𖼷𖽑𖽻𖾐 𖼞𖽳𖾐 𖼊𖽶𖾐 𖼮𖽑𖽪
6
1 𖼷𖽑𖽻𖾐 𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖼀𖽑𖽙 𖼄𖽨 𖼍𖽪𖾐 𖼖𖽻𖾐，𖼦𖽑𖽔𖾐 𖼖𖽺𖾑 𖼻𖽙 𖼄𖽳 𖼦𖽑𖽨𖾐 𖼞𖽑𖽶𖾑 𖼮𖽶𖾐， 2 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼻𖽙 𖼣𖽻𖾐 𖼀𖽦𖾐 𖼺𖽪𖾐 𖼊𖽑𖽡 𖼹𖽻𖾐，𖼽𖽻 𖼈𖽳𖾐 𖼷𖽑𖽻𖾐 𖼞𖽳𖾐 𖼻𖽙 𖼄𖽳 𖼐𖽑𖽧𖾐 𖼐𖽜𖾑 𖼊𖽑𖽺 𖼐𖽦𖾐 𖼄𖽡𖽻𖾐．𖽃𖽔𖾐 𖼺𖽺𖾑，𖼽𖽻 𖼄𖽳𖾑 𖼐𖽑𖽧𖾐 𖼺𖽳 𖼖𖽙𖾐 𖼮𖽑𖽻𖾐 𖼺𖽺𖾐，𖼹𖽶𖾐 𖼂𖽻𖾐 𖼖𖽻𖾐 𖼄𖽳 𖼻𖽙 𖼰𖽕𖾐． 3 𖼽𖽺𖾐 𖼦𖽴 𖼦𖽫 𖼀𖽦𖾐：“𖼷𖽑𖽻𖾐 𖼦𖽙 𖼮𖽑𖽪𖾐 𖼣𖽻𖾐 𖼺𖽺𖾑，𖼣𖽙𖾐 𖼽𖽻 𖼈𖽳𖾐 𖼞𖽜 𖼻𖽳𖾐 𖼻𖽳𖾐 𖼠𖽙𖾑 𖼍𖽳𖾐 𖼄𖽔 𖼠𖽸𖾑 𖼊𖽻𖾐，𖽃𖽔𖾑 𖼞𖽶𖾐 𖼽𖽻 𖼈𖽳𖾐 𖼞𖽳𖾐 𖼈𖽪𖾑 𖼠𖽻𖾐 𖼊𖽑𖽡 𖼦𖽑𖽙𖾐 𖼐𖽑𖽡 𖼷𖽑𖽡𖾐 𖼞𖽑𖽚 𖼊𖽑𖽺 𖼄𖽔 𖼠𖽳𖾐 𖼊𖽻𖾐．”4 𖼞𖽑𖽶𖾑 𖼊𖽑𖽙𖾐 𖼻𖽳𖾐 𖼐𖽺𖾐 𖼞𖽑𖽶𖾑 𖼠𖽙𖾑 𖼍𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦，𖼞𖽶𖾐 𖼂𖽚𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼦𖽶𖾑 𖼄𖽔 𖼷𖽑𖽶𖾐 𖼈𖽳 𖼺𖽪𖾐 𖼷𖽑𖽻𖾐 𖼊𖽺𖾐 𖼊𖽑𖽺 𖼊𖽑𖽺 𖼮𖽻𖾐．𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼻𖽙 𖼊𖽑𖽡 𖼹𖽻𖾐 𖼐𖽺𖾐 𖼷𖽑𖽻𖾐 𖼞𖽳𖾐 𖼻𖽙 𖼄𖽳 𖼷𖽙𖾐 𖼖𖽙𖾐 𖼮𖽑𖽻𖾐 𖼻𖽙 𖼦𖽑𖽨𖾐 𖼺𖽺𖾑，𖽃𖽔 𖼈𖽶 𖼊𖽑𖽙 𖼹𖽦𖾐 𖼄𖽡𖾐 𖼊𖽻 𖼊𖽚𖾐 𖼺𖽪𖾐 𖼷𖽑𖽻𖾐 𖼦𖽜 𖼊𖽑𖽺 𖼽𖽚𖾐．
5 𖼽𖽺𖾐 𖼦𖽴 𖼦𖽫 𖼐𖽦𖾐 𖼄𖽡𖽻𖾐，𖼷𖽑𖽻𖾐 𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖼽𖽺𖾐 𖼮𖽑𖽡𖽪𖾑 𖼊𖽶𖾐 𖼮𖽑𖽪 𖼈𖽳 𖼰𖽡，𖼄𖽶 𖼐𖽑𖽡𖾐 𖼄𖽶 𖼦𖽑𖽦 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼞𖽑𖽙𖾐 𖼣𖽝 𖼺𖽪𖾐，𖼄𖽳𖾑 𖼄𖽳 𖼖𖽺𖾑 𖼊𖽶𖾐 𖼮𖽑𖽪 𖼍𖽺𖾑 𖼣𖽻𖾐． 6 𖽃𖽔𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼹𖽸𖾑 𖼄𖽡𖾑 𖼐𖽦𖾐 𖼊𖽑𖽺 𖼍𖽙𖾑 𖼖𖽙𖾐 𖼀𖽙𖾐 𖼐𖽑𖽧𖾐 𖽃𖽝𖾐 𖼠𖽚 𖼳𖽚𖾑． 7 𖼽𖽺𖾐 𖼦𖽴 𖼦𖽫 𖼀𖽦𖾐：“𖼣𖽙𖾐 𖼞𖽑𖽙𖾐 𖼹𖽸𖾑 𖼺𖽪𖾐 𖼷𖽑𖽻𖾐，𖼐𖽑𖽡𖾑 𖼻𖽙 𖼣𖽕𖾐 𖼐𖽜𖾐 𖼐𖽺𖾐 𖼀𖽶 𖼊𖽡𖾐 𖼀𖽶 𖼄𖽳，𖼣𖽙𖾐 𖼽𖽻 𖼈𖽳𖾐 𖼞𖽜 𖼄𖽡𖾑 𖼐𖽦𖾐 𖼊𖽑𖽺 𖼮𖽑𖽻𖾐 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐．𖼞𖽪𖾐 𖼮𖽡𖽺𖾐，𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼹𖽸𖾑 𖼺𖽺𖾑 𖼄𖽡𖾑 𖼐𖽦𖾐 𖼊𖽑𖽺 𖼮𖽻𖾐 𖼖𖽙𖾐 𖼀𖽙𖾐 𖼐𖽑𖽧𖾐 𖽃𖽝𖾐 𖼠𖽚 𖼳𖽚𖾑．”
𖼐𖽚 𖼽𖽕𖾑 𖼖𖽡𖾑 𖼞𖽑𖽪 𖼹𖽸𖾑 𖼞𖽪𖾐 𖼮𖽡𖽺𖾐
8 𖼞𖽑𖽶𖾑 𖼮𖽶𖾐，𖼐𖽚 𖼽𖽕𖾑 𖼍𖽺𖾑 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐．
9 𖼈𖽝 𖼍𖽕𖾑 𖽂𖽚 𖼍𖽙𖾑 𖼺𖽪𖾐 𖼐𖽚 𖼽𖽕𖾑 𖼊𖽑𖽡 𖼈𖽴 𖼷𖽑𖽻𖾐 𖼞𖽳𖾐 𖼞𖽪𖾐 𖼮𖽡𖽺𖾐 𖼣𖽻𖾐．𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺，𖼐𖽚 𖼽𖽕𖾑 𖼦𖽑𖽺𖾑 𖼷𖽑𖽻𖾐 𖼹𖽳𖾐 𖼊𖽑𖽡 𖼽𖽚𖾐 𖼣𖽻𖾐，𖼽𖽻 𖼞𖽑𖽶𖾑 𖼊𖽑𖽙𖾐 𖼻𖽳𖾐 𖼞𖽳𖾐 𖼀𖽦𖾐 𖼊𖽪𖾐 𖼄𖽔 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼣𖽻𖾐．𖼐𖽚 𖼽𖽕𖾑 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽻 𖼮𖽶𖾐 𖼮𖽻𖾑 𖼊𖽴． 10 𖼽𖽻 𖼻𖽙 𖼺𖽙𖾐 𖼽𖽚𖾐 𖼮𖽻𖾐，𖼞𖽑𖽶𖾑 𖼳𖽔、 𖼦𖽕 𖼐𖽺𖾐 𖼽𖽔 𖼇𖽮 𖼣𖽻𖾐．
11 𖼞𖽑𖽶𖾑 𖼮𖽶𖾐，𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺，𖼊𖽺𖾐 𖼊𖽑𖽺 𖼷𖽑𖽻𖾐 𖼊𖽶𖾐 𖼮𖽑𖽪 𖼦𖽑𖽻𖾐，𖼄𖽡𖾑 𖼐𖽦𖾐 𖼊𖽑𖽺 𖼮𖽑𖽡𖾐 𖼻𖽸 𖼀𖽡𖾐 𖼖𖽚𖾐 𖼦𖽑𖽻𖾐． 12 𖽂𖽙 𖼺𖽙𖾐 𖼂𖽙𖾐 𖼄𖽡𖾑 𖼐𖽦𖾐 𖼊𖽑𖽺 𖼣𖽜 𖼐𖽦𖾐，𖼊𖽺𖾐 𖼊𖽑𖽺 𖼷𖽑𖽻𖾐 𖼊𖽶𖾐 𖼮𖽑𖽪 𖼦𖽑𖽻𖾐 𖼞𖽳𖾐 𖼐𖽦𖾐 𖼄𖽡𖽻𖾐．𖼷𖽑𖽻𖾐 𖼄𖽳𖾑 𖼄𖽳 𖼄𖽡𖾑 𖼐𖽦𖾐 𖼊𖽑𖽺 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽶𖾐 𖼮𖽑𖽪 𖼦𖽑𖽻𖾐． 13 𖽂𖽙 𖼺𖽙𖾐 𖼂𖽙𖾐 𖼐𖽚 𖼽𖽕𖾑 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！ 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼷𖽑𖽻𖾐 𖼞𖽳𖾐 𖼮𖽑𖽡𖾐 𖼻𖽸 𖼊𖽶𖾐 𖼄𖽡𖽻 𖼄𖽡𖾑 𖼐𖽦𖾐 𖼊𖽑𖽺 𖼀𖽡𖾐 𖼖𖽚𖾐 𖼦𖽑𖽻𖾐，𖼽𖽻 𖼈𖽳𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼞𖽳𖾐 𖼦𖽑𖽻𖾐，𖼣𖽙𖾐 𖼽𖽻 𖼈𖽳𖾐 𖼞𖽜 𖼺𖽺𖾑 𖼊𖽺𖾐 𖼊𖽑𖽺 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼄𖽳 𖼮𖽡𖽦 𖼊𖽻𖾐．
14 𖼐𖽑𖽡𖾐 𖼣𖽜𖾐 𖼺𖽧𖾐 𖼈𖽺𖾐 𖼺𖽺𖾑 𖼖𖽡𖾑 𖼞𖽑𖽪 𖼊𖽑𖽡 𖼷𖽸 𖼹𖽸𖾑 𖼖𖽡𖾐．𖼖𖽡𖾑 𖼞𖽑𖽪 𖼞𖽑𖽶𖾐 𖼮𖽻𖾐 𖼊𖽑𖽡 𖼠𖽴 𖼊𖽑𖽡 𖼠𖽴 𖼐𖽺𖾐 𖼀𖽜𖾐 𖼀𖽑𖽪𖾐 𖼹𖽸𖾑，𖼞𖽑𖽶𖾐 𖼮𖽻𖾐 𖼐𖽑𖽡𖾑 𖼮𖽻𖾐 𖼖𖽺𖾑 𖼊𖽑𖽻 𖼷𖽑𖽳𖾐 𖼻𖽜 𖼰𖽡𖾑 𖼮𖽨𖾐 𖼖𖽡𖾐． 15 𖼐𖽑𖽡𖾐 𖼖𖽡𖾑 𖼞𖽑𖽪 𖼦𖽑𖽺𖾑 𖼖𖽙𖾐 𖼺𖽶𖾑 𖼹𖽸𖾑 𖼖𖽡𖾐：𖼖𖽡𖾑 𖼞𖽑𖽪 𖼳𖽶𖾐 𖼞𖽳𖾐 𖼦𖽑𖽦 𖼷𖽑𖽡𖾐 𖼖𖽜𖾐，𖼞𖽑𖽫𖾐 𖼞𖽳𖾐 𖼷𖽑𖽡𖾐 𖼺𖽙𖾐 𖼖𖽜𖾐，𖼄𖽶𖾐 𖼞𖽳𖾐 𖼦𖽑𖽦 𖼖𖽜𖾐 𖼮𖽻𖾐 𖼖𖽡𖾐． 16 𖼖𖽡𖾑 𖼞𖽑𖽪 𖼞𖽕 𖼂𖽻𖾑 𖼞𖽳𖾐 𖼀𖽜𖾐 𖼖𖽜𖾐 𖼳𖽡𖽪𖾐 𖼀𖽑𖽨，𖼄𖽶𖾐 𖼞𖽳𖾐 𖼺𖽙𖾐 𖼊𖽑𖽙 𖼮𖽻𖾐 𖼖𖽡𖾐，𖼖𖽡𖾑 𖼞𖽑𖽪 𖼀𖽙 𖼖𖽙𖾐 𖼀𖽳 𖽃𖽔𖾑 𖼊𖽪 𖼍𖽴𖾑 𖼖𖽡𖾑，𖼖𖽡𖾑 𖼞𖽑𖽪 𖼞𖽕 𖼂𖽻𖾑、 𖼠𖽻𖾐 𖼊𖽑𖽺 𖼐𖽺𖾐 𖼊𖽑𖽻𖾐 𖼞𖽑𖽶𖾐 𖼺𖽙𖾐 𖼍𖽴𖾐 𖼀𖽜𖾐 𖼹𖽸𖾑 𖼖𖽡𖾐．
17 𖼐𖽦𖾐 𖼄𖽺！ 𖼣𖽙𖾐 𖼊𖽚𖾐 𖼈𖽡𖾐 𖼹𖽪𖾐 𖼐𖽦𖾐 𖼈𖽡𖾐 𖼽𖽚 𖼀𖽑𖽨 𖼄𖽡𖾑 𖼐𖽦𖾐 𖼊𖽑𖽺 𖼣𖽡𖽳𖾑 𖼀𖽑𖽧𖾐，𖼄𖽶 𖼊𖽑𖽡 𖽂𖽚 𖼞𖽑𖽶𖾐 𖼠𖽙𖾑 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐 𖼞𖽜 𖼄𖽳 𖼮𖽡𖽦，𖼄𖽡𖾑 𖼐𖽦𖾐 𖼊𖽑𖽺 𖼞𖽑𖽙𖾐 𖼮𖽻𖾐 𖼺𖽪𖾐 𖼞𖽜 𖼄𖽳𖾑 𖼄𖽳 𖼳𖽶𖾐 𖼮𖽡𖽦 𖼦𖽑𖽙𖾐 𖼊𖽻𖾐． 18 𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼄𖽳 𖼻𖽙、 𖼐𖽑𖽡𖾐 𖼻𖽙 𖼐𖽺𖾐 𖼮𖽑𖽡 𖼄𖽙𖾐 𖼖𖽺𖾑 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼖𖽡𖾑 𖼞𖽑𖽪 𖼞𖽑𖽶𖾐 𖼊𖽡 𖼽𖽡𖾐 𖼖𖽡𖾐．
19 𖼠𖽙𖾑 𖼺𖽦 𖼞𖽑𖽙𖾐 𖼮𖽻𖾐 𖼺𖽪𖾐，𖼐𖽑𖽡𖾐 𖼊𖽑𖽡 𖼳𖽶 𖼊𖽑𖽡 𖼷𖽜𖾐，𖼽𖽻 𖼀𖽑𖽶𖾐 𖼮𖽻𖾐、 𖼽𖽻 𖼄𖽙𖾐 𖼮𖽻𖾐 𖼐𖽺𖾐 𖼦𖽳 𖼖𖽡𖾑 𖼞𖽑𖽪 𖼞𖽑𖽶𖾐 𖼊𖽡 𖼽𖽡𖾐 𖼖𖽡𖾐，𖽃𖽔𖾐 𖼺𖽺𖾑 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼈𖽪𖾑 𖼠𖽻𖾐 𖽂𖽙𖾐 𖼰𖽨𖾑 𖼊𖽙𖾐． 20 𖼞𖽑𖽙𖾐 𖼣𖽻𖾐 𖼳𖽶 𖼣𖽕𖾐，𖼞𖽑𖽙𖾐 𖼣𖽻𖾐 𖼳𖽶 𖼮𖽡𖽺，𖼞𖽑𖽙𖾐 𖼣𖽻𖾐 𖼳𖽶 𖼄𖽝𖾐 𖼺𖽜 𖼺𖽪𖾐 𖼀𖽶 𖼊𖽡𖾐，𖼊𖽑𖽡 𖼳𖽶 𖼊𖽑𖽡 𖼷𖽜𖾐，𖼄𖽳𖾑 𖼄𖽳 𖼐𖽑𖽡𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼖𖽻𖾐 𖼊𖽻𖾐，𖽃𖽔𖾐 𖼺𖽺𖾑 𖼈𖽪𖾑 𖼠𖽻𖾐 𖽂𖽙𖾐 𖼰𖽨𖾑 𖼊𖽙𖾐． 21 𖼐𖽑𖽡𖾐 𖼞𖽑𖽙𖾐 𖼣𖽻𖾐 𖼳𖽶 𖼷𖽙 𖼊𖽪𖾐 𖼂𖽺𖾐 𖼳𖽡𖽻𖾐 𖼍𖽙𖾑 𖼺𖽺𖾑，𖼐𖽑𖽡𖾐 𖼐𖽺𖾐 𖼽𖽻 𖼈𖽳𖾐 𖼞𖽜 𖽂𖽙𖾐 𖼷𖽙 𖼊𖽙𖾐．”
22 𖽃𖽔𖾐 𖼺𖽺𖾑，𖼐𖽚 𖼽𖽕𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐．𖽂𖽙 𖼺𖽙𖾐 𖼂𖽙𖾐 𖽃𖽔 𖼊𖽺𖾐 𖼀𖽦𖾐 𖼄𖽪𖾑，𖼽𖽻 𖽃𖽔 𖼊𖽺𖾐 𖼂𖽺𖾐 𖼦𖽑𖽻𖾐．