𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼊𖽻 𖼈𖽪𖾐 𖼮𖽑𖽻𖾐 𖼖𖽻𖾐 𖼞𖽳𖾐 𖼞𖽪𖾐 𖼮𖽡𖽺𖾐
11
1 𖼞𖽑𖽶𖾑 𖼮𖽶𖾐，𖼊𖽺𖾐 𖼊𖽑𖽺 𖼷𖽑𖽻𖾐 𖼞𖽳𖾐 𖼊𖽻 𖼈𖽪𖾐 𖼊𖽑𖽡 𖼳𖽶 𖼍𖽺𖾑 𖼣𖽻𖾐，𖼄𖽳𖾑 𖼄𖽳 𖼊𖽻 𖼊𖽑𖽜𖾐 𖼷𖽙𖾐 𖼖𖽙𖾐 𖼺𖽶𖾑． 2 𖼽𖽻 𖼈𖽳𖾐 𖼮𖽑𖽶𖾑 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼽𖽡𖾐 𖼞𖽑𖽶𖾑 𖼮𖽶𖾐，𖼳𖽶𖾑 𖼐𖽕 𖼄𖽡𖾐 𖼊𖽺𖾐 𖼞𖽳𖾐 𖼊𖽺𖾐 𖼠𖽻𖾐 𖼄𖽙𖾐 𖼊𖽑𖽡 𖼊𖽝𖾐 𖼰𖽙𖾐 𖽂𖽙𖾐，𖽃𖽔𖾐 𖼺𖽺𖾑 𖼞𖽑𖽶𖾑 𖼠𖽻𖾐 𖼮𖽻𖾐．3 𖼽𖽻 𖼈𖽳𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖼖𖽻𖾐！ 𖽃𖽔 𖼐𖽺𖾑 𖼐𖽑𖽡𖾑 𖼰𖽡𖽺𖾐 𖼦𖽜𖾐，𖼐𖽑𖽡𖾑 𖼰𖽡𖽺𖾐 𖼮𖽑𖽡𖽪𖾐 𖼠𖽴𖾐！” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼐𖽑𖽡𖾑 𖼰𖽡𖽺𖾐 𖼈𖽺𖾐 𖼖𖽚𖾐 𖼄𖽙𖾐 𖼍𖽡𖾐 𖼻𖽜，𖼐𖽑𖽡𖾑 𖼐𖽑𖽡𖽻 𖼈𖽺𖾐 𖼐𖽑𖽡𖾑 𖼐𖽝𖾐 𖼂𖽺𖾐． 4 𖼽𖽻 𖼈𖽳𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖼖𖽻𖾐！ 𖽃𖽔 𖼐𖽺𖾑 𖼖𖽪𖾐 𖼊𖽑𖽡 𖼊𖽝𖾐 𖼊𖽴𖾐，𖼊𖽦𖾐 𖼀𖽑𖽸𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐，𖼊𖽦𖾐 𖼀𖽑𖽸𖾐 𖼷𖽻𖾐 𖼞𖽳𖾐 𖼈𖽪𖾑 𖼊𖽡𖾐 𖼞𖽜 𖼄𖽶 𖼠𖽻𖾐 𖼊𖽑𖽺 𖼊𖽦𖾐 𖼮𖽨𖾐．𖽃𖽔𖾐 𖼐𖽺𖾑 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼄𖽡𖾐 𖼊𖽻 𖼂𖽺𖾐 𖼖𖽡𖾐，𖼀𖽜𖾐 𖼀𖽺 𖼄𖽶 𖼊𖽑𖽡 𖼊𖽺𖾐 𖼽𖽡𖾐 𖼄𖽔 𖼻𖽻𖾐．”
5 𖼽𖽺𖾐 𖼦𖽴 𖼦𖽫 𖼹𖽺𖾐 𖼖𖽻𖾐，𖼷𖽑𖽻𖾐 𖼊𖽴𖾐 𖼍𖽙𖾑 𖼺𖽪𖾐 𖼖𖽪𖾐 𖼐𖽺𖾐 𖼊𖽦𖾐 𖼀𖽑𖽸𖾐 𖼷𖽻𖾐 𖼊𖽑𖽺 𖼐𖽦𖾐 𖼊𖽻𖾐． 6 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽦𖾐 𖼄𖽺！ 𖼽𖽻 𖼈𖽳𖾐 𖼊𖽑𖽡 𖼳𖽶 𖼀𖽑𖽙 𖼮𖽑𖽪𖾐 𖼍𖽺𖾑 𖼣𖽻𖾐，𖼊𖽑𖽡 𖼳𖽶 𖼊𖽻 𖼈𖽪𖾐 𖼍𖽺𖾑 𖼊𖽑𖽜𖾐，𖽂𖽙 𖼊𖽺𖾐 𖼮𖽑𖽻𖾐 𖼍𖽪𖾐 𖼹𖽦𖾐 𖼽𖽻 𖼈𖽳𖾐 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐，𖽃𖽔𖾑 𖼞𖽶𖾐 𖼽𖽻 𖼈𖽳𖾐 𖼞𖽑𖽙𖾐 𖼂𖽺𖾐 𖼊𖽻𖾐 𖼺𖽪𖾐 𖼄𖽡𖽻，𖼽𖽻 𖼈𖽳𖾐 𖼊𖽑𖽺 𖼀𖽨 𖼮𖽳 𖼊𖽪𖾐 𖼄𖽔 𖼮𖽻𖾐 𖼊𖽻𖾐． 7 𖼖𖽻𖾐！ 𖽃𖽔 𖼐𖽺𖾑 𖼹𖽺𖾐 𖼽𖽡𖾐，𖼽𖽻 𖼈𖽳𖾐 𖼊𖽻 𖼈𖽪𖾐 𖼊𖽑𖽺 𖼦𖽑𖽚 𖼀𖽑𖽧𖾐 𖼦𖽑𖽙𖾐，𖼽𖽻 𖼈𖽳𖾐 𖼞𖽜 𖼷𖽙𖾐 𖼖𖽙𖾐 𖼊𖽻 𖼈𖽪𖾐 𖼄𖽔 𖼺𖽝𖾑 𖼍𖽳𖾐．”
8 𖽃𖽔𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼞𖽜 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼀𖽜𖾐 𖼀𖽺 𖼄𖽶 𖼊𖽑𖽡 𖼊𖽺𖾐 𖼽𖽡𖾐 𖼦𖽑𖽻𖾐 𖼺𖽺𖾑，𖼽𖽻 𖼈𖽳𖾐 𖼖𖽪𖾐 𖼊𖽴𖾐 𖼐𖽙 𖼦𖽑𖽙𖾐． 9 𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼊𖽺𖾐 𖼊𖽑𖽺 𖼷𖽑𖽻𖾐 𖼞𖽳𖾐 𖼊𖽻 𖼈𖽪𖾐 𖼊𖽑𖽺 𖼦𖽑𖽚 𖼀𖽑𖽧𖾐 𖼦𖽑𖽙𖾐，𖼷𖽑𖽻𖾐 𖼊𖽑𖽺 𖼀𖽜𖾐 𖼀𖽺 𖼄𖽶 𖼊𖽑𖽡 𖼊𖽺𖾐 𖼽𖽡𖾐，𖽃𖽔𖾐 𖼺𖽺𖾑 𖼖𖽪𖾐 𖼞𖽑𖽶𖾑 𖼂𖽔𖾐 𖼂𖽡𖽦 \fr 11．9 \ft “𖼂𖽔𖾐 𖼂𖽡𖽦 ” 𖼦𖽑𖽺𖾑 “𖼦𖽑𖽚 𖼀𖽑𖽧𖾐 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡𖾐．
𖼳𖽔 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐
10 𖼈𖽝 𖼍𖽕𖾑 𖽂𖽚 𖼍𖽙𖾑 𖼺𖽪𖾐 𖼳𖽔 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼄𖽡𖾐 𖼣𖽻𖾐．𖼊𖽚𖾐 𖼈𖽡𖾐 𖼹𖽪𖾐 𖼐𖽦𖾐 𖼈𖽡𖾐 𖼽𖽚 𖼠𖽙𖾑 𖼍𖽻𖾐 𖼐𖽑𖽡 𖼞𖽑𖽚，𖼳𖽔 𖼊𖽑𖽡 𖼦𖽑𖽙𖾐 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼽𖽕𖾑 𖼇𖽕 𖼺𖽔 𖼊𖽑𖽺 𖼽𖽚𖾐． 11 𖼽𖽕𖾑 𖼇𖽕 𖼺𖽔 𖼊𖽑𖽺 𖼽𖽚𖾐 𖼠𖽙𖾑 𖼍𖽻𖾐，𖼳𖽔 𖼹𖽦𖾑 𖼣𖽙 𖼦𖽑𖽙𖾐 𖼞𖽑𖽚 𖼠𖽙𖾑，𖼦𖽑𖽔𖾐 𖼖𖽺𖾑 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑．
12 𖼽𖽕𖾑 𖼇𖽕 𖼺𖽔 𖼺𖽙𖾐 𖼷𖽑𖽡𖾐 𖼣𖽙 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼳𖽔𖾐 𖼖𖽔𖾐 𖼊𖽑𖽺 𖼽𖽚𖾐． 13 𖼳𖽔𖾐 𖼖𖽔𖾐 𖼊𖽑𖽺 𖼽𖽚𖾐 𖼠𖽙𖾑 𖼍𖽻𖾐，𖼽𖽕𖾑 𖼇𖽕 𖼺𖽔 𖼹𖽦𖾑 𖼖𖽡𖾐 𖼦𖽑𖽙𖾐 𖼐𖽺𖾐 𖼺𖽙𖾐 𖼞𖽑𖽚 𖼠𖽙𖾑，𖼦𖽑𖽔𖾐 𖼖𖽺𖾑 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑．
14 𖼳𖽔𖾐 𖼖𖽔𖾐 𖼺𖽙𖾐 𖼷𖽑𖽡𖾐 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼳𖽡𖾐 𖼂𖽚 𖼊𖽑𖽺 𖼽𖽚𖾐． 15 𖼳𖽡𖾐 𖼂𖽚 𖼊𖽑𖽺 𖼽𖽚𖾐 𖼠𖽙𖾑 𖼍𖽻𖾐，𖼳𖽔𖾐 𖼖𖽔𖾐 𖼹𖽦𖾑 𖼖𖽡𖾐 𖼦𖽑𖽙𖾐 𖼐𖽺𖾐 𖼺𖽙𖾐 𖼞𖽑𖽚 𖼠𖽙𖾑，𖼦𖽑𖽔𖾐 𖼖𖽺𖾑 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑．
16 𖼳𖽡𖾐 𖼂𖽚 𖼺𖽙𖾐 𖼷𖽑𖽡𖾐 𖼖𖽡𖾐 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼇𖽕 𖼖𖽴𖾑 𖼊𖽑𖽺 𖼽𖽚𖾐． 17 𖼇𖽕 𖼖𖽴𖾑 𖼊𖽑𖽺 𖼽𖽚𖾐 𖼠𖽙𖾑 𖼍𖽻𖾐，𖼳𖽡𖾐 𖼂𖽚 𖼹𖽦𖾑 𖼖𖽡𖾐 𖼦𖽑𖽙𖾐 𖼺𖽙𖾐 𖼷𖽑𖽡𖾐 𖼞𖽑𖽚 𖼠𖽙𖾑，𖼦𖽑𖽔𖾐 𖼖𖽺𖾑 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑．
18 𖼇𖽕 𖼖𖽴𖾑 𖼺𖽙𖾐 𖼷𖽑𖽡𖾐 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼖𖽔𖾐 𖼈𖽮 𖼊𖽑𖽺 𖼽𖽚𖾐． 19 𖼖𖽔𖾐 𖼈𖽮 𖼊𖽑𖽺 𖼽𖽚𖾐 𖼠𖽙𖾑 𖼍𖽻𖾐，𖼇𖽕 𖼖𖽴𖾑 𖼹𖽦𖾑 𖼐𖽑𖽡 𖼦𖽑𖽙𖾐 𖼐𖽺𖾐 𖼠𖽶𖾐 𖼞𖽑𖽚 𖼠𖽙𖾑 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑．
20 𖼖𖽔𖾐 𖼈𖽮 𖼺𖽙𖾐 𖼷𖽑𖽡𖾐 𖼐𖽑𖽡 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼳𖽡𖾐 𖼖𖽪𖾑 𖼊𖽑𖽺 𖼽𖽚𖾐．
21 𖼳𖽡𖾐 𖼖𖽪𖾑 𖼊𖽑𖽺 𖼽𖽚𖾐 𖼠𖽙𖾑 𖼍𖽻𖾐，𖼖𖽔𖾐 𖼈𖽮 𖼹𖽦𖾑 𖼐𖽑𖽡 𖼦𖽑𖽙𖾐 𖼐𖽺𖾐 𖼳𖽶 𖼞𖽑𖽚 𖼠𖽙𖾑，𖼦𖽑𖽔𖾐 𖼖𖽺𖾑 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑．
22 𖼳𖽡𖾐 𖼖𖽪𖾑 𖼺𖽙𖾐 𖼷𖽑𖽡𖾐 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼐𖽕 𖼦𖽴𖾑 𖼊𖽑𖽺 𖼽𖽚𖾐． 23 𖼐𖽕 𖼦𖽴𖾑 𖼊𖽑𖽺 𖼽𖽚𖾐 𖼠𖽙𖾑 𖼍𖽻𖾐，𖼳𖽡𖾐 𖼖𖽪𖾑 𖼹𖽦𖾑 𖼐𖽑𖽡 𖼦𖽑𖽙𖾐 𖼞𖽑𖽚 𖼠𖽙𖾑，𖼦𖽑𖽔𖾐 𖼖𖽺𖾑 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑．
24 𖼐𖽕 𖼦𖽴𖾑 𖼐𖽑𖽡 𖼷𖽑𖽡𖾐 𖼠𖽶𖾐 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼊𖽑𖽔𖾐 𖼖𖽔𖾐 𖼊𖽑𖽺 𖼽𖽚𖾐．
25 𖼊𖽑𖽔𖾐 𖼖𖽔𖾐 𖼊𖽑𖽺 𖼽𖽚𖾐 𖼠𖽙𖾑 𖼍𖽻𖾐，𖼐𖽕 𖼦𖽴𖾑 𖼹𖽦𖾑 𖼊𖽑𖽡 𖼦𖽑𖽙𖾐 𖼷𖽑𖽡𖾐 𖼠𖽶𖾐 𖼞𖽑𖽚 𖼠𖽙𖾑，𖼦𖽑𖽔𖾐 𖼖𖽺𖾑 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑．
26 𖼊𖽑𖽔𖾐 𖼖𖽔𖾐 𖼳𖽶 𖼷𖽑𖽡𖾐 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐 𖼮𖽑𖽡𖾐，𖼽𖽕𖾑 𖼂𖽚 𖼖𖽕、 𖼐𖽕 𖼦𖽴𖾑 𖼐𖽺𖾐 𖼦𖽔𖾐 𖼖𖽕 𖼊𖽑𖽺 𖼽𖽚𖾐 𖼦𖽑𖽙𖾐．
𖼊𖽑𖽔𖾐 𖼖𖽔𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐
27 𖼈𖽝 𖼍𖽕𖾑 𖽂𖽚 𖼍𖽙𖾑 𖼺𖽪𖾐 𖼊𖽑𖽔𖾐 𖼖𖽔𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼄𖽡𖾐 𖼣𖽻𖾐．𖼊𖽑𖽔𖾐 𖼖𖽔𖾐 𖼻𖽙 𖼽𖽕𖾑 𖼂𖽚 𖼖𖽕、 𖼐𖽕 𖼦𖽴𖾑 𖼐𖽺𖾐 𖼦𖽔𖾐 𖼖𖽕 𖼣𖽻𖾐．𖼦𖽔𖾐 𖼖𖽕 𖼞𖽳𖾐 𖼻𖽙 𖼖𖽚 𖼍𖽴 𖼣𖽻𖾐． 28 𖼦𖽔𖾐 𖼖𖽕 𖼽𖽻 𖼀𖽙 𖼮𖽻𖾐 𖼍𖽳𖾐 𖼺𖽺 𖼞𖽑𖽶𖾑 𖼮𖽶𖾐，𖼽𖽻 𖼽𖽚𖾐 𖼈𖽳 𖼞𖽳𖾐 𖼰𖽡𖽔𖾐 𖼖𖽴𖾑 𖼍𖽡 𖼄𖽡𖾐 𖼊𖽺𖾐 𖼈𖽮 𖽃𖽳 𖼖𖽪𖾐 𖼮𖽻𖾐 𖼳𖽶𖾐 𖼦𖽑𖽙𖾐． 29 𖼽𖽕𖾑 𖼂𖽚 𖼖𖽕 𖼐𖽺𖾐 𖼐𖽕 𖼦𖽴𖾑 𖼖𖽺𖾑 𖼄𖽳 𖼻𖽙 𖼹𖽶𖾐 𖼦𖽑𖽙𖾐．𖼽𖽕𖾑 𖼂𖽚 𖼖𖽕 𖼄𖽳 𖼻𖽙 𖼺𖽔 𖼖𖽦 𖼄𖽡𖾐．𖼐𖽕 𖼦𖽴𖾑 𖼄𖽳 𖼻𖽙 𖼞𖽑𖽶𖾑 𖼦𖽔𖾐 𖼖𖽕 𖼞𖽳𖾐 𖼻𖽙 𖼄𖽳 𖼣𖽻𖾐，𖼄𖽧𖾑 𖼰𖽡𖽔𖾐 𖼄𖽡𖾐．𖼦𖽔𖾐 𖼖𖽕 𖼦𖽑𖽺𖾑 𖼄𖽧𖾑 𖼰𖽡𖽔𖾐 𖼐𖽺𖾐 𖼽𖽡𖾑 𖼰𖽡𖽔𖾐 𖼞𖽳𖾐 𖽃𖽔 𖼀𖽙 𖼣𖽻𖾐． 30 𖼺𖽔 𖼖𖽦 𖼄𖽺 𖼊𖽦𖾐 𖼄𖽔 𖼠𖽸𖾑，𖼻𖽙 𖼄𖽡𖾐 𖼐𖽜𖾐 𖼄𖽔 𖼮𖽻𖾐．
31 𖼊𖽑𖽔𖾐 𖼖𖽔𖾐 𖼽𖽻 𖼻𖽙 𖼽𖽕𖾑 𖼂𖽚 𖼖𖽕 𖼐𖽺𖾐 𖼽𖽻 𖼖𖽡𖾑 𖼂𖽙𖾑 𖼖𖽚 𖼍𖽴 𖼊𖽑𖽺 𖼦𖽳，𖼹𖽦𖾑 𖼽𖽕𖾑 𖼂𖽚 𖼖𖽕 𖼞𖽳𖾐 𖼄𖽳 𖼻𖽙 𖼺𖽔 𖼖𖽦 𖼊𖽑𖽺 𖼦𖽳 𖼮𖽑𖽻𖾐，𖼊𖽑𖽡 𖼊𖽑𖽜 𖼰𖽡𖽔𖾐 𖼖𖽴𖾑 𖼍𖽡 𖼄𖽡𖾐 𖼊𖽺𖾐 𖼈𖽮 𖽃𖽳 𖼖𖽪𖾐 𖼞𖽳𖾐 𖼮𖽑𖽻𖾐 𖼊𖽚𖾐 𖼽𖽡𖾐，𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼽𖽡𖾐 𖼊𖽻𖾐．𖼽𖽻 𖼈𖽳𖾐 𖼦𖽔𖾐 𖼖𖽕 𖼄𖽡𖾐 𖼊𖽺𖾐 𖼮𖽑𖽡𖾐 𖼺𖽺𖾑 𖼞𖽑𖽶𖾑 𖼠𖽻𖾐 𖼮𖽻𖾐．𖼖𖽚 𖼍𖽴 𖼦𖽑𖽺𖾑 𖼦𖽔𖾐 𖼖𖽕 𖼞𖽳𖾐 𖼻𖽙 𖼣𖽻𖾐． 32 𖼊𖽑𖽔𖾐 𖼖𖽔𖾐 𖼐𖽑𖽡 𖼦𖽑𖽙𖾐 𖼐𖽺𖾐 𖼣𖽙 𖼞𖽑𖽚 𖼖𖽚 𖼞𖽑𖽶𖾑 𖼮𖽶𖾐，𖼽𖽻 𖼦𖽔𖾐 𖼖𖽕 𖼄𖽡𖾐 𖼊𖽺𖾐 𖼞𖽳𖾐 𖼮𖽻𖾐 𖼳𖽶𖾐 𖼦𖽑𖽙𖾐．