𖼍𖽕𖾑 𖼈𖽪𖽺𖾑 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼊𖽡 𖼮𖽑𖽻 (𖼍𖽦𖾑 𖼊𖽑𖽡 17：1-2)
7
1 𖼞𖽑𖽶𖾑 𖼮𖽶𖾐，𖼍𖽕𖾑 𖼈𖽪𖽺𖾑 𖼽𖽻 𖼞𖽳𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼮𖽻𖾐，𖼽𖽺𖾐 𖼦𖽴 𖼦𖽫 𖼽𖽻 𖼞𖽜 𖼮𖽻𖾐 𖼺𖽙𖾐 𖽂𖽙𖾐，𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽕 𖼰𖽡𖽺𖾐 𖼞𖽳𖾐 𖼮𖽡𖾐 𖼂𖽦𖾐 𖼖𖽻𖾐 𖼽𖽻 𖼊𖽑𖽺 𖼄𖽔 𖼠𖽻 𖼮𖽑𖽻． 2 𖼈𖽪𖾐 𖼍𖽦 𖼞𖽻𖾑𖽑 𖼺𖽡𖾐 𖼻𖽙 𖼐𖽕 𖼍𖽔𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼐𖽦𖾐！𖼣𖽙𖾐 𖼐𖽙𖾑 𖼍𖽕 𖼺𖽧𖾐 𖼻𖽜 𖼍𖽡𖾐 𖼺𖽪𖾐 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼈𖽶，𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽚 𖼀𖽑𖽚𖾐 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼍𖽺𖾑 𖽂𖽙𖾐 𖼍𖽙𖾑．”3 𖼐𖽕 𖼍𖽔𖾐 𖼀𖽦𖾐：“𖼐𖽑𖽡𖾐 𖼞𖽑𖽙𖾐 𖼣𖽝 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐 𖼮𖽑𖽳𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐．”
𖼐𖽕 𖼍𖽔𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼊𖽻 𖼂𖽪𖾑 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽑𖽧 (𖼍𖽦𖾑 𖼊𖽑𖽡 17：3-15)
4 𖼞𖽑𖽶𖾑 𖼊𖽑𖽡 𖼦𖽑𖽦 𖼄𖽺𖾐，𖼽𖽺𖾐 𖼦𖽴 𖼦𖽫 𖼐𖽕 𖼍𖽔𖾐 𖼊𖽑𖽺 𖼀𖽑𖽪𖾐 𖼄𖽪𖾑，𖼀𖽦𖾐：
5 “𖼐𖽑𖽡𖾐 𖼽𖽡𖾐 𖼣𖽙𖾐 𖼞𖽳𖾐 𖼮𖽜𖾐 𖼀𖽑𖽙 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐 𖼊𖽑𖽧，𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘𖼐𖽑𖽡𖾐 𖼦𖽑𖽺𖾐 𖼊𖽑𖽡 𖼊𖽡 𖼍𖽡𖾐 𖼣𖽙𖾐 𖼞𖽜 𖼮𖽻𖾐 𖼊𖽡 𖼮𖽑𖽻 𖼖𖽔𖾑？ 6 𖼣𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽦𖾐 𖼖𖽻𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐，𖼣𖽙𖾐 𖼦𖽑𖽺𖾐 𖼞𖽑𖽶𖾐 𖼈𖽶 𖼄𖽔 𖼠𖽚，𖼻𖽳𖾐 𖼻𖽳𖾐 𖼦𖽑𖽺𖾐 𖼠𖽴𖾐 𖼐𖽺𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼍𖽺𖾑 𖼮𖽻𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽑𖽶𖾑 𖼺𖽜． 7 𖼣𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼮𖽻𖾐 𖼠𖽚 𖼞𖽳𖾐 𖼄𖽡𖾐 𖼊𖽺𖾐，𖼣𖽙𖾐 𖼞𖽑𖽙 𖼊𖽑𖽻𖾐 𖼣𖽙𖾐 𖼞𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼠𖽕 𖼺𖽪𖾐 𖼮𖽑𖽪𖾐 𖼳𖽶 𖼈𖽪𖾑 𖼷𖽪𖾐 𖼖𖽙𖾐 𖼀𖽦𖾐 𖼠𖽚：‘ 𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼐𖽙𖾑 𖼍𖽕 𖼺𖽧𖾐 𖼻𖽜 𖼣𖽙𖾐 𖼖𖽙𖾐 𖼀𖽙𖾐 𖼦𖽑𖽺𖾐 𖼊𖽑𖽡 𖼊𖽡 𖼄𖽔 𖼍𖽡𖾐 𖼐𖽺𖾑？’
8 𖽃𖽔𖾑 𖼄𖽳𖾐 𖼐𖽑𖽡𖾐 𖼣𖽙𖾐 𖼞𖽳𖾐 𖼮𖽜𖾐 𖼀𖽑𖽙 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼖𖽡𖾐：‘ 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼮𖽡𖽺 𖼖𖽚𖾑 𖼊𖽺𖾐 𖼽𖽻𖾐 𖼖𖽚𖾑 𖼀𖽑𖽙 𖼠𖽻𖾐 𖼊𖽑𖽺 𖼮𖽑𖽻𖾐 𖼺𖽺𖾐 𖼊𖽑𖽧 𖼖𖽻𖾐，𖼐𖽑𖽡𖾐 𖼞𖽜 𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐． 9 𖼐𖽑𖽡𖾐 𖽃𖽔 𖼊𖽺𖾑 𖼠𖽻𖾐 𖼽𖽡𖾐 𖼣𖽻𖾐 𖼦𖽻，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼊𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐．𖼣𖽙𖾐 𖼐𖽑𖽡𖾐 𖼞𖽜 𖼊𖽺𖾐 𖼊𖽑𖽺 𖼄𖽡𖾐 𖼊𖽻 𖼈𖽳 𖼮𖽻𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼖𖽙𖾐 𖼺𖽶𖾑， 𖼄𖽡𖾐 𖼊𖽻 𖼈𖽳 𖼮𖽻𖾐 𖼊𖽻𖾐． 10 𖼣𖽙𖾐 𖼣𖽙𖾐 𖼞𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖼄𖽡𖾐 𖼊𖽺𖾐 𖼊𖽑𖽡 𖼄𖽦𖾐 𖼺𖽺𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽺 𖼹𖽳𖾐 𖼄𖽙𖾐 𖼞𖽪𖾐 𖼹𖽪𖾐，𖼽𖽻 𖼈𖽳𖾐 𖼞𖽜 𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐，𖼺𖽙𖾐 𖼞𖽜 𖼖𖽻𖾐 𖼠𖽻 𖼮𖽑𖽻 𖼄𖽔 𖼻𖽻𖾐，𖼷𖽑𖽻𖾐 𖼊𖽶𖾐 𖼖𖽺𖾑 𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼺𖽶𖾑 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼄𖽔 𖼠𖽸𖾑． 11 𖼣𖽙𖾐 𖼄𖽡𖽻 𖼮𖽳 𖼀𖽑𖽙 𖼞𖽜 𖼣𖽙𖾐 𖼞𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼠𖽕 𖼞𖽑𖽶𖾑 𖼮𖽶𖾐 𖼮𖽑𖽻𖾐 𖼍𖽪𖾐 𖼖𖽙𖾐 𖼺𖽶𖾑，𖼣𖽙𖾐 𖼐𖽑𖽡𖾐 𖼞𖽜 𖼺𖽙𖾑 𖼺𖽙𖾐 𖽂𖽙𖾐 𖼮𖽻𖾐 𖼊𖽻𖾐，𖼮𖽡𖾐 𖼂𖽦𖾐 𖼖𖽺𖾑 𖼐𖽑𖽡𖾐 𖼊𖽑𖽺 𖼄𖽔 𖼠𖽻 𖼮𖽑𖽻 𖼊𖽻𖾐．
𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽡 𖼈𖽴 𖼷𖽑𖽻𖾐 𖼊𖽑𖽺 𖼞𖽪𖾐 𖼹𖽪𖾐 𖼊𖽻𖾐． 12 𖼐𖽑𖽡𖾐 𖼞𖽑𖽚 𖼊𖽑𖽙 𖼮𖽻𖾐 𖼀𖽡𖾐，𖼊𖽺𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑，𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼖𖽙𖾐 𖼄𖽡𖽻𖾐 𖼽𖽡𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼞𖽪𖾐 𖼹𖽪𖾐 𖼐𖽑𖽡𖾐 𖼊𖽑𖽡𖾑 𖼮𖽪 𖼈𖽪𖾐 𖼍𖽦 𖼂𖽺𖾐，𖼣𖽙𖾐 𖼦𖽑𖽔𖾐 𖼖𖽺𖾑 𖼽𖽻 𖼞𖽳𖾐 𖼠𖽚 𖼞𖽜 𖼮𖽻𖾐 𖼻𖽺𖾐 𖼊𖽻𖾐． 13 𖼽𖽻 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼄𖽡𖾐 𖼖𖽙𖾐 𖼀𖽙𖾐 𖼦𖽑𖽺𖾐 𖼊𖽑𖽡 𖼊𖽡 𖼍𖽡𖾐 𖼊𖽻𖾐，𖼣𖽙𖾐 𖼽𖽻 𖼞𖽳𖾐 𖼠𖽚 𖼞𖽜 𖼮𖽻𖾐 𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼊𖽻𖾐． 14 𖼣𖽙𖾐 𖼽𖽻 𖼞𖽳𖾐 𖽃𖽔 𖼀𖽙 𖼂𖽺𖾐，𖼽𖽻 𖼣𖽙𖾐 𖼞𖽳𖾐 𖼻𖽙 𖼂𖽺𖾐 𖼊𖽻𖾐．𖼽𖽻 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼊𖽑𖽡𖾑 𖼣𖽻𖾐，𖼣𖽙𖾐 𖼊𖽺𖾐 𖼊𖽑𖽺 𖼷𖽑𖽻𖾐 𖼞𖽜 𖼍𖽚𖾐 𖼖𖽜 𖼐𖽺𖾐 𖼖𖽙 𖼮𖽝 𖼻𖽜 𖼽𖽻 𖼊𖽑𖽺 𖽂𖽙 𖼇𖽕 𖼳𖽶 𖼊𖽻𖾐． 15 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼊𖽑𖽺 𖼐𖽙𖾑 𖼣𖽜 𖼊𖽻𖾐，𖼺𖽻 𖼖𖽚 𖼊𖽑𖽺 𖼰𖽡𖾑 𖼦𖽑𖽙𖾐 𖼖𖽙𖾐 𖼺𖽶𖾑 𖼮𖽻𖾐 𖼄𖽔 𖼠𖽸𖾑． 16 𖼐𖽑𖽡𖾐 𖼊𖽑𖽡 𖼈𖽴 𖼷𖽑𖽻𖾐 𖼐𖽺𖾐 𖼐𖽑𖽡𖾐 𖼞𖽳𖾐 𖼠𖽚 𖼖𖽺𖾑 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼻𖽳𖾐 𖼹𖽦𖾐 𖼮𖽻𖾐 𖼻𖽺𖾐 𖼊𖽻𖾐，𖼐𖽑𖽡𖾐 𖼞𖽳𖾐 𖼠𖽚 𖼞𖽜 𖼖𖽺𖾑 𖼮𖽻𖾐 𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼊𖽻𖾐．’”
17 𖽃𖽔𖾐 𖼺𖽺𖾑，𖼐𖽕 𖼍𖽔𖾐 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼐𖽺𖾐 𖼀𖽑𖽪𖾐 𖼄𖽪𖾑 𖼖𖽙𖾐 𖼮𖽑𖽻𖾐，𖼄𖽳𖾑 𖼄𖽳 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼰𖽨𖾐 𖼦𖽑𖽙𖾐．
𖼍𖽕𖾑 𖼈𖽪𖽺𖾑 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡 𖼮𖽡𖽺 𖼐𖽺𖾐 𖼞𖽑𖽪𖾐 𖼮𖽑𖽳 (𖼍𖽦𖾑 𖼊𖽑𖽡 17：16-27)
18 𖼍𖽕𖾑 𖼈𖽪𖽺𖾑 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼊𖽡 𖼽𖽡𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼊𖽡𖾐 𖼺𖽺𖾑，𖼀𖽦𖾐：
“𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖽃𖽔𖾐！𖼣𖽙𖾐 𖽃𖽔 𖼊𖽺𖾑 𖼳𖽶 𖼰𖽕𖾐 𖼖𖽚？ 𖼣𖽻𖾑 𖼈𖽴 𖼷𖽑𖽻𖾐 𖼖𖽺𖾑 𖽃𖽔 𖼊𖽺𖾑 𖼳𖽶 𖼰𖽕𖾐 𖼖𖽚？ 𖽃𖽔𖾐 𖼺𖽺𖾑 𖼐𖽑𖽡𖾐 𖼦𖽑𖽺𖾑 𖼻𖽻𖾐 𖼣𖽙𖾐 𖼊𖽑𖽺 𖼦𖽳 𖼞𖽜． 19 𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖽃𖽔𖾐！𖼦𖽑𖽺𖾑 𖼐𖽑𖽡𖾐 𖼄𖽦𖾐 𖼊𖽪 𖼞𖽑𖽶𖾐 𖼄𖽡𖽻 𖼽𖽳𖾐 𖼣𖽻𖾐，𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼄𖽢 𖼖𖽪 𖼣𖽙𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼞𖽜 𖼊𖽻𖾐 𖼀𖽦𖾐．𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖽃𖽔𖾐！𖼦𖽑𖽺𖾑 𖼷𖽑𖽻𖾐 𖽂𖽙𖾐 𖼽𖽻 𖼺𖽪𖾐 𖼣𖽻𖾐 𖼖𖽔𖾑？
20 𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖽃𖽔𖾐！𖼐𖽑𖽡𖾐 𖼐𖽑𖽡𖾐 𖼮𖽜𖾐 𖼀𖽑𖽙 𖼊𖽑𖽺 𖼺𖽝𖾑，𖼍𖽕𖾑 𖼈𖽪𖽺𖾑 𖼹𖽦𖾑 𖽃𖽔 𖼊𖽺𖾑 𖼳𖽶 𖼊𖽻 𖼂𖽪𖾑 𖼀𖽦𖾐 𖼖𖽚𖾐 𖼂𖽚𖾐 𖼮𖽻𖾐 𖼺𖽺 𖼐𖽺𖾑？ 21 𖼐𖽑𖽡𖾐 𖼮𖽜𖾐 𖼀𖽑𖽙 𖼞𖽜 𖼺𖽝𖾑 𖼄𖽶𖾑，𖼐𖽑𖽡𖾐 𖼞𖽑𖽙𖾐 𖼞𖽜 𖼮𖽙𖾐 𖼐𖽺𖾐 𖼣𖽝 𖼮𖽑𖽡𖽺 𖼖𖽙𖾐 𖼮𖽑𖽻𖾐 𖼺𖽺𖾑，𖼄𖽡𖽻 𖼈𖽳 𖼦𖽑𖽺𖾑 𖼂𖽺𖾐 𖼺𖽪𖾐 𖼣𖽻𖾐．
22 𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖽃𖽔𖾐！𖼐𖽑𖽡𖾐 𖼈𖽳 𖼷𖽑𖽚 𖼺𖽪𖾐 𖼣𖽻𖾐，𖼣𖽙𖾐 𖼈𖽳𖾐 𖼊𖽻 𖼮𖽨，𖼐𖽑𖽡𖾐 𖼖𖽙𖾐 𖼄𖽳𖾐 𖼊𖽙𖾐 𖼺𖽪𖾐 𖼄𖽔 𖼮𖽻𖾐，𖼐𖽑𖽡𖾐 𖼍𖽺𖾑 𖼺𖽡𖾐 𖼠𖽕𖾐 𖼰𖽶𖾐 𖼣𖽻𖾐，𖼠𖽳𖾐 𖼖𖽪𖾐 𖼺𖽡𖾐 𖼄𖽔 𖼮𖽻𖾐． 23 𖼊𖽺𖾐 𖼊𖽑𖽺 𖽃𖽔 𖼊𖽺𖾑 𖼳𖽶 𖼀𖽑𖽙 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼖𖽙𖾐 𖼺𖽶𖾑 𖼐𖽺𖾑？ 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼊𖽑𖽙 𖼽𖽻 𖼈𖽳𖾐 𖼊𖽑𖽺 𖼰𖽨𖾑 𖼞𖽑𖽚 𖼖𖽻𖾐，𖼽𖽻 𖼈𖽳𖾐 𖼞𖽜 𖼽𖽻 𖼞𖽳𖾐 𖼷𖽑𖽻𖾐 𖼀𖽺 𖼂𖽺𖾐，𖽂𖽙 𖼺𖽙𖾐 𖼂𖽙𖾐 𖼹𖽦𖾑 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼄𖽡𖾐 𖼊𖽻 𖼂𖽺𖾐 𖼍𖽙𖾑．𖼽𖽻 𖼈𖽳𖾐 𖼖𖽙𖾐 𖼀𖽙𖾐 𖼄𖽡𖽻 𖼈𖽳 𖼂𖽺𖾐 𖼦𖽑𖽙𖾐．𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼞𖽳𖾐 𖼞𖽜 𖼮𖽙𖾐 𖼄𖽡𖾐 𖼊𖽺𖾐 𖼖𖽙𖾐 𖼀𖽙𖾐 𖼞𖽑𖽙 𖼣𖽝 𖼄𖽡𖽻 𖼂𖽺𖾐，𖼐𖽑𖽡𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐 𖼺𖽪𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐，𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼺𖽡𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼦𖽑𖽙𖾐． 24 𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼞𖽪𖾐 𖼹𖽪𖾐 𖼺𖽺𖾑，𖼽𖽻 𖼈𖽳𖾐 𖼞𖽜 𖼻𖽳𖾐 𖼻𖽳𖾐 𖼹𖽦𖾐 𖼹𖽦𖾐 𖼐𖽑𖽡𖾐 𖼞𖽳𖾐 𖼷𖽑𖽻𖾐 𖼀𖽺 𖼂𖽺𖾐．𖼽𖽺𖾐 𖼦𖽴 𖼦𖽫 𖽃𖽔𖾐！𖼐𖽑𖽡𖾐 𖼖𖽺𖾑 𖼽𖽻 𖼈𖽳𖾐 𖼞𖽳𖾐 𖼺𖽡𖾐 𖼂𖽺𖾐 𖼍𖽳𖾐 𖼦𖽑𖽻𖾐．
25 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖽃𖽔𖾐！𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼐𖽑𖽡𖾐 𖼐𖽑𖽡𖾐 𖼮𖽜𖾐 𖼀𖽑𖽙 𖼐𖽺𖾐 𖼽𖽻 𖽃𖽔𖾑 𖼞𖽑𖽶𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼺𖽪𖾐 𖼞𖽑𖽶𖾑 𖼊𖽑𖽺 𖼻𖽳𖾐 𖼻𖽳𖾐 𖼹𖽦𖾐 𖼹𖽦𖾐 𖼳𖽪𖾐 𖼞𖽜 𖼖𖽡𖾐，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼀𖽦𖾐 𖼖𖽙𖾐 𖼮𖽑𖽻𖾐 𖼂𖽺𖾐 𖼞𖽜 𖼖𖽡𖾐． 26 𖼦𖽑𖽺𖾑 𖼻𖽻𖾐，𖼐𖽑𖽡𖾐 𖼄𖽡𖾐 𖼊𖽻 𖼦𖽑𖽺𖾑 𖼻𖽳𖾐 𖼹𖽦𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼈𖽳 𖼺𖽪𖾐 𖼰𖽕𖾐 𖼊𖽻𖾐，𖼷𖽑𖽻𖾐 𖼹𖽦𖾑 𖼀𖽦𖾐：‘𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐．’ 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼍𖽕𖾑 𖼈𖽪𖽺𖾑 𖼈𖽴 𖼞𖽜 𖼖𖽺𖾑 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖽂𖽙𖾐 𖼮𖽻𖾐 𖼻𖽺𖾐 𖼊𖽻𖾐．
27 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖽃𖽔𖾐！𖼐𖽑𖽡𖾐 𖽃𖽙𖾑 𖼄𖽺 𖼊𖽑𖽙 𖼐𖽑𖽡𖾐 𖼮𖽜𖾐 𖼀𖽑𖽙 𖼊𖽑𖽺 𖼀𖽑𖽪𖾐 𖼄𖽪𖾑 𖼺𖽺𖾑，𖼀𖽦𖾐：‘𖼣𖽙𖾐 𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼊𖽑𖽺 𖼞𖽪𖾐 𖼹𖽪𖾐．’ 𖽃𖽔𖾐 𖼺𖽺𖾑，𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽙𖾐 𖼖𖽻𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽺𖾑 𖼻𖽻𖾐 𖼮𖽑𖽡 𖼮𖽡𖽺𖾐 𖼂𖽡𖾑． 28 𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖽃𖽔𖾐！𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼐𖽑𖽡𖾐 𖼞𖽳𖾐 𖼊𖽻 𖼂𖽪𖾑 𖼞𖽑𖽶𖾑 𖼠𖽕𖾐 𖼰𖽶𖾐 𖼊𖽻 𖼮𖽶𖾐 𖼊𖽙𖾐 𖼳𖽶 𖼣𖽻𖾐．𖼐𖽑𖽡𖾐 𖼄𖽢 𖼹𖽳𖾐 𖼦𖽑𖽺𖾑 𖼖𖽪 𖼐𖽑𖽡𖾐 𖼮𖽜𖾐 𖼀𖽑𖽙 𖼊𖽑𖽺 𖼞𖽜 𖼮𖽙𖾐 𖼳𖽶 𖼣𖽻𖾐． 29 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼐𖽑𖽧𖾐 𖼺𖽳 𖼄𖽢 𖼀𖽜𖾐 𖼦𖽑𖽺𖾑 𖼖𖽪 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼈𖽴 𖼊𖽑𖽺 𖼄𖽻𖾑 𖼞𖽜，𖼽𖽻 𖼞𖽜 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼻𖽳𖾐 𖼻𖽳𖾐 𖽂𖽙𖾐 𖼮𖽻𖾐 𖼊𖽙𖾐．𖼺𖽡 𖼀𖽑𖽙 𖼽𖽺𖾐 𖼦𖽴 𖼦𖽫 𖽃𖽔𖾐！𖼦𖽑𖽺𖾑 𖼐𖽑𖽡𖾐 𖼞𖽑𖽙𖾐 𖼞𖽜 𖼮𖽙𖾐 𖼺𖽪𖾐 𖼣𖽻𖾐，𖽃𖽔𖾐 𖼺𖽺𖾑 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼈𖽴 𖼞𖽜 𖼻𖽳𖾐 𖼻𖽳𖾐 𖼹𖽦𖾐 𖼹𖽦𖾐 𖼐𖽑𖽡𖾐 𖽃𖽙𖾑 𖼄𖽺 𖼮𖽑𖽡𖽺 𖼄𖽢 𖼀𖽜𖾐 𖽂𖽙𖾐．”