𖼽𖽔 𖼠𖽴𖾑 𖼀𖽑𖽚𖾐 𖼂𖽚 𖼊𖽑𖽴𖾑 𖼖𖽡𖾑 𖼄𖽡𖾐 𖼊𖽺𖾐 𖼞𖽚 𖼮𖽑𖽡𖾐
35
1 𖽂𖽙 𖼺𖽙𖾐 𖼂𖽙𖾐 𖼽𖽔 𖼠𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐，𖼞𖽑𖽶𖾑 𖼠𖽻𖾐 𖼮𖽻𖾐 𖼖𖽡𖾐．𖼐𖽑𖽡𖾐 𖼐𖽑𖽡𖽻𖾐 𖼍𖽕𖾑 𖼊𖽑𖽺 𖼮𖽡𖽪 𖼀𖽑𖽻𖾐 𖼞𖽑𖽶𖾑 𖼮𖽶𖾐，𖼞𖽑𖽶𖾑 𖼠𖽻𖾐 𖼊𖽚𖾐 𖼊𖽑𖽧 𖼖𖽻𖾐 𖼐𖽑𖽡𖾐 𖼞𖽜 𖼄𖽡𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽑𖽶𖾑 𖼣𖽙𖾐 𖼣𖽻𖾐．𖽃𖽔𖾐 𖼺𖽺𖾑，𖼐𖽑𖽡𖾐 𖼞𖽑𖽶𖾑 𖼠𖽻𖾐 𖼣𖽙𖾐 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐 𖼖𖽡𖾐．”2 𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖼽𖽻 𖽃𖽔𖾑 𖼞𖽑𖽶𖾐 𖼷𖽑𖽻𖾐 𖼐𖽺𖾐 𖼞𖽑𖽙𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼊𖽑𖽺 𖼷𖽴𖾐 𖼦𖽑𖽙𖾐，𖼞𖽶𖾐 𖼮𖽑𖽶 𖼷𖽑𖽡，𖼀𖽑𖽡𖽻𖾐 𖼖𖽳𖾑 𖼈𖽦 𖼖𖽡𖾐． 3 𖽃𖽔 𖼐𖽺𖾑 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼊𖽦𖾐 𖼽𖽡𖾐，𖼣𖽙𖾐 𖼞𖽑𖽶𖾑 𖼠𖽻𖾐 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐 𖼊𖽻𖾐，𖼽𖽻 𖼦𖽑𖽺𖾑 𖼣𖽙𖾐 𖼠𖽻𖾐 𖼰𖽡𖽳𖾐 𖼷𖽶𖾐 𖼄𖽳𖾐 𖼞𖽑𖽶𖾑 𖼮𖽶𖾐，𖼣𖽙𖾐 𖼮𖽑𖽡 𖼮𖽡𖽺𖾐 𖼊𖽑𖽺 𖼊𖽻 𖼞𖽑𖽚，𖼣𖽙𖾐 𖼞𖽑𖽙𖾐 𖼺𖽜 𖼺𖽪𖾐 𖼮𖽨𖾐 𖼄𖽙𖾐 𖼊𖽑𖽺 𖼣𖽙𖾐 𖼊𖽑𖽺 𖼐𖽦𖾐 𖼳𖽪𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼣𖽻𖾐．”
4 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽳𖾐 𖼺𖽡𖾐 𖼮𖽑𖽡𖽻𖾐 𖼐𖽺𖾐 𖼞𖽑𖽙𖾐 𖼊𖽴 𖼺𖽪𖾐 𖼐𖽙𖾑 𖼮𖽡𖽪𖾐 𖼈𖽺𖾐 𖼽𖽔 𖼠𖽴𖾑 𖼞𖽜．𖼽𖽔 𖼠𖽴𖾑 𖼄𖽡𖽻 𖼐𖽑𖽡 𖼦𖽑𖽺𖾑 𖼹𖽻𖾐 𖼀𖽑𖽨 𖼺𖽺𖾑，𖼳𖽶𖾑 𖼰𖽡𖽦𖾑 𖼄𖽡𖾐 𖼊𖽺𖾐 𖼺𖽧𖾐 𖼷𖽡𖾐 𖼈𖽳 𖽂𖽚 𖼞𖽑𖽶𖾐 𖼦𖽸𖾐． 5 𖼽𖽻 𖼈𖽳𖾐 𖼍𖽪𖾐 𖼖𖽻𖾐 𖼺𖽜 𖼽𖽡𖾐，𖽂𖽙 𖼺𖽙𖾐 𖼂𖽙𖾐 𖼞𖽑𖽶𖾑 𖼞𖽕 𖼰𖽡𖽺𖾐 𖼖𖽪𖾐 𖼞𖽳𖾐 𖼷𖽑𖽻𖾐 𖼞𖽜 𖼮𖽡𖽮𖾐 𖼷𖽑𖽚 𖼺𖽺𖾑，𖼽𖽔 𖼠𖽴𖾑 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼄𖽔 𖼞𖽕 𖼽𖽡𖾐．
6 𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼖𖽪𖾑 𖼺𖽶𖾐 𖼖𖽪𖾐 𖼞𖽳𖾐 𖼮𖽑𖽡𖾐，𖼖𖽪𖾑 𖼺𖽶𖾐 𖼦𖽑𖽺𖾑 𖼂𖽚 𖼊𖽑𖽴𖾑 𖼖𖽡𖾑 𖼣𖽻𖾐． 7 𖼽𖽻 𖼞𖽑𖽶𖾑 𖼠𖽻𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐 𖼺𖽺𖾑，𖼞𖽑𖽶𖾑 𖼄𖽡𖾐 𖼊𖽺𖾐 𖼽𖽡𖾐 𖼖𖽴𖾑 𖼂𖽚 𖼊𖽑𖽴𖾑 𖼖𖽡𖾑 𖼄𖽡𖾐．𖼞𖽪𖾐 𖼮𖽡𖽺𖾐，𖼽𖽻 𖼽𖽻 𖼍𖽕𖾑 𖼊𖽑𖽺 𖼮𖽡𖽪 𖼀𖽑𖽻𖾐 𖼞𖽑𖽶𖾑 𖼮𖽶𖾐，𖽂𖽙 𖼺𖽙𖾐 𖼂𖽙𖾐 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼊𖽚𖾐 𖼊𖽑𖽧 𖼖𖽻𖾐 𖼽𖽻 𖼞𖽜 𖼄𖽡𖽻𖾐． 8 𖼖𖽡𖾑 𖼂𖽦 𖼰𖽡𖽔𖾐 𖼞𖽳𖾐 𖼍𖽕 𖼄𖽙𖾐 𖼍𖽡 𖼂𖽙𖾐 𖼖𖽔𖾐 𖼳𖽶𖾐 𖼦𖽑𖽙𖾐，𖼀𖽑𖽨 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼍𖽕𖾑 𖽂𖽚 𖼞𖽳𖾐 𖼺𖽧𖾐 𖼷𖽡𖾐 𖼈𖽳 𖼞𖽑𖽶𖾐 𖼍𖽡𖾑．𖽃𖽔𖾐 𖼺𖽺𖾑，𖼺𖽧𖾐 𖼞𖽑𖽶𖾑 𖼷𖽡𖾐 𖼊𖽑𖽺 𖼽𖽕𖾑 𖼖𖽪𖽦 𖼂𖽔𖾐 𖼠𖽪 \fr 𖼄𖽡𖾐．
9 𖼽𖽔 𖼠𖽴𖾑 𖼂𖽔𖾐 𖼍𖽕𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼮𖽑𖽻𖾐 𖼞𖽚 𖼖𖽻𖾐 𖼠𖽙𖾑 𖼍𖽻𖾐，𖽂𖽙 𖼺𖽙𖾐 𖼂𖽙𖾐 𖼹𖽦𖾑 𖼊𖽚𖾐 𖼊𖽑𖽧 𖼖𖽻𖾐 𖼽𖽻 𖼞𖽜 𖼄𖽡𖽻𖾐，𖼄𖽢 𖼖𖽪 𖼽𖽻 𖼄𖽻𖾑． 10 𖽂𖽙 𖼺𖽙𖾐 𖼂𖽙𖾐 𖼽𖽻 𖼖𖽙𖾐 𖼀𖽦𖾐：“𖽃𖽙𖾑 𖼄𖽺 𖼊𖽑𖽙 𖼐𖽑𖽡𖾐 𖼊𖽑𖽺 𖼽𖽔 𖼠𖽴𖾑 𖼄𖽡𖾐．𖼦𖽑𖽻𖾐 𖼊𖽑𖽻𖾐，𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐 𖼐𖽑𖽡𖾐 𖼊𖽑𖽺 𖼽𖽔 𖼠𖽴𖾑 𖼄𖽔 𖼄𖽡𖾐 𖼊𖽻𖾐，𖼐𖽑𖽡𖾐 𖼊𖽑𖽺 𖼽𖽡 𖼺𖽴𖾑 𖼖𖽡𖽦𖾑 𖼄𖽡𖾐 𖼖𖽡𖾐．” 𖽃𖽔𖾐 𖼺𖽺𖾑，𖽂𖽙 𖼺𖽙𖾐 𖼂𖽙𖾐 𖼽𖽻 𖼊𖽑𖽺 𖼄𖽡𖾐 𖼂𖽚𖾐．
11 𖽂𖽙 𖼺𖽙𖾐 𖼂𖽙𖾐 𖼦𖽑𖽔𖾐 𖼖𖽺𖾑 𖼽𖽻 𖼖𖽙𖾐 𖼀𖽦𖾐：“𖼣𖽙𖾐 𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼠𖽸𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼐𖽑𖽡𖾐 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑 𖼄𖽨 𖼄𖽨 𖼀𖽑𖽙 𖼍𖽪𖾐 𖼖𖽻𖾐 𖼖𖽡𖾐，𖽃𖽔𖾑 𖼞𖽶𖾐 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼠𖽚 𖼈𖽳 𖼊𖽑𖽡 𖼊𖽝𖾐 𖼐𖽺𖾐 𖼠𖽚 𖼞𖽑𖽙 𖼄𖽙𖾐 𖼊𖽝𖾐 𖼖𖽺𖾑 𖼊𖽴𖾐 𖼍𖽙𖾑，𖼈𖽪𖾐 𖼍𖽦 𖼞𖽑𖽙 𖼄𖽙𖾐 𖼊𖽚𖾐 𖼊𖽻𖾐． 12 𖼣𖽙𖾐 𖼖𖽪 𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼽𖽡 𖼺𖽔 𖼊𖽑𖽺 𖼞𖽜 𖼺𖽪𖾐 𖼄𖽡𖾑 𖼐𖽦𖾐，𖼣𖽙𖾐 𖼖𖽪 𖼐𖽑𖽡𖾐 𖼊𖽑𖽺 𖼞𖽜，𖼦𖽑𖽔𖾐 𖼖𖽺𖾑 𖼖𖽪 𖼐𖽑𖽡𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦 𖼊𖽑𖽺 𖼞𖽜 𖼊𖽻𖾐．” 13 𖽂𖽙 𖼺𖽙𖾐 𖼂𖽙𖾐 𖼽𖽔 𖼠𖽴𖾑 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼦𖽑𖽻𖾐 𖼺𖽺𖾑，𖼞𖽑𖽶𖾑 𖼠𖽻𖾐 𖼞𖽳𖾐 𖼮𖽑𖽻𖾐 𖼄𖽶 𖼠𖽻𖾐 𖼊𖽦𖾐 𖼽𖽡𖾐 𖼦𖽑𖽙𖾐．
14 𖽃𖽔𖾐 𖼺𖽺𖾑，𖼽𖽔 𖼠𖽴𖾑 𖽂𖽙 𖼺𖽙𖾐 𖼂𖽙𖾐 𖼽𖽻 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽳𖾐 𖼞𖽑𖽶𖾑 𖼠𖽻𖾐，𖼖𖽚𖾐 𖼻𖽶𖾐 𖼊𖽑𖽡 𖼮𖽑𖽡𖾐 𖼰𖽻 𖼞𖽑𖽻𖾑 𖼍𖽳𖾐 𖼺𖽙 𖼂𖽺𖾐，𖼮𖽶𖾐 𖼀𖽳 𖼐𖽺𖾐 𖽃𖽔 𖼮𖽑𖽙 𖼵𖽶𖾐 𖼈𖽡𖾐 𖼐𖽑𖽡𖾑 𖼖𖽚𖾐 𖼻𖽶𖾐 𖼊𖽑𖽺 𖼦𖽜． 15 𖼽𖽔 𖼠𖽴𖾑 𖼞𖽑𖽶𖾑 𖼄𖽡𖾐 𖼊𖽺𖾐 𖼊𖽑𖽺 𖼂𖽚 𖼊𖽑𖽴𖾑 𖼖𖽡𖾑 𖼄𖽡𖾐．
𖼖𖽔𖾐 𖼰𖽡𖽦 𖼈𖽦𖾐 𖼊𖽴 𖼳𖽶𖾐 𖼦𖽑𖽙𖾐
16 𖼽𖽻 𖼈𖽳𖾐 𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼞𖽳𖾐 𖼮𖽑𖽻𖾐 𖼺𖽜 𖼍𖽪𖾐，𖼽𖽡 𖼇𖽕 𖼊𖽑𖽔𖾐 𖼄𖽡𖾐 𖼊𖽺𖾐 𖼄𖽔 𖼮𖽑𖽡𖾐 𖼺𖽺 𖼞𖽑𖽶𖾑 𖼮𖽶𖾐，𖼖𖽔𖾐 𖼰𖽡𖽦 𖼳𖽨𖾐 𖼄𖽪𖾐 𖼰𖽶𖾐 𖼮𖽑𖽡𖾐 𖼖𖽻𖾐．𖼦𖽑𖽻𖾐 𖼊𖽑𖽻𖾐，𖼽𖽻 𖼻𖽙 𖼽𖽚𖾐 𖼦𖽑𖽔𖾐 𖼮𖽶𖾐 𖼠𖽻𖾐 𖼰𖽡𖽳𖾐． 17 𖼖𖽔𖾐 𖼰𖽡𖽦 𖼻𖽙 𖼽𖽚𖾐 𖼦𖽑𖽔𖾐 𖼮𖽶𖾐 𖼠𖽻𖾐 𖼰𖽡𖽳𖾐 𖼞𖽑𖽶𖾑 𖼮𖽶𖾐，𖽃𖽔𖾐 𖼞𖽶𖾑 𖼠𖽺𖾑 𖼺𖽪𖾐 𖼻𖽙 𖼄𖽳 𖼽𖽻 𖼖𖽙𖾐 𖼀𖽦𖾐：“𖼮𖽡𖽮𖾐 𖼄𖽔 𖼻𖽻𖾐！ 𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼻𖽙 𖼊𖽑𖽡 𖼽𖽚𖾐 𖼠𖽺𖾑 𖽂𖽙𖾐．” 18 𖼖𖽔𖾐 𖼰𖽡𖽦 𖼳𖽶𖾐 𖼖𖽻𖾐 𖼮𖽻𖾐，𖼽𖽻 𖼳𖽶𖾐 𖼺𖽦 𖼷𖽑𖽦𖾐 𖼊𖽻𖾐 𖼞𖽑𖽶𖾑 𖼮𖽶𖾐，𖽃𖽔𖾐 𖼞𖽶𖾑 𖼊𖽑𖽺 𖼂𖽡𖽦𖾑 𖽃𖽴 𖼐𖽑𖽧 \fr 𖼄𖽡𖾐．𖼦𖽑𖽻𖾐 𖼊𖽑𖽻𖾐，𖼽𖽔 𖼠𖽴𖾑 𖽃𖽔𖾐 𖼞𖽶𖾑 𖼊𖽑𖽺 𖼂𖽡𖽦𖾑 𖼽𖽔 𖼄𖽡𖽺 \fr 𖽃𖽶𖾐． 19 𖼖𖽔𖾐 𖼰𖽡𖽦 𖼳𖽶𖾐 𖼦𖽑𖽙𖾐，𖼀𖽑𖽨 𖼽𖽡 𖼇𖽕 𖼊𖽑𖽔𖾐 𖼄𖽡𖾐 𖼊𖽺𖾐 𖼽𖽡𖾐 𖼞𖽳𖾐 𖼮𖽨𖾐 𖼄𖽙𖾐 𖼦𖽜 𖼍𖽡𖾑．𖼽𖽡 𖼇𖽕 𖼊𖽑𖽔𖾐 𖼦𖽑𖽺𖾑 𖼂𖽚 𖼖𖽡𖾑 𖼦𖽴 𖼣𖽻𖾐． 20 𖼽𖽔 𖼠𖽴𖾑 𖼽𖽻 𖼖𖽙𖾐 𖼀𖽙𖾐 𖼖𖽧 𖼀𖽳𖾐 𖼊𖽑𖽺 𖼖𖽚𖾐 𖼻𖽶𖾐 𖼊𖽑𖽡 𖼮𖽑𖽡𖾐 𖼍𖽳𖾐 𖼍𖽙𖾑，𖼖𖽔𖾐 𖼰𖽡𖽦 𖼞𖽳𖾐 𖼖𖽧 𖼀𖽳𖾐 𖼖𖽚𖾐 𖼻𖽶𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼖𖽺𖾑 𖼮𖽻𖾐 𖼍𖽳𖾐 𖼺𖽺．
𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼻𖽙
21 𖼽𖽡 𖼺𖽴𖾑 𖼖𖽡𖽦𖾑 𖼹𖽦𖾑 𖼮𖽑𖽶𖾑 𖼺𖽜 𖽃𖽙𖾑 𖼄𖽺 𖼽𖽡𖾐 𖼺𖽺𖾑，𖼽𖽡 𖼍𖽴 𖼊𖽑𖽦 𖼄𖽡𖾐 𖼊𖽺𖾐 𖼞𖽳𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶． 22 𖼽𖽡 𖼺𖽴𖾑 𖼖𖽡𖽦𖾑 𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼖𖽡𖽚 𖼂𖽡𖽦𖾑 𖼽𖽡𖾐 𖼽𖽻 𖼀𖽙 𖼞𖽳𖾐 𖼄𖽳 𖼖𖽳𖾐 𖼀𖽑𖽡𖾑 𖼖𖽔𖾐 𖼖𖽙𖾐 𖼮𖽑𖽻𖾐 𖼽𖽦，𖼄𖽡𖽻 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼖𖽺𖾑 𖼊𖽻 𖼮𖽨 𖼦𖽑𖽻𖾐．
23 𖼽𖽔 𖼠𖽴𖾑 𖼻𖽙 𖼷𖽑𖽡𖾐 𖼐𖽑𖽡 𖼦𖽑𖽳𖾐 𖼐𖽑𖽳𖾐 𖼮𖽻𖾐． 𖼖𖽡𖾑 𖼽𖽕𖾑 𖼽𖽚𖾐 𖼺𖽪𖾐：𖼽𖽔 𖼠𖽴𖾑 𖼞𖽳𖾐 𖼻𖽙 𖼈𖽳 𖼖𖽡𖽚 𖼂𖽡𖽦𖾑 𖼣𖽻𖾐，𖼽𖽻 𖼹𖽦𖾑 𖼳𖽡𖾐 𖼄𖽡𖽺、 𖼖𖽡𖾑 𖼈𖽪𖽺𖾑、 𖼽𖽚 𖼍𖽕𖾑、 𖼽𖽡 𖼺𖽕𖾑 𖼰𖽡𖽔𖾐 𖼐𖽺𖾐 𖼳𖽡𖾐 𖼂𖽪𖾑 𖼖𖽪𖽦 𖼊𖽑𖽺 𖼽𖽚𖾐．
24 𖼖𖽔𖾐 𖼰𖽡𖽦 𖼽𖽚𖾐 𖼺𖽪𖾐：𖼽𖽱𖾐 𖼺𖽴𖾑 𖼐𖽺𖾐 𖼂𖽡𖽦𖾑 𖼽𖽔 𖼄𖽡𖽺 𖼣𖽻𖾐．
25 𖼖𖽔𖾐 𖼰𖽡𖽦 𖼞𖽳𖾐 𖼮𖽜𖾐 𖼄𖽙𖾐 𖼀𖽑𖽡𖾑 𖼖𖽔𖾐 𖼽𖽚𖾐 𖼺𖽪𖾐：𖼍𖽗𖾑 𖼐𖽺𖾐 𖼐𖽕 𖼇𖽮 𖼊𖽑𖽔𖾐 𖼖𖽡𖾑 𖼣𖽻𖾐．
26 𖼖𖽡𖾑 𖼽𖽕𖾑 𖼞𖽳𖾐 𖼮𖽜𖾐 𖼄𖽙𖾐 𖼳𖽧 𖼀𖽑𖽕𖾑 𖼽𖽚𖾐 𖼺𖽪𖾐：𖼰𖽡𖽔𖾐 𖼍𖽴 𖼐𖽺𖾐 𖼽𖽕𖾑 𖼳𖽴𖾑 𖼣𖽻𖾐．
𖼻𖽙 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼖𖽺𖾑 𖼽𖽔 𖼠𖽴𖾑 𖼂𖽔𖾐 𖼍𖽗𖾑 𖼽𖽕𖾑 𖼖𖽕 𖼄𖽡𖾐 𖼊𖽺𖾐 𖼮𖽻𖾐 𖼞𖽑𖽶𖾑 𖼮𖽶𖾐 𖼽𖽚𖾐 𖼺𖽪𖾐 𖼣𖽻𖾐．
27 𖼽𖽔 𖼠𖽴𖾑 𖼖𖽻𖾐 𖼰𖽡𖾐 𖼖𖽡𖽦𖾑 𖼽𖽕𖾑 𖼂𖽔𖾐 𖼄𖽡𖾐 𖼊𖽺𖾐 𖼄𖽕𖾑 𖼖𖽡𖾑 𖼄𖽡𖾑 𖼐𖽦𖾐 𖼞𖽳𖾐 𖼮𖽑𖽡𖾐，𖼽𖽻 𖼀𖽙 𖼽𖽡 𖼺𖽔 𖼞𖽑𖽶𖾑 𖼠𖽻𖾐 𖼮𖽻𖾐．𖼰𖽡𖾐 𖼖𖽡𖽦𖾑 𖼽𖽕𖾑 𖼂𖽔𖾐 𖼦𖽑𖽺𖾑 𖼳𖽡𖾐 𖼂𖽚 𖼖𖽪𖽦 𖼣𖽻𖾐，𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼽𖽡 𖼺𖽔 𖼞𖽑𖽶𖾑 𖼄𖽡𖾐 𖼊𖽺𖾐 𖼣𖽙𖾑 𖼮𖽻𖾐 𖼠𖽚．
𖼽𖽡 𖼺𖽔 𖼳𖽶𖾐 𖼦𖽑𖽙𖾐