜 𖼠𖽻𖾐 𖼰𖽡𖽳𖾐 𖼷𖽶𖾐 𖼄𖽳𖾐． 𖼽𖽻 𖼈𖽳𖾐 𖼠𖽻𖾐 𖼰𖽡𖽳𖾐 𖼞𖽑𖽶𖾑 𖼮𖽶𖾐， 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑， 𖼐𖽑𖽡𖾐 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼊𖽻 𖼞𖽑𖽚， 𖼐𖽑𖽡𖾐 𖼀𖽻𖾐 𖼀𖽡𖾐 𖼞𖽳𖾐 𖼐𖽑𖽧𖾐 𖼮𖽡𖽻𖾐 𖼖𖽙𖾐 𖼮𖽑𖽻𖾐， 𖼽𖽻 𖼈𖽳𖾐 𖼊𖽑𖽺 𖼰𖽨𖾑 𖼺𖽪𖾐 𖼷𖽑𖽻𖾐 𖼊𖽑𖽡 𖼹𖽻𖾐 𖼞𖽪𖾐 𖼹𖽪𖾐 𖼺𖽺𖾑， 𖼽𖽻 𖼈𖽳𖾐 𖼊𖽑𖽺 𖼮𖽡𖾐 𖼂𖽦𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐．

28 𖼦𖽑𖽻𖾐 𖼊𖽑𖽻𖾐， 𖼽𖽻 𖼈𖽳𖾐 𖼺𖽙𖾑 𖼺𖽙𖾐 𖽂𖽙𖾐 𖼮𖽻𖾐 𖼠𖽙𖾑 𖼍𖽻𖾐， 𖼹𖽦𖾑 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼊𖽶𖾐 𖼄𖽡𖽻 𖼂𖽺𖾐 𖼺𖽺𖾑， 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼀𖽑𖽨 𖼮𖽡𖾐 𖼂𖽦𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐， 𖼮𖽡𖾐 𖼂𖽦𖾐 𖼞𖽜 𖼽𖽻 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸， 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼹𖽦𖾑 𖼊𖽡 𖼮𖽑𖽻 𖼀𖽑𖽚𖾐 𖼞𖽚 𖼖𖽻𖾐， 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐， 𖼞𖽑𖽶𖾑 𖼮𖽶𖾐 𖼐𖽑𖽡𖾐 𖼹𖽦𖾑 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼊𖽻 𖼞𖽑𖽚， 𖼐𖽑𖽡𖾐 𖼀𖽻𖾐 𖼀𖽡𖾐 𖼞𖽳𖾐 𖼐𖽑𖽧𖾐 𖼮𖽡𖽻𖾐 𖼖𖽙𖾐 𖼮𖽑𖽻𖾐 𖼺𖽺𖾑， 𖼊𖽑𖽡 𖼂𖽦𖾑 𖼠𖽙𖾑 𖼍𖽻𖾐 𖼊𖽑𖽡 𖼂𖽦𖾑 𖼽𖽻 𖼈𖽳𖾐 𖼊𖽑𖽺 𖼰𖽨𖾑 𖼞𖽜．

29 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼦𖽑𖽳𖾐 𖼄𖽪𖾑， 𖼽𖽻 𖼈𖽳𖾐 𖼞𖽜 𖼊𖽡 𖼮𖽑𖽻𖾐 𖼀𖽑𖽚𖾐 𖼐𖽑𖽡𖾐 𖼞𖽳𖾐 𖼳𖽪𖾐 𖼮𖽨𖾐 𖼊𖽑𖽺 𖼮𖽻𖾑 𖼊𖽴 𖼖𖽡𖾐 𖼀𖽦𖾐． 𖼦𖽑𖽻𖾐 𖼊𖽑𖽻𖾐， 𖼽𖽻 𖼈𖽳𖾐 𖼳𖽡𖽦 𖼈𖽳 𖼖𖽺𖾐 𖼦𖽜𖾐， 𖼐𖽑𖽡𖾐 𖼞𖽳𖾐 𖼷𖽑𖽦𖾐 𖼮𖽡𖽺𖾐 𖼊𖽑𖽺 𖼄𖽔 𖼊𖽻 𖼐𖽙𖾐， 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼐𖽑𖽡𖾐 𖼞𖽳𖾐 𖼄𖽪𖾑 𖼊𖽻 𖼊𖽑𖽺 𖼮𖽑𖽡𖽺 𖼂𖽚𖾐． 𖼷𖽑𖽻𖾐 𖼐𖽑𖽡𖾐 𖼞𖽳𖾐 𖼄𖽪𖾑 𖼊𖽻 𖼊𖽑𖽺 𖼳𖽪𖾐 𖼊𖽑𖽡𖾑 𖼣𖽻𖾐， 𖼷𖽑𖽜𖾑 𖼷𖽑𖽜𖾐 𖼻𖽳𖾐 𖼳𖽶𖾐 𖼈𖽪𖾑 𖼠𖽻𖾐 𖼐𖽺𖾐 𖼄𖽢 𖼹𖽳𖾐 𖽂𖽙𖾐 𖼊𖽻𖾐． 𖼦𖽑𖽻𖾐 𖼊𖽑𖽻𖾐， 𖼽𖽻 𖼈𖽳𖾐 𖽃𖽙𖾑 𖼍𖽡𖾐 𖼍𖽡𖾐 𖼰𖽻𖾐 𖼀𖽑𖽚𖾐 𖼞𖽚 𖼽𖽡𖾐， 𖼐𖽑𖽧𖾐 𖼠𖽴𖾐 𖼖𖽺𖾐 𖼈𖽳𖾑， 𖼐𖽑𖽡𖾐 𖼊𖽑𖽺 𖼮𖽻𖾑 𖼊𖽴 𖼄𖽔 𖼦𖽶𖾐． 30 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼦𖽑𖽺𖾑 𖼄𖽨𖾐 𖼞𖽑𖽚 𖼷𖽳𖾑 𖼦𖽑𖽙𖾐， 𖼐𖽑𖽡𖾐 𖼞𖽳𖾐 𖼳𖽨𖾐 𖼹𖽳𖾐 𖼞𖽑𖽻𖾑 𖼺𖽡 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼹𖽡𖾐 𖼺𖽺𖾑， 𖼽𖽻 𖼈𖽳𖾐 𖼊𖽑𖽺 𖼦𖽑𖽳𖾐 𖼄𖽪𖾑 𖼠𖽚， 𖼽𖽻 𖼈𖽳𖾐 𖼦𖽑𖽔𖾐 𖼖𖽺𖾑 𖼄𖽔 𖼊𖽻 𖼐𖽙𖾐， 𖽃𖽔𖾐 𖼺𖽺𖾑 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼀𖽑𖽨 𖼞𖽑𖽻𖾐 𖼂𖽻𖾑 𖼀𖽑𖽙 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐． 31 𖼦𖽑𖽻𖾐 𖼊𖽑𖽻𖾐， 𖼐𖽑𖽡𖾐 𖼀𖽻𖾐 𖼀𖽡𖾐 𖼞𖽳𖾐 𖼐𖽑𖽧𖾐 𖼮𖽡𖽻𖾐 𖼖𖽙𖾐 𖼮𖽑𖽻𖾐 𖼺𖽺𖾑， 𖼽𖽻 𖼈𖽳𖾐 𖼊𖽑𖽺 𖼄𖽔 𖼄𖽳 𖼮𖽡𖽦， 𖼽𖽻 𖼈𖽳𖾐 𖼊𖽑𖽺 𖼖𖽺𖾑 𖼄𖽔 𖼷𖽴𖾐 𖼦𖽑𖽙𖾐， 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼦𖽑𖽺𖾑 𖼮𖽡 𖼽𖽡𖾑 𖼮𖽻𖾐、 𖼐𖽑𖽧𖾐 𖼮𖽡𖽻𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐．

32 𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖽃𖽔𖾐! 𖼐𖽑𖽡𖾐 𖼦𖽑𖽺𖾑 𖼈𖽳 𖼷𖽑𖽚、 𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼠𖽸𖾑、 𖼮𖽡𖽮𖾐 𖼠𖽙𖾐 𖼳𖽙𖾐 𖼷𖽻、 𖼄𖽳𖾐 𖼷𖽑𖽦𖾐 𖼖𖽙𖾐 𖼮𖽑𖽻𖾐 𖼷𖽑𖽻𖾐 𖼊𖽑𖽺 𖼐𖽙𖾑 𖼣𖽜 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐． 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐， 𖼽𖽕𖾑 𖼳 𖽪𖾑 𖼠𖽚 𖼈𖽪𖾐 𖼍𖽦 𖼞𖽑𖽶𖾑 𖼹𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼮𖽑𖽻𖾐 𖼍𖽪𖾐， 𖼣𖽙𖾐 𖼈𖽳𖾐 𖼐𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖼈𖽪𖾐 𖼍𖽦、 𖼷𖽶 𖼄𖽻、 𖼍𖽡𖾐 𖼄𖽻、 𖼺𖽡𖾐 𖼻𖽙、 𖼣𖽙𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼐𖽺𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼠𖽻𖾐 𖼰𖽡𖽳𖾐， 𖼐𖽑𖽡𖾐 𖼄𖽡𖽻 𖼈𖽳 𖼄𖽔 𖼣𖽻𖾐 𖼐𖽺𖾐 𖼊𖽑𖽔 𖼰𖽕𖾐 𖼞𖽜． 33 𖼣𖽙𖾐 𖼈𖽳𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼷𖽶𖾐 𖼄𖽳𖾐 𖼊𖽑𖽻𖾐， 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼀𖽳𖾐 𖼈𖽡𖾐 𖼮𖽻𖾐 𖼺𖽪𖾐 𖼣𖽻𖾐， 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼣𖽜𖾐 𖼻𖽺𖾐 𖼊𖽙𖾐， 𖼣𖽙𖾐 𖼈𖽳𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽶𖾐 𖼮𖽑𖽪 𖼣𖽻𖾐． 34 𖼣𖽙𖾐 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼐𖽺𖾐 𖼈𖽪𖾑 𖼷𖽪𖾐， 𖼣𖽙𖾐 𖼈𖽳𖾐 𖼞𖽳𖾐 𖼍𖽡𖾐 𖼄𖽻 𖼐𖽺𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻， 𖼄𖽳𖾑 𖼄𖽳 𖼐𖽑𖽡𖾐 𖼞𖽳𖾐 𖼳𖽪𖾐 𖼮𖽨𖾐 𖼊𖽑𖽺 𖼄𖽔 𖼳𖽪𖾐， 𖼐𖽑𖽡𖾐 𖼞𖽳𖾐 𖼷𖽑𖽦𖾐 𖼮𖽡𖽺𖾐 𖼐𖽺𖾐 𖼐𖽑𖽡𖾐 𖼞𖽑𖽙𖾐 𖼽𖽻 𖼈𖽳𖾐 𖼊𖽑𖽺 𖼦𖽑𖽳𖾐 𖼄𖽪𖾑 𖼺𖽪𖾐， 𖼽𖽻 𖼈𖽳𖾐 𖼀𖽑𖽨 𖼐𖽑𖽧𖾐 𖼄𖽙𖾐 𖼊𖽑𖽺 𖼖𖽺𖾑 𖼄𖽔 𖼍𖽙𖾑． 35 𖼽𖽻 𖼈𖽳𖾐 𖼽𖽻 𖼄𖽳𖾑 𖼠𖽚 𖼠𖽻𖾐 𖼞𖽑𖽶𖾐 𖼮𖽻𖾐， 𖼐𖽑𖽡𖾐 𖼞𖽑𖽙𖾐 𖼖𖽪 𖼞𖽜 𖼺𖽪𖾐 𖼄𖽢 𖼈𖽳 𖼞𖽑𖽶𖾑 𖼷𖽶𖾐 𖽂𖽙𖾐， 𖼽𖽻 𖼈𖽳𖾐 𖼐𖽑𖽡𖾐 𖼀𖽑𖽨 𖼽𖽻 𖼈𖽳𖾐 𖽃𖽙𖾑 𖼄𖽺 𖼍𖽙𖾑 𖼺𖽪𖾐 𖼄𖽡𖾐 𖼹𖽳𖾐 𖼄𖽡𖾐 𖼷𖽑𖽪𖾐 𖼦𖽑𖽺𖾑 𖼊𖽑𖽺 𖽂𖽙𖾐 𖼮𖽻𖾐 𖼊𖽑𖽻𖾐， 𖼐𖽑𖽡𖾐 𖼊𖽑𖽺 𖼄𖽔 𖼠𖽙𖾐 𖼳𖽙𖾐， 𖼽𖽻 𖼈𖽳𖾐 𖼞𖽳𖾐 𖼊𖽶𖾐 𖼄𖽡𖽻 𖼊𖽑𖽺 𖼖𖽺𖾑 𖼄𖽔 𖼰𖽡𖾑 𖼦𖽑𖽙𖾐．

36 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑， 𖽃𖽔𖾑 𖼄𖽳𖾐 𖼣𖽙𖾐 𖼈𖽳𖾐 𖼐𖽑𖽡𖾐 𖼞𖽑𖽙𖾐 𖼖𖽪 𖼣𖽙𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼊𖽑𖽺 𖼞𖽜 𖼺𖽪𖾐， 𖼷𖽙𖾐 𖼹𖽳𖾐 𖼺𖽳 𖼹𖽳𖾐 𖼊𖽚𖾐 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐， 𖼣𖽙𖾐 𖼈𖽳𖾐 𖼀𖽑𖽚𖾐 𖼀𖽑𖽙 𖼀𖽑𖽚𖾐 𖼄𖽙𖾐 𖼀𖽑𖽢 𖼦𖽑𖽙𖾐 𖼦𖽑𖽻𖾐． 37 𖼦𖽑𖽺𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼊𖽚𖾐 𖼺𖽪𖾐 𖼖𖽚𖾑 𖼄𖽚 𖼈𖽺𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽳𖾐 𖼈𖽪𖾐 𖼍𖽦 𖼞𖽑𖽶𖾑 𖼹𖽻𖾐 𖼊𖽑𖽺 𖼞𖽜， 𖼽𖽻 𖼈𖽳𖾐 𖼞𖽑𖽶𖾑 𖼣𖽙𖾐 𖼈𖽳𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼖𖽙𖾐 𖼀𖽙𖾐 𖼺𖽺𖾑， 𖼐𖽑𖽡𖾐 𖼹𖽡𖾐 𖼂𖽻𖾐 𖼖𖽻𖾐 𖼣𖽙𖾐 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼺𖽪𖾐 𖼣𖽻𖾐． 𖼽𖽻 𖼈𖽳𖾐 𖼽𖽻 𖼄𖽳𖾑 𖼣𖽝 𖼖𖽙𖾐 𖼮𖽑𖽻𖾐， 𖼣𖽙𖾐 𖼈𖽳𖾐 𖼞𖽳𖾐 𖼞𖽶𖾐 𖼮𖽑𖽶 𖼐𖽺𖾐 𖼣𖽙𖾐 𖼈𖽳𖾐 𖼞𖽳𖾐 𖼮𖽡𖽺 𖼊𖽑𖽺 𖼮𖽑𖽡𖾐 𖼻𖽸， 𖼣𖽙𖾐 𖼈𖽳𖾐 𖼠𖽻𖾐 𖼰𖽡𖽳𖾐 𖼈𖽳 𖼄𖽙𖾐 𖼷𖽶𖾐 𖼄𖽳𖾐．”

38 𖼄𖽡𖽻 𖼦𖽑𖽺𖾑 𖼹𖽻𖾐 𖼖𖽙𖾐 𖼀𖽙𖾐 𖼺𖽺𖾑， 𖼣𖽙𖾐 𖼈𖽳𖾐 𖼠𖽕𖾐 𖼰𖽶𖾐 𖼊𖽑𖽡 𖼮𖽨𖾐 𖼄𖽳𖾐 𖼷𖽑𖽦𖾐， 𖼈𖽝 𖼺𖽪𖾑 𖼮𖽑𖽙𖾐 𖼊𖽑𖽺 𖼍𖽦𖾐． 𖼣𖽙𖾐 𖼈𖽳𖾐 𖼞𖽳𖾐 𖼈𖽪𖾑 𖼷𖽪𖾐、 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼍𖽡𖾐 𖼄𖽻， 𖼄𖽳𖾑 𖼄𖽳 𖼖𖽺𖾑 𖼺𖽪𖾑 𖼮𖽑𖽙𖾐 𖼊𖽑𖽺 𖼄𖽡𖾐 𖼈𖽝 𖼍𖽦𖾐 𖼦𖽑𖽙𖾐．